ULUBALI 4
Ukumfwa Ububi pa Membu Mwacitile—“Nsangululeni na ku Lubembu Lwandi”
“Incito natampile ukubomba yalengele ndeikala bwino no lupwa lwandi. Na lyo line, iyi incito yalengele ndecita ifyabipa. Natendeke ukusefya amaholide, ukuisansha mu mapolitiki, e lyo no kulaya ku macalici. Nalilekele ukulongana no kushimikila pa myaka 40. Ilyo paleya palepita inshita, natampile ukutontonkanya ukuti Yehova takatale anjeleela pa fyo nalecita. Nalemona kwati imembu nacitile shalifulile sana. Na kuba, nalisambilile icine ilyo nshilatendeka ukucita ifyabipa.”—Ba Martha.
NGA MULOMFWA ububi pa membu mwacitile kuti mwalasakamikwa sana. Imfumu Davidi yatile: “Imembu shandi shapita pa muulu wa mutwe wandi; shamfinina nge cisendo cafina.” (Amalumbo 38:4) Abena Kristu bamo balaba sana no bulanda pantu bamona kwati Yehova te kuti abeleele. (2 Abena Korinti 2:7) Bushe ca cine Lesa te kuti abeleele? Nga mwalicitilepo imembu ishabipisha, bushe mumona kwati muli babembu sana ica kuti Yehova te kuti amweleele? Iyo, kuti amweleela.
“Lekeni Tulanshanye Kabili Nalamwafwa Ukuwamya Bucibusa Bwenu na Ine”
Yehova talekelesha ababembu abalapila. Na kuba, alafwaya sana ukuti balapile. Mu cilangililo ca mwana uwalubile, Yesu apashenye Yehova kuli wishi uwakwete umwana uwashiile ba lupwa wakwe no kutendeka ukwikala imikalile yabipa. Mu kupita kwa nshita, umwana alibweleele ku ng’anda. “Nomba ilyo [umwana] acili ukutali, wishi alimumwene kabili aumfwile uluse, kabili alimubutukile no kuwila pa mukoshi wakwe no kumutomona.” (Luka 15:11-20) Bushe mulafwaya ukupalama kuli Yehova, lelo mumona kwati ‘mucili ukutali’ nankwe? Nga filya wishi wa mu cilangililo ca kwa Yesu acitile, Yehova na o kuti amubelela uluse. Alafwaisha mwatendeka ukumubombela na kabili.
Finshi mufwile ukucita nga mumona kwati imembu mwacita shalifulisha ica kuti Yehova te kuti amweleele? Moneni ifyo Yehova atweba pali Esaya 1:18. Atila: “‘Nomba iseni, lekeni tulanshanye kabili nalamwafwa ukuwamya bucibusa bwenu na ine,’ e fyo Yehova asosa. ‘Imembu shenu nelyo shakashika ce, shikabuuta tuutu kwati butonge.’” Ca cine ukuti nangu fye imembu shenu shimoneke isha kashika ce pa nsalu yabuuta, Yehova kuti amweleela.
Yehova tafwaya mwatwalilila fye ukumfwa ububi pa fyabipa ifyo mwacitile. Finshi mufwile ukucita pa kuti Yehova amweleele na pa kuti mutwalilile ukumubombela na kampingu iisuma? Natulande pa fintu fibili ifyo Davidi uwali imfumu acitile. Abalile alanda ukuti: “Nalayebelela imembu shandi kuli Yehova.” (Amalumbo 32:5) Mwilalaba ukuti, Yehova alimweba kale ukuti mulingile ukupepa kuli ena pa kuti ‘engamwafwa ukuwamya bucibusa bwenu’ na ena na kabili. Kanshi mufwile ukulapepa kuli Yehova lyonse. Mulingile ukweba Yehova pa membu mwacita e lyo ne fyo muleumfwa ububi pa membu mwacitile. Ifyacitikiile Davidi fyalengele apepe ati: “Nsangululeni na ku lubembu lwandi. . . . Umutima uwa bulanda kabili uwasakamikwa, tamwakausuule, mwe Lesa.”—Amalumbo 51:2, 17.
Lesa na kabili alitumine kasesema Natani ku kwafwa Davidi. (2 Samwele 12:13) Na muno nshiku mwine, Yehova alibikako baeluda mu filonganino abo asambilisha bwino ifya kwafwa ababembuka abalapila ukuba ifibusa fyakwe na kabili. Nga mwaeba baeluda ulubembu mwacitile, bakamubelengela Amalembo ayakamwafwa, kabili bakamupepelako pa kuti mwikatwalilila fye ukuba no bulanda pa fyo mwacitile na pa kuti mukapole.—Yakobo 5:14-16.
Yehova afwaya ukuti mulemubombela na kampingu iisuma
“Alipaalwa uo Baeleela Ulubembu Lwakwe”
Nalimo kuti mwamona kwati cintu cayafya sana ukweba Yehova Lesa na baeluda imembu isho mwacitile. Ifi fine e fyo na Davidi alemona pantu atile ‘alitaleele’ ilyo abembwike. (Amalumbo 32:3) Na lyo line, mu kuya kwa nshita, alimwene ubusuma bwaba mu kuyebelela imembu ne fyo cawamina ukuleka ukucita ifyabipa.
Ilyo Davidi ayebelele imembu, ali ne nsansa na kabili. Alembele ati: “Alipaalwa uo baeleela ulubembu lwakwe, uo bafimba pa lubembu lwakwe.” (Amalumbo 32:1) Alipepele no kuti: “Mwe Yehova, shi asamuneni akanwa kandi, pa kuti akanwa kandi kasose ifya kumulumbanya.” (Amalumbo 51:15) Ilyo Davidi alekele ukumfwa ububi pa membu isho acitile kabili no kutemwa atemwa pa fyo Yehova amubeleele uluse, alitendeke ukwebako bambi pa fyo Yehova eleela imembu.
Yehova afwaya ukuti mulemubombela na kampingu iisuma. Afwaya no kuti muleebako bambi pali ena na pa bufwayo bwakwe. Tafwaya ukuti muletwalilila fye ukumfwa ububi pa membu isho mwacitile, lelo afwaya ukuti mulemubombela muli bucishika no kuti muleba ne nsansa. (Amalumbo 65:1-4) Yehova atweba ati lapileni ‘pa kuti imembu shenu shifuutwe, e lyo Yehova akamupuupuutula.’—Imilimo 3:19.
Ifi fine e fyo cali na kuli ba Martha. Batiile: “Umwana wandi atwalilile fye ukuntumina Ulupungu lwa kwa Kalinda na Loleni. Ici calengele ntendeke ukutemwa Yehova panono panono. Icintu icangafishe ukucita, kulomba ubwelelo kuli Yehova pa membu isho nacitile pa kuti mbwelele kuli ena. Lelo nasukile napepa kuli Lesa ukuti anjeleele. Ndafilwa ukushininkisha ukuti palipitile imyaka 40 pa kuti ntendeke ukubombela Yehova na kabili. Ifyancitikiile filanga fye ukuti nangu pengapita imyaka iingi shani, umuntu na kabili kuti atendeka ukupepa Lesa kabili kuti aaba cibusa wakwe.”