Shukileni ili Shuko Lyaibela!

PETER ali nafika apatali mu masambililo yakwe aya fya budokota lintu ubukombe bwa Baibolo pa lwe pusukilo bwamucebwishe. Lintu apwishishe amasambililo no kutendeka ukubomba budokota mu cipatala cimo ifi, abakalamba ba ncito pe fye balemukoselesha ukubelesha ukuba kalepula waishibisha ifya mishipa. Ili lyali lishuko ilyo abengi badokota bapya bengashukila ukwabula ukwikata na ku cani.

Lelo, Petera apingwilepo ukukanashukila ili shuko. Mulandu nshi? Bushe takwete fye ukukunta no kufwaisha kukabilwa? Iyo, pantu Peter alitontonkenyepo sana pa lwa ili shuko. Pa numa ya kusanguka Inte ya kwa Yehova uwaipeela, uwabatishiwa, alefwaisha ukupoosa inshita yakulisha ukufika apo engapesha mu mbali shalekanalekana isha butumikishi bwa Bwina Kristu. Nga afikapo ukuba kalepula waishibisha ifya mishipa, apelulwile ukuti, incito yakwe yali no kusende nshita yakwe iikalamba na maka. Bushe cali butumpe kuli wene ukupusumuna ili shuko lyaibela, nelyo bushe ali wa mano?

Kuli bamo, uku kupingulapo kwa kwa Peter kuti kwamoneka ukwa buwelewele. Nangu ni fyo, alangulwike amalembo ya mu Baibolo pamo nga Abena Efese 5:15, 16. Palya umutumwa Paulo acincishe Abena Kristu banankwe ukuti: “Cenjeleni pa kwenda kwenu, te kwenda nga batumpa iyo, kano nga ba mano; mube ababomfye nshita, ico ishi nshiku sha bubifi.”

Shi moneni ishiwi “inshita.” Lyapilibulwa ukufuma kwi shiwi lya ciGriki ilyabomfiwa muli Baibolo libili libili ukulosha ku nshita nelyo iciputulwa ca nshita umwacitika ifintu fimo nelyo iyalinga ukucitamo icintu cimo. Pano Paulo akomailapo ukuti Abena Kristu balingile ukulubula inshita ku kubombako ifintu fyakatama. Mu cine cine, balekabila ‘ukusuminishe ifyacilamo.’ (Abena Filipi 1:10) Kwishiba fye ifilingile ukwisa intanshi.

E co, lyene, mifwaile nshi Lesa akwatila inshita yesu? Cinshi Lesa afwaila abamutemwa? Amasesemo ya mu Baibolo yalangisha apabuuta ukuti inshiku shesu ni “nshita ya ku mpela,” nelyo “inshiku sha kulekelesha.” (Daniele 12:4; 2 Timote 3:1) Kristu Yesu alilandile mu kumfwika icali no kuba icacindama nga nshi mu nshiku shesu. Alandile mu kulungatika ukuti ilyo impela ya ino micitile ya fintu tailaisa, ‘imbila nsuma iyi ya bufumu yali no kubilwa ku fyalo fyonse ku kubo bunte ku nko shonse.’ E lintu fye impela ikesa.—Mateo 24:3, 14.

Tulingile kanshi, ukushukila ishuko ilili lyonse ukushimikila imbila nsuma ya Bufumu no kupanga abasambi. (Mateo 28:19, 20) Apantu iyi milimo tayakatale aibwekeshiwapo, lino e shuko lya kulekelesha ilya kuipoosamo muli uyu mulimo wa kupususha imyeo. “Nomba e nshita ya kupokelelwamo.” Ee, “nomba e bushiku bwe pusukilo.”—2 Abena Korinti 6:2.

Ukupingulapo Mano Mano

Peter—umulumendo ulumbwilwe pa kwiswila—alitontonkenyepo mu kusakamana pa lwa kupingulapo kwakwe no kupimununa ifyo ali no kusalapo. Aishileishiba ukuti tacingalubana nga asambilile ku kwisaba kalepula waishibisha ifya mishipa. Lelo cinshi cali icacindamisha kuli wene? Cali mulimo wakwe mu butumikishi bwa Bwina Kristu, pa mulandu wa kuti uyu mulimo wakwe we pamfya. Pa nshita imo ine alikwete ifishingamo fya kufikilisha. Alyupile kabili alefwaikwa ukusakamana umukashi wakwe, uubomba umulimo wa kushimikila inshita yonse. (1 Timote 5:8) Peter na kabili ali no kubweshe nkongole akongwele pa kuti engasambilila. Cinshi, lyene, apingwilepo ukucita?

Peter apingwilepo ukusambilila radiology na ultrasound (umusango wa kuceeceetelamo ifya mu mubili no kusanga ubulema). Iyi yali ni ncito yali no kukabila fye amaawala ya lyonse. Na kabili ali no kukanshiwa ilyo alebomba fye nga pe. Ca cine, bamo kuti balanguluka ukuti ici cifulo ca pa nshi, lelo kuti camupeele nshita yafulilako iya kupeelesha ku fintu fya ku mupashi.

Kwali icintu na cimbi Peter alangulwikepo pa kupingula. Ilintu talelengulula bambi abo pambi abasalile incito mu kupusanako, alishibe ukuti ukuyobekamo sana mu ncito ya ku calo kulabika Umwina Kristu mu busanso. Kuti kwamulenga ukulekelesha ifishingamo fya ku mupashi. Ici calangililwa ku ca kumwenako cimbi icakumine ku ncito.

Kashimikila wa Bufumu uwa nshita yonse umo ali ni kalenga wakanshiwa bwino. Alesanga indalama shalinga ukupitila mu kushitisha ifyo alelenga. Ilintu alepeelesha inshita yakwe ikalamba ku butumikishi bwa Bwina Kristu ubwacindamisha, kuti ayafwilisha fye bwino bwino. Nangu cibe fyo, atendeke ukufwaisha ukufika apatali ne fya kulenga. Aishileyobekamo sana mu fya kulengalenga no kwelenganya, alilekele ubutumikishi bwa nshita yonse, na mu kupelako alishileleko kubomba umulimo wa kushimikila Ubufumu. Mu kupita kwa nshita, aishilesangwa mu myendele ishili ya mu malembo, icatungulwile ku kumufumya mu cilonganino ca Bwina Kristu.—1 Abena Korinti 5:11-13.

Inshita Yesu Yaliibela

Apo tulebombela Yehova nomba, mu kushininkisha tulefwaya ukutwalilila aba busumino kuli wene. Natwishibe fyo tuleikala mu nshita yaibela nga nshi ukutula apo umuntunse abelako. Pa kuti twingatwalilila ukubombela Lesa no kubomba bwino ne mibele tulimo ndakai, kuti twakabila ukuteuluka ukwingi. Kuti twalinganyako ku nshita ya balimi iya kulobolola. Ico ciputulwa ca nshita lintu kuba imilimo yaibela, lintu ababomfi ba pa cilime benekelwa ukupilikita ukucila ifyo bacita lyonse no kubomba amaawala yafulilako. Mulandu nshi? Pantu ubusomboshi bulingile ukulobololwa pa ciputulwa capimwa ica nshita.

Ino micitile ya fintu ibifi ishele fye ne nshita inono nga nshi. Nomba ukucila pali kale lyonse, Umwina Kristu wa cine alekabila ukupilikita ukukonka ica kumwenapo ca kwa Yesu no kwenda mu nkasa shakwe. Inshila yakwe iya bumi ilyo ali pe sonde yalangilile bwino bwino icali icacindamisha kuli wene. Atile: “Tuli no kubombe milimo ya wantumine, ilyo kucili akasuba: buleiso bushiku, ilyo nangu umo ashingabomba.” (Yohane 9:4) Pa kusoso kuti buleiso bushiku, Yesu alelanda pa nshita ya kulubulwishiwa kwakwe, ukupoopelwa, ne mfwa, lintu ubutumikishi bwakwe ubwa pe sonde bwali no kupwa kabili tali no kubomba imilimo ya kwa Wishi wa ku muulu na kabili.

Ca cine, mu butumikishi bwakwe ubwa myaka itatu na hafu, Yesu apoosele inshita yakwe imo ukucita ifipesha amano no kundapa abalwala. Nangu ni fyo, abomfeshe ubwingi bwa nshita yakwe ukushimikila ubukombe bwa Bufumu no “kuyabilila kuli bankole [ba mu kupepa kwa bufi] ukulubuka.” (Luka 4:18; Mateo 4:17) Yesu alibombeshe na maka yonse mu butumikishi bwakwe e lyo na kabili alilubwileko inshita ya kukansha abasambi bakwe pa kuti bengakuula pa mufula aimike no kutwalilila bwino bwino umulimo wa kushimikila. Yesu ashukile ishuko ilili lyonse ku kulundulula ifya Bufumu kabili afwaile abasambi bakwe ukucita cimo cine.—Mateo 5:14-16; Yohane 8:12.

Ukupala Yesu, ifwe fwe bakonshi bakwe aba muno nshiku tulekabila ukumona imibele ilimo umutundu wa muntu nga fintu Yehova Lesa aimona. Inshita ya ino micitile ya fintu ilepwa lubilo lubilo, kabili mu nkumbu Lesa afwaya bonse ukukwata ishuko lya kupusuka. (2 Petro 3:9) E co, bushe tacingaba ica mano ukubika ifintu fyonse fimbi pa numa e lyo ukucita ukufwaya kwa kwa Yehova pa ntanshi? (Mateo 6:25-33) Ukucilisha pa nshita yaibela nga ino, icintu icingalangulukwa lyonse nge cacindama te kuti pambi cicindame mu bumi bwesu ubwa Bwina Kristu.

Bushe uuli onse uwa ifwe akalangulushiwa pa kubika ukufwaya kwa kwa Lesa intanshi mu bumi bwesu? Mu cine cine iyo, pantu inshila ya Bwina Kristu iya kuipeela bulilambo ya kulambula nga nshi. Ku ca kumwenako, Yesu aebele abasambi bakwe ati: “Ndemwebe cine, nati, takuli nangu umo uwashile ku mwabo, nangu ni bamunyina, nangu ni nkashi, nangu ni nyina, nangu ni wishi, nangu bana, nangu filime, pa mulandu wa ine na pa mulandu wa mbila nsuma, uushakapokelele nomba mu nshita ino ifya miku umwanda umo, amayanda, na bamunyina, ne nkashi, na banyina, na bana, ne filime, pamo ne fya kupakasa; na mu bwikashi ubukesa umweo wa muyayaya.”—Marko 10:29, 30.

Takuli indalama ishingashita ifilambu bakaipakisha ababomfya inshita yabo mu kulumbanya Yehova no kubilisha ubukombe bwa Bufumu. Balaipakisha amapaalo ayengi nga nshi! Aya yasanshamo ifibusa fya cine, ukwikushiwa pa kucita ukufwaya kwa bulesa, ukusenamina kwa kwa Lesa, ne cilolelo ca bumi bushakapwe. (Ukusokolola 21:3, 4) Kabili mwandi lipaalo ukwaafwa abantu lwa ku mupashi no kuleta umucinshi kwi shina lya mushilo ilya kwa Yehova pa kuba Inte shakwe! Mu kushininkisha, ‘ukubomfye nshita’ mu cine cine ni nshila ya mano kabili iya kulambula. Nomba ukucila pali kale lyonse e nshita ya kubombako mu kubilisha imbila nsuma ya Bufumu bwa kwa Lesa. Bushe muli no kushukila ili shuko lyaibela no kulikatilila mu kutwalilila?

[Futunoti]