Yobo Alishipikishe—Na Ifwe Bene Kuti Twashipikisha!

“Moneni, tuletila balishuka abashipikisha.”—YAKOBO 5:11.

 1. Cinshi cintu Umwina Kristu mukoloci umo asosele pa lwa fya kwesha fyakwe?

‘CIWA nampimpila! Ndeyumfwa kwati fye ni Yobo!’ Mu kuba na mashiwi ya musango yo A. H. Macmillan alumbulwile ukuyumfwa kwakwe kuli cibusa wapalamisha pa maofesi yakalamba aya Nte sha kwa Yehova. Munyina Macmillan apwishishe ubumi bwakwe ubwa pe sonde pa mushinku wa myaka 89 pa August 26, 1966. Alishibe ukuti ukunonko mucinshi ku mulimo wa busumino ukwa Bena Kristu basubwa ukupala wene ‘kulabakonka.’ (Ukusokolola 14:13) Mu cituntulu, bali no kukonkanyapo mu mulimo wa kwa Yehova pa kubuukila ku bumi bwa bumunshifwa mu muulu. Abanankwe balisekelele ukuti Munyina Macmillan alipokele ico cilambu. Mu myaka yakwe iya kupelako pe sonde, nangu cibe fyo, aali ashingululwikwe ne fya kwesha fya misango na misango, ukusanshako ne mpika sha butuntulu bwa bumi isho shamulengele ukubo waibukila mu kuswatuka ulwa kwesha kwa kwa Satana ukwa kutoba bumpomfu bwakwe kuli Lesa.

2, 3. Yobo aali ni ani?

² Lintu Munyina Macmillan asosele ukuti aleyumfwa fye nga Yobo, alelosha ku mwaume uwashipikishe amesho yakalamba aya citetekelo. Yobo aikele mu “calo ca Usi,” mu kupalishako ku kapinda ka ku kuso aka Arabia. Intuntuko ya mwana mwaume wa kwa Noa Shemu, aali ni kapepa wa kwa Yehova. Amesho ya kwa Yobo mu kumonekesha yaishile lwa mupepi na pa kati ka mfwa ya kwa Yosefe ne nshita lintu Mose aishininkishe umulungami. Mu kati ka cilya ciputulwa ca nshita takwali nangu umo pe sonde uwalingene na Yobo mu kuipeelesha kwa bukapepa. Yehova amwene Yobo pamo nga umuntu wa mpomfu, uwatambalala, uutiina Lesa.—Yobo 1:1, 8.

³ Pamo ngo “mukulu ukucila pali bonse abana ba ku Kabanga,” Yobo akwete ababomfi abengi, kabili ifitekwa fyakwe fyafikile mu mpendwa ya 11,500. Lelo ifyuma fya ku mupashi e fyali fya bucindami bwacilishapo kuli wene. Ukupala bawishi ba bukapepa ilelo, Yobo mu kupalishako alisambilishe abana bakwe abaume cinelubali na bana banakashi batatu pa lwa kwa Yehova. Nangu fye ni lintu bashaleikala na kabili mu ŋanda yakwe, abombele nga shimapepo wa lupwa pa kubaninikile fya kuninika, epali balibembwike.—Yobo 1:2-5.

 4. (a) Mulandu nshi Abena Kristu abalepakaswa balingile ukulangulukila umwaume Yobo? (b) Ukukuma kuli Yobo, fipusho nshi twalalangulukapo?

⁴ Yobo aba uwalinga ukulanguluka ku Bena Kristu abalepakaswa pa kuti bengaikosha ku kushipikisha kwatekanya. “Moneni” e fyalembele umusambi Yakobo. “Tuletila balishuka abashipikisha; mwalyumfwo kushipikisha kwa kwa Yobo, kabili mwalimwene ukupanga kwa kwa Shikulu, kwa kuti Shikulu wa luse ulwingi kabili wa congwe.” (Yakobo 5:11) Ukupala Yobo, abakonshi basubwa aba kwa Yesu ne “bumba likalamba” ilya muli kano kasuba bakabila ukushipikisha pa kubomba mu kutunguluka na mesho ya citetekelo. (Ukusokolola 7:1-9) E co, fya kwesha nshi fintu Yobo ashipikishe? Mulandu nshi fyaishile? Kabili ni shani fintu twinganonkelamo mu fya kukumanya fyakwe?

Ifikansa Fyaluma

 5. Cinshi calecitika mu muulu, icishaishibikwe kuli Yobo?

⁵ Yobo taishibe ukuti ifikansa fikalamba fyali no kwimishiwa mu muulu. Ubushiku bumo “abana baume ba kwa Lesa baishile ku kwiminina pali Yehova.” (Yobo 1:6) Umwana mwaume wafyalwa eka uwa kwa Lesa, Cebo, e po aali. (Yohane 1:1-3) Bamalaika abalungami na bo e po baali na “bana baume ba kwa Lesa” ba bumalaika ababulwe cumfwila. (Ukutendeka 6:1-3) Satana e po aali, pantu ukufwintwa kwakwe ukufuma mu muulu takwali na kwisa ukufikila pa numa ya kwimikwa kwa Bufumu mu 1914. (Ukusokolola 12:1-12) Mu kasuba ka kwa Yobo, Satana aali no kwimye fikansa fyaluma. Aali mupepi no kutwishika ukulinga kwa bumulopwe bwa kwa Yehova pa fibumbwa Fyakwe fyonse.

 6. Cinshi cintu Satana aleesha ukucita, kabili ni shani fintu aleamba Yehova?

⁶ “Ni kwi uko wafuma?” e fyaipwishe Yehova. Satana ayaswike no kutila: “Nafuma mu kusabanta pe sonde, no kwendaukapo.” (Yobo 1:7) Aalefwaya untu engalya. (1 Petro 5:8, 9) Pa kutoba bumpomfu bwa bantu umo umo ababombela Yehova, Satana kuti aesha ukushinina ukuti takuli nangu umo uwingomfwila Lesa mu kukumanina ukufuma ku kutemwa. Ukubomba ne fikansa, Yehova aipwishe Satana ukuti: “Bushe walolekesho mubomfi wandi Yobo no kumono kuti tapaba pe sonde uwaba nga wene, umuntu wa mpomfu kabili uwatambalala, uutiina Lesa kabili uwatalukako ku bubi?” (Yobo 1:8) Yobo alifikilishe ifipimo fya bulesa ukulingana no kukanapwililika kwakwe. (Ilumbo 103:10-14) Lelo Satana apaashishe ukuti: “Bushe Yobo atiinina Lesa apa fye? Bushe imwe tamwapindilila pali wene, na pa ŋanda yakwe, na pali conse ico akwata? Umulimo wa minwe yakwe mwalipaala, ne fitekwa fyakwe fyalifumfumuka mu calo.” (Yobo 1:9, 10) Ciwa muli fyo aleyamba Yehova pa kutubulula ukuti takuli nangu umo uwatemwa kabili uupepa Wene pa mulandu wa cintu Aba lelo ukuti Wene alapeela ifibumbwa amafisakanwa pa kuti bengabombela Wene. Satana atungenye ukuti Yobo abombele Lesa ku bunonshi bwa kaso, te ku kutemwa.

Satana Asansa!

 7. Ni mu nshila nshi umo Ciwa asonsombele Lesa, kabili ni shani fintu Yehova ayankwileko?

⁷ “Lelo,” e fyasosele Satana, “shi tambikeni ukuboko kwenu, mukumyemo na muli conse ico akwata, mumone nga takamutuke pa cinso cenu.” Ni shani fintu Lesa aali no kwankulako ku kusonsomba kwa musango yo ukwabamo musaalula? “Mona,” e fyasosele Yehova. “Conse ico akwata ndepeela mu minwe yobe; ici fye, pali wene witambikapo ukuboko kobe.” Ciwa aali nasosa ukuti fyonse ifyo Yobo akwete fyalipaalilwe, fyalefula, kabili fyalipindililwe. Lesa ali no kusuminisha Yobo ukucula, nangu cingati umubili wakwe tawali na kwikatwako. Mu kuba na mapange yabifi, Satana afumine pa kulongana.—Yobo 1:11, 12.

 8. (a) Kulufya nshi ukwa fya ku mubili kuntu Yobo akumenye? (b) Cinshi cali e cine pa lwa “mulilo wa kwa Lesa”?

⁸ Mu kwangufyanya, ukusansa kwa busatana kwalitendeke. Umo uwa babomfi ba kwa Yobo amupeele ili lyashi lyabipa: “Iŋombe shali shilelima, ne mpunda nkota shali shilemema lubali, e lyo abena Sheba bawilepo, no kushisenda; kabili bomine bakalume ku kanwa ka lupanga.” (Yobo 1:13-15) Ica kupindilila cali naciseshiwapo pa fikwatwa fya kwa Yobo. Ilyo line fye, amaka ya kulungatika aya fibanda yalibomfiwe, pantu umubomfi na umbi acitile lipoti ati: “Umulilo wa kwa Lesa uponene mu muulu, wocele no kupwisho mukuni na bakalume.” (Yobo 1:16) Fintu cali ca buciwa ukucilenga ukumoneka ukuti Lesa e washingemwe ku tuyofi twa musango yo kabili pa mubomfi wakwe wine! Apantu inkuba ifuma ku muulu, Yehova mu kwanguka aali no kupeelwa umulandu, lelo mu kushininkisha umulilo wali wa ntulo ya fibanda.

 9. Ni shani fintu ukonaika kwa mu fya bunonshi kwayambukile ukwampana kwa kwa Yobo na Lesa?

⁹ Ilyo Satana atwalilile ukusansa, umubomfi na umbi acitile lipoti ukuti abena Kaldi balisendele ingamali sha kwa Yobo kabili bali nabepaya bakalume bambi bonse. (Yobo 1:17) Nangu line Yobo akumenye ukonaika kwa mu fya bunonshi, ici tacaonawile ukwampana kwakwe na Lesa. Bushe kuti washipikisha ukulufya kukalamba ukwa fya ku mubili ukwabula ukutoba bumpomfu bobe kuli Yehova?

Akayofi Kakulilako Kapama

10, 11. (a) Cinshi cacitike ku bana ikumi aba kwa Yobo? (b) Pa numa ya mfwa yabamo akayofi iya bana ba kwa Yobo, ni shani fintu amwene Yehova?

¹⁰ Ciwa tapeleele apa pene na Yobo. Umubomfi na umbi acitile lipoti ukuti: “Abana benu abaume na bana benu abanakashi bali balelya no kunwo mwangashi mu ŋanda ya kwa munyinabo mukalamba: moneni kwishile umwela ukalamba uufumine lubali ku matololo, upumine pa fifutu fine fya ŋanda, no kuleka iwe pa bana; na bo bafwa, na kabili ine wine napusuka neka naisa ku kumweba.” (Yobo 1:18, 19) Abashaebwa bwino kuti pambi batila ukupomona ukwalengelwe na ulya mwela kwali ‘milimo ya kwa Lesa.’ Nangu cibe fyo, amaka ya fibanda yakumishe Yobo apo engakuntukilwa bwangu.

¹¹ Uwapumwa no bulanda, Yobo “alepwile tambatamba wakwe, no kubeya ku mutwe wakwe; e lyo awile pa nshi, alashinshimuna.” Lelo, kutika ku mashiwi yakwe. “Yehova alipeele, kabili Yehova asenda; libe ilyapaalwa ishina lya kwa Yehova.” Ubulondoloshi bulundapo kuti: “Muli ici conse Yobo tabembwike, kabili talingile Lesa ukulufyanya.” (Yobo 1:20-22) Satana alicimfiwe na kabili. Ni shani nga twingakumanya ukufwilwa no bulanda pamo nga babomfi ba kwa Lesa? Ukuipeelesha kwabula akaso kuli Yehova no kucetekela muli wene kuti fyatulenga ukushipikisha pamo nga bakasunga ba bumpomfu, nga fintu fye Yobo acitile. Abasubwa na banabo abakwata isubilo lya pe sonde kuti mu cishinka basanga ubukose ukufuma kuli ubu bulondoloshi bwa kushipikisha kwa kwa Yobo.

Ifikansa Fyakoselako

12, 13. Pa kulongana kumbi mu muulu, cinshi cintu Satana apindile, kabili ni shani fintu Lesa ayankwileko?

¹² Yehova mu kwangufyanya akuutenye ukulongana na kumbi mu mekalo ya mu muulu. Yobo ali nasanguka imbulwa mwana, uwapooswa mu bupiina, mu kumoneka ukupumwa na Lesa, lelo bumpomfu bwakwe bwali ubwakosa. Ukubulo kutwishika, Satana tali na kusumina ukuti ukutunga kwakwe ukwa kulwisha Lesa na Yobo kwali kwa bufi. Nomba “abana baume ba kwa Lesa” bali mupepi no kumfwa ukushinina no kupaasha ilintu Yehova aseseshe Ciwa pa kuti engaleta ifikansa kuli kapeleko.

¹³ Pa kulubulwisha Satana, Yehova aipwishe ati: “Ni kwi uko wafuma?” Cinshi cali e casuko? “Nafuma mu kusabanta pe sonde, no kwendaukapo.” Yehova na kabili aloseshe ukusakamana ku mubomfi wakwe Yobo uwa mpomfu, uwatambalala, kabili uutiina Lesa, uwali acili naikatisha bumpomfu bwakwe. Ciwa ayaswike no kutila: “Inkanda pa nkanda; conse ico umuntu akwata kuti apeelela pa mweo wakwe. Lelo, shi tambikeni ukuboko kwenu, mukumyeko na kwi fupa lyakwe no munofu wakwe, mumone nga takamutuke pa cinso cenu.” E lyo Lesa atile: “Mona, ali mu minwe yobe; kano fye, uletengelo mweo wakwe.” (Yobo 2:2-6) Ukutunga ukuti Yehova aali talati aseshepo ifipindami fyonse ifya kucingilila, Satana apindile ukukumya kwi fupa na ku munofu ifya kwa Yobo. Ciwa tali na kusuminishiwa ukwipaya Yobo; lelo Satana alishibe ukuti ubulwele bwa ku mubili bwali no kumukalifya no kucilenga ukumoneka ukuti alepita mu kucula ukufuma kuli Lesa pa membu sha mu bumfisolo.

14. Satana apamine Yobo na cinshi, kabili mulandu nshi umuntunse ashabelele na maka ya kupeela uyu walecula ukwilulukwa?

¹⁴ Ukutamfiwa ukufuma pali kulya kulongana, Satana atwalilile no kubekwa kwakwe ukwakaluka. Aumine Yobo ku “fipute fyabipa ukufuma ku nyantilo ya lukasa lwakwe no kufika pa kati ka mutwe.” Mwandi bulanda Yobo ashipikishe ilyo aikele mu mito no kulaipala ku ciinga! (Yobo 2:7, 8) Takwali shiŋanga wa buntunse uwali na maka ya kumuletela ukwilulukwa ku kucushiwa kwatapatisha, ukwa makankamike, kabili ukwa kulenge nsoni, apantu kwalengelwe na maka ya busatana. Ni Yehova fye eka aali no kundapa Yobo. Nga ca kuti uli mubomfi wa kwa Lesa uwalwala, wilalaba ukuti Lesa kuti akwaafwa ukushipikisha kabili kuti akupeela ubumi mu calo cipya icabulamo amalwele.—Ilumbo 41:1-3; Esaya 33:24.

15. Cinshi cintu umukashi wa kwa Yobo amucincishe ukucita, kabili cinshi cali e kwankulako kwakwe?

¹⁵ Mu kupelako, umukashi wa kwa Yobo atile: “Bushe mucili mulekoselela muli bumpomfu bwenu? tukeni Lesa, no kufwa.” “Bumpomfu” bulangilila ukuipeela kwabula akabi, kabili pambi alandile mu kutumfya pa kuti Yobo engatuka Lesa. Lelo Yobo ayaswike ati: “Kwati kusosa kwa umo wa mu banakashi bapumbu e fyo ulesosa. Kabili ubusuma tupokelela kuli Lesa; bushe te kuti tupokelele no bubi?” Nangu ni uyu mucenjelo uwa kwa Satana tawabombele, pantu twalyebwa ukuti: “Muli ici conse Yobo tabembwike ku milomo yakwe.” (Yobo 2:9, 10) Tutile ifilundwa fya lupwa abakaanya bali no kusoso kuti mu kubulwamo amano tuleilenga fwe bene ukufunshika mu fikonkelelo fya Bwina Kristu kabili batucincisha ukukaana Yehova Lesa. Ukupala Yobo, kuti twashipikisha ubwesho bwa musango yo pantu twalitemwa Yehova kabili tufwaisha ukulumba ishina lyakwe ilya mushilo.—Ilumbo 145:1, 2; AbaHebere 13:15.

Bakafutika Baituntumba Batatu

16. Ni bani baishile, mu kuitunga ku kusansamusha Yobo, lelo ni shani fintu Satana ababomfeshe?

¹⁶ Mu caishileba lipange na limbi ilya busatana, “abanankwe” batatu mu kuitunga baishile ku kusansamusha Yobo. Umo aali ni Elifasi, mu kupalishako intuntuko ya kwa Abrahamu ukupitila muli Esau. Apantu Elifasi e watendekelepo kulanda, ukwabulo kutwishika aali e mukalamba pali bonse. Umbi uwalipo, ni Bildadi, intuntuko ya kwa Shua, umo uwa bana baume ba kwa Abrahamu muli Ketura. Umwaume walenga butatu aali ni Sofari, uwaleitwa umwina Naamati ku kwishibisha ulupwa lwakwe nelyo icifulo cakwe ica bwikashi, nakalimo pa kati ka kapinda ka kuso na masamba aka Arabia. (Yobo 2:11; Ukutendeka 25:1, 2; 36:4, 11) Ukupala abo abesha ukulenga Inte sha kwa Yehova ukukaana Lesa ilelo, aba batatu babomfiwe na Satana mu kubombesha kwa kulenga Yobo ukusumine milandu ya bufi no kutoba bumpomfu bwakwe.

17. Cinshi cintu abatandashi batatu bacitile, kabili cinshi bashacitile pa nshiku cinelubali akasuba no bushiku?

¹⁷ Aba batatu balangishe icililishi pa kulila, ukulepula batambatamba babo, no kukuba ulukungu pa mitwe yabo. Lelo baikele na Yobo inshiku cinelubali akasuba no bushiku ukwabulo kulandapo ishiwi nangu limo ilya kusansamusha! (Yobo 2:12, 13; Luka 18:10-14) Aba bakafutika baituntumba batatu baali ababulisha nga nshi bumupashi ica kuti tabakwete nangu cimo ica kusansamusha ica kusosa pa lwa kwa Yehova na malayo yakwe. Nalyo line, balefika ku kusondwelela kwalubana no kuba abaiteyanya ukubomfya kwene ku kulwisha Yobo mu kwangufyanya pa numa babe nabalangishako ubulanda bwa munsaunte. Ku ca kusekesha, lintu ukukutumana kwa nshiku cinelubali takulapwa, umulumendo Elihu aikele pa cifulo apo engalaumfwako.

18. Mulandu nshi Yobo afwaile umutende mu mfwa?

¹⁸ Yobo mu kupelako acilingenye kulya kukutumana. Pa kukanasanga ukusansamusha ukufuma ku batandashi batatu, atipwilile ubushiku ubo afyelwe kabili atwishike umulandu ubumi bwakwe ubwa nkumbabulili bwaletantalishiwilwa. Afwaile umutende mu mfwa, ukukanalanguluka fye no kuti akatala akwatapo ukusekelela kwa cine cine pa ntanshi talafwa, apo nomba ali uwapeleelwa, uwafwilwa, kabili uwalwale cabipisha. Lelo Lesa taali na kuleka Yobo ukwikatwapo ukufika ku mfwa.—Yobo 3:1-26.

Bakapeela ba Milandu aba kwa Yobo Basansa

19. Ni mu mbali nshi umo Elifasi apeelele Yobo imilandu ya bufi?

¹⁹ Elifasi e wabalilepo ukulanda mu kushokana kutatu ukwa kwasukana uko mu kulundapo kwaeseshe bumpomfu bwa kwa Yobo. Mu kulanda kwakwe ukwa kubalilapo, Elifasi aipwishe ukuti: “N’ani uwa kaele uwaloba?” Asondwelele ukuti Yobo afwile alicitilepo cimo icabipa ku kupokelela ukukanda kwa kwa Lesa. (Yobo, ifipandwa 4, 5) Mu kulanda kwakwe ukwalenga bubili, Elifasi apumishe amano ya kwa Yobo no kwipusho kuti: “Cinshi waishiba, na ifwe tatwaciishiba?” Elifasi atungile ukuti Yobo aleesha ukuilangisha ukuba uwacila pa Wa maka yonse. Pa kupwisha ukusansa kwakwe ukwalenga bubili, alangishe Yobo ngo wali no mulandu wa busangu, amafisakanwa, no kufutika. (Yobo, icipandwa 15) Mu kulanda kwakwe ukwa kupelako, Elifasi abepeshe Yobo ulwa misoka iingi—ukufinsha, ukutana umukate na menshi ku baali mu kukabila, no kutitikisha bamukamfwilwa ne nshiwa.—Yobo, icipandwa 22.

20. Yali mibele nshi iya kusansa kwa kwa Bildadi pali Yobo?

²⁰ Ukuba ngo wa cibili muli kumo na kumo ukwa kushokana kutatu ukwa kwasukana, Bildadi ilingi line alekonka umutwe wa cinkumbawile uwaleimikwa na Elifasi. Ukulanda kwa kwa Bildadi kwaleba ukwaipipako lelo ukwacilapo kucena. Apeele fye na bana ba kwa Yobo umulandu wa kulufyanya na muli fyo ukuwaminwa imfwa. Mu kuba no kupelulula kwalubana, abomfeshe ici cilangililo: Kwati fintu amacinda ne fisonge fyuma no kufwa apashili menshi, e fyo caba na kuli “bonse abalaba Lesa.” Ayo mashiwi ya cine, lelo tayabombele kuli Yobo. (Yobo, icipandwa 8) Bildadi abikile ukucula kwa kwa Yobo mwi longo limo line na kulya ukwisa pa babifi. (Yobo, icipandwa 18) Mu kulanda kwakwe ukwipi ukwalenga butatu, Bildadi apelulwile ukuti umuntu aba “mutiti” kabili “mwambo” na muli fyo tasanguluka pa ntanshi ya kwa Lesa.—Yobo, icipandwa 25.

21. Sofari apeele Yobo umulandu wa cinshi?

²¹ Sofari aali e wa citatu ukulanda mu kwasukana. Mu cinkumbawile, imitontonkanishishe yakwe yalekonka ilya iya kwa Elifasi na Bildadi. Sofari apeele Yobo umulandu wa bubifi no kumucincisha ukutalusha ifibelesho fyakwe ifya lubembu. (Yobo, ifipandwa 11, 20) Pa numa ya kushokana kubili Sofari alilekele ukulanda. Takwete nangu cimo ica kulundapo mu kushokana kwalenga butatu. Inshita yonse, nangu cibe fyo, Yobo mu kushipa ayaswike aba kumupeela imilandu. Ku ca kumwenako, pa nshita imo atile: “Bonse bene muli bakasansamusha ba kutendusha. Bushe kuli impela ku fyebo fya mupu?”—Yobo 16:2, 3.

Kuti Twashipikisha

22, 23. (a) Pamo nga mu mulandu wa kwa Yobo, ni shani pambi Ciwa engabomba pa kwesha ukutoba bumpomfu bwesu kuli Yehova Lesa? (b) Nangu cingati Yobo aleshipikisha amesho ya misango na misango, cinshi pambi twingepusha pa lwa mibele yakwe iya mutima?

²² Ukupala Yobo, kuti pambi twalolenkana ne fya kwesha ifyacila pali cimo pa nshita imo, kabili Satana kuti pambi abomfya ukufuupula nelyo fya kusangwilako fimbi mu kubombesha kwakwe ukwa kutoba bumpomfu bwesu. Kuti pambi aesha ukutulenga ukwalukila Yehova nga tulekwata amafya ya mu fya bunonshi. Nga ca kuti uwatemwikwa afwa nelyo twakwata ubutuntulu bwa bumi bwabipa, Satana kuti pambi afwaya ukutupatikisha ukupeela Lesa umulandu. Ukupala abanankwe ba kwa Yobo, umo kuti pambi atupeela fye ne milandu ya bufi. Nga fintu Munyina Macmillan alangilile, Satana kuti pambi ‘atupimpila,’ lelo kuti twashipikisha.

²³ Nga fintu tumwene ukufika pali ino nshita, Yobo aleshipikisha ifya kwesha fyakwe ifya misango na misango. Nangu cibe fyo, bushe aleshipikisha fye no kuwishikana? Bushe mu cituntulu aali no mupashi wanashiwa? Natumone nga mu cituntulu Yobo alilufishe isubilo.

Ni Shani Fintu Wingankulako?

◻ Fikansa nshi ifikalamba Satana aimishe mu kasuba ka kwa Yobo?

◻ Ni kuli cinshi Yobo aeshiwilwe ukufika ku mpela?

◻ “Abanankwe” batatu aba kwa Yobo bamupeele umulandu wa cinshi?

◻ Pamo nga mu mulandu wa kwa Yobo, ni shani Satana pambi engesha ukutoba bumpomfu bwesu kuli Yehova?

[Icikope pe bula 10]

A. H. Macmillan