Asambilisha Abantu Pa Fyo Lesa Amona Ukulekana Na Pa Kutemwa Abana

Ilyo Yesu na basambi bakwe bafumine ku Galili, bayabwike Umumana wa Yordani, balola ku kapinda ka ku kulyo e lyo bayapita mu Perea. Umuku wafumineko ilyo Yesu aali mu Perea, alyebele abaFarise pa fyo Lesa aalanda pa kulekana. (Luka 16:18) E ico baimishe ili lyashi pa kuti beshe Yesu.

Mu Mafunde ya kwa Mose mwalembelwe ukuti umulume kuti aleka umukashi nga ca kuti ‘asangamo icishiweme muli ena.’ (Amalango 24:1) Abantu baishibe ifyalekanalekana pa fingalenga umulume ukuleka umukashi. Bamo baishibe ukutila umulume kuti aleka umukashi na pa tuntu fye utwa cabe cabe. E ico abaFarise baipwishe Yesu abati: “Bushe calisuminishiwa umuntu ukuleka umukashi wakwe pa mulandu fye onse?”—Mateo 19:3.

Yesu talandile pa fyo abantu abengi basumiine, lelo alandile pa fyo Lesa afwaya icupo ukuba. Atile: “Bushe tamwabelenga ukuti uwababumbile pa kutendeka ababumbile umwaume no mwanakashi, kabili atile, ‘E mulandu wine umwaume akashiila wishi na nyina no kulambatila ku mukashi wakwe, kabili aba babili bakaba umubili umo’? E ico tabali babili na kabili iyo, lelo bali umubili umo. Kanshi, ico Lesa alundenye, umuntu ecilekanya.” (Mateo 19:4-6) Ilyo Lesa uwatendeke icupo aufishe Adamu na Efa, tatile icupo cifwile ukupwa.

AbaFarise tabasumiine ifyo Yesu alandile, e ico batile: “Nga kanshi cinshi Mose alandile ukuti umulume kuti apeela umukashi kalata wa kumutamfya no kumuleka?” (Mateo 19:7) Yesu abebele ati: “Ni pa mulandu wa kukosa kwa mitima yenu, e co Mose amusuminishishe ukuleka abakashi benu, lelo te fyo cali pa kutendeka.” (Mateo 19:8) Uku “kutendeka” Yesu alelandapo te kwa mu nshiku sha kwa Mose, lelo alelanda pa nshita Lesa aufishe Adamu na Efa mu Edeni.

Lyena Yesu abebele amashiwi yacindama aya kuti: “Ndemweba nati, onse uwaleka umukashi wakwe, apashili umulandu wa bulalelale [mu ciGriki, por·neiʹa], aupa na umbi, ninshi acita ubucende.” (Mateo 19:9) Kanshi umulandu fye uo icupo cingapwilapo, bulalelale.

Ifyo Yesu alandile fyalengele abasambi bebe Yesu abati: “Kanshi nga e fyo caba ifi ku mwaume no mukashi wakwe, cawamapo ukukanaupa.” (Mateo 19:10) Kanshi umuntu onse uulefwaya ukuupa nelyo ukuupwa afwile ukwishiba ukuti icupo tacifwile ukupwa.

Lyena Yesu alandile pa bashimbe ukuti, bamo e fyo bafyalwa fye, tabakwata amaka ya kupanga icupo. Bambi balabatungula, ne ci cilenga belakwata amaka ya kupanga icupo. Lelo bambi nabo basalapo fye ukukanaupa pa kuti balepoosa inshita iikalamba ukubomba umulimo wa Bufumu. Yesu aebele abantu ati: “Uwingekala ukwabula ukuupa, naekale ifyo fine.”—Mateo 19:12.

Abantu batendeke ukutwala abana kuli Yesu. Lelo abasambi ba kwa Yesu balikalipiile abantu pantu balemona kwati balemupumfyanya. Ilyo Yesu amwene ifi, alikalipe no kubeba ati: “Lekeni abana banono bese kuli ine; mwibakaanya, pantu Ubufumu bwa kwa Lesa bwa bantu ababa kwati ni aba bana. Ndemweba icine cine nati, onse uushipokelela Ubufumu bwa kwa Lesa filya umwana munono apokelela ifintu, takengilemo nakalya.”—Marko 10:14, 15; Luka 18:15.

Alibasambilishe isambililo ilyacindama. Nga tulefwaya ukwingila mu Bufumu bwa kwa Lesa, tufwile ukuba abafuuka no kutemwa ukusambilila nga filya abana abanono baaba. Pa kulanga ifyo atemenwe abana, Yesu alibafukatiile, atendeka no kubapaala. Kabili alitemwa na bonse ‘abapokelela Ubufumu bwa kwa Lesa ngo mwana umunono.’—Luka 18:17.