Icipandwa 14

“Ipaalo Kukasuke Kukabule Incende ya Kubapo”

1, 2. (a) Kusalapo nshi ukusuma uko ifwe umo umo twingasalapo? (b) Kufikilishiwa kwa busesemo nshi ukwingalenga ukuti tupaalwe?

INSHITA twikalamo, ni nshita ya bupingushi ne paalo. Ni nshita ilyo utubungwe twa mapepo tulewa lelo pa nshita imo ine ukupepa kwa cine kwena kwalitwalilila ukubukuluka. Bushe kwena tamufwaya amapaalo pali ino nshita na ku ntanshi ayaba mu kupepa kwa cine ukwatwalilila ukulabukuluka? Nomba bushe kuti mwacita shani pa kuti mukapaalwe? Icasuko caba mu busesemo ubwafikilishiwe ilyo fye “inshiku sha kulekelesha” shatendeke mu 1914. (2 Timote 3:1) Malaki asobele ukuti: “Shikulu [Yehova] untu mufwaya akesa no kupumikisha kwi tempele lyakwe; Inkombe ya Cipingo intu imwe mubekelwa, moneni, ileisa—e fyo Yehova wa milalo asosa.”—Malaki 3:1.

² Ubu busesemo ubwacindama nga nshi kuli imwe, bwalembwa mwi buuku lya kulekeleshako pali yalya mabuuku yalembele bakasesema 12. Ilyo tuleya tulesondwelela ilyashi muli cino citabo icilelanda pali aya mabuuku ya bakasesema 12, twalamona ukuti ubukombe bwalembele Malaki bwalicindama nga nshi maka maka muno nshiku. Mwi buuku lyakwe mwaliba no kufunda ukusuma nga nshi ukwingamwafwa pamo na babomfi bambi aba kwa Yehova ukupokelela “ipaalo, kukasuke kukabule incende ya kubapo.” (Malaki 3:10) Lekeni nomba tubebete icipandwa 3 mwi buuku lya kwa Malaki.

INSHITA YA KUSANGULULA UKUPEPA

 3. Cinshi cacitike pa bantu ba kwa Lesa aba ku kale icalengele ukuti “Israele wa kwa Lesa” asalwe?

³ Ilyo papitile imyaka nalimo 500 ukutula apo Malaki abelele pa calo, Yehova, ukupitila muli Kristu (“inkombe ya cipingo [ca kwa Abrahamu]”), aishile kwi tempele lyali mu Yerusalemu mu kupingula abantu bakwe abo apangene nabo icipangano. Ukulingana ne fyo lulya luko lwalecita, tabalingile no kuti Yehova atwalilile ukubapaala, e calengele ukuti abakaane. (Mateo 23:37, 38) Uko mwingeshibila ukuti ca cine alibakeene ni ku cacitike mu 70 C.E. Na cimbi icingalenga ukuti mushininkishe, mulandu wa kuti Lesa alisalile abantu bambi e kutila “Israele wa kwa Lesa,” uluko lwa mampalanya ulwa bantu 144,000 abafuma mu nko shonse. (Abena Galatia 6:16; Abena Roma 3:25, 26) Lelo, uku takwali e kufikilishiwa kukalamba ukwa busesemo bwa kwa Malaki. Ubu busesemo bwalesobela ne fyali no kulacitika muno nshiku kabili bwalicindama pantu kuti bwamwafwa ukwishiba ifyo mwingesapokelela “ipaalo, kukasuke kukabule incende ya kubapo.”

 4. Cipusho nshi calingile ukwasukwa ilyo fye Yesu abikilwe pa bufumu mu 1914?

⁴ Ukufikilishiwa kwa busesemo bwa mu Baibolo kulangilila ukuti mu 1914, e lyo Yesu Kristu abikilwe nge Mfumu ya Bufumu bwa mu muulu ubwa kwa Yehova. Lyena inshita yalishile iya kuti Yesu asale ibumba lya Bena Kristu abo amwene ukuti nabalinga ukupaalwa kuli Lesa. Ni bani baali no kucimfya ubu bwesho bwa mampalanya? Icasuko kuti mwacisanga mu mashiwi ya kwa Malaki ayatila: ‘Nani uwingashipikishako pa bushiku bwa kwisa kwakwe? kabili nani uwingeminina pa kumoneka kwakwe? Pantu wene aba ngo mulilo wa kwa kalopolola.’ (Malaki 3:2) Ni lilali Yehova aishile ku kupingula “itempele” lyakwe kabili acitile shani pa kulipingula?

5, 6. (a) Ilyo Yehova aishile kwi tempele lya ku mupashi ku kulibebeta, finshi asangile abantu abengi abaleti balemupepa balecita? (b) Finshi abantu ba kwa Lesa abasubwa balekabila?

⁵ Kwena, Lesa taishile kwi tempele lya cine cine. Itempele lya cine cine ilya kulekeleshako umwalebela ukupepa kwa cine lyaonawilwe mu 70 C.E. Lelo Yehova aishile kwi tempele lya ku mupashi, uko aapekanya ukuti abantunse e ko baleisa mu kumupepa ukupitila mwi lambo lya kwa Yesu. (AbaHebere 9:2-10, 23-28) Kwena amacalici ya bantu abayita ukuti Bena Kristu te baali itempele lya ku mupashi, pantu baali no mulandu wa kwipaya abantu kabili balecita no bucende bwa mampalanya, imipepele yabo yalesambilisha ifya bufi mu nshita ya kusambilisha icine. Yehova aishileba “inte iyayanguka pa” bantu ba musango yu, kabili mwalipwa no kwishiba ukuti ubupingushi bwakwe bwali ubwalungama. (Malaki 3:5) Lelo, ilyo fye Ubufumu bwa kwa Lesa bwaimikwe, kwali ibumba lya Bena Kristu ba cine abalebombela mu mansa she tempele lya ku mupashi ilya kwa Lesa, ilyalangilile ukuti lyali ne cishinka kuli Lesa pa mulandu wa kushipikisha amesho ayakalamba. Lelo kwena, na Bena Kristu basubwa nabo bene balefwaikwa ukusangululwa. Ifyebo ifyo bakasesema 12 balembele fyalesobela pali uku kusangulula, pantu mwaba amalayo ayafika pa mutima ayalanda pa kubukulula ukupepa kwa cine e lyo ne fyo ababomfi ba kwa Lesa bali no kulaikala bwino na kabili. Malaki asobele ukuti kwali no kuba abantu abo Yehova aali no “[kukamuna] nga golde na silfere.” Baali no kuba bantu “ababa kuli Yehova aba kupalamikile fya bupe mu bulungami.”—Malaki 3:3.

⁶ Ukulingana ne fishinka twaishiba, ukutendekela mu 1918 ukuya na ku ntanshi, Yehova alisangulwile Abena Kristu basubwa, asangulwile ukupepa kwabo, ifyo baleikala, ne fyo balesambilisha.a Bena ne “bumba likalamba” ilyailundileko pa numa balinonkelamo apakalamba. (Ukusokolola 7:9) Babombela pamo pa kutuula “ifya bupe mu bulungami” ‘ifyawama kuli Yehova.’—Malaki 3:3, 4.

 7. Cipusho nshi icingalinga ukuipusha icakuma bucibusa bwesu na Lesa?

⁷ Ifi twaumfwa e fyo abantu ba kwa Lesa bonse baaba, inga imwe pa lwenu mwaba shani? Limbi kuti mwaipusha amuti: ‘Bushe nalikwatako imibele imo imo nangu incitilo shimo shimo isho ningawamyako? Bushe ningile ukusangulula imibele yandi, nga filya Yehova asangulula abasubwa bakwe?’ Nge fyo twasambilile mu kubangilila, bakasesema 12 balilandile pa mibele yabipa na pa mibele iisuma ne ncitilo shisuma. Pa mulandu wa kuti balilandapo pali ifi, calilenga ukuti mwishibe bwino bwino ifyo Yehova “[afwaya] kuli iwe.” (Mika 6:8) Moneni ifyo bamweba, baatila, “kuli iwe.” Aya mashiwi yalekomaila pa mulandu uo ifwe bonse umo umo tulingile ukuibebetela ukumona nampo nga tulingile ukuwamyako mumo mumo nangu nga tulingile ukuisangulula.

‘SHI MUNJESHE’

 8. Bwite nshi ubo Yehova aatuma ku bantu bakwe?

⁸ Tontonkanyeni pa fyo Yehova akonkanyapo ukusosa muli Malaki mu cipandwa 3, icikomo 10. Muli ici cikomo mwalasangamo amashiwi ayasuma nga nshi ayatila: “Leteni ica pe kumi conse mu ng’anda ya cipao, ukuti mubemo ifya kulya mu ng’anda yandi, kabili shi mundabwile kuli ico, e fyo Yehova wa milalo asosa; mumone nga nshakamwiswile ifipunda fya mu muulu, no kumupongolwele paalo, kukasuke kukabule incende ya kubapo.” Ubu bwite bwa bantu ba kwa Lesa fye bonse. Bushe na imwe mwalishiba ukuti balimwitako?

 9. Malambo ya musango nshi ne fya pe kumi ifyo mwingatuula kuli Yehova?

⁹ Finshi mwingacita pa kuti mupeele “ica pe kumi” kuli Yehova? Ukuba kwena, te kuti tulande ukuti nangu mulefwaya nangu tamulefwaya mufwile fye ukutuula imituulo nangu ukubuulapo icintu cimo pa fintu ikumi no kutuula, nga filya balondolola mu Mafunde ya kwa Mose. Pali ino nshita Lesa atwenekela ukumupeela ifintu fya mampalanya. Nga fintu twasambilile mu cipandwa cafumineko, Paulo alondolwele umulimo mubomba uwa kushimikila ukuti kutuula ilambo. (Hosea 14:2) Lyena umutumwa alandile pa mutuulo na umbi, alembele ukuti: “Mwilaba ukucita icisuma no kupeelana ifintu, pantu amalambo aya musango yu e yatemuna Lesa.” (AbaHebere 13:15, 16) Kanshi ca cine ukuti “ica pe kumi” icalumbulwa pali Malaki 3:10 cimininako ukupeela kwa ku mupashi e lyo no kupeela ifintu ifyo twakwata. Apo muli Bena Kristu babatishiwa, mwali-ipeela kuli Yehova, nomba ica pe kumi cimininako ifintu ifyo mwakwata ifyo mwingapeela Yehova nangu ifyo mwingabomfya mu mulimo wakwe. Ifi fintu, kubiikako ne nshita yenu, amaka yenu, ifipe mwakwata, ne fyuma fyenu ifyo mupeela mu mulimo wa kwa Yehova.

10. Ni mu nshila nshi isuma ‘mwingeseshamo’ Yehova?

¹⁰ Ala kanshi calilinga ukuti mulepeela iyi mituulo ya ku mupashi iya ca pe kumi kuli Yehova mu kuitemenwa fye mwe bene no mweo onse! Kabili mulingile ukubikako sana amano. Mwalishiba ukuti ubushiku bukalamba ubwa kwa Yehova bwile bulepalama kabili “bwa kutiinisha.” (Yoele 2:1, 2, 11) Imyeo ya bantu kuti yaloba. Lesa alimwita, kanshi mulingile ukwitaba ku bwite bwakwe. Yehova alimulomba ukuti ‘mumweshe.’ Nomba kwena, umuntu-untu fye te kuti eshe Yehova kwati nakalimo Lesa taba na cishinka. (AbaHebere 3:8-10) Lelo kuti mwamwesha bufuke bufuke mu nshila isuma. Kuti mwacita shani pa kumwesha? Alilaya ukuti akatupaala. Nga mulemumfwila, ninshi mule-esha Lesa, cili kwati muleipusha amuti ‘Bushe akampaala?’ Na o Lesa, aaba ngo muntu uuli ne misha ya kufuta kuli imwe, e kutila alafwaya ukucita ifyo alaya. E ico, filya Lesa aleka ukuti ‘mulemwesha’ cilalenga mucetekele sana ukuti akamupaala nga nshi.

11, 12. Mapaalo nshi ayo Yehova apongolwela pa bantu bakwe ayo muipakisha?

¹¹ Kuti mwamona ukuti abantu ba kwa Yehova balapeela no mweo onse ifintu bakwata e lyo balapeela na malambo ya mampalanya. Kabili Yehova alibapongolwela ‘ipaalo ica kuti ne ncende yabula.’ Nalimo mwalimona ukuti ipaalo lyalipongolwelwa pa bantu ba kwa Lesa, pantu Inte sha kwa Yehova balitwalilila ukufula ukutendekela fye muli ba 1900 ukushinta na lelo. Na kabili mwalimona ifyo baishiba nga nshi “ifyashika fya kwa Lesa” ifingi. (1 Abena Korinti 2:10; Amapinda 4:18) Nomba baleni tontonkanishisheniko na mu nshila imbi: Bushe imwe mwanonkelamo shani?

¹² Limbi kwali inshita imo ilyo mwalepepa kumbi, nangu limbi kwali inshita ilyo mwaletendeka fye ukusangwa ku kulongana kwa Nte sha kwa Yehova. Pali iyi nshita, bushe mwalishibe sana icine ca mu Baibolo ico mulingile ukubalilapo ukwishiba? Nomba linganyeni ku fyo mwasambilila ukushinta na lelo ifyo mwingabelenga na mu Malembo ukulangilila ukuti fya cine. Nangu limbi tontonkanyeni pa fyakosa ifyo nomba mwaishiba, ukubikako na masesemo ayalefikilishiwa pali ino nshita. Kabili tontonkanyeni pa fyo nomba mwaishiba ukukonka ifilanda amalembo yamo aya mu Baibolo mu mikalile yenu. Ala kwena mwaliya pa ntanshi! Na imwe kuti mwalanda ifyo umutumwa Petro alandile ukuti: “Twakwate cebo ca kusesema icacilapo ukushininkishiwa.” (2 Petro 1:19) Ico tulelandapo ni ci: ‘Mwalisambilishiwa kuli Yehova’ kabili mwaba pa Bena Kristu ba cine, abafwaya ukubombela Yehova pe na pe. (Esaya 54:13) Nangu fye ni lelo line kuti mwalanda ukwabula no kutwishika ukuti alimupaala icine cine.

UKULEMBWA ISHINA LYENU MWI BUUKU LYA MWEO

13. Finshi mulingile ukucita pa kuti ishina lyenu lilembwe mwi buuku lya cibukisho?

¹³ Na kabili kuti mwabelenga pa mapaalo na yambi aya kwa Yehova pali Malaki 3:16: “E lyo abali na katiina kuli Yehova balesoshanya; na o Yehova alepeepeka, no kuumfwa, ne buuku lya kwibukisha lyalembelwe ku cinso cakwe, ilya babela Yehova akatiina, ilya batontonkanye shina lyakwe.” Abasubwa e lyo na baba mwi bumba likalamba bonse “babela Yehova [aka kene] katiina.” Bushe tamumona ukuti mwalishuka ukuba Inte ya kwa Yehova, ukuba pa bantu ababa ne nsansa, abatontonkanya pe shina lya kwa Yehova no kulicindika mu calo conse? Ala kwena kuti mwaba ne nsansa ukwishiba ukuti Yehova takalabe bucishinka bwenu!—AbaHebere 6:10.

14. Bushe bakasesema 12 bamwafwile shani ukwishiba imibele ne misango iyo Yehova apata?

¹⁴ Nomba bushe finshi mulingile ukucita pa kuti ishina lyenu lilembwe mwi “buuku lya kwibukisha,” ilyo Yehova na nomba acili alelemba? Ibukisheni ukufunda kumo ukusuma uko tusambilile mu mabuuku ya bakasesema 12. Twasambililemo pa musango wa myendele, pa mibele, e lyo na pa mibele ya mutima ifilenga Yehova ukukalipa. Ica kumwenako, bakasesema baletusoka ku misango iyapusana na mafunde yalungama aya kwa Lesa kabili iingatonaula fye, pamo nga “bucisenene” e lyo no “mupashi wa bucilende.” (Hosea 4:12; 6:9) Lesa alipata abashaba na cishinka ku bena mwabo, e lyo nga kukonka ici cine cishinte, kuti twatila alipata na bafyenga balupwa wabo. (Malaki 2:15, 16) Yehova aebele bakasesema ukukomaila pa kuti alipata ulufyengo lonse apo lwapela. (Amose 3:10) Abebele no kweba abantu ukuti belafyenga abanabo nangu ukubacenjesha mu makwebo yabo na mu fya ndalama. (Amose 5:24; Malaki 3:5) Na kabili bakasesema 12 bakomaile pa mulandu cacindamina ku baletungulula ukukaanaba na kapatulula pa kupingula nangu ukufwaya ukulamwenamo abene.—Mika 7:3, 4.

15. Mapaalo nshi yamo ayo munonkelamo nga mulekonka ifyo bakasesema 12 balandile?

¹⁵ Kwena bakasesema tabaletusambilisha fye ifintu ifyo tulingile ukupata. Baletusambilisha na pa busuma bwaba mu kukonka amafunde ya kwa Lesa. Bucibusa bwesu na Yehova bukakoselako. (Mika 4:5) Kabili nga mu cilonganino muli ubulungami, cikaba icakosa kabili icacincila. Ifyupo fyesu fikakosa, indupwa shesu na sho shikaba ishaikatana, tukabika na mano ku mulimo wa kwa Lesa. (Hosea 2:19; 11:4) Nga tuli no mulinganya no kuba ne cishinka, abantu bakatucindika. Nga tulepashanya Yehova inkumbu, tukaba ne cikuuku no luse kabili bamunyinefwe na bankashi yesu e fyo bakalacita na kuli ifwe. (Mika 7:18, 19) Kanshi, tukala-ampana na bantu abatemwa Lesa, bamunyinefwe na bankashi yesu, abatemwa icine no mutende, kabili icacindamishapo ca kuti tukaba ifibusa fya kwa Yehova. (Sekaria 8:16, 19) Bushe tamulesumina ukuti aya e mapaalo ayo muipakisha pali ino nshita?

16. Bupusano nshi tumona muno nshiku, kabili ubu bupusano bukalenga cikabe shani ilyo ubushiku bwa kwa Yehova ubwa bupingushi bukesa?

¹⁶ Pa mulandu wa fyo twasambilila, natumona fye apabuuta tuutu ubupusano “[ubwalekanya] uubombela Lesa no ushimubombela,” Umwina Kristu wa cine no wa bufi. (Malaki 3:18) Ifwe tulesha na maka yesu yonse ukukonka amafunde ya kwa Yehova, nomba abantu abengi bena mu calo tabafwaya nangu panono ukupepa. Kabili mwalishiba ukuti ubu bupusano buli no kulenga cikabipe nga nshi ilyo “bushiku ubukulu ubwa kwa Yehova” bukesa.—Sefania 1:14; Mateo 25:46.

17. Bushe ku ntanshi mukabomfya shani ifi fyebo muli cino citabo?

¹⁷ Kanshi twamona bwino bwino ukutila ukufunda kwa bakasesema 12 kulabomba na ino nshita. Nga mwakwata ubwafya nangu nga mulefwaya ukwishiba ifya kucita pa fintu fimo, mukwai kuti mwamona mu fyebo fisuma ifyaba mu fipandwa fili muli cino citabo. Nga mulecita ifi ninshi mulelangilila ukuti mulafwaya sana ukulasambilila inshila sha kwa Yehova no ‘kulaenda mu nshila shakwe.’ (Mika 4:2) Lelo tatulingile ukulatontonkanya ukuti ukwenda mu nshila sha kwa Yehova ni pali ino nshita fye epela. Ico mulingile ukufwaisha ca kuti ishina lyenu lilembwe mwi buuku lya kwa Yehova ilya cibukisho pe na pe, bushe te ifyo fine? Amabuuku ya bakasesema 12 kuti yamwafwa ukwishiba ifyo mwingacita.

ICITETEKELO KUTI CALENGA MWAISAPUSUKA

18. Cinshi icikalamba icifwaikwa icaba pali Yoele 2:32, kabili mashiwi nshi ayo umutumwa Paulo alundileko?

¹⁸ Ilyo Yoele alekomaila pa cikalamba icingalenga ukuti Yehova lyonse alemupaala, atile: “Onse uukalilila kwi shina lya kwa Yehova akapokololwa.” (Yoele 2:32) Abatumwa babili, Petro na Paulo, na bo balilandile aya yene mashiwi ayacindama. (Imilimo 2:21; Abena Roma 10:13) Paulo alilundileko icishinka na cimbi kuli uku kukonkomesha ilyo aipwishe ukuti: “Bakalilila shani ku o bashatetekela?” (Abena Roma 10:14) Nomba imwe, ukwabula no kutwishika mufwaya ukulalilila kwi shina lya kwa Yehova no kumutetekela pali ino nshita ukuya fye na ku ntanshi, umuyayaya!

19. Bushe finshi umuntu alingile ukucita pa kuti alilile kwi shina lya kwa Yehova?

¹⁹ Ukulilila kwi shina lya kwa Yehova takupelela fye pa kwishiba ishina lya kwa Lesa no kulalilumbula fye. (Esaya 1:15) Amashiwi ya kubalilapo ilyo tatulati tubelenge Yoele 2:32 yakomaila pa kulapila no kutetekela ukuti Yehova kuti atubelela uluse. (Yoele 2:12, 13) Ukulilila kwi shina lya kwa Lesa kwalola mu kuti tufwile ukumwishiba bwino, ukumutetekela, ukumumfwila, e lyo no kumubika pa ntanshi mu mikalile yesu. Ee, ukubombela Yehova e cilingile ukuba icacindamisha. Nga tulecita ifi, Lesa kuti atupaala, kuti twaba ne nsansa kabili kuti tuleikala bwino.—Mateo 6:33.

20. Nga mwatetekela, cilambu nshi icisuma ico mwingakwata?

²⁰ Yehova alandiile muli Habakuki ukuti: “Uwalungama akabelo wa mweo [ku citetekelo] cakwe.” (Habakuki 2:4) Bikeniko amano pa kuti tamulabile ici cishinka, icaba pa fishinka fyacindama mu Baibolo. Paulo alandile pali ili lembo imiku itatu mu fyebo fyakwe ifyapuutwamo ifyo alembele.b (Abena Roma 1:16, 17; Abena Galatia 3:11, 14; AbaHebere 10:38) Pa kuti mukonke ici cishinka mulingile ukuba ne citetekelo mwi lambo lya kwa Yesu Kristu ilyo atuulile pa membu shesu. Yesu alondolwele ukuti: “Lesa atemenwe aba pano calo ukutemwa kwa kuti apeele Umwana wakwe uwafyalwa eka, ukuti onse uumutetekela . . . abe no bumi bwa muyayaya.” Na kabili tubelenga ukuti: “Uutetekelo Mwana aba no bumi bwa muyayaya.” (Yohane 3:16, 36) Ili lambo lya musango yu lilalenga twaundapwa, no wingatundapa fye Mulubushi wesu. Ilyo Malaki alembele amashiwi ya kwa Yehova ayalanda pa fyo ubushiku Bwakwe ubukalamba bukonaula icalo cibifi ica kwa Satana, akonkenyepo ukuti: “Kakatulila imwe, mwe batiine shina lyandi, Akasuba ka bulungami akali no kuundapa mu mapindo ya kako.” Kanshi, Yesu ali no kundapa abantu ilyo akabalika nga kasuba. Muli uku kundapa mwaba no kundapa kwa ku mupashi ukwabako pali ino nshita. Lelo, tulasansamuka nga twatontonkanya ukuti mu calo cipya akondapa na malwele fye yonse!—Malaki 4:2.

21. Mulandu nshi mwingacetekelela amaka ya kwa Yehova aya kufikilisha ifyo afwaya ukucita?

²¹ Na kabili calicindama ukutetekela amaka ya kwa Lesa aya kufikilisha ukufwaya kwakwe. Mu nshiku sha kwa Mika, abantu calebafya ukucetekelana. Uyu kasesema atile: “Mwitetekela munenu, mwisuubila cibusa.” Lelo Mika ena takwete bwafya bwa kutetekela Yehova; na imwe e o mufwile ukutetekela. Mika atile: “Ine nakulalolela Yehova.” (Mika 7:5, 7) Yehova taaba nga bantu abaluka-aluka, ena alafwaya ukufikilisha ukufwaya kwakwe kabili alikwata na maka ya kufikilisha ico afwaya pa kuti akalangilile ukuti e walinga ukuteka mu muulu na pano calo e lyo no kupaala abantu ba citetekelo.

22. Finshi abalilila kwi shina lya kwa Yehova ne citetekelo bakapokelela?

²² Kuti mwalanda amashiwi ya kwa Habakuki no mweo onse aya kuti: “Ndesekelela muli Yehova, ndeangila muli Lesa we pusukilo lyandi.” (Habakuki 3:18) Kasesema Yoele alondolola umulandu abantu balilila kwi shina lya kwa Yehova no kumutetekela babela ne nsansa, atila: ‘Bakapokololwa’ nangu, ukulingana ne fyalandile umutumwa Paulo, ‘bakapusuka.’ (Yoele 2:32; Abena Roma 10:13) Bushe bali no kupokololwa kuli cinshi, nangu ukupusuka mu nshila nshi? Icitetekelo cenu calimupususha kale ku micenjelo ya kwa Satana na ku fintu fyabipa ificitikila abantu babifi. (1 Petro 1:18) Nomba cimbi ico mwingacetekela ca kuti muli no kupusuka ubonaushi bwa kapela makufi ubwa cino calo. Ilyo mukapusuka muli no kuipakisha amapaalo ayengi icine cine ayo bakasesema 12 basobele.

IFINTU FIMO FIMO IFIKABA MU PARADAISE

23, 24. (a) Finshi fimo fimo ifikaba mu Paradaise ifyo bakasesema 12 basobele? (b) Bushe ifi bakasesema 12 balembele fyalenga ukuti muletontonkanya finshi pa lwa nshita ya ku ntanshi?

²³ Abantu ‘abatiina Yehova’ bakapokelela amapaalo yabelelela. (Malaki 3:16) Bamo pali bakasesema 12 balandile pali fimo fimo ifikaba muli paradaise iili ku ntanshi, fimo ifyo balondolwele kuti fyalenga imitima yenu ukulabilima. Katulangilile, Mika atile: “Bakekalo muntu onse mwi samba lya mwangashi wakwe, kabili mwi samba lya mukunyu wakwe, tapakabe na wa kututumya.” (Mika 4:4) Icumi fye, mu bufumu bwa kwa Lesa, mukalaikala mu cibote kabili mukamwenamo mu mibombele yenu!

²⁴ Ala te ciloto fye ukulasubila ukuti ukulwala, ubulanda nangu fye ni mfwa fikafumapo. Ala nomba tontonkanyeni insansa sha bantu bakabuuka ku bafwa abakaba ne subilo lya kuba abapwililika! Bali no kumona ukufikilishiwa kukalamba ukwa mashiwi ya kwa Hosea 13:14 ayatila: “Bushe ndebashita mbafumye mu maka ya ku Mbo? Bushe ku mfwa e ko ndebalubula? Fili kwi ifikuko fyobe, we Mfwa? Ali kwi pumpunta obe, we ku Mbo?” Paulo alandile ukuti aya mashiwi yali no kufikilishiwa ku bakabuuka ukuya ku muulu.—1 Abena Korinti 15:55-57.

25. Bushe mukomfwa shani nga mwapusuka ukwingila mu calo cipya?

²⁵ Tacilingile ukwafya ukusumina ukuti kukaba ukubuuka kwa bafwa pano calo. (Sekaria 8:6) Ilyo Amose na Mika basobele ukuti abantu ba kwa Lesa bali no kubwela muli bunkole, cifwile camoneke kwati bufi. Lelo mwalishiba ukuti calicitike. (Amose 9:14, 15; Mika 2:12; 4:1-7) Umfweni ifyalandile ababwelele mu busha: “Twali nga baleloota: e lyo utunwa twesu twaiswilemo inseko, ne ndimi shesu shaiswilemo akapundu; . . . Yehova atucitile fikalamba; twasamwa.” (Amalumbo 126:1-3) Ala ifi e fyo mukayumfwa mu calo cipya nga mwapokelela “ipaalo, kukasuke kukabule incende ya kubapo.”

26. Mapaalo nshi ayo abantu abatontonkanya lyonse pa bushiku bwa kwa Yehova balolela?

²⁶ “Ubushiku bwa kwa Yehova” nga bwapita fye, asangulula ne calo cabipa, “ubufumu bukaba bwa kwa Yehova” icine cine. (Obadia 15, 21) Bushe kwena aya tayakabe mapaalo ayakalamba nga nshi ku bantu abakalaikala pa calo? Na kabili kuti mwaba pa bantu abakamona uko amashiwi yalembwa pali Malaki icipandwa 3 yakafikilishiwa ayatila: “E fyo Yehova wa milalo asosa, Kabili bakaba bandi, icikwatwa candi icaibela, . . . kabili nkabalanguluka, ifyo umuntu alanguluka umwana wakwe umwaume uumubombela.” (Malaki 3:17) Ukwabula no kutwishika, icitetekelo cenu pali ino nshita icamubika pa mutande wa bakapusuka, cili no kulenga mukakwate “ipaalo, kukasuke kukabule incende ya kubapo.” Yangu amapaalo tulolela ubusuma ee!

[Amafutunoti]

BUSHE IFI FYEBO FYAMUFIKA PA MUTIMA?

• Mwanonkelamo shani mu kusangululwa kwa ku mupashi ukwa bantu ba kwa Yehova aba muno nshiku?—Daniele 12:10; Malaki 3:12.

• Mulandu nshi mwingafwaila ukulundako amalambo ayo mutuula kuli Lesa?—Hosea 14:2; 1 Petro 2:5.

MULETONTONKANYA LYONSE PA BUSHIKU BWA KWA YEHOVA

• Mulandu nshi mwingatontonkanishisha ukuti calicindama sana ukulaibukisha ifyalembwa pali Habakuki 2:4?—Hosea 2:18, 20.

• Bushe bakasesema 12 bamukoselesha shani ukulalolela icalo cipya?—Amalumbo 126:1-3.

• Mulandu nshi mulingile ukukoselapo fye ukulatontonkanya lyonse pa bushiku bwa kwa Yehova?—Yoele 2:1, 2; Habakuki 2:2, 3.

[Icikope pe bula 180, 181]

Yehova alitwalilila ukuwamya abantu bakwe. Nga imwe bushe kuti mwaiwamyako mumo mumo?

[Icikope pe bula 187]

Yoele

[Ifikope pe bula 188, 189]

Ababomfi ba kwa Yehova bampana na bantu abatemwa icine no mulinganya