Icipandwa 11

Shino Ni Nshiku Sha Kulekelesha!

 1. Mulandu nshi abengi bayumfwila abapelenganishiwa panono lintu balelanguluka pa mibele ya mu calo, lelo ni kwi uko ubulondoloshi bwashintililwapo ubwa filecitika mu calo bwingasangwa?

BUSHE icalo cesu icalulunkana caishilefika shani kuli cino cipimo? Ni kwi tukapela? Bushe walitala auipushapo ifipusho fya musango yu? Bamo balapelenganishiwa lintu balanguluka imibele ya calo. Ifintu pamo nge nkondo, amalwele, ne misoka filenga abantu ukulangulushiwa pa lwa fili ku ntanshi uku tuleya. Intungulushi sha mabuteko tashipeele subilo lyakumanina. Nangu cibe fyo, Lesa alipeela ubulondoloshi bwashintililwapo pa lwa ishi nshiku sha kulengo kumanama mu Cebo cakwe. Baibolo yashintililwapo ilatwaafwa ukumona apantu tufikile mu kupita kwa nshita. Itulangisha ukuti tuli mu “nshiku sha kulekelesha” isha ino micitile ya fintu.—2 Timote 3:1.

 2. Cipusho nshi abasambi ba kwa Yesu bamwipwishe, kabili ayaswike shani?

² Languluka ku ca kumwenapo, ifyo Yesu ayaswike ifipusho abasambi bakwe baipwishe. Inshiku shitatu pa ntanshi ya mfwa ya kwa Yesu, bamwipwishe abati: “Cinshi iciishibilo ca [kubapo, NW] kwenu, ne ca kupwa kwa pano isonde”?a (Mateo 24:3) Pa kwasuka, Yesu alandile pa lwa fintu fya kulungatika ifyali no kulacitika mu calo ne mibele iyo yali no kwishibisha mu kulengama ukuti iyi micitile yabula bukapepa yali naingila mu nshiku sha iko isha kulekelesha.

 3. Mulandu nshi imibele pe sonde yabipileko lintu Yesu atendeke ukuteka?

³ Nga fintu cilangililwe mu cipandwa cifumineko, ukupende nshita kwa Baibolo kutulenga ukusondwelela ukuti Ubufumu bwa kwa Lesa kale kale bwalitendeka ukuteka. Lelo kuti caba shani fyo? Ifintu fyalibipilako, tafyawaminako. Na kuba, ubu buli bushininkisho bwakosa ubwa kuti Ubufumu bwa kwa Lesa bwalitendeka ukuteka. Mulandu nshi? Ilumbo 110:2 litwishibisho kuti pa nshita imo Yesu aali no kuteka ‘mu kati ka balwani bakwe.’ Mu cishinka, incitilo yakwe iya kubalilapo lintu atendeke ukuteka nge Mfumu mu muulu yali ya kupoosa Satana ne fibanda fyakwe ifya bumalaika ku bwina mupalamano bwe sonde. (Ukusokolola 12:9) Cinshi cakonkelepo? Cali fye ni cintu Ukusokolola 12:12 kwasobele ati: “Kalanda kuli imwe, mwe calo na bemba! pa kuti Kaseebanya naikila pali imwe, ali ne cipyu cikalamba, pa kwishibo kuti ali ne nshita inono fye.” Nomba tuleikala muli ilya “nshita inono fye.”

 4. Ni mbali nshi shimo isha nshiku sha kulekelesha, kabili cinshi shilangilila? (Mona umukululo.)

⁴ Tacili ca kupapusha kanshi, ukuti icasuko ca kwa Yesu lintu aipushiwe icali no kuba iciishibilo ca kubapo kwakwe ne ca kupwa kwa pano isonde, cali ica kushilimuna. Imbali shalekanalekana isha ciishibilo shilesangwa mu mukululo uli pe bula 102. Nga fintu wingamona, abatumwa ba Bwina Kristu Paulo, Petro, na Yohane batupayanishisha ifishinka fyalundwapo ukulosha ku nshiku sha kulekelesha. Ca cine, imbali ishingi isha ciishibilo ne sha nshiku sha kulekelesha shisanshamo imibele ya kulengo kumanama. Nalyo line, ukufikilishiwa kwa aya masesemo kulingile ukutushinina ukuti iyi micitile ibifi naipalamina ku mpela ya iko. Lekeni tubebeteshe imbali shimo ishikalamba isha nshiku sha kulekelesha.

IMBALI SHA NSHIKU SHA KULEKELESHA

5, 6. Bushe amasesemo pa lwa nkondo ne fipowe yalefikilishiwa shani?

⁵ “Uluko lukemino luko, no bufumu bukemino bufumu.” (Mateo 24:7; Ukusokolola 6:4) Kalemba Ernest Hemingway aitile Inkondo ya Calo iya Kubalilapo, “ukwipayaulula kwacilishapo, ukwa kulofya, ukwabulo kulamwa ukwatala akucitika pe sonde.” Ukulingana ne citabo The World in the Crucible—1914-1919, uku kwali “kusaalala kupya ukwa nkondo, inkondo ya kubalilapo ukusanshamo icalo conse ukutula pa kubako kwa mutundu wa muntu. Ukulepa kwa iko, ukuluma, ne cipimo fyacilile pa cili conse icaishibikwe ku numa nelyo icaleenekelwa mu cinkumbawile.” Lyene kwaishile Inkondo ya Calo iya Cibili, iyali iyacilishapo ukonaula ukucila Inkondo ya Calo iya Kubalilapo. Profesa wa lyashi lya kale Hugh Thomas asoso kuti: “Umwanda wa myaka uwalenga 20 watekwa ku mfuti sha ciwaya, fimotoka fya minshinga, indeke sha mabomba ishiitwa B-52, ibomba lya nyukiliya, na mu kupelako, ifya kufwinta. Waishibikilwa ku nkondo isho abantu abengi bafwamo kabili ishacilapo ukonaula ukucila iili yonse imbi iya mu nkulo shafumako.” Ca cine, kwali ukulandapo sana pa lwa kutuula ifyanso pa numa Inkondo ya pa Kanwa yapwile. Nalyo line, lipoti umo apima ukuti pa numa ya mapange ya kucefyako ifyanso, ifya kupuusha fimo ifya nyukiliya mupepi na 10,000 ukufika kuli 20,000 ficili fikashalapo—ifyakwata amaka imiku 900 ukucila filya ifyabomfiwe mu Nkondo ya Calo iya Cibili.

⁶ “Kukaba ne fipowe.” (Mateo 24:7; Ukusokolola 6:5, 6, 8) Ukutula 1914 kwalibako ifipowe fikalamba nangu 20. Ififulo fyapamwa fisanshako Bangladesh, Burundi, Cambodia, China, Ethiopia, Greece, India, Nigeria, Russia, Rwanda, Somalia, na Sudan. Lelo te lyonse ifipowe filengwa no kubulwe fya kulya. “Mu makumi ya myaka aya nomba line ubwingi bwa fya kulya mu calo conse bwalingilishiwako mu kwangufyanya ukucila ubwingi bwa bantu,” e fyasondwelele ibumba lya basayantisti ba fya bulimi na baishibisha ifya bunonshi. “Lelo pa mulandu wa kuti abantu napamo ukufika ku mamilioni 800 baba abapiina icabipisha, . . . tabakwata indalama sha kushita ifya kulya fyakumanina ku kubapusushako ku bulwele bwa kondoloka ku nsala ubwa mutatakuya.” Inshita shimo shimo aba mapolitiki balayobekamo. Dr. Abdelgalil Elmekki uwa ku Yuniversiti ya Toronto aloshako ku fya kumwenapo fibili umo amakana ya bantu balefwa ku nsala ilintu ifyalo fyabo fyaleshitisha ifya kulya ifingi ku nse ya calo. Amabuteko yalemoneka ayacilapo ukwangwako ku kunonka indalama sha ku fyalo fimbi ku kushita ifyanso fya nkondo ukucila ukuliisha abatekwa ba yako. Cinshi Dr. Elmekki asondwelele? Icilenga sana icipowe “ni nshila ya kwananishishamo ifya kulya ne fishinte fya buteko.”

 7. Cili shani ilelo pa lwa fikuko?

⁷ “Ifikuko.” (Luka 21:11; Ukusokolola 6:8) Spanish influenza iya mu 1918-19 yaipeye abantu napamo amamilioni 21. “Icalo tacatalile acipamwapo na kepaya uyo waipeye abantunse abafule fyo mu kwangufyanye fyo,” e fyalembele A. A. Hoehling muli The Great Epidemic. Ilelo, ifikuko ficili filetwalilila. Cila mwaka, kansa epaya bantu amamilioni yasano, amalwele ya kupolomya yasenda imyeo ya tunya na bana ukucila pa mamilioni yatatu, kabili icifuba ca TB cipaya amamilioni yatatu aya bantu. Amalwele yambukila ukupeema, ukucilisha utulaso, yepaya abacaice abashilafika pa myaka ya kufyalwa isano amamilioni 3.5 cila mwaka. Kabili impendwa ya kusungusha iya bantu amabilioni 2.5, uko e kuti hafu wa bwingi bonse ubwa bantu ba mu calo conse, balacula ku malwele ayalengwa ku mulandu wa kubulwa amenshi nelyo ukukwata fye ayakowela no kubulwa ukwa kupooso busali. AIDS na yo ili ca kucinkulako calundwapo ica kuti, te mulandu ne fya kusangasanga mu fya miti, umuntu te kuti apwishe ifikuko.

 8. Ni mu nshila nshi abantu balelangishisha ukuti ‘balitemwe ndalama’?

⁸ “Abantu bakaba . . . abatemwe ndalama.” (2 Timote 3:2) Mu fyalo ukushinguluke calo conse, cimoneka kwati abantu balikwata ulunkumbwa lwa cuma ulushingekushiwa. Indalama umo afola e shipima “ukutunguluka,” “ifya kupwishishisha” fipiminwa ku bwingi bwa fintu umo akwata. “Ukutemwe fyuma kukatwalilila ukuba e fya kukunta mu bena America . . . kabili mu fyalo fimbi ifishita, kulecililako ukuba e cikunta cakatama na mo mwine,” e fyabilishe inkonkani ya mukalamba wa kampani akasabankanya. Bushe ifi fintu filecitika no ko wikala?

 9. Cinshi twingasosa pa lwa bucintomfwa ku bafyashi ubwasobelwe?

⁹ “Aba bucintomfwa ku bafyashi.” (2 Timote 3:2) Abafyashi ba muno nshiku na bakafundisha na bantu bambi, baliimwena ubushininkisho bwa kuti abana abengi tababa na mucinshi kabili ni bacintomfwa. Bamo muli aba abacaice ni pa mulandu wa kukalifiwa ku mibele yalubana iya bafyashi nelyo ukupashanya fye yene. Abana bafulilako nabaleka ukutetekela—kabili balepondokela—amasukulu, ifunde, ukupepa, na bafyashi babo. Kafundisha wa pa sukulu umo umukokole asosa ukuti: “Cilemoneka kwati icibelesho cabo cili kukanakwata umucinshi ku cili conse.” Nangu ni fyo, ku ca buseko, abana abengi abatiina Lesa baliba fya kumwenako mu mibele.

10, 11. Bushininkisho nshi ubwa kuti abantu bali abankalwe kabili abaumalala?

¹⁰ “Abankalwe.” (2 Timote 3:3) Ishiwi lya ciGreek ilyapilibulwa “abankalwe” lipilibula ‘uushingalamwa, uwasakaatuka, uushakwata icililishi ca buntunse no kulangulukilako.’ Fintu ici cilondolola bwino bakasongelekanya ba lukaakala abengi aba lelo! “Ubumi buli ubwa kutiinya, ubwaisulamo ukwipayana kwa kutiinya ica kuti pa kubelenga fye inyunshipepala ulingile ukushipa,” e fyasosele bakalemba ba nyunshipepala imo. Kapokola umo uulinda icifulo cabapo amayanda ayengi asosele ukuti imisepela iingi imoneka ukukanafwaya ukutontonkanyapo pa lwa fifumamo mu ncitilo shabo. Atile: “Bayumfwo kuti, ‘Nshishibe ubwa mailo ico bukaleta. Kuliilapo lelo line.’”

¹¹ “Abaumalala.” (2 Timote 3:3) Ili shiwi lyapilibulwa ukufuma kwi shiwi lya ciGreek ilipilibula “umukalushi, umukatu” kabili ililangilila “ukubulwe citemwishi ca cifyalilwa, ica mu lupwa.” (The New International Dictionary of New Testament Theology) Ee, mu fifulo mwine umo icitemwishi cilingile ukusangwa, e kuti mu mayanda, e mo tacisangwa no kusangwa. Amalipoti ya kusunga abanabo ba mu cupo buluku buluku, abana, kabili nelyo fye abafyashi abakote yaliseeka pa cipimo ca kutiinya. Ibumba limo ilya bakasapika lyalandilepo ukuti: “Ulukaakala lwa bantunse—nampo nga kutoba fye ulupi nelyo ukusunka, ukulasa umwele nelyo ukupike mfuti—lulacitika libili libili mu kati na nkati ka ndupwa ukucila ukuli konse kumbi mu bwikashi bwesu.”

12. Mulandu nshi twingasoselo kuti abantu bakwata fye imimonekele ya bukapepa?

¹² “Abantu abakwate mimonekele ya bukapepa, lelo abakaana amaka ya buko.” (2 Timote 3:5) Baibolo yalikwata amaka ya kwalula ubumi ukuti buwamineko. (Abena Efese 4:22-24) Lelo, abantu abengi ilelo babomfya imipepele yabo nge ca kufisamako ilyo balecita ifintu fishalungama ififulwisha Lesa. Ukubepa, ukwiba, na bucisenene filamonwa no kusuulwako ku ntungulushi sha mipepele. Imipepele iingi isambilisha ukutemwa lelo ilafwilisha inkondo. Ukulandapo kwa muli magazini wa India Today kwali kwa kuti: “Mwi shina lya kwa Kabumba Wapulamo, abantunse balicita ubukalushi bwabipisha ku bantunse banabo.” Na kuba, ukukansana ukwasende myeo ya bantu iyafulisha ukwa mu nshita sha nomba line—Inkondo ya Calo iya Kubalilapo ne ya Cibili—kwatendekele mu kati ka Kristendomu.

13. Bushininkisho nshi twakwata ubwa kuti isonde lileonaulwa?

¹³ ‘Ukonaule calo.’ (Ukusokolola 11:18) Basayantisti ukucila pali 1,600, ukusanshako abanonkapo ifilambu fya Nobel 104, ukufuma konse konse mu calo balisuminishe ku kusoka, ukwapeelwe na Union of Concerned Scientists (UCS), ukwalondolwele ukuti: “Abantunse ne filengwa na lesa baleya balepunkana. . . . Mu makumi ya myaka ayanono fye ayali no kukonkapo, takwakabe ishuko lya kusengauka akayofi.” Uyu lipoti alondolwele ukuti incitilo sha muntu ishaba sha cintiinya ku bumi “kuti shayalula icalo ica kuti tacakabe na maka ya kutungilila ubumi mu nshila cibutungililamo nomba.” Ukucepa kwa mutika wa ozone, ukukowesha amenshi, ukubungaule miti, umushili ukulufya umufundo, no kuloba kwa misango yalekanalekana iya nama ne fimenwa e fyaloshiweko nga mafya yalekabila ukubombelwapo mu kwangufyanya. UCS yatile: “Uku kusaminwa ku mibombele ya fya mweo iya kushintilila pali cimo ne cinankwe kuti kwasonkomona ifya kufumamo fyasaalala, ukusanshako ukubongoloka kwa mikulile ya fintu iyo tushumfwikisha bwino.”

14. Bushinino nshi wingapeela ubwa kuti Mateo 24:14 alefikilishiwa muli shino nshiku shesu?

¹⁴ “Imbila nsuma iyi ya bufumu ikabilwa ku fyalo fyonse.” (Mateo 24:14) Yesu asobele ukuti imbila nsuma ya Bufumu yali no kushimikilwa mu kusaalala kwe sonde, ku kubo bunte ku nko shonse. Mu kuba no kwaafwa kwa bulesa ne paalo, amamilioni ya Nte sha kwa Yehova balepeelesha amabilioni ya maawala kuli uyu mulimo wa kushimikila no kupanga abasambi. (Mateo 28:19, 20) Ee, Inte baliluke fyo kuti baba no mulandu wa mulopa nga ca kuti tababilishe imbila nsuma. (Esekiele 3:18, 19) Lelo balacankwa pa kuti cila mwaka amakana ya bantu mu kutasha balankula ku bukombe bwa Bufumu kabili balaishibisha nga Bena Kristu ba cine, uko e kuti, nge Nte sha kwa Yehova. Ukubombela Yehova na muli ifyo ukwananya ukwishiba Lesa lyaba lishuko lishingapimwa. Kabili pa numa iyi mbila nsuma yashimikilwa mu fyalo fyonse, impela ya ino micitile ibifi ikesa.

CITAPO CIMO PA BUSHININKISHO

15. Ni shani fintu imicitile ibifi iya nomba ikapwa?

¹⁵ Bushe ino micitile ikapwa shani? Baibolo isobela ukuti kukabo “bucushi bukalamba” ubo bukatendeka no kusansa “Babele mukalamba,” ubuteko bwa calo ubwa kupepa kwa bufi. (Mateo 24:21; Ukusokolola 17:5, 16) Yesu asosele ukuti muli ici ciputulwa ca nshita “akasuba kakafiishiwa, no mweshi tawakabalike, intanda shikapona mu muulu, ne fya maka fya mu muulu fikatenkaniwa.” (Mateo 24:29) Ici kuti pambi capilibula ukuti kukaba ifinjelengwe fya cine cine ifya mu muulu. Te mulandu ne cikacitika, lelo bashimapepo ba mu calo bena bakaba nabasansalikwa no kufumishiwapo. Lyene Satana, uwitwa “Goge [wa] mu calo ca Magoge,” akabomfya abantunse babotelela ku kusansa abantu ba kwa Yehova na maka yakwe yonse. Lelo Satana akafilwa, pantu Lesa akabapokolola. (Esekiele 38:1, 2, 14-23) “Ubucushi bukalamba” bukafika pa kalume pa Armagedone, “ubushiku bukalamba bwa kwa Lesa wa maka yonse.” Ikapyanga umulondo onse uwa kuteyanya kwa kwa Satana ukwa pe sonde, ukulenga amapaalo yabule mpela ukupongolokela umutundu wa muntu uukapusuka.—Ukusokolola 7:9, 14; 11:15; 16:14, 16; 21:3, 4.

16. Twaishiba shani ukuti imbali shasobelwe pa lwa nshiku sha kulekelesha shakuma shino nshiku shesu?

¹⁶ Imbali shimo isha busesemo bulondolola pa lwa nshiku sha kulekelesha nga shalangulukwa lumo lumo kuti shamoneka ukulosha ku fiputulwa fimbi ifya mu lyashi lya kale. Lelo lintu shabikwa pamo, ubushininkisho bwasesemwe busonta mu kulungatika ku nshiku shesu. Natulangilile: Imipelwa iipanga ififwati fya mu minwe ya muntu yaba mu musango wa kuti te kuti ibe ya muntu umbi. Mu kupalako, inshiku sha kulekelesha shalikwata ifya kushishibilako, nelyo ifya kucitika ifya shiko. Ifi fipanga ico twingeta ififwati ifyo fishingaba fya ciputulwa cimbi ica nshita. Lintu ubushininkisho bwalangulukilwa pamo no kulangilila kwa Baibolo ukwa kuti Ubufumu bwa kwa Lesa ubwa mu muulu nomba buleteka, butupayanishisha ishintililo lyakosa ilya kusondwelela ukuti shino mu cine cine ni nshiku sha kulekelesha. Mu kulundapo, kwaliba ubushininkisho bwamonekesha ubwa mu Malembo ubwa kuti ino micitile iibifi ili no konaulwa nomba line.

17. Ukwishiba ukuti shino ni nshiku sha kulekelesha kulingile ukutulenga ukucita cinshi?

¹⁷ Cinshi uli no kucitapo pa bushininkisho bwa kuti shino ni nshiku sha kulekelesha? Tala languluke ci: Nga ca kuti inkuuka yakalipisha yalepalamina, tulabombelapo ukwabulo kushingashinga ku kufwaya ukuicingilila. Kanshi cintu Baibolo yasobela pa lwa ino micitile cilingile ukutulenga ukucitapo cimo. (Mateo 16:1-3) Kuti twamona mu kulengama ukuti tuleikala mu nshiku sha kulekelesha isha micitile ya cino calo. Ici cilingile ukutulenga ukuti twaluke ukwaluka uko kulekabilwa pa kuti tukanonke ukusenamina kwa kwa Lesa. (2 Petro 3:3, 10-12) Ilyo alelanda ukuti wene e washingamwa ne pusukilo, Yesu abilikisha ubu bwite bwa mu kampampa: “Muyangwe, epali imitima yenu yalemenenwa ku buliili no kukolwakolwa na ’masakamika ya bwikashi buno, no bushiku bulya bwaisa pali imwe no kupumikisha kwati citeyo; pantu cikesa pali bonse abaikala pano nse ponse. Lelo loleni mu nshita yonse, mube abapaapaata ukuti mukose ku kupusuka kuli ifi fyonse ifikesapona, no kwiminina ku menso ya Mwana wa muntu.”—Luka 21:34-36.

[Futunoti]

MONA NGA NAWISHIBA

Cinshi Baibolo yasobele pa fyali no kucitika mu calo pa kutendeka kwa kuteka kwa kwa Kristu?

Ni mbali nshi shimo isha nshiku sha kulekelesha?

Cinshi cakushinina ukuti shino ni nshiku sha kulekelesha?

[Akabokoshi pe bula 102]

IMBALI SHIMO ISHA NSHIKU SHA KULEKELESHA

• Inkondo pa cipimo icishatala acimonwapo.—Mateo 24:7; Ukusokolola 6:4.

• Ifipowe.—Mateo 24:7; Ukusokolola 6:5, 6, 8.

• Ifikuko.—Luka 21:11; Ukusokolola 6:8.

• Ukwingilishiwako kwa bupulumushi.—Mateo 24:12.

• Ukonaule sonde.—Ukusokolola 11:18.

• Ifinkukuma.—Mateo 24:7.

• Inshita shayafya.—2 Timote 3:1.

• Ukucishamo ukutemwe ndalama.—2 Timote 3:2.

• Bucintomfwa ku bafyashi.—2 Timote 3:2.

• Ukumalala.—2 Timote 3:3.

• Ukutemwa ukwangala ukucisha ukutemwa Lesa.—2 Timote 3:4.

• Ukubulwo kuiteka.—2 Timote 3:3.

• Ukukanatemwa busuma.—2 Timote 3:3.

• Ukukanaishiba ubusanso bulepalamina.—Mateo 24:39.

• Bakapumya ukukaana ubushinino bwa nshiku sha kulekelesha.—2 Petro 3:3, 4.

• Ukushimikila Ubufumu bwa kwa Lesa ukwa mu cibulungwa conse.—Mateo 24:14.

[Icikope pe bula 101]