Ala Ulubuuto Lusuma Nga Nshi!

BUSHE mwalyendapo mu mfifi iya kuti mulefifitila fye pa kwenda? Nga e fyo, ninshi namwishiba ifyo cumfwika ukwenda mu mfifi. Bushe mwaumfwile shani ilyo ulubuuto lwasanike? Ukwabula no kutwishika mwayumfwile bwino. Nalimo kwalibako ifyamucitikila ifyalengele muyumfwe kwati mwali mu mfifi. Limbi ici cacitike ilyo mwafililwe ukupwisha ubwafya. Ilyo bwafya bwailebulepwa , cali kwati mwatendeka ukumona ulubuuto. Mwandini cilomfwika bwino nga mwapwisha ubwafya, ciba kwati mwaciba mu mfifi e lyo mwasanga ulubuuto!

Mu mwanda wa myaka uwa kubalilapo, abantu abengi tabaishibe Lesa cali kwati baali mu mfifi. Ilyo umutumwa Petro alembele kalata ku balekele ifyo basuminemo kale no kusanguka Abena Kristu, atile: ‘[Lesa] amwitile ukuti mufume mu mfifi mwingile mu lubuuto lwakwe ulwapesha amano.’ (1 Petro 2:9) Kuli bena, cali kwati bafuma umwafita nga nshi e lyo baingila umuli lubuuto sana. Ici kuti twacipashanya ku fyo ciba umuntu nga takwata ba lupwa kabili takwata na kwa kulola e lyo bamusenda ku lupwa ulwikala bwino.—Abena Efese 2:1, 12.

“Nuleka Ukutemwa Uko Wakwete Pa Kubala”

Abena Kristu ba kubalilapo balisambilile “icine,” e kutila ifyo Abena Kristu ba cine basuminemo. (Yohane 18:37) Ilyo baishibe icine cali kwati bamona ulubuuto ulusuma kabili balyalwike, bafumine mu mfifi no kwisa mu lubuuto. Nangu cibe fyo, ilyo papitile inshita Abena Kristu bamo abali abacincila balinenwike. Ica kumwenako fye, ku mpela ya mwanda wa myaka uwa kubalilapo, mu cilonganino ca mu Efese mwali ubwafya ubukalamba. Yesu Kristu uwali nabuushiwa pali ilya nshita alibebele ubwafya bakwete, atile: “Ndi ne ci ica kukushinina, ukuti nuleka ukutemwa uko wakwete pa kubala. E ico ibukisha ku fyo wawiile, kabili lapila no kucita imilimo ya ntanshi.” (Ukusokolola 2:4, 5) Abena Kristu ba mu Efese balingile ukubukulula ukutemwa Lesa ne cine nge fyo bali pa kubala.

Nga pali ino nshita? Na ifwe bene twaliba ne nsansa pa kwishiba icine ica mu Baibolo pantu caba kwati twalimona ulubuuto ulusuma. Twalitemwa icine, lelo amafya ayaseeka muli cino calo kuti yalenga uku kutemwa ukufubalila. Fimbi ifingalenga uku kutemwa ukufubalila mafya aya muli shino “nshiku sha kulekelesha.” Twikala mu ‘nshita shayafya,’ mu calo umwaba abantu “abaitemwa, abatemwe ndalama, aba mataki, aba matutumuko, aba miponto, abashumfwila abafyashi babo, abashitasha, abashaba na bucishinka.” (2 Timote 3:1, 2) Imibele yabo iyabipa kuti yalenga twanenuka kabili ukutemwa Yehova kuti kwafubalila.

Nga ukutemwa twakwete pa kubala kwalifubalila, tulingile ‘ukwibukisha ifyo twawile no kulapila.’ Tufwile na kabili ukukosha bucibusa bwesu na Lesa. E lyo, tulingile no ukucenjela sana pa kuti tatulekele ukutemwa twakwete pa kubala ukufubalila. Kanshi nacicindama ukuti ifwe bonse tube ne subilo ne nsansa no kutwalilila kutemwa Lesa ne cine caba mu Baibolo!

‘Icine Icitulenga Abantungwa’

Icine ca mu Baibolo caba kwati lubuuto pantu cilatulenga ukwishiba amasuko ku mepusho ayo abantu bafilwa ukwishiba pa myaka iingi. Pali ayo mepusho paba na aya: Mulandu nshi twabelako? Mulandu nshi Lesa atupangile? Mulandu nshi ifyabipa ficitikila? Bushe kwaliba icipusuka umuntu nga afwa? Yehova alitusambilisha icine icaba mu Baibolo. Bushe tatulingile ukumutasha pa fyo atusambilisha? Kanshi, natulebika amano ku kucita ifyo twasambilila!

Yesu aebele abasambi bakwe ukuti: “Mukeshibe cine, ne cine cikamulenga abantungwa.” (Yohane 8:32) Ilambo lya kwa Yesu lyalenga twalubuka ku lubembu ne mfwa. E lyo icine na co calilenga twaishiba ifingi ifyo abantu ba muli cino calo caba mu mfifi bashaishiba. Ukulatontonkanya sana pa fyo twasambilila ku kalenga tukatemwe sana Yehova ne Cebo cakwe.

Umutumwa Paulo alembele Abena Kristu ba ku Tesalonika ukuti: “Ilyo mwapokelele icebo ca kwa Lesa, ico mwaumfwile kuli ifwe, tamwacipokelele nge cebo ca bantu, lelo, ifyo caba icine cine, icebo ca kwa Lesa, icilebombela na muli imwe mwe basumina.” (1 Abena Tesalonika 2:13) Abena Tesalonika balyumfwile no ‘kupokelele icebo [ca kwa Lesa] no kusekelela.’ Balifumine mu “mfifi,” kabili baishileba “abana ba lubuuto.” (1 Abena Tesalonika 1:4-7; 5:4, 5) Basambilile ukuti Yehova e Kabumba no kuti wa maka yonse, wa mano, kabili aba no kutemwa, no luse. Nge fyo cali na ku basambi ba kwa Kristu bambi, nabo balisambilile ukuti Yehova aliteyanya ilambo lya cilubula ilyo Umwana wakwe Yesu Kristu apeele ukuti imembu shabo shifuutwe.—Imilimo 3:19-21.

Nangu abena Tesalonika tabaishibe sana icine ca mu Baibolo, balishibe ifyo bali no kucita pa kuti beshibilepo na fimbi. Amalembo yapuutwamo kuti yalenga umuntu wa kwa Lesa ukuba “uwafikapo bwino bwino, uwaipangasha umupwilapo ku kubomba umulimo onse uusuma.” (2 Timote 3:16, 17) Abena Kristu ba mu Tesalonika balitwalilile ukusambilila, kabili libili libili balemona ukuti icine ca mu Baibolo caba kwati lubuuto ulusuma nga nshi. E mulandu wine balesekelela inshita yonse. (1 Tesalonika 5:16) Kanshi na ifwe tulingile ukulasekelela.

Lubuuto ku Nshila Yesu

Mu lwimbo lwakwe, kemba wa malumbo alilandile umulandu ulubuuto lwawamina, atile: “Icebo cenu ni nyali ku makasa yandi, kabili lubuuto ku nshila yandi.” (Amalumbo 119:105) Ubutungulushi bwa kwa Lesa ubwaba mu Cebo cakwe bulatwafwa ukupingulapo bwino, ukusengauka amafya, kabili tulaba ne nsansa nga nshi. Tatulingile ukuba ngo bwato ubulesensenunwa fye. Nga twaishiba icine no kulacita ifyo tulesambilila, tatwakabe ngo bwato ‘ubulesensenunwa ku mabimbi no kuulwilwa uku no ku, ku mwela onse uwe sambilisho.’—Abena Efese 4:14.

Baibolo itila: “Mwitetekela bakankaala, nangu mwana wa muntu uo takuli ukupususha muli wene.” Isosa no kuti: “Alishuka uo Lesa wa kwa Yakobo e kwafwa kwakwe, uo icilolelo cakwe cili kuli Yehova Lesa wakwe.” (Amalumbo 146:3, 5) Na kabili ukucetekela Yehova kulatwafwa ukupwisha umwenso na masakamika. Umutumwa Paulo alembele ukuti: “Mwisakamikwa nangu kamo, lelo muli fyonse lekeni ifya kulomba fyenu fiishibikwe kuli Lesa mu kupepa no kupaapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.” (Abena Filipi 4:6, 7) Ukutungululwa no lubuuto ulwa Cebo ca kwa Lesa kulatunonsha icine cine.

Mulebalika nge Fyengelo Muno Calo

Cimbi icalenga ulubuuto lwa Cebo ca kwa Lesa ukuwama nga nshi ca kuti lulapeela abantu ishuko lya kubombako umulimo uwacindamisha. Yesu aebele abasambi bakwe ukuti: “Kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo, mulebasambilisha ukubaka fyonse ifyo namwebele. Kabili, moneni! nakulaba na imwe inshiku shonse ukufika na ku mpela ya bwikashi.” Ilyo talabeba ukucite fi atalile asosa ukuti: “Amaka yonse nayapeelwa kuli ine mu muulu na pano isonde.”—Mateo 28:18-20.

Tontonkanyeni na pa batungilila no kwafwa Abena Kristu ba cine ukubomba uyu mulimo wa kushimikila imbila nsuma no kusambilisha abantu ba mu nko shonse icine ca mu Baibolo. Yesu alaile abasambi bakwe ukuti akulaba nabo. Ukwabula no kutwishika alabafwa no kubatungilila ilyo balelenga ‘ulubuuto lwabo ukubalika’ mu mulimo wabo uwa kushimikila na mu ‘milimo imbi iisuma.’ (Mateo 5:14-16) Bamalaika nabo balabombako umulimo wa kushimikila. (Ukusokolola 14:6) Nga Yehova, bushe na o alatutungilila? Umutumwa Paulo alembele ukuti: “Ine nalilimbile, Apolo alitapilile, lelo Lesa e walemesha.” Ala mwandini lishuko ukuba pali “bakabomba banankwe aba kwa Lesa”!—1 Abena Korinti 3:6, 9.

Tontonkanyeni na pa fisuma ififumamo ilyo tulebombesha muli uyu mulimo Lesa atupeela. Takwaba ico twingalinganya kwi shuko Lesa atupeela ilya ‘kubalika nge fyengelo muno calo.’ Nga tulebalika ulubuuto lwa Cebo ca kwa Lesa mu milandile na mu fyo tucita, tulaafwa abantu abafumacumi ukwishiba icine ca mu Baibolo. (Abena Filipi 2:15) Na kabili nga tuli abacincila ilyo tuleshimikila no kusambilisha, tulasekelela ‘pantu Lesa tali uushalungama uwa kuti alabe umulimo wesu no kutemwa uko tulanga kwi shina lyakwe.’—AbaHebere 6:10.

‘Shiteni Umuti wa Kusuba mu Menso Yenu’

Mu bukombe Yesu asosele ku cilonganino ca ku Laodikea, atile: “Ushite kuli ine . . . umuti wa kusuba mu menso yobe ukuti umone. Bonse abo natemwa ndabebaula no kubasalapula.” (Ukusokolola 3:18, 19) “Umuti wa kusuba mu menso,” e kuti amasambilisho no kusalapula kwa kwa Yesu e wingaposha ubupofu bwa ku mupashi. Nga ca kuti tulefwaya ukutwalilila ukuba ne subilo, tufwile ukumfwila ukufunda kwakwe no kunakila ubutungulushi bwakwe ubwaba mu Baibolo. Tulingile no kulapashanya umutima wa kwa Kristu na fyonse ifyo alecita. (Abena Filipi 2:5; 1 Petro 2:21) Lelo, umuti wa kusuba mu menso te wa pa fye. Yesu atile: ‘Shiteni kuli ine.’ Pa kushita uyu muti, tufwile ukubomfya inshita yesu na maka.

Nga twafuma mu mfifi e lyo twaya mu lubuuto, palakokolako pa kuti amenso yabelele ukulamona bwino. Na lintu tulesambilila Icebo ca kwa Lesa, palakokolako pa kuti tumfwikishe icine icaba kwati ulubuuto lwa Cebo ca kwa Lesa. Cilakabila inshita pa kuti tuleetetula pa fyo tulesambilila na pa kuti twishibe ifyo icine cacindama. Kabili, kuti twakwanisha ukucite ifi fyonse. Mulandu nshi twasosela ifyo? Pantu ulubuuto lusuma nga nshi!

[Icikope pe bula 14]

“Ushite kuli ine . . . umuti wa kusuba mu menso yobe ukuti umone”