ISAMBILILO 35
Ifyo Twingacita pa Kuti Tulesala Bwino Ifya Kucita
Bonse tulasala ifyo tufwile ukucita. Mu fingi ifyo tusalapo ukucita kuti mwafuma ifisuma nelyo ifibi, kabili kuti fyalenga bucibusa bwesu na Yehova bwakoselako nelyo bwapwa. Ku ca kumwenako, nalimo kuti twasala uko twakulaikala, ifyo tukalacita pa kuti tukalekwata indalama tulekabila, nelyo ukusalapo nampo nga tulefwaya ukuupa nelyo ukuupwa. Nga twasala bwino ifya kucita tukaba ne nsansa, kabili tukalenga na Yehova akasekelele.
1. Kuti mwabomfya shani Baibo pa kuti musale bwino ifya kucita?
Ilyo mushilasala ifyo mwalacita, mulepepa kuli Yehova ukuti amwafwe kabili mulebelenga Baibo pa kuti mwishibe ifyo amona ifyo mulefwaya ukusalapo. (Belengeni Amapinda 2:3-6.) Yehova alibikako amafunde ayo tulingile ukukonka mu fintu fimo. Kanshi nga ca kuti Yehova alibikako ifunde pa fyo tulesalapo ukucita, tulingile ukulikonka pa kuti ifintu fikatuwamine.
Kuti mwacita shani nga ca kuti mu Baibo tamuli ifunde ilya mu kulungatika ililelanda pa fyo mulingile ukucita? Na pali iyo yine nshita Yehova akamutungulula ‘mu nshila iyo mufwile ukwendamo.’ (Esaya 48:17) Akamulanga shani? Akabomfya amashinte ya mafunde ya mu Baibo pa kumutungulula. Amashinte ya mafunde, cine icilondolola ifyo Yehova atontonkanya e lyo ne fyo omfwa pa fintu. Ilingi line tuleshiba ifyo Yehova omfwa pa fintu fimo nga twabelenga ilyashi limo ilya mu Baibo. Nga twaishiba ifyo Yehova omfwa, tukalasala ifya kucita ifikalalenga alesekelela.
2. Finshi mulingile ukutontonkanyapo ilyo mushilasala ifya kucita?
Baibo itila: “Uwa mano alalolekesha ponse apo alenyanta.” (Amapinda 14:15) Ici cilolele mu kuti ilyo tushilasala ifya kucita, tufwile ukutontonkanyapo sana pa fyo tulefwaya ukusalapo. Ilyo muletontonkanyapo muleyipusha amuti: ‘Mashinte nshi aya mu Baibo ayo ningabomfya? Ni cinshi nalasalapo ukucita icikalenga nkabe ne nsansa? Bushe ifyo nalasalapo ukucita fikakuma shani abantu bambi? Ne cacilapo ukucindama, bushe fikalenga Yehova akabe ne nsansa?’—Amalango 32:29.
Yehova alikwata insambu sha kutweba ukuti ici cisuma e lyo ici cibi. Nga twaishiba bwino amafunde yakwe na mashinte ya mu Baibo, kabili tulefwaisha no kulayakonka, tukaba na kampingu iisuma. Kampingu ni nte iitweba ukuti ici cisuma no kuti ici cibi. (Abena Roma 2:14, 15) Nga twasambilisha bwino kampingu yesu, ikalatwafwa ukusala bwino ifya kucita.
SAMBILILENI NA FIMBI
Moneni ifyo amashinte ya mafunde ya mu Baibo na kampingu yesu, fingatwafwa ukulasala bwino ifya kucita.
3. Muleleka Baibo ilemutungulula
Bushe amashinte ya mafunde kuti yatutungulula shani ilyo tulesala ifya kucita? Tambeni VIDIO, lyena lanshanyeni amepusho yakonkapo.
Bushe insambu sha kuisalila ifya kucita ni cinshi?
Mulandu nshi Yehova atupeelela insambu sha kuisalila ifya kucita?
Finshi Yehova atupeela ifingatwafwa ukulabomfya bwino insambu shesu isha kuisalila ifya kucita?
Pa kuti mwishibe ishinte limo ilya mu Baibo, belengeni Abena Efese 5:15, 16. Lyena lanshanyeni ifyo mwingacita pa kuti “mulebomfya bwino inshita yenu” . . .
ku kubelenga Baibo lyonse.
ku kucita ifingalenga mwaba abalume nelyo abakashi abasuma, ku kuba umufyashi umusuma, nelyo umwana umusuma.
ku kulalongana lyonse.
4. Sambilisheni kampingu yenu pa kuti ilemwafwa ukusala bwino ifya kucita
Cilanguka ukusalapo ifya kucita nga ca kuti kwaliba ifunde lya mu Baibo ilyalandapo mu kulungatika pa fyo tulefwaya ukusalapo. Inga ca kutila takwaba ifunde ilyalandapo mu kulungatika? Tambeni VIDIO, lyena lanshanyeni icipusho cakonkapo.
Muli vidio twatamba, finshi nkashi acitile pa kusambilisha kampingu yakwe no kusalapo ifya kucita ifyali no kulenga Yehova asekelela?
Cinshi tushilingile ukwebela abantu bambi ukuti batusalileko ifya kucita? Belengeni AbaHebere 5:14, lyena lanshanyeni aya mepusho:
Nangu ca kuti cilanguka ukweba abantu bambi ukutusalilako ifya kucita, cinshi tufwile ukwishiba?
Finshi ifingamwafwa ukulasambilisha kampingu yenu no kulasala bwino ifya kucita?
Nga filya fine mapu itwafwa ukwishiba uko tuleya, kampingu yesu nayo ilatwafwa ukusala bwino ifya kucita mu mikalile
5. Mulecindika kampingu ya bantu bambi
Ifyo abantu basalapo ukucita filapusanapusana. Kuti twalanga shani ukuti twalicindika kampingu ya bantu bambi? Natulande pa fya kumwenako fibili:
Ica kubalilapo: Nkashi uwatemwa ukuipenta akuukila ku cilonganino cimbi uko bankashi abengi bashatemwa ukumona umuntu naipenta.
Belengeni Abena Roma 15:1 na 1 Abena Korinti 10:23, 24, lyena lanshanyeni aya mepusho:
Ukulingana na malembo twabelenga, finshi uyu nkashi nalimo engasalapo ukucita? Finshi mwingacita nga muli no muntu uo kampingu yakwe ilesha ukucita ifintu fimo ifyo kampingu yenu imusuminisha ukucita?
Ica bubili: Munyinefwe alishiba ukuti Baibo tayakaanya ukunwa ubwalwa mu kulinga, lelo asalapo ukukananwa. Bamwita ukuya-angalila pamo na ba bwananyina, e lyo amona bamunyinefwe balenwa.
Belengeni Lukala Milandu 7:16 na Abena Roma 14:1, 10, lyena lanshanyeni aya mepusho:
Ukulingana na malembo twabelenga, finshi uyu munyinefwe nalimo engasalapo ukucita? Finshi mwingacita nga mwamona umuntu acita ifyo kampingu yenu imulesha ukucita?
Finshi mufwile ukucita pa kuti musale bwino ifya kucita?
1. Mulelomba Yehova ukuti alemwafwa ukusala bwino ifya kucita.—Yakobo 1:5.
2. Mulefwailisha ifyebo mu Baibo na mu mpapulo shilanda pa fya mu Baibo pa kuti mulemona amashinte ya mafunde mwingabomfya. Kuti mwaipushako na Bena Kristu abakalamba mu fya kwa Lesa.
3. Muletontonkanya pa fyo ifyo mwalasalapo ukucita fingakuma kampingu yenu na kampingu ya bantu bambi.
ABANTU BAMO BATILA: “Walikwata insambu sha kucita fye fyonse ifyo ulefwaya. Taulingile ukubika amano ku fyo abantu bambi balatontonkanya pa fyo walasalapo ukucita.”
Mulandu nshi tulingile ukubikila amano ku fyo Lesa omfwa pa fyo tusalapo ukucita, e lyo ne fyo abantu bambi bomfwa?
IFYO MUSAMBILILE
Nga twaishiba ifyo Yehova omfwa pa fyo tulefwaya ukucita kabili twatontonkanya na pa fyo fikakuma abantu bambi, tukalasala bwino ifya kucita.
Ukupitulukamo
Kuti mwacita shani pa kuti mulesala ifya kucita ifingalenga Yehova alesekelela?
Kuti mwasambilisha shani kampingu yenu?
Kuti mwalanga shani ukuti mwalicindika kampingu ya bantu bambi?
ISHIBILENIPO NA FIMBI
Kuti mwacita shani pa kuti mulesala ifingalenga bucibusa bwenu na Lesa bwakoselako?
Ishibilenipo na fimbi pa fyo Yehova atupanda amano.
Moneni ica-afwile umwaume umo ukupingulapo ukucita icintu cimo icisha-angwike.
Sambilileni na fimbi pa fyo mwingalenga Yehova asekelela ilyo mulesalapo ukucita ifintu ifyo ashalandapo mu kulungatika.
“Bushe Lyonse Mukabila Ifunde lya mu Baibolo?” (Ulupungu lwa kwa Kalinda, December 1, 2003)