Umulandu Tulingile Ukubombela Imilimo

CINSHI watemwisha, imilimo nelyo ukwangala?— Kwena, ukwangala takwabipa. Baibolo ilanda pali Yerusalemu ‘waisulamo utulumendo no tukashana tuleangala mu misebo ya uko.’—Sekaria 8:5.

Kasambilisha Mukalamba aletemwa ukumona abaice baleangala. Ilyo ashilaisa pe sonde, atile: “Naishileba kuli [Lesa] ngo mubomfi uwaishibisha imilimo . . . uwalesekelela ku cinso cakwe mu nshita shonse.” Mona ukuti Yesu alebombela pamo na Yehova ku muulu. Kabili ilyo ali kulya, atile: “Natemenwe abana ba bantu.” Nge fyo twasambilile, Kasambilisha Mukalamba alepoosa amano kuli bonse, pamo na baice.—Amapinda 8:30, 31, NW.

Bushe uletontonkanya ukuti Yesu aleangala ilyo ali umwaice?— Napamo. Lelo apo ali “umubomfi uwaishibisha imilimo” ku muulu, bushe na pe sonde alebomba?— Kwena, Yesu aitilwe ati “umwana wa kwa kabasa.” Lelo na kabili aitilwe ati “kabasa.” Bushe cinshi ici cilelanga?— Yosefe, uwakushishe Yesu ngo mwana wakwe afwile alimusambilishe. E co Yesu na o aishileba kabasa.—Mateo 13:55; Marko 6:3.

Bushe Yesu ali ni kabasa wa musango nshi?— Apo ali uwaishibisha imilimo ku muulu, bushe tauletontonkanya ukuti na pe sonde aishileba uwaishibisha ukubasa?— Tontonkanya ifyo umulimo wa bukabasa wakosele ilya nshita. Yesu napamo aleya mu kuteme miti, ukuputaula ilya miti, ukusenda imbao ku ng’anda no kubasa shilya mbao ukupangamo amatebulo, amabenchi, ne fintu fimbi.

Bushe uletontonkanya uyu mulimo walelenga Yesu ukusekelela?— Bushe kuti watemwa nga ulepanga amatebulo yasuma ne fipuna ne fintu fimbi ifyo abantu bengabomfya?— Baibolo itila cisuma umuntu ‘ukusamwa mu mulimo wakwe.’ Imilimo ilaleta insansa isho ushingasanga mu kwangala.—Lukala Milandu 3:22.

Cine cine, umulimo ulaleta ubusuma ku matontonkanyo yesu ne mibili. Abana abengi bekala fye no kulatamba TV nelyo ukwangala ifyangalo fya pa vidio. Ici cilenga baina sana kabili tabakwata maka, kabili tababa abasansamuka. Na kabili tabalenga bambi ukuba ne nsansa. Cinshi tufwile ukucita pa kuba ne nsansa?—

Mu Cipandwa 17 ica cino citabo twasambilile ukuti ukupeela no kwafwa bambi filaleta insansa. (Imilimo 20:35) Baibolo ita Yehova ati “Lesa wa nsansa.” (1 Timote 1:11, NW) Kabili, nga fintu tubelenga mu Amapinda, Yesu ‘alesekelela ku cinso cakwe mu nshita shonse.’ Mulandu nshi Yesu abelele ne nsansa?— Alandile umulandu umo ilyo asosele ati: “Tata acili alebomba, na ine ndebomba.”—Yohane 5:17.

Ilyo Yesu ali pe sonde, tali kabasa ubumi bwakwe bonse. Yehova Lesa amukwatile umulimo waibela pe sonde. Bushe uyu mulimo waliwishiba?— Yesu alandile ati: ‘Ndi no kubile mbila nsuma ya bufumu bwa kwa Lesa, pa kuti e co natuminwa.’ (Luka 4:43) Inshita shimo ilyo Yesu aleshimikila abantu, balesumina muli wene no kutendeka ukwebako bambi ifintu alelanda, nge fyacitile uyu mwanakashi umwina Samaria ulemona pano.—Yohane 4:7-15, 27-30.

Yesu aleumfwa shani pa kubomba uyu mulimo? Bushe uletontonkanya ukuti alefwaya ukubomba uyu mulimo?— Yesu atile: “Ica kulya candi kucito kufwaya kwa wantumine, no kupwisho mulimo wakwe.” (Yohane 4:34) Bushe ulatemwa ukulya ica kulya watemwisha?— Ico cakwafwa ukwishiba ifyo Yesu atemenwe umulimo Lesa amupeele.

Lesa atupangile mu nshila ya kuti ukusambilila imilimo kuletuletela insansa. Atila ica bupe Cakwe ku bantu ca kuti ‘balesekelela mu milimo yabo.’ E co nga wasambilila ukubomba ilyo ucili umwaice, ubumi bobe bonse bukaba ubwa nsansa.—Lukala Milandu 5:19, NW.

Ico tacilepilibula ukuti umwana umunono kuti abomba umulimo wa muntu umukalamba, lelo bonse kuti twabombako imilimo. Abafyashi bobe napamo balaya ku ncito cila bushiku pa kuti basange indalama sha kuliishishamo ulupwa ne ng’anda umwa kwikala. Kabili nga fintu ufwile ukwishiba, kwaliba imilimo iingi iilingilwe ukubombwa pa ng’anda ku kuisunga iya busaka.

Milimo nshi wingacita iingaleta ubusuma ku ba mu lupwa bonse?— Kuti waafwa ukupekanya apa kuliila, ukusamfye mbale, ukuyapoosa ifisoso, ukuwamya uko ulaala, no kusha wabika bwino ifyo wacilaangasha. Napamo kale kale ulacitako fimo pali ifi. Iyo milimo ilaleta ubusuma ku lupwa.

Natumone ifyo imilimo ya musango yu ileta ubusuma. Ufwile ukubika bwino ifya kwangasha pa numa ya kwangala. Mulandu nshi wingalandila ati ici calicindama?— Cilenga ing’anda ukuba iya busaka, kabili kuti calenga amasanso ukukanabako. Nga ca kuti taubikile bwino ifyo wacilaangasha, kuti bushiku bumo banoko baleisa nabasenda ifipe e lyo banyanta pa co wacilaangasha. Kuti baipununa no kupona no kuicena. Kuti napamo baya na ku cipatala. Ico kuti cabipa te fyo?— E co lintu wabika bwino ifyo wacilaangasha, ico cileta ubusuma kuli bonse.

Kwaliba umulimo umbi uo abaice bakwata. Ku ca kumwenako, ifya ku sukulu. Ku sukulu usambilila ifya kubelenga. Abaice bamo balitemwa ukubelenga, lelo bambi batila calikosa. Nangu camoneka ukukosa pa kubala, ukatemwa nga waishiba ukubelenga bwino. Nga waishiba ukubelenga, fingi ifisuma ifyo wingasambilila. Kuti walaibelengela ne buuku lya kwa Lesa, Baibolo. E co, cisuma nga ulecita bwino ifya ku sukulu, bushe te ifyo?—

Kwaliba abantu bamo abashifwaya ukubomba. Napamo walishibako umuntu uucite fyo. Lelo apo Lesa atupangile ukulabomba, tufwile ukusambilila ifya kuipakisha ukubomba. Bushe Kasambilisha Mukalamba aipakishe shani umulimo wakwe?— Wali kwati kulya ica kulya atemwisha. Kabili mulimo nshi alelandapo?— Ukweba bambi pali Yehova Lesa ne fyo bengapokelela umweo wa muyayaya.

E co pano pali icingatwafwa ukuipakisha imilimo. Ipushe ati, ‘Mulandu nshi uyu mulimo ulekabila ukubombelwa?’ Nga waishiba umulandu icintu cimo cabela icacindama, cilanguka ukubomba. Kabili nampo umulimo ukalamba atemwa unono, bomba bwino. Nga wacite fyo, kuti wasekelela mu milimo yobe, filya fine Kasambilisha Mukalamba acitile.