Ubumi bwa kwa Yesu no Butumikishi

Ukucetekela Mu Kati ka Nshiku sha Kulekelesha

LINTU Cibili, Nisani 11, ilepalamina ukupwa, Yesu na batumwa bakwe ali pa Lupili lwa Miolife. E lintu fye bashile icifulo ce tempele, ico bengamona pe samba, kabili Yesu acilalanshanya na bene ifishibilo fya kubapo kwakwe mu maka ya Bufumu kabili ne fya mpela ya micitile ya fintu.

Ukutwalilila ukulandapo kwakwe, Yesu abasoka pa lwa kukonka ba Kristu ba bufi. Ukwesha kuli no kucitwa, e fintu asosa pa kuti, “balufye na basalwa bene, nga cabe cingacitwa.” Lelo, ukupala bakapumpe abamwena apatali, aba abasalwa bakalongana uko ica kulya ca ku mupashi cikasangwa, ukukulumbula, kuli Kristu wa cine pa kubapo kwakwe ukwa kukanamoneka. Tabakalufiwe no kulonganikilwa pamo na Kristu wa bufi.

Ba Kristu ba bufi kuti bacita fye imimonekele imoneka. Mu kucilana, ukubapo kwa kwa Yesu kukaba mu kukanamoneka. Kukacitikako mu nshita ya kutiinya iya lyashi lya kale ilya mutundu wa muntu, nga fintu Yesu asosa ukuti: “Akasuba kakafiishiwa, no mweshi tawakabalike.” Ee, ici cikaba ciputulwa ca nshita icafiitisha ica kubako kwa mutundu wa muntu. Cikaba kwati akasuba nakafiishiwa mu kati ka nshita ya kasuba, no mweshi kwati taupeele ulubuuto lwa uko ubushiku.

“Ifya maka fya mu mulu fikantekaniwa,” e fyo Yesu atwalilila. Muli fyo alangilila ukuti imyulu ya cine cine ikabuula imimonekele ya cishibilo. Imyulu tayakabe fye bwikalo fya fyuni, lelo ikesulamo ne ndeke sha nkondo, amaroketi, no kufwailisha kwa mu lwelele. Umwenso no lukakala fikacila icili conse icakumanishiwa mu lyashi lya kale ilyapita ilya mutundu wa muntu.

Nge ca kufumamo, Yesu asosa ukuti, kukabako “inkumbabulili ku nko ishili mu kupelelwa ku kululuma kwa bemba na matamba, abantu bakaleko mweo ku mwenso, na ku kulolele fikesapona pa ba pano nse.” Mu cine cine, ici ciputulwa ca nshita icafiitisha ica kubako kwa mutundu wa muntu cikatungulula ku nshita lintu, nga fintu Yesu asosa ukuti, “ciishibilo ca Mwana wa muntu mu mulu; e lyo ne nko shonse sha pano isonde shikapumapo imisowa.”

Lelo te bonse abakalapumapo imisowa lintu ‘Umwana wa muntu aisa mu maka’ ku konaula imicitile ibifi iya fintu. “Abasalwa,” ba 144,000 abakakana na Kristu mu Bufumu bwakwe ubwa mu mulu, tabakapumepo imisowa, nelyo fye banabo, abo Yesu mu kubangilila acita “impaanga shimbi” ishakwe. Te mulandu no kwikala mu ciputulwa ca nshita icafiitisha mu lyashi lya kale ilya mutundu wa muntu, aba balankulako ku kukoselesha kwa kwa Yesu ukwa kuti: “Lelo pa kutendeko kubako ifi fintu, inukeni, inuneni imitwe; pantu ukulubuka kwenu nakupalama.”

Pa kuti abasambi bakwe baali no kwikala mu kati ka nshiku sha kulekelesha bengapima ukupalama kwa mpela, Yesu apeela ici cilangililo ukuti: “Moneni umukunyu, ne miti yonse; ilyo nailemba, e lyo mwamona no kwishiba mwe bene, ukuti nomba amainsa yali mupepi. Ifyo fine na imwe, ilyo mukamona ifi fintu fileisa, ishibeni ukuti ubufumu bwa kwa Lesa buli mupepi. Ndemwebe cine, nati, Inkulo ino tayakapite iyo, kano fikasuke afipona fyonse ifi.”

Muli fyo, lintu abasambi bakwe bamona imbali ishingi ishalekanalekana isha cishibilo shilefikilishiwa, balingile ukwishiba ukuti impela ya micitile ya fintu ili mupepi no kuti Ubufumu bwa kwa Lesa mu kwangufyanya bukapyangapo ububifi bonse. Na kuba, impela ikacitikako mu kati ka nshita ya bumi iya bantu bamwene ukufikilishiwa kwa fintu fyonse Yesu asobela! Ukukonkomesha abasambi bakwe abali no kwikalako mu kati ka nshiku sha kulekelesha ishayafya, Yesu asosa ukuti:

“Muyangwe, epali imitima yenu yalemenenwa ku buliili no kukolwakolwa na masakamika ya bwikashi buno, no bushiku bulya bwaisa pali imwe no kupumikisha kwati citeyo; pantu cikesa pali bonse abaikala pano nse ponse. Lelo loleni mu nshita yonse, mube abapaapaata ukuti mukose ku kupusuka kuli ifi fyonse ifikesapona, no kwiminina ku menso ya Mwana wa muntu.” Mateo 24:23-51; Marko 13:21-37; Luka 21:25-36; Ukusokolola 14:1, 3; Yohane 10:16.

◆ Mibele nshi iya calo ishibisha ukubapo kwa kwa Kristu?

◆ Ni lilali lintu ‘inko shonse isha pe sonde shikapumapo imisowa ishine,’ lelo cinshi abakonshi ba kwa Kristu bakalacita?

◆ Cilangililo nshi Yesu apayanya ku kwaafwa abasambi bakwe aba nshita ya ku ntanshi ukwiluka lintu impela yapalamina?

◆ Kukonkomesha nshi Yesu apayanishisha abasambi bakwe aba kalaikala mu kati ka nshiku sha kulekelesha?