Cinshi Abasambi Ba Kwa Yesu Bashilekela Ukulya?

Ilyo Yesu afumine ku Ca Kucilila ica mu 30 C.E., tapapitile na nshita Yohane Kabatisha balimupoosele mu cifungo. Yohane alefwaya abasambi bakwe baba abasambi ba kwa Yesu, lelo ilyo Yohane ali mu cifungo, te basambi bakwe bonse abatampile ukukonka Yesu.

Ilyo Ica Kucilila ca mu 31 C.E. capaleme, abasambi ba kwa Yohane bamo baile kuli Yesu no kumwipusha abati: “Mulandu nshi ifwe na baFarise tulekela ukulya lelo abasambi bobe bena tabaleka ukulya?” (Mateo 9:14) Ico abaFarise balelekela ukulya, ni co wali mwata uo balekonka mu mipepele yabo. Pa numa, Yesu abebele icilangililo pa muFarise uwaleimona uwalungama, uwapepele ati: “Mwe Lesa, ndemutootela ico nshaba nga bantu bambi abashala . . . Ndaleka ukulya imiku ibili mu mulungu.” (Luka 18:11, 12) Abasambi ba kwa Yohane nabo bafwile baleleka ukulya apo wali mwata wabo. Nalimo tabalelya pa mulandu wa kuti bali no bulanda pali filya Yohane ali mu cifungo. Abantu nabo balepapa ico abasambi ba kwa Yesu bashalelekela ukulya, atemwa ico bashalelangila ukuti baali no bulanda pa fyacitikiile Yohane.

Pa kubaasuka Yesu abomfeshe icilangililo. Atile: “Bushe abanankwe ba kwa shibwinga bafwile ukuloosha ilyo shibwinga acili pamo nabo? Lelo inshiku shileisa ilyo shibwinga bakamusenda, e lyo bakaleka ukulya.”—Mateo 9:15.

Yohane umwine alilandilepo pali Yesu ukuti ni shibwinga. (Yohane 3:28, 29) Kanshi apo Yesu e po ali, abasambi ba kwa Yesu tabalekabila ukuleka ukulya. Lelo ilyo Yesu afwile, abasambi balilooseshe kabili tabalefwaya ukulya. Nomba ilyo abuushiwe, tabalingile ukumfwa ubulanda no kuleka ukulya.

Lyena Yesu alandile pali ifi ifilangililo fibili. Atile: “Takuli uubila icikamba ca nsalu iipya pa ca kufwala ca kale; pantu icikamba ca nsalu iipya calikosa, kabili kuti calepula ica kufwala ne cipunda kuti cakulilako. Kabili abantu tababika umwangashi uushilakalipa mu nyambi isha kale; lelo nga babikamo, inyambi shilalepuka no mwangashi uletika ne nyambi shilonaika. Lelo abantu babika umwangashi uushilakalipa mu nyambi ishipya.” (Mateo 9:16, 17) Bushe Yesu aloseshe mwi?

Yesu alefwaya abasambi ba kwa Yohane beshibe ukuti abasambi bakwe tabaalingile ukukonka imyata ya kale iya baYuda pamo nga ilya iyalelanda pa kuleka ukulya. Taishile mu kukosha imipepele ya kale iishali bwino, iyali no kufumishawapo. Imipepele iyo Yesu alefwaya abantu bakonke te mipepele ya baYuda umwali sana intambi. Kanshi talefwaya ukubila icikamba pa ca kufwala ca kale, nelyo ukubika umwangashi uushilakalipa mu nyambi ya kale.