“Imembu Shobe Shaelelwa”

Abantu abafumine ku fifulo fya kutali balyumfwile ifyo Yesu alecita. Kwali abengi abafumine mu mishi ya kutali sana abaile mu kumfwa ifyo alesambilisha no kumona ifipesha amano ifyo alecita. Lelo pa numa ya nshiku ishinono, Yesu alibwelelemo ku Kapernahumu uko alebombela sana. Ilyashi lya kuti Yesu nabwela lyalisalangene muli uyu musumba ukufika fye na ku fifulo ifyali ku lulamba lwa Bemba wa Galili. E ico abengi balile ku ng’anda uko aleikala. Pa baile pali na baFarise na bakasambilisha ba Mafunde, abafumine mu misumba iingi iya mu Galili na mu Yudea e lyo na mu musumba wa Yerusalemu.

“Abengi balilongene ica kuti tapali ne ncende nangu imo, kumo na pa mwinshi, kabili atendeke ukubila icebo ca kwa Lesa kuli bena.” (Marko 2:2) Icacitike cali icikalamba nga nshi. Cilatulanga bwino sana ukuti Yesu alikwata amaka ya kundapa abantu na maka ya kufumyapo icalenga abantu balecula.

Ilyo Yesu alesambilisha mu muputule umwali sana abantu, abaume bane baletele umwaume wa bulebe ninshi nalaala pa butanda. Balefwaya Yesu amuposhe. Lelo apo abantu balifulishe, balifililwe “ukumufisha kuli Yesu.” (Marko 2:4) Bafwile balyumfwile sana ububi. E ico baninine pa mutenge no kutula icipunda apo Yesu abelele. Lyena baingishe ubutanda mu ng’anda apaleele uwa bulebe.

Bushe Yesu alikalipe ilyo aba baume bamupumfyenye? Iyo! Alitemenwe sana pa kumona icitetekelo bakwete. E ico aebele umwaume uwalwele ubulebe ati: “Imembu shobe shaelelwa.” (Mateo 9:2) Lelo bushe Yesu alikwete amaka ya kwelela imembu? Bakalemba na baFarise tabatemenwe. Batile: “Cinshi uyu muntu alelandila ifi? Aleponta. Bushe te Lesa e ka uwingelela imembu?”—Marko 2:7.

Apo Yesu alishibe ifyo baletontonkanya, abebele ati: “Cinshi muletontonkanishisha ifi fintu mu mitima yenu? Nga kanshi, icayangukapo ukulanda cinshi, ukweba uwa bulebe, ati, ‘Imembu shobe shaelelwa,’ nelyo ukutila, ‘Ima, buula ubutanda bobe no kwenda’?” (Marko 2:8, 9) Ilambo Yesu ali no kupeela lyalengele akwata amaka ya kwelela abantu imembu.

Lyena Yesu alangile abalongene kumo na balya bene abalemusuusha ukuti, alikwete amaka ya kulekelela imembu. Aebele uwa bulebe ati: “Ndekweba nati, Ima, senda ubutanda bobe, kabiye ku mobe.” Awe aliimine, kabili ilyo line abuulile ubutanda bwakwe afuma ninshi bonse baletamba, ica kuti bonse balipeshiwe amano! Balumbenye Lesa, abati: “Tatwatala atumona ica musango yu”!—Marko 2:11, 12.

Nga fintu twamona, ifyo Yesu alandile filanga ukuti icalenga tulelwala, lubembu no kuti amalwele ya bantu kuti yapola nga baelelwa imembu. E filya Baibolo itusambilisha ukuti Adamu, wishi wa bantu bonse, alibembwike kabili ifwe bonse twalipyana ulubembu ululenga tulelwala no kufwa. Lelo ilyo Yesu akalateka mu Bufumu bwa kwa Lesa, abantu bonse abatemwa Lesa kabili abamubombela akabeleela imembu. Lyena akafumyapo no kulwala umuyayaya.—Abena Roma 5:12, 18, 19.