Ubumi bwa kwa Yesu no Butumikishi

Ukumoneka kwa Kupelako, na Pentekoste 33 C.E.

PA NSHITA imo Yesu acita amapekanyo ya kuti bonse 11 abatumwa bakwe bamukumanye pa lupili mu Galili. Abasambi bambi mu kumonekesha baebwa pa lwa kukumana, kabili ubwingi bonse ubwa kucila pa bantu 500 balongana. Mwandi libungano lya nsansa ici cashininkisha ukuba lintu Yesu amoneka no kutendeka ukubasambilisha!

Pa kati ka fintu fimbi, Yesu alondolola kwi bumba likalamba ukuti Lesa namupeela amaka yonse mu mulu na pe sonde. “E ico kabiyeni,” e fyo akonkomesha, “kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo: mulebasambilisha ukubaka fyonse ifyo namwebele.”

Citontonkanye! Abaume, abanakashi, na bana bonse bapokelela uku kutumwa kumo kwine ku kwakana mu mulimo wa kupanga abasambi. Bakakaanya bakesha ukulesha ukushimikila kwabo no kusambilisha, lelo Yesu abasansamusha ati: “Moneni, ine nakulaba na imwe ukufika na [ku kusondwelela kwa micitile ya fintu, NW].” Yesu atwalilila na bakonshi bakwe ukupitila mu mupashi wa mushilo, ukubafwilisha ukufikilisha ubutumikishi bwabo.

Yesu ailanga umwine uwa mweo ku basambi bakwe pa ciputulwa ca nshiku 40 ukukonka pa kubuushiwa kwakwe. Mu kati ka uku kumoneka, abakambisha pa lwa Bufumu ba kwa Lesa, kabili akomaila pa fintu ifishingamo fyabo fili pamo nga basambi bakwe. Pa kashita kamo amoneka fye na kuli munyina citika Yakobo no kushinina uyu uwali pa nshita imo uushasumina ukuti mu cine cine Wene ni Kristu.

Ilintu abatumwa bacili mu Galili, Yesu mu kushininkisha abakambisha ukubwelela ku Yerusalemu. Lintu akumana na bene kulya, asosa kuli bene ukuti: “Befuma ku Yerusalemu, lelo balinde ico Wishi alaile; atile, E cintu mwaumfwile kuli ine; ica kuti Yohane wena abatishe ku menshi, lelo imwe mukabatishiwa ku mupashi wa mushilo tapakapite inshiku ishingi.”

Pa numa Yesu akumana na kabili na batumwa bakwe no kubatungulula ku nse ya musumba ukufika ku Betani, iyabela pa mutentemuko wa kukabanga uwa Lupili lwa Miolife. Mu kupapusha, te mulandu ne cili conse cintu asosele pa lwa kufumapo kwakwe bwangu bwangu ukuya ku mulu, bacili nabasumina ukuti Ubufumu bwakwe bukemikwa pe sonde. E co baipusho kuti: “Mwe Shikulu, bushe ni mu nshita ino ine mulebwesesho bufumu kuli Israele?”

Ukucila ukwesha na kabili ukulungika imfundo shabo ishalubana, Yesu ayasuka mu kwanguka ukuti: “Te cenu ukwishibe nshita nangu myaka ifyo Tata abikile mu maka yakwe.” Lyene, ukukomaila na kabili pa mulimo bafwile ukucita, atila: “Mukapokelela amaka ilyo ukeso mupashi wa mushilo pali imwe; kabili mukabe nte shandi mu Yerusalemu, na monse mu Yudea na Samaria, no kufika ku mpela ya pano nse.”

Ilintu bacili balelolesha, Yesu atendeka ukwima ukulola mu mulu, kabili lyene ikumbi lyamufisa ukufuma ku menso yabo. Pa numa ya kufumyako umubili wakwe uwa munofu, anina ku mulu ngo muntu wa mupashi. Ilyo aba 11 batwalilila ukutonta amenso mu mulu, abaume 2 abafwele amalaya yabuuta bamoneka pali bene. Aba bamalaika bafwele imibili ya buntunse baipusho kuti: “Mwe bena Galili, cinshi mwimininine mulelolesesha mu mulu? Uyu Yesu uwasendwa pali imwe no kutwalwa mu mulu, akesa ifi fine  umusango uyu wine   mwamumwenamo aleya mu mulu.”

Umusango untu Yesu afuminapo nomba line pe sonde uli uwabula ukulisha kwa ntandala kwa cintubwingi ukwa kusefya kabili mu kuba fye na bakonshi bakwe aba busumino ukumonako. E co akabwela mu musango umo wine—ukwabula ukulisha kwa ntandala kwa cintubwingi ukwa kusefya kabili mu kuba fye na bakonshi bakwe aba busumino ukwiluka ukuti alibwela kabili alitendeka ukubapo kwakwe mu maka ya Bufumu.

Abatumwa nomba batentemuka Ulupili lwa Miolife, baabuka Umukonko wa Kedrone, no kwingila na kabili mu Yerusalemu. Baikala mulya mu kumfwila ukukambisha kwa kwa Yesu. Inshiku ikumi pa numa, pa Mutebeto wa ciYuda uwa Pentekoste 33 C.E., ilintu mupepi na 120 aba mu basambi balongene mu muputule wa pa mulu mu Yerusalemu, iciunda kwati cipupu cikali ica mwela mu kupumikisha caisusha iŋanda yonse. Indimi ishabe misasatwe kwati sha mulilo shamoneka, kabili lumo lwaikala pali umo umo uwa abo abasangilwepo, kabili abasambi bonse batendeka ukulandila mu ndimi shapusanapusana. Ici cili kupongololwa kwa mupashi wa mushilo untu Yesu alaile! Mateo 28:16-20; Luka 24:49-52; 1 Abena Korinti 15:5-7; Imilimo 1:3-15; 2:1-4.

◆ Ni kuli bani Yesu apeela amakambisho ya kushalikapo pa lupili mu Galili, kabili cinshi cili aya makambisho?

◆ Kusansamusha nshi Yesu apayanishisha abasambi bakwe, kabili ni shani fintu akulaba na bene?

◆ Ni pa butali bwaba shani pa numa ya kubuuka kwakwe Yesu amoneka ku basambi bakwe, kabili cinshi abasambilisha?

◆ Ni ku muntu nshi, uyo mu kushininkisha uushali umusambi pa ntanshi ya mfwa ya kwa Yesu, Yesu amonekela?

◆ Kukumana nshi kubili ukwa kupelako Yesu akwata na batumwa bakwe, kabili cinshi cacitika pali utu tushita?

◆ Ni shani cabo kuti Yesu akabwela mu musango umo wine untu afuminapo?

◆ Cinshi cacitika pa Pentekoste 33 C.E.?