Ababelenga Ino Magazini Balepusha Ukuti

Bushe ni Ndalama Shinga Mfwile Ukutuula Kuli Lesa?

Baibolo itila: “Lesa atemwa uupeela ne nsansa.” (2 Abena Korinti 9:7) Abantu abengi nga nshi muno calo balishiba aya mashiwi. Lelo abantu bamo abaya ku macalici bamona kwati balingile ukutuula indalama ishingi ukucila isho bakwata. Na kuba, mu macalici yamo abapepamo balibapimina indalama isho balingile ukulatuula. Ukutuula kwa musango yu, e kulya beta ati ukupeela ica pe kumi, e kutila pa ndalama umuntu apoka afwile ukubulapo indalama shimo isho bapimina kabela no kutuula ku calici.

Bushe cine cine Baibolo itila kwaliba icipimo ca ndalama isho tulingile ukutuula ngo mutuulo? Nalimo kuti mwaipusha amuti, bushe ni ndalama shinga mfwile ukutuula?

Ifyo Aba Kale Balecita ne Mituulo Baletuula

Muli Baibolo mwaba amafunde ayalondololwa bwino bwino ayo Lesa aebele abena Israele pa mituulo balingile ukutuula kuli ena. (Ubwina Lebi 27:30-32; Impendwa 18:21, 24; Amalango 12:4-7, 11, 17, 18; 14:22-27) Ifi Yehova abebele ukucita tafyayafishe iyo. Alibalaile ukutila nga ca kuti batwalilila ukulakonka amafunde yakwe, ali no ‘kufusha ubusuma’ mu luko lwabo lonse.—Amalango 28:1, 2, 11, 12.

Inshita shimbi abena Israele baletuula imituulo ukufuma pa nshi ya mitima yabo ukulingana ne fintu bakwete, fibe finono nelyo fingi. Ku ca kumwenako, ilyo Imfumu Davidi yalefwaya ukukuulila Yehova itempele, abantu yaleteka baletele imisangulo iingi. Baletele “golde amatalanti 5,000.”a (1 Imilandu 29:7) Nomba linganyeni iyi mituulo ku cacitike ilyo Yesu ali pano calo. “Amwene mukamfwilwa umo umupiina apoosa utundalama tubili utwacepesha” mu cipao ca mituulo ya pe tempele. Bushe umutuulo wa kwa ulya mukamfwilwa wali shani? Wali unono sana, indalama shalekelesheko ubunono. Lelo Yesu atile uyu mutuulo unono na o walipokelelwe.—Luka 21:1-4.

Bushe Abena Kristu Balingile Ukubapimina Indalama sha Kutuula?

Abena Kristu tabatungululwa ne cipangano ca Mafunde ico Lesa apeele abena Israele. Kanshi tabalingile ukulakonka icipimo cimo ica mutuulo pa kupeela Lesa. Lelo mu cilonganino ca Bena Kristu ba cine mwena ukupeela kulaleta insansa nga nshi. Yesu Kristu umwine alandile ukuti: “Mwaba insansa ishingi mu kupeela ukucila ishaba mu kupokelela.”—Imilimo 20:35.

Inte sha kwa Yehova balafwilisha umulimo wabo uwa kushimikila lintu balepeela imisangulo ya kuitemenwa. Iyi misangulo balaibomfya ku kupulintilamo impapulo, pamo nga iyi ine magazini mulebelenga, e lyo no kukuulilamo amayanda ya kupepelamo ayo beta ati Amayanda ya Bufumu. Tapaba indalama sha misangulo isho babomfya ku kufolesha aba ncito. Ababombako umulimo waibela uwa kulenga abantu ukuba abasambi ba kwa Yesu, babapelako fye kandalama kanono aka kwendela, no kushitamo tumo tumo utwa kubomfya mu mikalile. Lelo takwaba uupamfya ukuti kano fye bamupeele aka kandalama. Na kuba baNte abengi tabapokako ubwafwilisho pa kuti balebomba umulimo wa kushimikila. Lelo abengi balaibombela incito no kulaisakamana, nga filya fine na Paulo alecita ilyo alepanga amatenti.—2 Abena Korinti 11:9; 1 Abena Tesalonika 2:9.

Nomba nga ca kuti umuntu alefwaya ukusangwilako indalama ku mulimo wa Nte sha kwa Yehova, ni shinga engapeela? Umutumwa Paulo alembele ati: “Onse acite umo apangile mu mutima wakwe, te kupeela na mutimako nangu mu kupatikishiwa, pantu Lesa atemwa uupeela ne nsansa.”—2 Abena Korinti 8:12; 9:7.

[Futunoti]