Ukutemwa Kwalibekatanya—Lipoti ya Kukumana kwa pa Mwaka

BONSE abasangilwe pa Cikuulwa ca Kulonganinamo ica Nte sha kwa Yehova mu Jersey City, ku New Jersey ku America bali ne nsansa icine cine. Pa 3 October, 2009, abantu ukucila 5,000 balilongene ilyo kwali ukukumana kwa pa mwaka ukwalenga 125 ukwa kabungwe ka Watch Tower Bible and Tract Society of Pennsylvania. Kwali na bambi abengi abalekutika kuli iyi programu no kutamba pa TV abali pa Bethel ya ku Brooklyn, ku Patterson, ne ya ku Walkill mu United States e lyo na pa Bethel yaba mu calo ca Canada. Abantu 13,235, abatemwa Yehova e bakutike kuli iyi programu ya ma-awala yatatu.

Ba Geoffrey Jackson ababa mwi Bumba Litungulula e bali ba ceyamani. Pa kutendeka programu, baitile ibumba lya bakemba ababa pa Bethel abaimbile inyimbo ukufuma mu citabo cesu icipya. Uwaleimbisha inyimbo ni Munyinefwe na umbi uwa mwi Bumba Litungulula, David Splane. Abalile alandako panono pa fyo ukwimba kwacindama mu kupepa kwasanguluka. Aebele ibumba lyonse ukwimbako inyimbo shitatu ishipya; ibumba lya bakemba lyaletala lyaimba, e lyo bonse abaliko baimbila pamo nabo. Balondolwele ukuti ico babomfeshe ibumba lya bakemba ukwimba inyimbo, ni co uku kwali kukumana kwaibela. Lelo te fyo cakulaba pa kulongana kwa cilonganino, ukwa muputule no kwa citungu.

Amalipoti Ukufuma ku Maofeshi ya Misambo

Aba mu Makomiti ya Misambo abasangilweko bashimike ifilecitika mu misambo 5. Ba Kenneth Little batile ku calo ca Canada nomba e ko bakulapulinta bamagazini bonse aba kubomfya mu United States na mu Canada mwine. Ici cilengele imilimo pa musambo wa ku Canada ukufulilako icine cine. Pa kuti balekwanisha ukubomba imilimo yonse, mashini ya kupulintila iyo bashita nomba line ili no kulabomba akasuba no bushiku, ama-awala yonse pamo 16.

Ba Reiner Thompson balandile pa mulimo wa Bufumu mu calo ca Dominican Republic, e lyo ba Albert Olih balondolwele ifyo umulimo ule-enda mu calo ca Nigeria. Ba Emile Kritzinger aba ku Mozambique batile, pa numa ya kucushiwa pa myaka iingi, mu mwaka wa 1992, Inte sha kwa Yehova shalilembeshiwe ukulingana ne funde. Muli ifi fyalo fyonse fitatu, bakasabankanya balifulilako sana muli ino myaka. Ba Viv Mouritz ababa pa musambo mu calo ca Australia balandile pa filecitika mu calo ca East Timor. Icalo ca Australia e cangalila umulimo wa Bufumu muli ici calo.

Amakomiti ye Bumba Litungulula

Mu mwaka wa 1976, amakomiti 6 aye Bumba Litungulula e yatendeke ukulolekesha pa milimo yonse iya Nte sha kwa Yehova. Mu kupita kwa nshita, aba mu mpaanga shimbi balisontelwe ukuti baleafwilishako. Nomba kwaba aba mu mpaanga shimbi 23 abafwilishako. Pali uku kukumana, balipwishepo bamunyinefwe 6 pali aba 23. Aba 6, babomba imyaka 341 mu mulimo wa nshita yonse. Nga kwakanya, ninshi cila muntu abomba imyaka 57.

Ba Don Adams, abatampile ukubombela pa Bethel mu 1943, balondolwele ukuti ababa muli Komiti ya Bakampanya ni bakampanya ba makomiti 5, kabili iyi komiti e imona ukuti yonse amakomiti 5 yalebombela capamo bwino bwino. Iyi komiti e ibombelapo nga kwaba amafya ayesa mu kupumikisha, na lintu kwaba ukupakaswa, imilandu ya mu filye, amasanso, ne fintu fimbi ifilekuma Inte sha kwa Yehova mwi sonde lyonse.

Ba Dan Molchan balondolwele umulimo wa baba muli Komiti Isakamana Ababomba pa Bethel. Batile bafwa bonse 19,851 ababomba pa Bethel mu calo conse ukukosha bukapepa bwabo e lyo kabili balabasakamana mu fyo bakabila mu bumi. Ba David Sinclair balandile pa fyo Komiti ya Kusabankanya ibombela pa kushita ifintu na bamashini ba kubomfya mu misambo. Ba Robert Wallen, ababombela pa Bethel pa myaka ukucila 60, e bakonkelepo. Bena bashimike ifyo Komiti ya Mulimo yangalila imilimo ibomba abantu ba kwa Yehova mwi bala na mu filonganino. Ba William Malenfant balandile mu kusupula pa mulimo ukalamba uwa kupekanya programu ya kulongana kwa citungu uo Komiti ya Kusambilisha ibomba. Na mu kulekelesha, ba John Wischuk balondolwele ukuti Komiti ya Kulemba e ishininkisha ukuti ifyebo fyapekanishiwa bwino bwino no kulembwa mu mpapulo shesu.a

Ilembo lya Mwaka wa 2010 Lilelanda pa Kutemwa

Abalandile amalyashi yakonkelepo yatatu ba mwi Bumba Litungulula. Ba Gerrit Lösch e babalilepo kabili balandile pa cipusho caleti, “Bushe mulafwaya ukutemwikwa?” Balondolwele ukuti umuntu fye onse alafwaya ukutemwikwa, kabili bonse tulomfwa bwino bambi nga batutemwa. Ukutemwa, e kwalenga tubeko, pantu e kwalengele ukuti Yehova atubumbe. Icilenga sana tuleshimikila no kusambilisha bambi ni co twalitemwa Yehova.

Nga twalikwata ukutemwa kwine kwine, tatwakatemwe fye abanensu, lelo takatemwa na balwani besu. (Mat. 5:43-45) Abasangilweko balibakoseleshe ukutontonkanya pa fyo Yesu afopawilwe, ukusekwa, ukufwishilwa amate, no kulaswa pa mulandu wesu. Te mulandu ne fi fyonse ifyo apitilemo, Yesu alipepeleko abashilika abalemupoopela pa cimuti. Bushe ici tacilenga tumutemwe sana? Lyena Munyinefwe Lösch abilishe ilembo lya mwaka wa 2010: Ilembo lya 1 Abena Korinti 13:7, 8, ilileti ‘Ukutemwa kushipikisha fyonse. Ukutemwa takupwa.’ Tatwakwata fye isubilo lya kwikala umuyayaya, lelo twalikwata ne subilo lya kutemwa bambi, no kutemwikwa umuyayaya.

Mwileka Amafuta Yacepe

Ba Samuel Herd batendeke ilyashi lyabo ne cilangililo. Basosele ati, tutile umunenu aisa na motoka ati muye pa bulendo bwa makilomita 50. Ilyo muleya na motoka, mwamona kalya kalanga amafuta yali mu motoka kalelanga ukuti amafuta yali mupepi no kupwa. Mwaeba umunenu ukuti amafuta yalapwa nomba line. E lyo amweba ati mwisakamana; mucili amalita 4 mwi tanki. Mwaendako fye panono, na mafuta yapwa. Bushe kuti cawama ukwenda na motoka umuli fye amafuta ayanono namwishiba no kuti yalamupwila pa nshila? Awe, cawamapo ukwisusha itanki! Na ifwe tufwile ukwisusha amafuta mwi tanki lyesu, na ya mafuta kwishiba Yehova.

Pa kucita ifyo, tufwile ukulabika aya mafuta mwi tanki lyesu libili libili. Kwaba inshila shine isha kucitilamo ifi. Iya kubalilapo, kulaisambilisha Baibolo cila bushiku pa kuti twaishiba sana ifyabamo. Tufwile kumfwikisha ifyo tulebelenga, te kubelenga fye amashiwi. Ica bubili, kulakwata Amapepo ya Lupwa. Bushe tulesusha itanki lyesu cila mulungu nangu tubikamo fye amafuta ayanono? Ica butatu, kusangwa kwi sambililo lya Baibolo ilya pa cilonganino e lyo na ku kulongana kumbi. Icalenga bune, kuya ukushili ifya kutupumfyanya no kwetetula, atemwa ukutontonkanya pa mibele ya kwa Yehova. Amalumbo 143:5 yatila: “Naibukisha inshiku sha ku kale; ntontonkanya pa micitile yenu yonse.”

“Abalungama Bakabalika”

Ba John Barr e balandile ilyashi lyalenga butatu kabili ilya kulekelesha, umo balondolwele icilangililo ca kwa Yesu ica ngano ne fyani. (Mat. 13:24-30, 38, 43) Cilya cilangililo cilanda pa nshita ya “kulobolola” ilyo “abana ba bufumu” bakalonganikwa e lyo ne fyani na fyo fikalonganikwe no kufyoca.

Munyinefwe Barr alondolwele bwino bwino ukuti uku kulonganika takwakatwalilile umuyayaya. Alandile pali Mateo 24:34, apatila: “Abantu ba nkulo ino tabakafwe nakalya mpaka fyonse ifi fikacitike.” E lyo abelengele imiku ibili amashiwi ya kuti: “Yesu alelanda pali balya basubwa abamweneko intendekelo ya nshiku sha mpela mu 1914 na bambi abaishilesubwa abakamonako ukutendeka kwa bucushi bukalamba lelo abaikeleko pa calo pa nshita imo ine na basubwa abamweneko ifya mu 1914.” Tatwaishiba bwino ubutali bwa nshita ubo “abantu ba nkulo” iyo bakatwalilila ukuba aba mweo, lelo “inkulo” ni aya yene mabumba yabili abaali no mweo pa ciputulwa ca nshita cimo. Nangu ca kuti abasubwa balipusanapusana imyaka ya kufyalwa, aba muli aya mabumba yabili ayapanga inkulo, baba aba mweo pa nshita imo ine, pa ciputulwa cimo mu nshiku sha kulekelesha. Cawama sana ukwishiba ukuti abasubwa abaiceko abaali no mweo pa nshita imo ine na basubwa abamweneko ilyo icishibilo catampile ukumoneka mu 1914 bakaba pano calo ilyo ubucushi bukalamba bukatendeka.

“Abana ba bufumu” balapembelela icilambu cabo ica ku muulu, lelo bonse fye tufwile ukutwalilila ne citetekelo, ukulabalika ukufika na ku mpela. Twalikwata ishuko lya kumona uko “ingano” shilelonganikwa mu nshiku shesu.

Pa numa ya kwimba ulwimbo lwa kulekelesha, ba Theodore Jaracz aba mwi Bumba Litungulula balipepele ipepo lya kwisalila. Ala mwandini ukukumana kwa pa mwaka kwalikuulile abasangilweko!

[Futunoti]

[Akabokoshi pe bula 5]

ISUKULU LYA BAELUDA

Pa kukumana kwa pa mwaka, ba Anthony Morris, aba mwi Bumba Litungulula, babilishe ukuti isukulu ilya kukansha baeluda lili no kutwalilila. Isukulu lya baeluda ba mu United States lyatendeke ku kutampa kwa mwaka wa 2008 ku Patterson, mu New York. Ikalasi lyalenga 72 e lyo fye lyapwile, kabili baeluda 6,720 balisangwa kale kuli ili sukulu. Lelo baeluda abashilasangwako e bengi. Mu United States mweka fye, mwaba baeluda ukucila pali 86,000. E ico, Ibumba Litungulula lyalisuminisha kuti kube isukulu na limbi ku Brooklyn, mu New York, ukutendeka pa 7 December, 2009.

Bakangalila benda bane, bali no kukanshiwa ku Patterson pa myeshi ibili pa kuti bakabe bakafundisha muli ili sukulu. Aba bali no kukuukila ku Brooklyn ku kusambilisha, kabili kukaba na bambi bane abo bakakansha. Aba nga bakanshiwa, bakaya mu kusambilisha ku Brooklyn, e lyo balya babalilepo ukukansha bane, bali no kuya mu kusambilisha ku masukulu ayakalabela mu Fikuulwa fya Kulonganinamo na mu Mayanda ya Bufumu. Bakatwalilila ukukansha bakafundisha mpaka bakafike 12 pa kuti bakalesambilisha amasukulu 6 cila mulungu mu ciNgeleshi mu United States. Lyena, bakesakansha bakafundisha na bambi bane aba kusambilisha mu ciSpanish. Ili isukulu talilepyana pe Sukulu lya Butumikishi bwa Bufumu; ubufwayo bwa ili sukulu kwafwilisha baeluda ukutwalilila ukulunduluka mu cine. Mu fyalo fimbi ifyashala, aya masukulu yakatendeka mu mwaka wa mulimo uwa 2011, kabili yakalabela mu Fikuulwa fya Kulonganinamo na mu Mayanda ya Bufumu.

[Ifikope pe bula 4]

Pa kutendeka programu ya kukumana kwa pa mwaka, baimbile inyimbo ukufuma mu citabo icipya icitila “Imbileni Yehova”