“Iseni Kuli Ine, . . . na Ine Nalamupeelo Kutusha”

Abacaice Ababa Ngo Mume Upuupuutula

UKWABULA ukutwishika Yesu Kristu aitile kumo na bakonshi bakwe abacaice ilyo atile: “Iseni kuli ine, . . . na ine nalamupeelo kutusha.” (Mateo 11:28) Ilyo abantu batendeke ukutwala abana babo kuli wene, abasambi bakwe bafwaile ukubakaanya. Lelo Yesu atile: “Lekeni abaice bese kuli ine, mwibakaanya.” Kabili Yesu ‘alibafukatile, abikilepo ne ndupi shakwe, no kubapaala.’ (Marko 10:14-16) Ukwabula no kutwishika Yesu alicindamike abacaice.

Baibolo ilanda pa balumendo na bakashana aba busumino, ilanda na pa misepela na bana banono, abali fya kumwenako fisuma mu kubombela Lesa. Amalumbo yalisobele ukuti “abalumendo” bakaba ngo mume upuupuutula. Kabili yalanda na pa “balumendo” na “bakashana” abalelumbanya ishina lya kwa Yehova.—Amalumbo 110:3; 148:12, 13.

Icifulo Abacaice Bengalundulukilamo

Nacilinga ukulinganya abacaice ku mume, pantu umume wayampanishiwa ku kupaka ne paalo. (Ukutendeka 27:28) Umume walitekanya kabili ulapuupuutula. Muli ino nshita ya kubapo kwa kwa Kristu, imintapendwa ya Bena Kristu bacaice baliipeela mu kuitemenwa. Nga filya umume upuupuutula waba, e fyo abalumendo abengi na bakashana baba ilyo balebombela Lesa ne nsansa no kwaafwako bakapepa banabo.—Amalumbo 71:17.

Abacaice ba Bwina Kristu bapuupuutula bambi, kabili na bo balapuupuutulwa ku mulimo wabo. Ukuteyanya kwa kwa Lesa kubateyanishisha icifulo ico bengalundulukilamo. Abalumendo na bakashana balaipakisha bucibusa bwine bwine na Lesa ilyo baletwalilila ukuba ne mibele yawamisha. (Amalumbo 119:9) Mu cilonganino mwine, balabombako imilimo isuma kabili balasangamo ne fibusa fisuma—ifibalenga ukwikushiwa no kuba no bumi busuma.

‘Ukuundapa no Kupuupuutula’

Bushe abacaice ba Bwina Kristu abene bayumfwa ukuti baba ngo “mume”? Umfweniko kuli Tania, umukashana uubomba bwino imilimo ya cilonganino kabili uubomba ne nsansa ubutumikishi pa maawala ukucila 70 cila mweshi. Bushe ayumfwa shani? Atila, “Ndapuupuutulwa kabili ndakoseleshiwa. Ukubika Yehova no kuteyanya kwakwe ukwa pe sonde mu mikalile yandi kwaba ‘kuundapa no kupuupuutula’ kuli ine.”—Amapinda 3:8.

Ariel, uwacaice na umbi umutumikishi wa nshita yonse, alatasha sana pa fya kulya fya ku mupashi ifyo apokelela mu cilonganino. Atila, “Nga naya ku kulongana kwa Bwina Kristu, ku mabungano, na ku kulongana kukalamba no kuliila pe tebulo lya ku mupashi ilya kwa Yehova, ndapuupuutulwa nga nshi lwa ku mupashi. Kabili ndakoseleshiwa pa kwishiba ukuti nalikwata bakabomba banandi mu calo conse.” Pa kulondolola ukufuma ukupuupuutula kwapulamo, atila: “Ukuba na Yehova nga cibusa wandi kulampuupuutula nga nshi, maka maka nga naumfwa no kumona ifyabipa ifilecitikila abantu mu calo.”—Yakobo 2:23.

Abishai uuli ne myaka 20, alebomba umulimo wa nshita yonse kabili mubomfi utumikila mu cilonganino. Alondolola ifyo caba kuli ena, atila: “Ndapuupuutulwa pantu nalishiba ifya kucimfya amafya ayengi ayo abacaice bashingwana na yo pali ndakai. Icine ca mu Baibolo calingafwa ukutonta pa co mfwile ukucita pa kubombela Yehova no mutima onse.”

Ilyo Antoine ali ne myaka ya bupungwe, alekalipa bwangu. Bushiku bumo atobele umusambi mubiye no mupando, kabili umbi amulashile pensulo. Antoine taali muntu wingapuupuutula bambi! Lelo ukufunda kwa mu Baibolo kwalyalwile imisango yakwe. Nomba ali ne myaka 19 kabili mubomfi utumikila kabili umutumikishi wa nshita yonse mu cilonganino, atila: “Ndetasha Yehova pa kunsuminisha ukwishiba icine pali wene na pa kungafwa ukumfwikisha ubucindami bwa kuteka umutima no kwalula imyendele yandi. Ukucite fi kwanenga ukutaluka ku mafya ayengi.”

Abantu bambi balamona imibele iipuupuutula ku bacaice ba Bwina Kristu. Matteo ni Nte wacaice mu Italy. Kafundisha wakwe aebele bonse mu kalashi ukuti onse uwatukana ulusele mu kalashi afwile ukulipila indalama inono. Ilyo papitileko inshita, abana baipwishe ukuti kafundisha engalula ifunde, batile, “calyafya ukukanalanda amashiwi yabipa.” Matteo atila, “Lelo bakafundisha balikeene, kabili babalangile ine, ne Nte ya kwa Yehova, ukuba ica kumwenako cisuma, balintashishe pa menso ya bonse abali mu kalashi pa mulandu wa kulanda amashiwi yasuma.”

Mu kalashi umwali abana bacintomfwa mu Thailand, kafundisha aebele Racha uwa myaka 11 ukwimako no kumutasha pa misango yakwe iisuma, atile: “Cinshi imwe bonse mushingapashanishisha uyu? Alicincila sana mu masambililo yakwe kabili alikwata imisango isuma.” Lyena aebele abana be sukulu ukuti: “Ndemona, pa kuba ne misango isuma nga Racha, mufwile ukuba Inte sha kwa Yehova.”

Cilaleta insansa ukumona abacaice abengi Abena Kristu balelundapo ukwishiba Yehova no kucita ukufwaya kwakwe. Abacaice basuma nga aba baba na amano ya bukalamba. Lesa kuti abafwa ukutunguluka mu mikalile yabo iya nomba no kubapeela ishuko lya kwikala mu calo cipya icileisa. (1 Timote 4:8) Muli ici calo ca ndakai icaba nge ng’umba lwa ku mupashi, icaisulamo abacaice bashikushiwa kabili abapelenganishiwa, mwaba na bacaice ba Bwina Kristu abapuupuutula!