Ubumi bwa kwa Yesu no Butumikishi

Ukufuma Kuli Pilato Ukuya Kuli Herode no Kubwela na Kabili

LINTU abaYuda bapeela Yesu umulandu pa kusoso kuti ni mfumu, Pilato na kabili aingila mwi sano lya kwa kateka ku kumwipusha. Nangu cingati Yesu teseshe ukufisa ukuti ni mfumu, alondolola ukuti Ubufumu bwakwe tabuli cintiinya kuli Roma.

“Ubufumu bwandi te bwa pano isonde,” e fyo Yesu aeba Pilato. “Abuba bwa pano isonde ubufumu bwandi, bakalume bandi nga balwa ukuti nipeelwa ku baYuda. Lelo nomba ubufumu bwandi te bwa pano nse.” Yesu muli ifyo asumina imiku itatu ukuti alikwata Ubufumu, nangu cingati te bwa ntulo ya pano isonde.

Nalyo line, Pilato amupatikisha mu kutwalilila: “Kanshi uli mfumu?” Uko e kuti, bushe uli mfumu nangula Ubufumu bobe te bwa pano isonde.

Yesu alenga Pilato ukwishiba ukuti nafika pa nsondwelelo yalungama, ukwasuko kuti: “Mwasosa ni mwe ukuti ine ndi mfumu. Pali ici e co nafyalilwe, kabili pali ici e co naishiile pano isonde, pa kuti nkeseshimike cine ubunte. Onse uuli uwa bucine omfwe shiwi lyandi.”

Ee, ukubapo kwine ukwa kwa Yesu pe sonde kwisashimike “cine,” ubunte mu kulungatika icine pa lwa Bufumu bwakwe. Yesu ali uwaipekanya ukuba uwa busumino kuli ico cine nangu cingamusendela ubumi. Nangu cingati Pilato aipusha ukuti: “Icine cinshi?” tapembelele ubulondoloshi bwalundwapo. Naumfwa kale ifyafulilako ku kupeela ubupingushi.

Pilato abwelela kwi bumba ililepembelela ku nse ye sano. Mu kumonekesha mu kuba na Yesu lwa mupepi, aeba bashimapepo bakalamba na bo bali nabo ukuti: “Nshisangile mulandu kuli uyu muntu nakalya.”

Ukukalifiwa ku kupingulapo, ibumba lyatendeka ukukosha ukuti: “Asonga abantu, ukusambilisha monse mu Yudea, ukutendeka ku Galili ukufika na pano.”

Bumbulwa mano bwabulo kupelulula ubwa baYuda bufwile ukupapusha Pilato. E co, ilyo bashimapepo bakalamba na baume bakalamba batwalilila ukuwelesha, Pilato ayalukila kuli Yesu no kwipusha ukuti: “Bushe tauleumfwe fintu ifyo bakushinina fingi?” Nalyo line, Yesu afinda. Ukutalala kwakwe mu cinso ca kupeelwe milandu kwakaluka kwalenga Pilato ukupapa.

Pa kwishiba ukuti Yesu ali mwina Galili, Pilato asange nshila ya kufyukilamo ukufuma ku kushingamwa kuli wene. Kateka wa Galili, Herode Antipa (umwana mwaume wa kwa Herode Mukalamba), ali mu Yerusalemu ku ca Kucilila, e co Pilato atuma Yesu kuli wene. Mu kubangilila, Herode Antipa alengele Yohane Kabatisha ukuputulwako umutwe, kabili lyene Herode alitiinishiwe lintu aumfwile pa lwa milimo ya cipesha amano iyo Yesu alecita, ukutiino kuti Yesu aali mu cine cine ni Yohane uwabuushiwe ku bafwa.

Nomba, Herode ali uwacankwa pa cilolelo ca kumona Yesu. Ici tacili pa mulandu wa kuti ali uwayangwako pa lwa busuma bwa kwa Yesu nelyo ukuti alefwaya ukucita ukwesha ukuli konse ukwishiba nampo nga ukupeelwa kwakwe milandu kwa cine nelyo iyo. Ukucila, alefwaisha fye ukwishiba no kusubila ukumona Yesu alecita cimo icipesha mano.

Yesu, nangu cibe fyo, akana ukwikusha ukufwaisha ukwishiba kwa kwa Herode. Na kuba, ilyo Herode alemwipusha, tafumishe shiwi. Uwalengwe nsoni, Herode na bashilika abalinshi bakwe bapumya Yesu. Bamufwika ica kufwala cabeeka no kumusenteka. Lyene bamubwesesha kuli Pilato. Nge ca kufumamo, Herode na Pilato, abo kale bali abalwani, baba ifibusa fisuma.

Lintu Yesu abwela, Pilato aita bashimapepo bakalamba, bakateka ba ciYuda, na bantu capamo no kusoso kuti: “Namuleta kuli ine uyu muntu ngo ulealula abantu. Kabili moneni, ine pa kumubushishisha pa menso yenu, nshisangile ku muntu uyu umulandu nakalya pali ifyo mulemushinina. Awe nangu ni Herode; pantu amubweseshe kuli ifwe, kabili, moneni, tacita nangu cimo ica kuti awamino kufwa. E ico ndemukanda, no kumukakula.”

Muli ifyo, Pilato imiku ibili abilisha Yesu ukubo wa kaele. Alefwaisha ukumukakula, pantu aishiba ukuti ni pa mulandu fye wa kalumwa e co bashimapepo bamuletele. Lelo ilyo Pilato atwalilila ukwesha ukukakula Yesu, apokelela ukukuntwa na kumbi ukwakosesha ku kucite fyo. Ilintu ali pa cipuna cakwe ica bupingushi, umukashi wakwe atuma ubukombe, ukumucincisha ukuti: “Wikuma ku mulandu wa muntu uyu umulungami; pantu nculile apakalamba lelo mu ciloto [mu kumonekesha ica ntulo ya bulesa] pa mulandu wakwe.”

Nalyo line, ni shani fintu Pilato engakakula uyu muntu uwa kaele, nge fyo eshibe ukuti alingile ukucita ico? Yohane 18:36-38; Luka 23:4-16; Mateo 27:12-14, 18, 19; 14:1, 2; Marko 15:2-5.

◆ Ni shani fintu Yesu ayasuka icipusho ukukuma kuli bumfumu bwakwe?

◆ “Icine” cinshi ico Yesu apoosele ubumi bwakwe ubwa pe sonde aleshimiko bunte?

◆ Cinshi cili ubupingushi bwa kwa Pilato, ni shani fintu abantu baankulako, kabili cinshi ico Pilato acita na Yesu?

◆ Herode Antipa nani, mulandu nshi acankilwa pa kumona Yesu, kabili cinshi acita na wene?

◆ Mulandu nshi Pilato alefwaisha ukukakula Yesu?