Ubumi bwa kwa Yesu no Butumikishi
Ukukaana mu Lubansa
PA NUMA ya kusha Yesu mwi bala lya Getsemane no kufulumuka mu mwenso pamo na batumwa bonse, Petro na Yohane baiminina. Nakalimo basanga Yesu lintu aletwalwa ku ŋanda ya kwa Anasi. Lintu Anasi atuma wene kuli Shimapepo Mukalamba Kayafa, Petro na Yohane bakonka akatalamukila, mu kumonekesha mwenso mwenso pa mulandu wa myeo yabo no kwangwako kwabo ukwashika ku calacitika kuli Shikulwibo.
Ukufika pa cifulo ca kwikalamo icikalamba ica kwa Kayafa, Yohane aingila mu lubansa, apantu alishibikwa kuli shimapepo mukalamba. Petro, nangu cibe fyo, ashala naiminina pa nse. Lelo mu kwangufyanya Yohane abwela no kulanda ku wa pa mwinshi, umukashana, kabili Petro asuminishiwo kwingila.
Pali nomba kuli mpepo, kabili ababomfi na balashi ba kwa shimapepo mukalamba nabakosha umulilo wa mafito. Petro ailunda kuli bene ku konta umulilo ilintu alelolela ica kufumamo ca kulubulwishiwa kwa kwa Yesu. Palya, mu cengelo ca mulilo, uwa pa mwinshi uwasuminishe Petro ukwingila amulolesha. “Na iwe wali pamo na Yesu umwina Galili!” e fyo abilisha.
Uwasakamikwa pa kwishibikwa, pa menso ya bonse Petro akaana ukutala eshiba Yesu. “Nshiishibe nangu kuumfwa umo uloseshe,” e fyo asosa.
Pali co, Petro afumina pa nse mupepi ne cipata. Kulya, umukashana umbi amumona no kutila ku beminine palya: “No yu ali pamo na Yesu umwina Nasarete.” Na kabili, Petro akaana cene, ukulapo ukuti: “Nshiishibe umuntu uyo.”
Petro atwalilila ukuba mu lubansa, aleesha ukufika apo engapela ukukanaishibikwa mu kwanguka. Nakalimo pali ino nshita atulumushiwa ku kulila kwa kwa mukolwe mu mfifi ya macaca. Pali ino nshita, ukulubulwishiwa kwa kwa Yesu kulecitwa, mu kushininkisha kulecitilwa mu lubali lwa ŋanda pa mulu wa lubansa. Nakalimo Petro na bambi abalelolela pe samba bamona ukwisa no kuya kwa nte shalekanalekana ishileletwa ku kupeelo bunte.
Mupepi ne awala nalipita ukufuma apo Petro mu kulekelesha acishibikwa ngo wa kubishanya na Yesu. Nomba impendwa ya abo beminine mupepi baisa kuli wene no kusoso kuti: “Cine cine na iwe uli mwina mwabo; pantu imisosele yobe yakulanga.” Umo uwa mwi bumba muntu wa kwa Maliki, uo Petro aputwile ukutwi. “Bushe nshikumwene pamo nankwe mwi bala?” e fyo asosa.
“Nshiishibe muntu uyo” e fyo Petro mu kukosa abilisha. Na kuba, pa kutukana no kulapa ku mulandu, mu kucitikako, ukwita ububi pa mwine nga ca kuti talelanda icine, aesha ukubashinina ukuti bonse nabaluba.
Lintu fye Petro akaana umuku walenga butatu, mukolwe alila. Kabili pali ako kashita, Yesu, uyo mu kumonekesha afumina pa lukungu pa mulu wa lubansa, apilibuka no kumulolesha. Apo pene, Petro aibukisha ico Yesu acisosa amaawala fye yanono mu kubangilila mu muputule wa pa mulu ukuti: “Ilyo mukolwe acili talalila [imiku ibili, NW], ulenkaana imiku itatu.” Uwabongaika ku kufina kwa lubembu lwakwe, Petro afumina ku nse no kulilisha akalanda.
Ni shani ici cingacitikako? Pa numa ya kuba uwashininkisha ifyo ulwa bukose bwakwe ubwa ku mupashi, ni shani Petro engakaana Shikulu wakwe imiku itatu mu kukonkana kwayangufyanya? Imibele ukwabulo kutwishika yasanga Petro uwabula kwibukila. Icine cilefulunganishiwa, kabili Yesu alelondololwa nge ntalamisoka yabipisha. Icili calungama cilelengwo kumoneka icalubana, uwa kaele ngo wa mulandu. E co pa mulandu wa fya kutitikisha ifya pa kashita, Petro alufya ukushikatala. Mu kwangufyanya inkuntu shakwe isha bucishinka shafulunganishiwa. Ku bulanda bwakwe afunshika ku kutiina umuntu. Shi ico cikabala acicitika kuli ifwe! Mateo 26:57, 58, 69-75; Marko 14:30, 53, 54, 66-72; Luka 22:54-62; Yohane 18:15-18, 25-27.
▪ Ni shani Petro na Yohane baingila mu lubansa lwa kwa shimapepo mukalamba?
▪ Ilintu Petro na Yohane bali mu lubansa, cinshi cilecitika mu ŋanda?
▪ Miku inga mukolwe alila, kabili lingi lyaba shani Petro akaana ukwishiba Kristu?
▪ Cinshi cilepilibula ukuti Petro atukana no kulapa?
▪ Cinshi calenga Petro ukukaana ukuti alishiba Yesu?