Itempele Lya kwa Yehova Ilya ku Mupashi Ilikulu

“Shimapepo uwabe fi tuli nankwe, . . . uubomba umwashila, mwi hema line line ilyaimikwe kuli Shikulu te ku bantu iyo.”—ABAHEBERE 8:1, 2.

 1. Kupayanya nshi ukwabamo kutemwa uko Lesa apayanishishe umutundu wa muntu uwa lubembu?

YEHOVA LESA, pa mulandu wa kutemwisha umutundu wa muntu, apayenye ilambo ku kusenda imembu sha ba pano isonde. (Yohane 1:29; 3:16) Cafwaile ukukuusha ubumi bwa Mwana wakwe ibeli ukufuma ku muulu ukubuleta mwi fumo lya kwa nacisungu wa ciYuda uwe shina lya Maria. Malaika wa kwa Yehova alilondolwelele Maria mu kumfwika ukuti umwana uo aali no kwimita aali no ‘kwitwa uwa mushilo, Umwana wa kwa Lesa.’ (Luka 1:34, 35) Yosefe, uwakobekele Maria, alyebelwe pa lwa kwimitwa kwa kwa Yesu ukwa mu cipesha amano kabili aishibe ukuti wene e “ukapususha abantu bakwe ku membu shabo.”—Mateo 1:20, 21.

 2. Cinshi Yesu acitile lintu aali mupepi ne myaka ya bukulu 30, kabili mulandu nshi?

² Ilyo Yesu alekula, afwile alyumfwikishe fimo ifya ifi fishinka pa lwa kufyalwa kwakwe ukwa mu cipesha amano. Alishibe ukuti Wishi wa ku muulu alimukwatile umulimo wa kupusushe myeo pano isonde. E co, ilyo akulile no kufika pa myaka ya bukulu mupepi na 30, Yesu aishile kuli kasesema wa kwa Lesa Yohane ku kwisabatishiwa mu mumana wa Yordani.—Marko 1:9; Luka 3:23.

 3. (a) Yesu aloseshe mwi pa kusosa ukuti, “Ilambo ne ca kuninika tamwafifwaile”? (b) Ca kumwenako nshi icapulamo cintu Yesu aimikile bonse abalefwaya ukuba abasambi bakwe?

³ Yesu alepepa pa nshita ya kubatishiwa kwakwe. (Luka 3:21) Mu kushininkisha, ukufuma pali iyi nshita ukuya na ku ntanshi mu bumi bwakwe, afikilishe amashiwi ya pe Ilumbo 40:6-8, nga fintu pa numa umutumwa Paulo aishilelangilila ukuti: “Ilambo ne ca kuninika tamwafifwaile, lelo umubili e o mwampekanisha.” (AbaHebere 10:5) Muli fyo Yesu alangishe ifyo aalishibe ukuti Lesa ‘tafwaile’ amalambo ya nama ukutwalilila ukuninikwa pe tempele lya mu Yerusalemu. Mu cifulo ca ico, aishibe ukuti Lesa alimupekanishishe umubili wa buntunse uwapwililika, Yesu, ku kuninika ilambo. Ici cali no kufumyapo ukukabila kwalundwapo ukwa malambo ya nama. Ukulangisha ukufwaisha kwakwe ukwa kufuma ku mutima ukwa kunakila ku kufwaya kwa kwa Lesa, Yesu atwalilile ukupepa ukuti: “Moneni, naisa mu mufungilo we buuku mwalembwo lwa ine ku kucito kufwaya kwenu, mwe Lesa.” (AbaHebere 10:7) Mwandi ca kumwenako cishaiwamina ica bukose no kuipeelesha kwabulwamo akaso ico Yesu pali bulya bushiku aimikile bonse abaali no kusanguka abasambi bakwe ku ntanshi!—Marko 8:34.

 4. Ni shani fintu Lesa alangishe ukuti alisuminishe ukuipeela kwa kwa Yesu?

⁴ Bushe Lesa alilangishe ukuti alisuminishe ipepo lya pa kubatishiwa ilya kwa Yesu? Lekeni umo uwa batumwa basalwa aba kwa Yesu atupeele icasuko: “Na Yesu, ilyo abatishiwe, aninine apo pene ukufuma ku menshi; kabili moneni, umuulu wamucenamina, amona no Mupashi wa kwa Lesa uleika nge nkunda, no kwisa pali wene. Kabili moneni, ishiwi lya mu muulu aliti, Uyu e mwana wandi uwatemwikwa, umo mbekelwa.”—Mateo 3:16, 17; Luka 3:21, 22.

 5. Cinshi cintu iciipailo ca mwi tempele lya cine cine caiminineko?

⁵ Filya Lesa apokelele umubili wa kwa Yesu uwapeelwe nge lambo capilibwile ukuti, mu mano ya ku mupashi, kwaishileko iciipailo icicilile pali cilya icali mwi tempele lya mu Yerusalemu. Iciipailo ca cine cine apo inama shalepeelelwa ilambo calecitilako icinshingwa cilya ciipailo ca ku mupashi, ico cali no kuba “kufwaya” kwa kwa Lesa nelyo imitantikile ku kupokelelamo ubumi bwa kwa Yesu ubwa buntunse nge lambo. (AbaHebere 10:10) E mulandu wine umutumwa Paulo alembele ku Bena Kristu banankwe ukuti: “Twakwate ciipailo ico abapyungila mwi Hema [nelyo, itempele] tabasuminishiwo kulyako.” (AbaHebere 13:10) Mu mashiwi yambi, Abena Kristu ba cine balamwenamo mwi lambo lya kukonsolwela imembu ilyacilamo, ilyo bashimapepo ba ciYuda abengi bakeene.

 6. (a) Cinshi caishilebako pa nshita ya lubatisho lwa kwa Yesu? (b) Cinshi cintu ilumbo lya kuti Mesia, nelyo Kristu, lipilibula?

⁶ Ukusuba Yesu no mupashi wa mushilo kwapilibwile ukuti Lesa nomba alileteleko imitantikile yakwe yonse iye tempele lya ku mupashi, na Yesu ukuba Shimapepo Mukalamba. (Imilimo 10:38; AbaHebere 5:5) Umusambi Luka apuutilwemo ukulungatika umwaka uyo ici cintu cakatamisha cacitikemo ukuti cali ni mu “mwaka uwalenge kumi na isano kuli bumulopwe bwa kwa Tiberi Kaisare.” (Luka 3:1-3) Uyo mwaka e cimo cine no mwaka wa 29 C.E.—imilungu ya myaka iyakumanina bwino bwino 69, nelyo imyaka 483, ukufuma pa nshita Imfumu Artakishashete akambishe ukuti ifibumba fya Yerusalemu fikuulululwe cipya cipya. (Nehemia 2:1, 5-8) Ukulingana no busesemo, “uwasubwa, cilongoshi” aali no kumoneka muli ulya mwaka wasobelwe. (Daniele 9:25) Cimoneka kwati abaYuda abengi balishibe ulwa ici. Luka ashimiko kuti “abantu balelolela” ukumoneka kwa kwa Mesia, nelyo Kristu, amalumbo ayafuma ku mashiwi ya ciHebere ne ciGriki ayapilibula icintu cimo cine, “uwasubwa.”—Luka 3:15.

 7. (a) Ni lilali lintu Lesa asubile “Umwashilisha,” kabili bushe ici calolele mwi? (b) Cinshi cimbi icacitike kuli Yesu pa nshita ya lubatisho lwakwe?

⁷ Pa nshita ya lubatisho lwa kwa Yesu, ubwikalo bwa mu muulu ubwa kwa Lesa bwalisubilwe, nelyo ukupaatulwako, ngo “mwashilisha” mu mitantikile ye tempele lya ku mupashi ilikalamba. (Daniele 9:24) “Ihema [nelyo, itempele] line line ilyaimikwe kuli Shikulu te ku bantu iyo,” lyalitendeke ukubomba. (AbaHebere 8:2) Na kabili, ukupitila mu lubatisho lwakwe mu menshi na ku mupashi wa mushilo, umuntu Yesu Kristu alifyelwe libili ngo Mwana wa kwa Lesa uwa ku mupashi. (Linganyeniko Yohane 3:3.) Ici capilibwile ukuti Lesa mu kupita kwa nshita aali no kwita Umwana wakwe ku bumi bwa ku muulu, uko aali no kuya ku kuboko kwa kulyo ukwa kwa Wishi ukuyabe Mfumu kabili Shimapepo Mukalamba “umuyayaya ku bukonkani bwa kuli Melkisedeke.”—AbaHebere 6:20; Ilumbo 110:1, 4.

Umwashilisha Umwa ku Muulu

 8. Ni mbali nshi ishipya shintu icipuna ca bufumu ica kwa Lesa mu muulu caishilekwata?

⁸ Pa bushiku bwa lubatisho lwa kwa Yesu, icipuna ca bufumu ica kwa Lesa ica ku muulu caishilekwata imbali shipya. Ukwishibikwa kwa kuti ilambo lyapwililika ilya buntunse lyali no kukonsolwela imembu sha ba pano isonde kwakomaile pali bumushilo bwa kwa Lesa mu kupusanako no lubembu lwa muntu. Inkumbu sha kwa Lesa na sho shalyebekeshiwe mu kuti nomba alangishe ukuitemenwa kwakwe ku kuteemunwa, nelyo ukukonsololwa. Muli fyo icipuna ca bufumu ica kwa Lesa ica mu muulu caishileba ngo muputule wa mu kati uwa mwi tempele, umo shimapepo mukalamba aleingila limo fye mu mwaka no mulopa wa nama ku kukonsolwela imembu mu nshila ya mampalanya.

 9. (a) Cinshi cintu icipembe cali pa kati ka Mwashila no Mwashilisha caiminineko? (b) Ni shani fintu Yesu apitile pa cipembe ce tempele lya kwa Lesa ilya ku mupashi?

⁹ Icipembe icalekenye Umwashila ukufuma ku Mwashilisha caleimininako umubili wa munofu uwa kwa Yesu. (AbaHebere 10:19, 20) Wali e cipindami icapindilile Yesu ilyo aali umuntu pano isonde ukukanaingila ukwali Wishi. (1 Abena Korinti 15:50) Pa nshita ya mfwa ya kwa Yesu, “icipembe ce tempele calepwike pa kati ukutula pa muulu no kufika pa nshi.” (Mateo 27:51) Ici mu kumonekesha calangilile ukuti icipindami calecilikila Yesu ukukanaingila mu muulu nomba califumishiwepo. Pa numa ya nshiku shitatu, Yehova Lesa acitile icipesha amano capulishamo. Abuushishe Yesu ukufuma ku bafwa, te ku kuba umuntunse wa munofu no mulopa, lelo ku kuba icibumbwa ca mupashi ica bukata ku ‘kwikala umuyayaya.’ (AbaHebere 7:24) Pa numa ya nshiku 40, Yesu aninine ku muulu no kwingila “Umwashilisha” mwa cine cine “ku kumonekela . . . ku cinso ca kwa Lesa pa mulandu wa ifwe.”—AbaHebere 9:24.

10. (a) Cinshi cacitike pa numa Yesu atambike umutengo we lambo lyakwe kuli Wishi wa ku muulu? (b) Cinshi cintu ukusubwa no mupashi wa mushilo kwapilibwile ku basambi ba kwa Kristu?

¹⁰ Bushe Lesa alipokelele umutengo wa mulopa wasuumiwe uwa kwa Yesu ukuba icikonsolwelo ca pa membu sha ba pano isonde? Mu cine cine alipokelele. Ubushininkisho bwa ici bwaishile pa numa ya nshiku 50 ukutula pa kubuushiwa kwa kwa Yesu, pa bushiku bwa mutebeto wa Pentekoste. Umupashi wa mushilo uwa kwa Lesa wapongolwelwe pa basambi ba kwa Yesu 120 abalongene capamo mu Yerusalemu. (Imilimo 2:1, 4, 33) Ukupala Shimapepo Mukalamba, Yesu Kristu, aba basambi nomba balisubilwe ku kubomba nga “bushimapepo bwa mushilo ku kutuulila amalambo ya bumupashi” pe samba lya mitantikile ye tempele lya kwa Lesa ilya ku mupashi ilikalamba. (1 Petro 2:5) Mu kulundapo, aba basubwa bapangile uluko lupya, “uluko lwa mushilo” ulwa kwa Lesa ulwa Israele wa ku mupashi. E co ukutula palya, amasesemo yonse aya fisuma fya kwa Israele, pamo ngo bulayo bwa “cipingo cipya” ubwalembwa pali Yeremia 31:31, yali no kulabomba ku cilonganino ca Bena Kristu basubwa, “Israele wa kwa Lesa” uwine wine.—1 Petro 2:9; Abena Galatia 6:16.

Imbali Shimbi Ishe Tempele lya kwa Lesa Ilya ku Mupashi

11, 12. (a) Cinshi caimininweko no lubansa lwa bashimapepo ukukuma kuli Yesu, kabili ni cinshi caimininweko ukukuma ku bakonshi bakwe abasubwa? (b) Cinshi cintu umusambilo wa menshi wimininako, kabili ni shani fintu ulebomfiwa?

¹¹ Nangu cingati Umwashilisha mwaleimininako “mu muulu mwine,” umo Lesa aikala pa cipuna ca bufumu, imbali shimbi shonse ishe tempele lya kwa Lesa ilya ku mupashi shakuma ku fintu fya pe sonde. (AbaHebere 9:24) Mwi tempele lya ku Yerusalemu, mwalimo ulubansa lwa mu kati ulwa bashimapepo umwali iciipailo ca malambo no musambilo wa menshi uukalamba, uo bashimapepo balebomfya ku kuisangulula abene ilyo bashilabomba umulimo washila. Cinshi cintu ifi fintu fimininako mu mitantikile ya kwa Lesa iye tempele lya ku mupashi?

¹² Ukukuma kuli Yesu Kristu, ulubansa lwa mu kati ulwa bashimapepo lwaiminineko imibele yakwe iyabulo lubembu pamo ngo Mwana wa kwa Lesa umuntunse wapwililika. Pa kubelesha icitetekelo mwi lambo lya kwa Yesu, abakonshi basubwa aba kwa Kristu balalungamikwa. Muli ifyo, Lesa kuti abomba na bene bwino bwino kwati fye tabali na lubembu. (Abena Roma 5:1; 8:1, 33) E ico, ulu lubansa na kabili lwimininako imibele yalungama iya buntunse iyo ifilundwa cimo na cimo ifya bushimapepo bwa mushilo fiipakisha pa ntanshi ya kwa Lesa. Pa nshita imo ine, Abena Kristu basubwa bacili abashapwililika kabili kuti bacito lubembu. Umusambilo wa menshi uwa mu lubansa wimininako Icebo ca kwa Lesa, ico Shimapepo Mukalamba abomfya ku kusangulula bashimapepo ba mushilo panono panono. Pa kunakila kuli uku kusangulula, balinonka imimonekele ya bukatebebe iyo icindika Lesa no kucebushisha aba ku nse ku kupepa kwasanguluka.—Abena Efese 5:25, 26; Linganyeniko Malaki 3:1-3.

Umwashila

13, 14. (a) Cinshi cintu Umwashila umwe tempele mwimininako ukukuma kuli Yesu na bakonshi bakwe abasubwa? (b) Cinshi cintu apa kuteka inyali apa golde pemininako?

¹³ Umuputule wa kubalilapo uwe tempele wimininako imibele yacila ilya iya mu lubansa. Ukukuma ku muntu wapwililika Yesu Kristu, umubili wakwe wimininako ukufyalwa kwakwe cipya cipya ngo Mwana wa kwa Lesa uwa ku mupashi uwali no kubwelela ku bumi bwa ku muulu. Pa numa ya kulungamikwa pa cishinte ca citetekelo cabo mu mulopa wasumiwe uwa kwa Kristu, aba bakonshi basubwa na kabili balaipakisha iyi mibombele yaibela iya mupashi wa kwa Lesa. (Abena Roma 8:14-17) Ukupitila mu “menshi [e kutila, ulubatisho lwabo] na ku Mupashi,” ‘balafyalwa ukufyalwa kwa mu muulu’ pamo nga bana ba kwa Lesa aba ku mupashi. Pali uyo mulandu, balikwata isubilo lya kubuushiwilwa ku bumi bwa ku muulu pamo nga bana ba kwa Lesa aba ku mupashi, kulila fye batwalilila ukuba aba busumino ukufika ne mfwa.—Yohane 3:5, 7; Ukusokolola 2:10.

¹⁴ Bashimapepo abalebombela Umwashila mwe tempele lya pano isonde tabalemonwa kuli bakapepa baali ku nse. Mu kupalako, Abena Kristu basubwa baipakisha imibele ya ku mupashi iyo ubwingi bwa bakapepa ba kwa Lesa, abakwata isubilo lya kwikala kuli pe na pe muli paradise wa pe sonde bashiipakishako nelyo iyo bashumfwikisha mu kukumanina. Ica kutekapo inyali ca golde ica mwi hema cimininako imibele yabuutushiwa iya Bena Kristu basubwa. Imibombele ya mupashi wa mushilo uwa kwa Lesa, ukupala amafuta yaleba mu nyali, ilabangushishako ukumfwikisha Baibolo. Ukumfwikisha uko aba Bena Kristu banonka nge ca kufumamo, tabakufishilisha. Mu cifulo ca ico, bomfwila Yesu, uwatile: “Imwe muli lubuuto lwa pano isonde. . . . Ulubuuto lwenu lengeni lubalikile ku cinso ca bantu, ukuti bamone imilimo yenu iisuma, no kucindika Shinwe wa mu muulu.”—Mateo 5:14, 16.

15. Cinshi cimininwako no mukate uwaleba pe tebulo lya mukate?

¹⁵ Pa kutwalilila ukuba muli iyi mibele yabuutushiwa, Abena Kristu basubwa bafwile ukulya lyonse icimininwako no mukate waleba pe tebulo lya mukate. Uko basanga sana ica kulya ca ku mupashi ico balya ni ku Cebo ca kwa Lesa, ico batukuta ukubelenga no kwetetula pali cene cila bushiku. Yesu na kabili alaile ukubapayanishisha “ifya kulya mu nshita iyene” ukupitila mu “musha wa cishinka kabili uwashilimuka.” (Mateo 24:45) Uyu “musha” aba libumba lyonse ilya Bena Kristu basubwa ababa pe sonde pa ciputulwa icili conse ica nshita. Kristu alibomfya ili bumba lya basubwa ku kusabankanya ifyebo pa lwa kufikilishiwa kwa masesemo ya Baibolo no kupeela ubutungulushi bwa pa nshita yalinga ukukuma ku fya kubomfya ifishinte fya Baibolo mu bumi bwa muno nshiku ubwa cila bushiku. E ico, Abena Kristu basubwa mu kubamo ukutasha balalya ica kulya ca ku mupashi ica musango yo conse. Lelo ukutungililwa kwa bumi bwabo ubwa ku mupashi kwashintilila pa cacila pa kunonka ukwishiba Lesa mu mintontonkanya yabo ne mitima. Yesu atile: “Ica kulya candi kucito kufwaya kwa wantumine, no kupwisho mulimo wakwe.” (Yohane 4:34) Mu kupalako, Abena Kristu basubwa balekushiwa pa kuibikilishako cila bushiku ku kucita ukufwaya kwa kwa Lesa ukwasokololwa.

16. Cinshi caimininwako ku mulimo walebombwa pa ciipailo ca kufutumwinapo?

¹⁶ Ulucelo ne cungulo, shimapepo aleninika ifyanunke cisuma kuli Lesa pa ciipailo ca kufutumwinapo icushi ce fungo mu muputule wa Mwashila. Pa nshita imo ine, bakapepa abashali bashimapepo balepepa kuli Lesa ilintu beminine mu lubansa lwa ku nse ulwe tempele. (Luka 1:8-10) Baibolo yalondolola ukuti: “Ifyanunke cisuma (e mapepo ya ba mushilo).” (Ukusokolola 5:8) “Lekeni ipepo lyandi lilingwe nge cushi ce fungo ku cinso cenu,” e fyalembele kemba wa malumbo Davidi. (Ilumbo 141:2) Abena Kristu basubwa na bo balateesa ishuko lyabo ilya kutununuka Yehova mwi pepo ukupitila muli Yesu Kristu. Amapepo yabilima ayafuma ku mutima yapala ice fungo icinunke cisuma. Abena Kristu basubwa na kabili balalumbanya Lesa mu nshila shimbi, ukubomfya imilomo yabo ku kusambilisha bambi. Ukushipikisha kwabo lintu balolenkana na mafya na bumpomfu bwabo pe samba lya fya kwesha e fiteemuna sana Lesa.—1 Petro 2:20, 21.

17. Cinshi cabimbilwemo mu kufikilishiwa kwa busesemo bwapayanishiwe no kwingila kwa kubalilapo ukwa kwa shimapepo mukalamba Umwashilisha pa Bushiku bwa Kukonsolwela?

¹⁷ Pa Bushiku bwa Kukonsolwela, shimapepo mukalamba uwa mu Israele aleingila Umwashilisha no kufutumune fye fungo pa cifutumwino ca golde icalipo imisolilo ya mulilo. Ici calingile ukucitwa ilyo ashilaleta umulopa wa pa membu. Mu kufikilishiwa kwa caleimininwako no bu busesemo, Yesu ilyo aali umuntu asungilile bumpomfu bwakumanina kuli Yehova Lesa ilyo ashilatambika ubumi bwakwe nge lambo libelelela ilya pa membu shesu. Muli ifyo alangishe ukuti umuntu wapwililika kuti asunga bumpomfu bwakwe kuli Lesa te mulandu no kutitikisha uko Satana aleta pali wene. (Amapinda 27:11) Lintu aeshiwe, Yesu alepepa “no kukuuta kwa kalanda ne filamba . . . kabili aumfwilwe pa mulandu wa kutiina Lesa.” (AbaHebere 5:7) Muli iyi nshila acindike Yehova ukuti e Mulopwe walungama kabili uwalinga mu kubumbwa konse. Lesa alambwile Yesu pa kumubuusha ku bafwa ukumupa ubumi bwa bumunshifwa ubwa ku muulu. Pa kuba pali ici cifulo casumbuka, Yesu alosha ukusakamana ku mulandu wa bubili uo aishile kwi sonde, ukuulumbula, ku kuwikisha abantunse ababembu abalapila kuli Lesa.—AbaHebere 4:14-16.

Ubukata Bwacilapo Ubwe Tempele lya kwa Lesa Ilya ku Mupashi

18. Ni shani fintu Yehova aleta ubukata bushaikulila kwi tempele lyakwe ilya ku mupashi?

¹⁸ “Ubukata bwa ŋanda iyi ubukakonkapo bukabo bukulu ukucilo bwa ntanshi,” e fyo Yehova asobele. (Hagai 2:9) Pa kubuusha Yesu ukuba Imfumu iishingafwa kabili Shimapepo Mukalamba, Yehova aletele ubukata bushaikulila kwi tempele lyakwe ilya ku mupashi. Yesu nomba e washingamwa ukupeela “ipusukilo lya muyayaya kuli bonse abamunakila.” (AbaHebere 5:9) Aba kubalilapo ukulangisha ukunakila kwa musango yo baali basambi 120 abapokelele umupashi wa mushilo pa Pentekoste mu 33 C.E. Ibuuku lya Ukusokolola lyasobele ukuti aba bana ba ku mupashi aba kwa Israele mu kupelako baali no kuba impendwa 144,000. (Ukusokolola 7:4) Pa numa ya kufwa, ubwingi bwabo balilele abashaishiba kantu nangu kamo mu nshishi ya mutundu wa muntu onse, ukupembelela inshita ya kubapo kwa kwa Yesu mu maka ya bufumu. Ukupende nshita kwa mu busesemo ukusangwa pali Daniele 4:10-17, 20-27 kusonta ku 1914 ukuba e nshita iyo Yesu aali no kutendeka ukuteka mu kati ka balwani bakwe. (Ilumbo 110:2) Amakumi ya myaka ayengi ilyo 1914 ashilafika, Abena Kristu basubwa bapembelele uyo mwaka mu kuswatuka. Inkondo ya calo iya ntanshi no tulanda twaishile pamo na yo pa mutundu wa muntu fyapayenye ubushininkisho bwa kuti Yesu mu cine cine alibikilwe pa cipuna ukuba Imfumu mu 1914. (Mateo 24:3, 7, 8) Mu kwangufyanya pa numa ya ico, apo inshita yalifikile iya “kutendeko bupingushi pa ba ŋanda ya kwa Lesa,” Yesu aali no kufikilisha ubulayo alaile abasambi bakwe abasubwa abaali nabasendama mu mfwa ubwa kuti: “Nkesa kabili, no kumupokelela kuli ne mwine.”—1 Petro 4:17; Yohane 14:3.

19. Ni shani fintu abashalapo aba ba 144,000 bali no kwingila Umwashilisha umwa mu muulu?

¹⁹ Ifilundwa fya ba 144,000 ifya bushimapepo bwa mushilo tabalati bakakatikwe bonse mu kupelako no kulonganikwa ku bwikalo bwabo ubwa ku muulu. Abashalapo pali bene bacili aba mweo pe sonde mu mibele ya ku mupashi iyaleimininwako no Mwashila, umwalekanishiwe ukufuma ku kubapo kwa kwa Lesa ukwa mushilo ku “cipembe,” nelyo icicingo, icili mibili yabo iya munofu. Ilyo aba bafwila mu busumino, balabuushiwa apo pene fye ukuba ifibumbwa fya ku mupashi ifishifwa ku kuyailunda ku ba muli ba 144,000 ababa kale kale ku muulu.—1 Abena Korinti 15:51-53.

20. Mulimo nshi uwakatama uo abashalapo ba bashimapepo ba mushilo balebomba pali ino nshita, kabili finshi fifumamo?

²⁰ Mu kuba na bashimapepo bafulishe fyo abalebombela capamo na Shimapepo Mukalamba uwakulisha mu muulu, itempele lya kwa Lesa ilya ku mupashi lyalipokelela ubukata bwalundwako. Pali ino nshita, abashalapo aba muli bushimapepo bwa mushilo balebomba umulimo wakatama pe sonde. Ukupitila mu kushimikila uko bashimikila, Lesa ‘aletenshe nko shonse’ ku numbwilo sha bupingushi bwakwe, nga fintu casobelwe pali Hagai 2:7. Pa nshita imo ine, amamilioni ya bakapepa balondololwa nge “fisuma fya nko shonse” balekonkomokela mu mansa she tempele lya kwa Yehova ilya pano isonde. Cifulo nshi cintu aba bakwata mu mitantikile ya kwa Lesa iya kupepa, kabili bukata nshi ubwa ku ntanshi twingenekela kwi tempele lyakwe ilya ku mupashi? Ifi fipusho fili no kubeebeetwa mu cipande cikonkelepo.

Ifipusho fya Kupitulukamo

Ca kumwenapo nshi icapulamo cintu Yesu aimike mu 29 C.E.?

Mitantikile nshi yatendeke ukubomba mu 29 C.E.?

Cinshi caimininwako no Mwashila e lyo no Mwashilisha?

Ni shani fintu itempele lya ku mupashi ilikalamba lyaisaba no bukata?

[Icikope pe bula 17]

Lintu Yesu asubilwe no mupashi wa mushilo mu 29 C.E., itempele lya kwa Lesa ilya ku mupashi ilikulu lyalitendeke ukubomba