“Muleleka Ukushipikisha Kwenu Kwapwisha Umulimo wa Kuko”

1, 2. (a) Finshi twingasambilila ku fyo Gidione na bashilika bakwe 300 bashipikishe? (Moneni icikope pa muulu.) (b) Ukulingana na Luka 21:19, mulandu nshi ukushipikisha kwacindamina?

ABENA Israele balelwa na bena Midiani, kabili inkondo yalikosele sana. Umupingushi Gidione e wali umukalamba wa bashilika ba bena Israele. Nangu ca kuti Gidione na bashilika bakwe balinakile sana, balikunkunike abena Midiani e lyo ne nko ishalebafwa mu bulwi. Balibakunkunike ubushiku bonse pa makilomita 32! Baibolo itila: “Gideone asukile afika ku mumana wa Yordani no kwabuka pamo na bantu 300 abo ali na bo, ninshi nabanaka.” Lelo pali iyi nshita ninshi tabalacimfya ubulwi, bali no kulwa na bashilika na bambi 15,000. Abena Midiani balititikishe sana abena Israele pa myaka iingi, kanshi abashilika abena Israele tabalefwaya ukunenuka. E ico Gidione na bashilika bakwe balikunkunike abalwani babo mpaka babacimfya!—Abapingushi 7:22; 8:4, 10, 28.

² Na ifwe bene tulalwa ubulwi ubwakosa, kabili bulatunasha. Pa balwani besu paba na Satana, icalo cakwe, e lyo no kukanapwililika kwesu. Bamo kale sana twatendeka ukulwa na ba balwani besu, lelo pa mulandu wa kuti Yehova alatwafwa, twalicimfya ifyakwesha ifingi ififuma ku balwani besu. Na lyo line, tatulacimfya umupwilapo. Limo kuti twanaka ukulwa na balwani besu nelyo kuti twanaka ukulolela impela ya cino calo. Yesu alitusokeele kabela ukuti muli shino nshiku sha kulekelesha twakulakwata amafya ayengi kabili bakulatucusha, lelo atwebele no kuti nga twashipikisha, kuti twacimfya. (Belengeni Luka 21:19.) Bushe ukushipikisha e kuti shani? Finshi fingatwafwa ukulashipikisha? Finshi twingasambilila kubashipikishe amafya? Kabili kuti ‘twaleka shani ukushipikisha kwesu kwapwisha umulimo wa kuko’?—Yakobo 1:4.

 3. Bushe ukushipikisha e kuti shani?

³ Ukulingana na Baibolo, ukushipikisha takupeleela fye pa kushishimisha, nelyo ukusuulako fye ku mafya, lelo kusanshamo ne fyo tumona amafya tukwete. Ukushipikisha kulalenga twaba abashipa, aba cishinka, e lyo no kuba abatekanya. Icitabo cimo calanda ukuti, ukushipikisha mibele iitwafwa ukuba ne subilo, no kukananenuka ilyo tuli na mafya. Kulatwafwa no kuba abashangila nangu tukwate amafya ayakalamba. Na kabili ukushipikisha kulenga twilabika amano ku fyo tulecula pantu tutontonkanya pa fisuma ifikafumamo nga ca kuti ubo bwesho bwapwa.

 4. Cinshi twingalandila ukuti ukutemwa e kulenga ukuti tuleshipikisha?

⁴ Ukutemwa e kulenga tuleshipikisha. (Belengeni 1 Abena Korinti 13:4, 7.) Ukutemwa Yehova kulalenga twalashipikisha amafya ayo asuminisha ukuti yabeko. (Luka 22:41, 42) Ukutemwa aba bwananyina kulalenga twalashipikisha nga batulufyanya. (1 Petro 4:8) Ukutemwa abena mwesu kulatwafwa ukushipikisha “amacushi” ayo na baba ne nsansa mu fyupo bakwata, kabili kulatwafwa ukukosha ifyupo fyesu.—1 Abena Korinti 7:28.

 5. Mulandu nshi Yehova engatwafwila ukushipikisha?

⁵ Mulepepa ukuti Yehova alemukosha. Yehova ni “Lesa uupeela ukushipikisha no kusansamusha.” (Abena Roma 15:5) Yehova e waishiba bwino ifyo tukabila pa kuti tuleshipikisha pantu aleshiba bwino ifyo ifintu fili, aleshiba ifyo tuleumfwa kabili alishiba ne nkulilo yesu. Baibolo itila: “Akacitila ababa na katiina kuli ena ifyo balefwaya, akomfwa ne nkuuta yabo, kabili akabapususha.” (Amalumbo 145:19) Bushe Lesa asuka shani amapepo tupepa aya kuti aletwafwa ukushipikisha?

 6. Bushe nga twaeshiwa Yehova afwaya shani apa kuti tufuminemo?

⁶ Yehova atulaya ukuti nga twapepa kuli ena ukuti atwafwe ukushipikisha ubwesho, ‘akafwaya na pa kuti tufuminemo.’ (Belengeni 1 Abena Korinti 10:13.) Atwafwa shani? Limo kuti afumyapo ubwesho tukwete, lelo ilingi line atupeela fye amaka pa kuti ‘tushipikishe muli fyonse no kushishimisha pamo no kusekelela.’ (Abena Kolose 1:11) Na kabili apo alishiba ifyo twabumbwa e lyo ne fyo tushingaba na maka ya kucita, Yehova takaleke ubwesho bukakule sana ica kuti twafilwa no kutwalilila ukuba aba cishinka.

 7. Langilileni ico ifya kulya fya ku mupashi fyacindamina.

⁷ Mulelya ifya kulya fya ku mupashi pa kuti mulekosha icitetekelo cenu. Mulandu nshi ifya kulya fya ku mupashi fyacindamina? Natulangilile: Pa kuti umuntu anine ulupili ulutali sana, alingile ukulya ifya kulya ifingi ifyo afwile ukulya pa nshiku shitatu nelyo shine. E fyo caba na kuli ifwe, tulingile ukulalya ifya kulya fya ku mupashi ifingi pa kuti tuleba na maka ya kushipikisha. Tulingile ukulaesha na maka ukulaisambilisha Baibolo no kulalongana lyonse, nga tulecita ifi, tukaba ne citetekelo icakosa.—Yohane 6:27.

8, 9. (a) Ukulingana na Yobo 2:4, 5, cinshi Satana afwaya ukumona nga tuleeshiwa? (b) Nga muli na mafya, finshi mulingile ukulaelenganya?

⁸ Muleba aba cishinka kuli Lesa. Tulacula nga tuli na mafya, lelo amafya yalesha ne citetekelo cesu. Ifyo tucita nga twaba na mafya e filanga nga tumona Yehova ukuti e walinga ukuteka ku muulu na pano isonde nelyo iyo. Mulandu nshi twalandila ifi? Satana umulwani wa kwa Lesa alasuusha imitekele ya kwa Yehova, alisaalwile Yehova ilyo atile icilenga abantu balemubombela ni co bafwaya fye ukuti alebapaala. Satana atile: “Conse ico umuntu akwata kuti apeelela pa mweo wakwe.” Lyena alandile pali Yobo ukuti: “Shi tambikeni ukuboko kwenu, mukumyeko na kwi fupa lyakwe na ku munofu wakwe kabili mumone nga takamutuke pa menso yenu.” (Yobo 2:4, 5) Bushe ifi fine e fyo Satana atontonkanya na ino nshita? Ee, pantu na pa numa ya myaka iingi ilyo bamutamfishe ku muulu, Satana talekele ukubepesha ababomfi ba kwa Lesa aba cishinka. (Ukusokolola 12:10) Na muno nshiku mwine, Satana atila ico abantu bapepela Lesa ni co bafwaya ukuti alebapaala. Ico afwaisha ca kuti tukaane imitekele ya kwa Lesa no kuleka ukumubombela.

⁹ Ilyo muleeshiwa, muleelenganya ukuti Satana ne fibanda fyakwe bali ku lubali lumo balemona ifyo mulecula kabili balelanda ukuti mwalafilwa ukushipikisha. Muleelenganya no kuti ku lubali lumbi kuli Yehova, Imfumu Kristu Yesu, abasubwa ababushiwa e lyo na bamalaika abengi nga nshi. Yehova pamo na bali ku lubali lwakwe balemona ifyo mulecula, lelo balemukoselesha ukuti mwinenuka! Batemwa ukumona ukuti namukwata amaka ya kushipikisha kabili mwalatwalilila ukuba aba cishinka kuli Yehova. E lyo mwaumfwa Yehova amweba ati: “We mwana wandi, ube na mano, kabili ulenge umutima wandi ukusekelela, pa kuti njasuke uulenseebanya.”—Amapinda 27:11.

10. Kuti mwapashanya shani Yesu nga muletontonkanya sana pa fyo Lesa akamulambula nga mwashipikisha?

¹⁰ Muletontonkanya sana pa cilambu mukapokelela. Elenganyeni ukuti muli pa bulendo ubwa kwenda inshiku shibili. Ilyo muleya, ubushiku bwaila ica kuti kwafita mwaleka no kumona bwino uko muleya. Lelo namwishiba ukuti bwalaca kabili nga mwatwalilila fye ukwenda mwalafika uko muleya. Ifi fine e fyo no bumi bwaba. Limo kuti mwaba na mafya ayakalamba ica kuti mwalatontonkanya no kuti tayakapwe. Nangu fye ni Yesu alikwete amafya ayakalamba. Ilyo balemwipaya pa cimuti, alyumfwile sana ubukali kabili balimuseebenye. Ubu bwali e bwafya ubukalamba ubo Yesu akwete ilyo ali pano calo! Cinshi calengele ukuti ashipikishe? Baibolo itila atontele amenso ku “kusekelela ukwabikilwe pa ntanshi yakwe.” (AbaHebere 12:2, 3) Yesu abikile amano ku cilambu ali no kupokelela nga ashipikisha, lelo icikalamba icalengele ashipikishe ni co alefwaya sana ukulenga ishina lya kwa Lesa ukuba ilya mushilo no kulanga ukuti ni Lesa fye e walinga ukuteka. Alishibe ukuti amafya akwete yali fye ya pa nshita fye iinono, lelo icilambu ali no kupokelela cali ca muyayaya. Muno nshiku, amafya mukwata kuti yalenga mwalaumfwa sana ububi, lelo mwilalaba ukuti aya mafya ya pa nshita fye iinono.

11. Cinshi ico tulingile ukulatontonkanishisha pa “bashipikisha amacushi”?

¹¹ Nga twakwata amafya tatulingile ukulamona ukuti ni fwe fye fweka tuleshipikisha amafya. Ilyo umutumwa Petro alekoselesha Abena Kristu ukulashipikisha amafya ayo Satana aleta, abalembeele ati: “Mukaanyeni, beni abakosa ndi mu citetekelo, pa kwishiba ukuti bamunyinenwe bonse pano calo na bo balecula fye nge fi fine na imwe mulecula.” (1 Petro 5:9) Ifyo ‘abashipikishe amacushi’ bacitile kuti fyatusambilisha ifyo twingacita pa kuti tutwalilile ukuba aba cishinka, kuti fyatukoselesha ukuti na ifwe kuti twashipikisha e lyo kuti tuleibukisha no kuti nga twaba aba cishinka tukapaalwa. (Yakobo 5:11) Natulande pali bamo abashipikishe amacushi.^[1]—Moneni ifyebo na fimbi.

12. Finshi twingasambilila kuli bakerubi abo Lesa atumine ku kulinda ibala lya Edeni?

¹² Bakerubi ni bamalaika abakwata icifulo icikalamba sana. Ilyo Adamu na Efa babembwike, Yehova atumine bakerubi pano sonde ku kubomba umulimo uo abapeele. Umulimo abapeele walipusene sana no mulimo balebomba ku muulu. Ifyo babombele uyu mulimo fitusambilisha ukuti tulingile ukushipikisha ilyo tulebomba umulimo uwayafya. Baibolo itila Yehova abikile “ku kabanga ke bala lya Edeni bakerubi, no lupanga lwa lubingu lwa mulilo ulwaleshinguluka ku kulinda inshila ya ku muti wa mweo.” ^[2] (Moneni ifyebo na fimbi.) (Ukutendeka 3:24) Baibolo tayalandapo ukuti bakerubi baleilishanya nelyo balemona kwati umulimo babapeele wali wa pa nshi. Tabaleumfwa ubunang’ani pa kubomba uyu mulimo kabili tabalefwaya ukuleka. Lelo balitwalilile ukubomba uyu mulimo mpaka wapwa, nalimo wapwile ilyo Ilyeshi lyaishile ninshi palipita ne myaka ukucila pali 1,600!

13. Finshi fyalengele ukuti Yobo ashipikishe amafya ayakalamba ayo akwete?

¹³ Yobo ali uwa cishinka. Limo kuti mwafuupulwa nga ca kuti umunenu nelyo lupwa lwenu amweba amashiwi ayabi. Limbi kuti mwafuupulwa pa mulandu wa kuti namulwala sana nelyo uo mwatemwa nafwa. Nangu mukwate amafya ayakalamba nga nshi, ifyo Yobo ashipikishe amacushi kuti fyamukosha. (Yobo 1:18, 19; 2:7, 9; 19:1-3) Yobo taishibe icalengele ukuti alecula, na lyo line tanenwike iyo. Cinshi camwafwile? Icamwafwile sana ca kuti alitemenwe Yehova kabili alefwaya ukulamusekesha lyonse. (Yobo 1:1) Yobo alefwaya ukulasekesha Yehova ilyo ifintu fyali bwino na lintu ali na mafya. E lyo Yehova na o alimwafwile ukumona amaka yakwe ilyo amwebele pa fintu ifisuma ifyo abumba. Ifi Yehova acitile fyalyafwile Yobo ukushininkisha ukuti Yehova alikwete amaka ya kupwisha amacushi akwete pa nshita yakwe umwine. (Yobo 42:1, 2) Na kuba ifi fine e fyacitike, Baibolo itila: “Yehova afumishepo ubucushi bwa kwa Yobo, . . . kabili Yehova alibweseshe imiku ibili conse ico Yobo akwete kale. Awe Yobo asukile afwa, umukote kabili uwa myaka iingi.”—Yobo 42:10, 17.

14. Ukulingana na 2 Abena Korinti 1:6, bushe filya Paulo ashipikishe amafya fyayafwile shani aba bwananyina?

¹⁴ Umutumwa Paulo. Bushe balamucusha nelyo balamukaanya ukubombela Yehova? Bushe ni mwe baeluda nelyo ni mwe bakangalila wa muputule abakwata imilimo iingi ica kuti mumona ukuti te kuti muibombe? Ifi nga e fyo mumona, ifyo Paulo apitilemo kuti fyamwafwa. Paulo balimucushishe icabipisha kabili lyonse alesakamana pa ba bwananyina mu filonganino. (2 Abena Korinti 11:23-29) Lelo Paulo tanenwike, kabili ifyo acitile fyalikoseleshe aba bwananyina. (Belengeni 2 Abena Korinti 1:6.) Na imwe bene nga mwashipikisha kuti mwakoseleshako bambi.

15, 16. (a) “Mulimo” nshi ukushipikisha kwingapwisha? (b) Langilileni ifyo ‘ukushipikisha kwesu kwingapwisha umulimo wa kuko.’

¹⁵ Umupashi wa mushilo walengele umusambi Yakobo alembele ukuti: “Muleleka ukushipikisha kwenu kwapwisha umulimo wa kuko, pa kutila mube abafikapo kabili abatuntulu muli fyonse, abashabulisha nangu cimo.” (Yakobo 1:4) Bushe ukushipikisha kuti kwapwisha shani “umulimo” wa kuko muli ifwe? Ilyo twaba na mafya, kuti twamona ukuti tulingile ukuba abatekanya sana, ukulatasha sana, nelyo ukuba sana no kutemwa. Nga tuleshipikisha amafya, tukaba sana ne yi mibele kabili tukaba Abena Kristu abasuma.

¹⁶ Apo ukushipikisha kulalenga twaba Abena Kristu abasuma, tatulingile ukutoba amafunde ya kwa Yehova pa kuti fye tupwishe ubwafya tukwete. Ku ca kumwenako, nga ca kuti ilingi line mulesha ukuleka ukutontonkanya pa fyabipa, tamufwile ukunenuka! Mulelomba ukuti Yehova alemwafwa ukukanalatontonkanya pa fyabipa. Bushe lupwa lwenu alamukaanya ukubombela Yehova? Mwinenuka iyo! Twalilileni fye ukubombela Yehova. Nga mwacita ifi, mukamucetekela sana. Muleibukisha ukuti, pa kutila Lesa aletupaala tulingile ukulashipikisha.—Abena Roma 5:3-5; Yakobo 1:12.

17, 18. (a) Langilileni ifyo ukushipikisha ukufika na ku mpela kwacindamina. (b) Ilyo impela ilepalamina, cinshi tulingile ukucetekela?

¹⁷ Tulingile ukushipikisha ukufika na ku mpela, te kushipikisha fye pa nshita iinono. Elenganyeni ukuti ubwato bulebunda, pa kuti abanininemo bapusuke, balingile ukowa ukufika na ku lulamba lwa bemba. Nomba umo nga atendeka ukowa e lyo afilwa ukutwalilila, kuti anwena. Nangu fye ni ulya uwanaka ilyo ali mupepi no kufika ku lulamba lwa bemba na o wine kuti anwena. Kanshi nga tulefwaya ukwisaikala mu calo cipya, tufwile ukutwalilila ukushipikisha. Natulecita ifyo umutumwa Paulo acitile uwatile: “Tatunenuka.”—2 Abena Korinti 4:1, 16.

¹⁸ Nga filya cali kuli Paulo, twalishininkisha ukuti Yehova akatwafwa ukushipikisha ukufika na ku mpela. Paulo alembele ukuti: “Tulecimfya icine cine mu watutemenwe. Pantu ninshininkisha ukuti nangu ni mfwa nangu mweo nangu ni bamalaika nangu mabuteko nangu fintu ifyabapo nangu fintu ifikesabako nangu fya maka nangu ifya pa muulu nangu ifya pa nshi nangu ifyabumbwa tafyakabe na maka ya kutupaatulako ku kutemwa kwa kwa Lesa ukwaba muli Kristu Yesu Shikulwifwe.” (Abena Roma 8:37-39) Kwena limo kuti twanaka, lelo tulingile ukupashanya Gideone na bashilika bakwe. Nangu ca kuti balinakile, tabanenwike, ‘balitwalilile ukukonka’ abalwani babo.—Abapingushi 8:4.