Ubumi bwa kwa Yesu no Butumikishi

Yesu Asuusha Bakakaanya Bakwe

YESU napesha amano umupwilapo bakakaanya bakwe aba butotelo ica kuti batiina ukumwipusha icili conse mu kulundapo. E co acito kuitendekelako ukusansalika ubumbulu bwabo. “Mutila shani ulwa kwa Kristu?” e fintu aipusha. “Mwana wa kwa ani?”

“Wa kwa Davidi,” e fyayasuka abaFarise.

Nangu cingati Yesu takeene ukuti Davidi aba cikolwe ca ku mubili ica kwa Kristu, nelyo Mesia, aipusha ukuti: “Nga kanshi Davidi pa kuba mu Mupashi amulumbula shani Shikulu, [pe Ilumbo 110] ati, [Yehova, NW] aeba Shikulu wandi, ati, Ikala ku kwa kulyo kwandi nsuke mbike abalwani bobe mwi samba lya makasa yobe? E ico apo Davidi amwita Shikulu, bushe mwana wakwe shani?”

AbaFarise batalala tondolo, pantu tabeshibe ukwishibikwa kwa cine ukwa kwa Kristu, nelyo uwasubwa. Mesia tali fye intuntuko ya buntunse iya kwa Davidi, nga fintu abaFarise mu kumoneka basumina, lelo e ko aali mu mulu kabili aali mukalamba wa kwa Davidi, nelyo Shikulu.

Ukwalukila nomba ku mabumba na ku basambi bakwe, Yesu asoka pa lwa bakalemba na baFarise. Apantu aba basambilisha Amalango ya kwa Lesa, ‘pa kuba baikala abene mu cipuna ca kwa Mose,’ Yesu acincisha ukuti: “Fyonse ifyo bamweba, citeni no kubaka.” Lelo alundapo kuti: “Mwicita umwabele milimo yabo. Pantu balasosa, lelo tabacita.”

Ba bumbimunda, kabili Yesu abasuusha mu mashiwi yamo yene yantu asosele lintu alelya mu ŋanda ya muFarise imyeshi mu kubangililako. “Imilimo yabo yonse bacita,” e fintu asosa, “ku kumonwa ku bantu.” Kabili apayanya ne fya kumwenako, ukusosa ukuti:

“Bapabula bafulakteria babo [ababamo amalembo, abo bafwala nge fya kubacingilila, NW].” Utu tufulakteria, twafwelwe pa mpumi nelyo ku kuboko, twakwatamo imbali shine isha Malango: Ukufuma 13:1-10, 11-16; na Amalango 6:4-9; 11:13-21. Lelo abaFarise bengilishako ubukulu bwa utu tufulakteria ku kupeela ukwebekesha kwa kuti bali abapimpa pa lwa Malango.

Yesu atwalilila ukuti “bakushe nseela sha malaya yabo.” Pa Impendwa 15:38-40 abena Israele bakambishiwa ukupange nseela ku malaya yabo, lelo abaFarise bapange ishabo ishikalamba ukucila pa fintu uuli onse umbi acita. Icili conse cicitilwa ku kulangisha! “Batemwa ne fya kukuwamapo fya ntanshi,” e fyo Yesu alondolola.

Ku ca bulanda, abasambi bakwe bene nabambukilwa kuli uku kufwaisha kwa kulumbuka. E co afunda ukuti: “Lelo imwe mwiitwa Rabi; pantu Kasambilisha wenu umo, na imwe muli ba bwananyina. Kabili mwiita uwa pano isonde, Tata; pantu Shinwe umo, uwa mu mulu; nangu kwitwa Intungulushi, pantu intungulushi yenu imo, ni Kristu.” Abasambi bafwile ukuleka ukufwaisha kwa kuba uwa kubalilapo! “Umukalamba muli imwe akaba kapyunga wenu,” e fyo Yesu akonkomesha.

Mu kukonkapo abilisha ukukonkana kwa kalanda pali bakalemba na baFarise, ukubeta mu kubwekeshabwekeshapo aba bumbimunda. “[Besalilo, NW] bufumu bwa mu mulu ku cinso ca bantu,” e fyo asosa, kabili “baliila bamukamfwilwa amayanda, no kupepa amapepo ayalepa aya bumbimunda.”

“Kalanda kuli imwe, mwe ntungulushi impofu,” e fyo Yesu asosa. Asenuka ukubulisha kwa baFarise ifyakatamikwa fya ku mupashi, nga fintu kwalangwa ku fipimo baicitila. Ku ca kumwenako, basosa ukuti, ‘Tacili mulandu nga ca kuti uuli onse alape tempele, lelo umo aba pe samba lya kukakililwako nga ca kuti alapila pali golde wa mwi tempele.’ Pa kubika kwabo ukwebekesha kwacilapo pali golde ukucila ukukatamika kwa ku mupashi ukwa ico cifulo ca kupepa, basokolola ubupofu bwabo ubwa mibele isuma.

Lyene, nga fintu acitile mu kubangililako, Yesu asenuka abaFarise pa kulekeleshe “fyafinako ifya Malango, [ukufilumbula, ubulungi, NW] no luse ne cishinka” ilintu balepeela ukusakamana kukalamba kuli minte, nelyo ulubali lwa pa ce kumi, ifya finsabwansabwa fishacindama.

Yesu aita abaFarise ukuti “muli ntungulushi impofu, abasusako akashishi, no kumine ngamali.” Basusako akashishi ukufuma ku mwangashi wabo, te pa mulandu fye wa kuti kashishi, lelo pa mulandu wa kuti mu nshila ya kusefya kaliba akashasanguluka. Nalyo line, ukusuulako kwabo imilandu yafinisha iya Malango kwalinganishiwa ku kumine ngamali, na yo mu nshila ya kusefya iishili nama yasanguluka. Mateo 22:41–23:24; Marko 12:35-40; Luka 20:41-47; Ubwina Lebi 11:4, 21-24.

◆ Mulandu nshi abaFarise batalalila tondolo lintu Yesu alebepusha pa lwa cintu Davidi asosele mwi Ilumbo 110?

◆ Mulandu nshi abaFarise bakushisha bafulakteria babo abakwatamo Amalembo ne nseela sha malaya yabo?

◆ Kufunda nshi Yesu apeela abasambi bakwe?

◆ Fipimo nshi ifyabo abene ifyo abaFarise bacita, kabili ni shani fintu Yesu abasenuka pa kulekeleshe milandu yafinisha?