Cila Bushiku Mulecita Ifilenga Lesa Ukucindikwa

KEMBA wa malumbo Davidi apepele kuli Yehova ukuti: “Munenge ukumfwa icikuuku cenu ulucelo. . . . Nengeni ukwishiba inshila iyo mfwile ukwendamo.” (Amalu. 143:8) Nga mwabuuka no kutasha Yehova pa bushiku ubupya ubo muli no mweo, bushe mulamulomba ukuti amutungulule pa kuti mucite ifisuma ubo bushiku nga filya Davidi amulombele? Tatuletwishika ukuti mulacite fyo.

Fwe babomfi ba kwa Yehova abaipeela, ‘nga tulelya nalimo tulenwa nalimo fyonse ifyo tulecita,’ tufwaya ‘ukulacita fyonse ku kucindika Lesa.’ (1 Kor. 10:31) Twalishiba ukutila ifyo tucita kuti fyalenga Yehova acindikwa nelyo asaalulwa. Tulebukisha no kuti Icebo ca kwa Lesa citila Satana alabepesha bamunyina ba kwa Kristu, na babomfi ba kwa Lesa bonse fye pe sonde, “akasuba no bushiku.” (Ukus. 12:10) E ico tulafwaya sana ukwasuka Satana pa fyo atubepesha kabili tulafwaya no kulenga umutima wa kwa Yehova ukusekelela nga tulebombela Shifwe wa mu muulu umulimo wa mushilo “akasuba no bushiku.”—Ukus. 7:15; Amapi. 27:11.

Nomba natulandeko panono pa nshila shibili umo twingalangila ukuti cila bushiku tulacita ifiletela Lesa ubukata. Intanshi twalalanda pa fintu twabikako sana mano e lyo twise tulanda na pa kulangulukilako abanensu.

Ukucita Ifyo Twalaya Lesa

Nga twaipeela kuli Yehova tulanga ukutila tulefwaya ukulamubombela no mutima onse. Tulalaya Yehova no kutila tukalaenda mu nshila shakwe “cila bushiku,” na ku ciyayaya. (Amalu. 61:5, 8) Bushe finshi tulingile ukulacita pa kuti tulecita ifyo twalaya Lesa? Bushe cila bushiku tulanga shani ukutila twalitemwa Yehova ukufuma pa nshi ya mutima?

Icebo ca kwa Lesa cilatulanga bwino bwino ifyo Yehova afwaya tulecita. (Amala. 10:12, 13) Ifingi pa fyo atweba fili mu kabokoshi akaleti “Ifyo Lesa Atweba Ukulacita,” pe bula 22. Ifi fyonse fyalicindama pantu e fyo Lesa afwaya tulecita. Bushe kuti twaishiba shani icicindamishe nga ca kutila ifintu fibili filekabila ukucitwa pa nshita imo ine?

Tutangishako ifya mushilo, pamo nga ukusambilila Baibolo, ipepo, ukulongana, no mulimo wa kushimikila. (Mat. 6:33; Yoh. 4:34; 1 Pet. 2:9) Lelo ifya kwa Lesa tafifwile ukutusendela akasuba konse. Tufwile ukukwata ne nshita ya kuya ku ncito, ku sukulu, no kubomba imilimo ya pa ng’anda. Na lyo line, tulesha na maka ukupekanya bwino pa kuti tulekwata ne nshita ya kucita ifyo Lesa afwaya tulecita pamo nga ukusangwa ku kulongana. Ku ca kumwenako, ilyo tulepekanya ukuya ku kutandala kumo, tufwile ukupekanya bwino pa kutila tatupushilweko ku kutandala kwa kwa kangalila wa muputule, ku kulongana kwaibela ukwa bushiku bumo, ku kulongana kwa muputule e lyo na ku kulongana kwa citungu. Limo ifintu fimo kuti twaficitila pamo. Ku ca kumwenako, limo ulupwa lonse kuti lwabombela pamo umulimo wa kuwamya Ing’anda ya Bufumu nelyo nga tuli ku sukulu na ku ncito kuti tuleshimikilako abanensu ilyo tuletuusha. Kanshi ilyo tulefwaya ukwingila incito, ukusala isukulu, no kusala ifibusa, tufwaya ukucite ifi fyonse ukwabula ukufumya amano ku fintu fyacindama sana mu bumi bwesu pamo nga ukupepa Yehova, Shifwe uwatutemwa.—Luk. Mil. 12:13.

Mulelangulukilako Bambi

Yehova alafwaya twabika amano ku banensu no kubacitila ifisuma. Lelo Satana ena afwaya tuleitemwa. Muli cino calo cakwe mwafula abantu “abaitemwa” na “batemwa ukwangala” e lyo na ‘babyala ku buntunse.’ (2 Tim. 3:1-5; Gal. 6:8) Abengi tabatontonkanyapo sana pa fyo imicitile yabo ikuma bambi. ‘Imicitile ya bantu ababembu’ yaba fye mpanga yonse.—Gal. 5:19-21.

Lelo abatungululwa no mupashi wa mushilo uwa kwa Yehova bena balipusanako sana, pantu balikwata ukutemwa, icikuuku, kabili balacitila abanabo ifisuma! (Gal. 5:22) Icebo ca kwa Lesa citweba ukubika amano ku filekabila bambi ukucila ukubika amano ku fyesu fye. E ico tufwaya ukulacita ifilanga ukuti twalitemwa abanensu. Na lyo line, tatufwaya ukuipoosa mu milandu yabo iishitukumine. (1 Kor. 10:24, 33; Fil. 2:3, 4; 1 Pet. 4:15) Abatetekela banensu e bo tucitila sana ifisuma, lelo tulesha no kwafwa abashatetekela. (Gal. 6:10) Fwayeni inshila imo iyo mwingalangilamo icikuuku ku muntu mulekumanya lelo.—Moneni akabokoshi kaleti “Mulebalangulukilako,” pe bula 23.

Twilatila tulingile fye ukulangulukilako bambi pa nshita shaibela na lintu pacitika cimo. (Gal. 6:2; Efes. 5:2; 1 Tes. 4:9, 10) Lelo cila bushiku tule-esha ukumona ifilecitikila abantu banensu no kuitemenwa ukubafwa mu fyo balekabila, nangu ca kutila pa kucite fyo nalimo kuti twaipusulako fimo. Tulafwaya sana ukubomfya ifili fyonse ifyo tukwete ku kwafwa abanensu, nampo nga ni nshita, ifikwatwa, amano, nangu ukubebako ifyo twaishiba ifingabafwa. Yehova alitulaya ukuti nga tulepeelako bambi na o akulatupeela.—Amapi. 11:25; Luka 6:38.

Ukubombela Lesa “Akasuba no Bushiku”

Bushe cine cine Yehova kuti twamubombela “akasuba no bushiku”? Ee, nga ca kuti lyonse tulebika amano ku kucita fyonse ifikabilwa mu kupepa kwesu. (Imil. 20:31) Kuti tulecita ifyo Lesa afwaya tulecita, pamo nga ukubelenga Icebo ca kwa Lesa cila bushiku no kulatontonkanyapo, ukupepa lyonse, ukwesha na maka ukulasangwa ku kulongana lyonse, e lyo no kulashimikila cila nshita.—Amalu. 1:2; Luka 2:37; Imil. 4:20; 1 Tes. 3:10; 5:17.

Bushe ifwe pa lwesu tulabombela Yehova muli iyi nshila? Nga tulacite fyo, ninshi ifyo tucita cila bushiku fikalanga ukuti tulafwaya ukutemuna Lesa no kulenga ayasuka Satana pa fyo atubepesha. Tulesha ukucindika Yehova muli fyonse ifyo tucita te mulandu ne fyo ifintu fili. Tulaleka ifishinte fyakwe ifyaba mu Baibolo filetutungulula mu fyo tusosa na mu fyo tucita na lintu tulesala ifya kucita pa fintu fimo. Ukumucetekela umupwilapo no kubombesha mu mulimo wakwe e filanga ukuti tulatasha pa fyo atusakamana na pa fyo atutemwa. Kabili tulakonka ifyo atufunda no kutusalapula ilyo twafilwa ukucita ifyo afwaya pa mulandu wa kukanapwililika.—Amalu. 32:5; 119:97; Amapi. 3:25, 26; Kol. 3:17; Heb. 6:11, 12.

Cila bushiku natulecita ifintu ifingalenga Lesa ukucindikwa. Nga tulecita ifyo, tukakwata insansa kabili Shifwe wa mu muulu akalatusakamana umuyayaya.—Mat. 11:29; Ukus. 7:16, 17.

[Akabokoshi ne Fikope pe bula 22]

Ifyo Lesa Atweba Ukulacita

• Ukulapepa lyonse.—Rom. 12:12.

• Ukulabelenga no kusambilila Baibolo no kucita ifyo ilanda.—Amalu. 1:2; 1 Tim. 4:15.

• Ukulasangwa mu kulongana ku kupepa Yehova.—Amalu. 35:18; Heb. 10:24, 25.

• Ukusakamana ulupwa lwesu mu fyo bakabila mu bumi, na mu fya kwa Lesa e lyo na mu matontonkanyo.—1 Tim. 5:8.

• Ukulabila imbila nsuma iya Bufumu, no kulenga abantu ukuba abasambi.—Mat. 24:14; 28:19, 20.

• Ukuisakamana mu fyo tukabila, mu fya kwa Lesa, na mu matontonkanyo, ne ci cisanshamo ukulapaatulako inshita ya kwangalako.—Marko 6:31; 2 Kor. 7:1; 1 Tim. 4:8, 16.

• Ukubomba imilimo ya mu cilonganino.—Imil. 20:28; 1 Tim. 3:1.

• Ukusunga ing’anda yesu iya busaka no kuwamya Ing’anda ya Bufumu.—1 Kor. 10:32.

[Akabokoshi ne Cikope pe bula 23]

Mulebalangulukilako

• Bamunyinefwe na bankashi abakote.—Lebi 19:32.

• Abalwele na bali no bulanda.—Amapi. 14:21.

• Uwa mu cilonganino uulekabila fimo mu kwangufyanya ifyo mushingafilwa ukumupeela.—Rom. 12:13.

• Aba mu ng’anda yenu.—1 Tim. 5:4, 8.

• Uwatetekela munenu uufwililwe.—1 Tim. 5:9.

• Eluda mu cilonganino mwaba uubombesha sana.—1 Tes. 5:12, 13; 1 Tim. 5:17.