Cinshi Mutangishako mu Bumi Bwenu?

“Nengeni ukwishibe nshila iyo mfwile ukwendamo.”—ILUMBO 143:8.

 1. Cinshi cintu Imfumu Solomone yasondwelele pa lwa fikonkelelo fya bantunse na fintu bapwishishisha?

NAKALIMO mwalishiba nga fintu uuli onse aishibo kuti ubumi bwalisulamo imibombele ne milandu ya kubombapo. Lintu mwatontonkanya pa lwa cene, kuti mwasangamo fimo ukuti fyalikatama. Imibombele ne milandu imbi tayacindama sana nelyo fye ukukaanabamo akantu. Icishinka ca kuti mwalishibe ci cilango kuti mulomfwana na umo uwa bantu bakwatishe amano abatalile ababako, Imfumu Solomone. Pa numa abe napituluka bwino bwino mu mibombele ya mu bumi, asondwelele ati: “Bela Lesa akatiina, baka amafunde yakwe; pantu ici e ca buntunse bonse.” (Lukala Milandu 2:4-9, 11; 12:13) Bupilibulo nshi buntu ici catukwatila ilelo?

 2. Cipusho nshi icikalamba cintu abantu batiina Lesa balingile ukuipusha abene, ukutungulula ku fipusho nshi ifyayampanako?

² Nga mulefwaya ‘ukubela Lesa akatiina, no kubaka amafunde yakwe,’ ipusheni mwe bene ici cipusho ca kusonsomba, ‘Cinshi ntangishako mu bumi bwandi?’ Kwena, napamo tamutontonkanya pali ici cipusho cila bushiku, lelo mulandu nshi mushingacilangulukilapo nomba? Na kuba, ciletwibukishako ifipusho fyayampanako, pamo nga ifya kuti, ‘Bushe kuti pambi ndakomaila sana pa ncito yandi nelyo umulimo naishibisha nelyo pa fikwatwa fya ku mubili? Ni shani fintu mona iŋanda yandi, ulupwa lwandi, na abo bantu natemwa?’ Umusepela kuti pambi waipusha auti, ‘Bukulu bwaba shani ubwa nshita no kwangwako ifyo amasomo yasenda? Bushe mu cituntulu, icintu ndeseshamo icitendwe, ifyangalo, nelyo umusango umo uwa fya kusekesha nelyo ifya kupangapanga e kwaba ubuseko bwandi ubukalamba?’ Kabili ukukaanasakamana umushinku wesu nelyo imibele yesu, tulingile ukuipusha mu kulinga ukuti, ‘Ni pi pantu nabika ukubombela Lesa mu bumi bwandi?’ Mu kupalishako kuti mwasumine fyo tulakabila ukutantika ifili no kwise ntanshi. Lelo ni shani kabili ni kwi twinganonko kwaafwa pa kufitantika mano mano?

 3. Mu kwimike fili no kwise ntanshi mwabimbwa finshi ku Bena Kristu?

³ “Iciise ntanshi” ni numbwilo iyumfwikamo ubupilibulo bwa cintu icitangila pa cili conse cimbi nelyo icikabila ukulangulukwapo intanshi. Nampo nga muli umo wa Nte sha kwa Yehova nelyo muli pa kati ka mamilioni ya basambi ba bufumacumi aba Cebo ca kwa Lesa abalebishanya na bene, langulukeni icine ici: “Ku cintu conse kwabe nshita iyalingwa, kwaba ne nshita ku mulandu onse mwi samba lya kasuba.” (Lukala Milandu 3:1) Mu kulingisha, ico cisanshamo ukuti mulelangisha ukwangwako kwabamo kutemwa ku kwampana kwa mu lupwa. (Abena Kolose 3:18-21) Cisanshamo ukupayanishisha aba mu ŋanda yenu mu bufumacumi ukupitila mu mulimo wa ku mubili. (2 Abena Tesalonika 3:10-12; 1 Timote 5:8) Kabili pa kupupwako mwela, kuti mwafumako pa ŋanda ku kuyaangalako icangalo ca kuleseshamo icitendwe nelyo ku fya kusekesha nelyo ukukokoloka kwa mu tushita mu tushita. (Linganyeniko Marko 6:31.) Lintu mwatontonkanyapo mu kusakamanishisha, nangu ni fyo, bushe tamulemone fyo pali ifi fintu tapali nangu cimo icifwile ukwise ntanshi mu bumi? Kwalibako cimbi icacilapo kucindama.

 4. Ni shani fintu Abena Filipi 1:9, 10 bayampana ku kutantika ifili no kwise ntanshi?

⁴ Napamo mwalishibe fyo ifishinte ifipayanyo butungulushi ifya mu Baibolo fya kwaafwa fyacindama mu kwimika ififwile ukwise ntanshi no kupingulapo mano mano. Ku ca kumwenako, pa Abena Filipi 1:9, 10, Abena Kristu balakoseleshiwa “ukucilamo no kucilamo mu kushininkisha no kwishiba konse.” Cinshi cili e buyo? Umutumwa Paulo alundileko kuti: “Ku kuleka musuminishe ifyacilamo.” Bushe ico tacileumfwika ukubamo amano? Ukushintilila pa kwishiba kwalungikwa, Umwina Kristu uwiluka kuti apima ico alingile ukusekelelamo intanshi—iciise ntanshi—mu bumi.

Icipasho pa lwa ca Kutangishako

 5. Mu kulondolola icipasho ico Abena Kristu babashiiliile, ni shani fintu Amalembo yalanga cintu Yesu atangisheko mu bumi bwakwe?

⁵ Tulasangamo ulubali lwaumo mutengo ulwa kwishiba mu mashiwi ya mutumwa Petro aya kuti: “Ni ci cine mwaitiilweko; pa kuti na Kristu aculiile imwe no kumushile ca kumwenako, ukuti mukonke mu makasa yakwe.” (1 Petro 2:21) Ee, pa kusange fya kutulangilila ica kutangishako mu bumi, kuti twalanguluka ifyo Yesu Kristu atontonkenye pa lwa cene. Ilumbo 40:8 lyasosele mu busesemo ulwa wene ukuti: “Nabekelwo kucite co mutemenwe, mwe Lesa wandi; kabili amalango yenu yali mu mutima wandi.” Itontonkanyo limo line alilumbulwilile muli iyi nshila ati: “Ica kulya candi kucito kufwaya kwa wantumine, no kupwisho mulimo wakwe.”—Yohane 4:34; AbaHebere 12:2.

 6. Ni shani twingaba ne fya kufumamo fimo fine nge fyakwete Yesu mu kubiko kufwaya kwa kwa Lesa pa ntanshi?

⁶ Moneni ayo makii—ukucito kufwaya kwa kwa Lesa. Ica kumwenako ca kwa Yesu cebekesha cintu abasambi bakwe balingile ukutangishako mu bumi bwabo, pantu atile “onse pa kupwishishiwa [“ukusambilishiwa mu kukumanina,” NW] akaba nga kasambilisha wakwe.” (Luka 6:40) Kabili ilyo Yesu aleenda mu nshila intu Wishi afwaile, alangile ukuti mwalimo “ukusekelela ukwafikapo” mu kutwalilila ukutangishako ukufwaya kwa kwa Lesa. (Ilumbo 16:11; Imilimo 2:28) Bushe mwamona cintu ico cipilibula? Ilyo abakonshi ba kwa Yesu basalapo ukucito kufwaya kwa kwa Lesa ukuti e co bali no kutangishako mu bumi bwabo, bakaipakisha “ukusekelela ukwafikapo” no mweo wabo mweo wine wine. (1 Timote 6:19) E co kwalibako imilandu yafulilako iya kucitilo kufwaya kwa kwa Lesa ukuba e ciise ntanshi mu bumi bwesu.

7, 8. Fya kwesha nshi fintu Yesu alolenkene na fyo, kabili cinshi twingasambililako?

⁷ Pa numa fye Yesu alangilile ukuipeela kwakwe ku kucito kufwaya kwa kwa Lesa, Kaseebanya afwaile ukumupumbula. Mu nshila nshi? Mu kuba na mesho mu mbali shitatu. Inshita imo na imo Yesu aleasuka mu nshila ya mu Malembo, iyabulo kutwishika. (Mateo 4:1-10) Lelo ifya kwesha na fimbi fyalemupembelela—ukupakaswa, ukupumya, ukufutukwa kuli Yuda, ukupeelwa imilandu ya bufi, e lyo ne mfwa pa cimuti ca kucushiwilwapo. Nalyo line, takwali nangu cimo pali ifi fya kwesha icali no kulenga Umwana wa kwa Lesa uwa bucishinka ukupaasuka ukufuma mu nshila intu aalimo. Pa nshita lintu cayafishe sana, Yesu apepele ati: “Te ifyo ine ntemenwe kano ifyo imwe mutemenwe. . . . Ukufwaya kwenu kucitwe.” (Mateo 26:40, 42) Bushe umo umo uwa ifwe tatulingile ukuseshiwa mu kushika kuli ulu lubali lwa cipasho ulwashilwa kuli ifwe, ukutulenga ‘ukuba aba mukoosha mu kupepa’?—Abena Roma 12:12.

⁸ Ee, lintu twatantika ifiise ntanshi mu bumi bwesu, icaafwa sana caba butungulushi bwa bulesa, maka maka lintu twalolenkana na balwani abalwishe cine na bakaanya ukufwaya kwa kwa Lesa. Ibukisheni ukupaapaata kwa Mfumu Davidi iya busumino ukwa kufwayo butungulushi lintu yakumenye ukukaanya kwa balwani. Twalamone ci ilyo tulelanguluka ulubali lwe Ilumbo 143. Ici cilingile ukutwaafwa ukwiluka fintu twingakosha ukwampana kwesu na Yehova no kukuulililwa ukuleka ukucito kufwaya kwa kwa Lesa ukuba icapulamo mu bumi bwesu.

Yehova Alomfwa no Kwasuka Amapepo Yesu

 9. (a) Nangu cingati Davidi aali mubembu, cinshi cintu amashiwi ne ncitilo shakwe fisokolola? (b) Mulandu nshi tushilingile ukuleka ukucite calungama?

⁹ Nangu line aali umubembu umwina kufwa, Davidi aali ne citetekelo ca kuti Yehova aali no kukutika ku kupaapaata kwakwe. Mu kuicefya apaapeete ati: “Mwe Yehova, umfweni ipepo lyandi, kutikeni ku kupaapaata kwandi; mu cishinka cenu, mu bulungami bwenu, e mo njasukileni. Kabili mwitwala mubomfi wenu mu kupingulwa; pantu ku cinso cenu te kuti kulungamikilwe uwa mweo nangu umo.” (Ilumbo 143:1, 2) Davidi aalibukiile ulwa kukaanapwililika kwakwe, lelo umutima wakwe walolele fye onse kuli Lesa. Muli fyo, aalicetekele ukuti aali no kupokelela icasuko mu bulungami. Bushe ici tacitukoselesha? Nangu ca kuti twapelebela ku bulungami bwa kwa Lesa, kuti twaba abacetekela ukuti alatumfwa nga ca kuti imitima yesu ilolele fye yonse kuli wene. (Lukala Milandu 7:20; 1 Yohane 5:14) Ilintu tulekoselela mu kupepa, tufwile ukupampamina pa ‘kucimfisha ububi mu kucite cisuma’ muli shino nshiku sha bubifi.—Abena Roma 12:20, 21; Yakobo 4:7.

10. Mulandu nshi Davidi akwatile inshita sha kusakamikwa?

¹⁰ Davidi alikwete abalwani, kwati fye fintu na ifwe twakwata. Nampo nga ni lintu aali uwauluba ukufuma kuli Sauli, ukupatikishiwa ukufisama mu fifulo fyaba fyeka, ififulo umwa kusokama, nelyo pamo nge mfumu iyalecushiwa na balwani, Davidi aali no tushita twa kusakamikwa. Alondolwele fintu ici camwambukiile ukuti: “Umulwani andamata ne muntu, . . . anjikaliko mwafiita. . . . Umweo wandi mu nda wafwa mutombo; umutima wandi wapeshiwa amano mu nda.” (Ilumbo 143:3, 4) Bushe mwalikwatapo umulandu wa kuyumfwila mu nshila yapalako?

11. Tushita nshi utwa kusakamikwa uto ababomfi ba kwa Lesa aba muno nshiku baalolenkana na to?

¹¹ Ukutitikisha kwa balwani, ifya kwesha pa mulandu wa mafya yatapata aya fya bunonshi, ukulwala kwabipisha, nelyo amafya yambi ayasakamika fyalilenga bamo mu bantu ba kwa Lesa ukuyumfwa ukuti umweo wabo wanakuka. Pa tushita tumo imitima yabo na yo ine yaliba nge yapeshiwa amano mu nda. Cili kwati pamo ngo muntu umo umo balipunda abati: “Mwe batulengo kumone fya kumanama ifingi kabili ifyabipa, mukabwekeshapo ukutulengo kuba no mweo . . . Mukaaluka no kutusansamusha.” (Ilumbo 71:20, 21) Ni shani fintu bayafwiwa?

Ifya Kulolenkana no Kubombesha kwa Mulwani

12. Ni shani fintu Imfumu Davidi abombele no busanso ne fya kwesha?

¹² Ilumbo 143:5 lilangilila cintu Davidi acitile lintu ashingulwikwe no busanso ne fya kwesha ifikalamba: “Njibukishe nshiku sha kale, ntontonkanye milimo yenu yonse; ifyacitile iminwe yenu ndafyetetula.” Davidi aibukiishe ifyo Lesa abombele na babomfi Bakwe na fintu umwine wine apokolwelwe. Atontonkenye pa fintu Yehova aacitile pa mulandu we shina Lyakwe ilikulu. Ee, Davidi aetetwile pa fyo Lesa acitile.

13. Lintu twalolenkana ne fya kwesha, ni shani fintu ukubelebesha pa fya kumwenapo fya pa kale ne fya muno nshiku ifya babomfi ba busumino kwingatwaafwa ukushipikisha?

¹³ Bushe ilingi line tatwibukisha ifyo Lesa abombele na bantu bakwe? Mu kushininkisha! Ici cisanshamo icalembwa icasha ‘ikumbi lya nte ilikulu’ ilya mu nshita sha pa ntanshi ya buKristu. (AbaHebere 11:32-38; 12:1) Abena Kristu basubwa aba mu mwanda wa myaka uwa kubalilapo na bo balikoseleshiwe ‘ukulaibukisha inshiku sha ntanshi’ na fintu bashipikisheko. (AbaHebere 10:32-34) Ni shani pa lwa fya kukumanya fya babomfi ba kwa Lesa mu nshita sha muno nshiku, pamo nga filya fyashimikwa mu citabo Jehovah’s Witnesses—Proclaimers of God’s Kingdom?a Ubulondoloshi ubwalembwa mulya na mu mpapulo shimbi butulenga ukwibukisha fintu Yehova ayafwilisha abantu bakwe ukushipikisha ifibindo, ukukakwa, ukwima kwa mabumba yakalifiwa, inkambi sha kucushiwilwamo ne ncito sha lucu. Kwaliba ukweshiwa mu fyalo fyalepaulwa ku nkondo, pamo nga mu Burundi, Liberia, Rwanda, ne cali kale Yugoslavia. Lintu ukukaanya kwamoneke, ababomfi ba kwa Lesa balishipikishe pa mulandu wa kusungilila ukwampana kwakosa na Yehova. Ukuboko kwakwe kwatungilile abo batangisheko ukucito kufwaya kwakwe mu myeo yabo.

14. (a) Ca kumwenapo nshi cimo ica fyo Lesa engatungililo muntu mu mibele iingapala ku yesu? (b) Cinshi mwasambililako kuli ici ca kumwenapo?

¹⁴ Nangu cibe fyo, kuti pambi mwayankulako amuti tamwapita mu kusanswa kwa bukatu ukwa musango yo, kabili kuti mwayumfwe fyo nakalimo tamwakafikumanye. Ukutungilila kwa kwa Lesa pa bantu bakwe, nangu ni fyo, takwaba lyonse mu cintu bamo bengamona nge mibele ya ca kutamba. Alitungilila “abantu fye yaweyawe” abengi mu mibele “ya lyonse.” Pano palipo cimo ica mu fya kumwenapo ifingi: Mu Ulupungu lwa kwa Kalinda ulwa December 1, 1996, mwali ubulondoloshi ubwashimikwe na Penelope Makris? Mwandi ca kumwenapo cawamisha ica bumpomfu bwa Bwina Kristu. Bushe kuti mwaibukisha fintu ashipikiishe ku bena mupalamano bakwe, fintu ashombweke no bulwele bwabipisha, na fintu abombeshe pa kuti engatwalilila mu butumikishi bwa nshita yonse? Ni shani pa lwa ca kukumanya cakwe ica kulambula mu Mytilene? Icishinka cili ca kuti, Bushe mulamona ifya kumwenapo fya musango yu nge fya kwaafwa ifwe bonse mu kwimika ifili no kwise ntanshi, ukubika ukucito kufwaya kwa kwa Lesa pa ntanshi mu myeo yesu?

15. Fintu nshi fimo fintu Yehova aacita ifyo tulingile ukwetetulapo?

¹⁵ Cilatukosha ukwetetula pa milimo ya kwa Yehova, nge fyacitile Davidi. Mu kufikilishe mifwaile yakwe, Yehova apayenye ipusukilo ukupitila mu mfwa ya Mwana wakwe, ukubuushiwa, no kukatamikwa kwakwe. (1 Timote 3:16) Aalimika Ubufumu bwakwe ubwa mu muulu, ukufumya Satana ne fibanda fyakwe mu myulu, no kubwesha ukupepa kwa cine pano isonde. (Ukusokolola 12:7-12) Aaliletako paradise wa ku mupashi kabili alipaala abantu bakwe no kwingilishiwako. (Esaya 35:1-10; 60:22) Abantu bakwe nomba balepeela ubunte bwa kupelako ilyo ubucushi bukalamba bushilatendeka. (Ukusokolola 14:6, 7) Ee, twalikwata ifingi ifya kutontonkanyapo.

16. Twakoseleshiwa ukwetetula pali finshi, kabili ico cikalambatika cinshi pali ifwe?

¹⁶ Ukucilo kufimbilikishiwa ne fitukutwa na bantunse, ukulaetetula pa fyacitile iminwe ya kwa Lesa kulafwatika pali ifwe ukuti amaka ya kwa Yehova ayabomfiwa tayengacincintilwa. Ifyo ifyacitwa, nangu ni fyo, tafyapelela fye ku fyacitwa mu bubumbo mu muulu na pano isonde. (Yobo 37:14; Ilumbo 19:1; 104:24) Ifyacitwa fyakwe ifya kusungusha fisanshamo imibombele ya kupususha abantu bakwe ku balwani ba lumanimani, nga fintu calangililwa ku cakumenye abantu bakwe aba pa kale abaali abasalwa.—Ukufuma 14:31; 15:6.

Ukwishiba Inshila ya Kwendamo

17. Yehova aali shani uwa cine cine kuli Davidi, kabili ni shani fintu twingebekeshiwa kuli ici?

¹⁷ Davidi apepeele ukwaafwa epali umutonshi wa bumi wauma muli wene: “Nyanshile ndupi shandi kuli imwe; umutima wandi ulamufwaya, nge calo icatembuka. Angufyanyeni ukunjasuka, mwe Yehova, umutima wandi walemba; mwimfise cinso cenu, epali napalana na baleikila mu nindi.” (Ilumbo 143:6, 7) Davidi, uwali umubembu, alishibe ukuti Lesa aalemone mibele intu wene aalimo. (Ilumbo 31:7) Inshita shimo na ifwe bene tuyumfwa ukuti bumupashi bwesu bwafika pa kutotobela. Lelo imibele taileto kupelelwa. Yehova, uumfwa amapepo yesu, kuti akwankwanya ukupuupuutuka kwesu pa kutupembesula ukupitila muli baeluda bakwato kutemwa, ifipande fya mu Ulupungu lwa kwa Kalinda, nelyo amalyashi ya mu kulongana ayamoneka kwati fye ni fwe yateyanishiwilwe.—Esaya 32:1, 2.

18, 19. (a) Cinshi cilingile ukuba e kupaapaata kwesu ukwacincila kuli Yehova? (b) Kuti twaba abashininkisha ulwa cinshi?

¹⁸ Ukutetekela kwesu muli Yehova kulatusesha ukumupaapaata ukuti: “Nengeni ukuumfwo luse lwenu ulucelo, pantu ni mwe natetekela; nengeni ukwishibe nshila iyo mfwile ukwendamo.” (Ilumbo 143:8) Bushe alilekeleshe Nkashi Makris, uwali mu cifulo caba ceka pa cishi cinono ica mu Greece? E co bushe akamulekelesha ilyo muletangishako ukucito kufwaya kwakwe mu bumi bwenu? Kaseebanya ne fibombelo fyakwe kuti batemwa ukucilikila nelyo ukulesho mupwilapo umulimo wesu uwa kubilisho Bufumu bwa kwa Lesa. Nampo nga tulebombela mu fyalo umo ukupepa kwa cine kwasuminishiwa mu cinkumbawile nelyo tulebombela umo kwatitikishiwa, amapepo yesu ayaikatana yalomfwana no kulomba kwa kwa Davidi ukwa kuti: “Mpokololeni ku balwani bandi, mwe Yehova; nabutukila kuli imwe ku kuuba.” (Ilumbo 143:9) Ukucingililwa kwesu ku busanso bwa ku mupashi kwaba mu kwikala umwa kufisama ku Wapulamo.—Ilumbo 91:1.

¹⁹ Ukushininwa kwesu pa lwa ca kutangishako kwalikwata ishintililo lyakosa. (Abena Roma 12:1, 2) Cincintileni kanshi, ukubombesha kwa calo ukwa kufwaya ukubika pali imwe cintu cene citontonkanya ukuti e cacindama mu miteyanishishe ya fintu iya buntunse. Twalilileni ukuleka ulubali lwenu lonse ulwa bumi lulebelebesha cintu mwaishiba ukuti e ca kutangishako—ukucita ukufwaya kwa kwa Lesa.—Mateo 6:10; 7:21.

20. (a) Cinshi twasambilila pa lwa kwa Davidi pa Ilumbo 143:1-9? (b) Ni shani fintu Abena Kristu ilelo babelebesha umupashi wa kwa Davidi?

²⁰ Ifikomo ifya Ilumbo 143 ifya kutendekelako 9 fikomaila pa kwampana kwa kwa Davidi ukwa pa lwakwe ukwapalamisha na Yehova. Lintu ashingilwe na balwani, mu kukakuka apaapeete ukuti Lesa amutungulule. Apongolwele fyonse ifyali ku mutima wakwe, ukufwaya ukwaafwa mu nshila yalungama iya kwendamo. E fyo caba na lelo ku bashalapo aba mu basubwa no mupashi abali pe sonde na banabo. Balanguluka ukwampana kwabo na Yehova ukwaumo mutengo ilyo bamupaapaata ukuti abatungulule. Batangishako ukucito kufwaya kwa kwa Lesa, te mulandu no kutitikisha ukufuma kuli Kaseebanya na ku calo.

21. Mulandu nshi cabele cacindama kuli ifwe ukwimike ca kumwenako cisuma nga tuli no kusambilisha bambi ico balingile ukutangishako mu myeo yabo?

²¹ Amamilioni abalesambilila Baibolo ne Nte sha kwa Yehova balekabila ukwishibo kuti ukucito kufwaya kwa kwa Lesa e ca kutangishako. Kuti twabaafwa ukumfwikishe ci lintu tulelanshanya icipandwa 13 ica mu citabo ca Ukwishiba Uko Kutungulula ku Mweo wa Muyayaya, icikomaila pa fishinte fyabimbwamo mu kumfwila Icebo.b Kwena, cintu tulebasambilisha balingile ukumona ukuti tulecilangilila mu bumi bwesu. Pa numa ya nshita fye iyalinga, na bo bene bakesaishiba inshila iyo balingile ukwendamo. Ilyo aya mamilioni pa lwabo bakutuluka icili no kuba ica bucindami bwapulishamo mu myeo yabo, abengi bakaseshiwa ukucitapo cimo ku kuipeela no kubatishiwa. Pa numa ya ico, icilonganino kuti cabaafwa ukutwalililo kwenda mu nshila ya ku bumi.

22. Fipusho nshi fili no kulangulukwapo mu cipande cikonkelepo?

²² Abengi mu kwangufyanya balasumino kuti ukufwaya kwa kwa Lesa kulingile ukuba ukwa bucindami bwapulishamo mu myeo yabo. Nangu ni fyo, ni shani fintu Yehova panono panono asambilisha ababomfi bakwe ukucito kufwaya kwakwe? Kumwenamo nshi ici cibaletela? Ifi fipusho fili no kulangulukwapo, capamo no kulanshanya kwa cikomo ca mpikwe, Ilumbo 143:10, mu cipande cikonkelepo.

[Amafutunoti]

Cinshi Cili E Casuko Cenu?

Pa kubomfya Abena Filipi 1:9, 10, ni shani fintu twingemika ifili no kwise ntanshi?

Ni shani fintu Yesu alangishe ico atangisheko mu bumi bwakwe?

Cinshi cintu twingasambilila ukufuma ku fintu Davidi acitile lintu aali mu fya kwesha?

Ni mu nshila nshi Ilumbo 143:1-9 litwafwila ilelo?

Cinshi tulingile ukutangishako mu bumi bwesu?

[Icikope pe bula 10]

Fintu Davidi acitile fyashininkishe fyo ashintilile pali Yehova

[Abatusuminishe]

Fyayambwilwe ukufuma muli Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s