Ubumi bwa kwa Yesu no Butumikishi

Ukukonkomesha kwa Kushalikapo

ICA KULYA ca cibukisho capwa, lelo Yesu na batumwa bakwe bacili mu muputule wa pa mulu. Nangu cingati Yesu mu kwangufyanya ali no kuya, acili nakwata ifintu ifingi ifya kusosa. “Imitima yenu isakamikwa,” e fyo abasansamusha. “Tetekeleni Lesa.” Lelo ifyafulilako filefwaikwa. “Tetekeleni na ine pamo,” e fyo alundapo.

“Mu ŋanda ya kwa Tata mwaba apa kwikala apengi,” Yesu atwalilila. “Ndeya ku kumupekanisho bwikalo . . . ukuti uko ndi e ko na imwe mukabe. No ko ine ndeya, namwishiba ne nshila.” Abatumwa tabomfwikishe ukuti Yesu alelanda pa lwa kuya ku mulu, e co Toma aipusha ukuti: “Mwe Shikulu, tatwishibe uko muleya; kuti twaishiba shani inshila?”

“Nine nshila ne cine no mweo,” e fyo Yesu ayasuka. Ee, ni pa kumupokelela no kupashanya inshila ya bumi bwakwe e lintu uuli onse engengila mu ŋanda ya mu mulu iya kwa Wishi pantu, nga fintu Yesu asosa: “Takuli uwisa kuli Tata, kano aishila muli ine.”

“Mwe Shikulu, tulangeni Shinwe,” Filipi aipusha, “nga tupeme.” Filipi mu kumoneka alefwaya Yesu ukupayanya ukulangisha kwa kumoneka ukwa kwa Lesa, pamo ngo kwapeelwe mu nshita sha pa kale mu fimonwa kuli Mose, Eliya, na Esaya. Lelo, mu cituntulu, abatumwa nabakwata cimo icawaminako ukucila ifimonwa fya uyo musango, nga fintu Yesu asoso kuti: “Bushe naba pamo na imwe inshita yakule fi, kabili tawanjishiba, Filipi? Uwamona ine, amona na Tata.”

Yesu mu kupwililika nga nshi abelebesha ubuntu bwa kwa Wishi ica kuti ukwikala nankwe no kumumona kuli, mu nshila imo ine, ngo kumona Wishi mu cine cine. Nalyo line, Wishi alicilapo pa Mwana, nga fintu Yesu asumina ukuti: “Ifyebo ifyo nanda kuli imwe, nshisosa ku maka yandi ne mwine.” Yesu mu kulinga apeela umucinshi onse pa fisambilisho fyakwe kuli Wishi wa mu mulu.

Fintu cifwile ukuba ica kukoselesha ku batumwa ukumfwa Yesu nomba abeba ukuti: “Uuntetekela, imilimo iyo ine ncita na o akacita, kabili akacite milimo iyacilapo pali iyi”! Yesu talepilibula ukuti abakonshi bakwe bakabelesha amaka yakalamba aya fipeesha mano ukucila fintu wene acitile. Iyo, lelo alepilibula ukuti bakatwalilila no butumikishi pa nshita yalepelako, pa ncende ya kulisha nga nshi, kabili ku bantu abengi ukucilapo.

Yesu takalekeleshe abasambi bakwe pa numa ya kubashalikapo kwakwe. “Na conse ico mukalombela mwi shina lyandi,” e fyo abalaya, “nkacicita.” Mu kulundapo, asoso kuti “Nkalomba kuli Tata, na o akamupo bukota bumbi, ukuti bwikale na imwe umuyayaya, [umupashi] wa cine.” Mu kukonkapo, pa numa anina ku mulu, Yesu apongolwela pa basambi umupashi wa mushilo, ubu bukota bumbi.

Ukushalikapo kwa kwa Yesu kwapalamina, kabili asoso kuti: “Kushele inshita inono, na ’ba pano isonde tabakamone kabili.” Yesu akaba cibumbwa ca mupashi ico takuli umuntunse uwingamona. Lelo na kabili Yesu alaya abatumwa bakwe aba busumino ukuti: “Imwe mukamona; pantu ine ndi no mweo, na imwe mukaba no mweo.” Ee, Yesu takamoneke fye kuli bene mu musango wa buntunse pa numa ya kubuushiwa kwakwe lelo mu nshita yalinga akababuushisha ku bumi pamo nankwe mu mulu nge fibumbwa fya mupashi.

Yesu nomba alondolola ifunde lyayanguka ukuti: “Uukwete amafunde yandi no kuyabaka, wene ninshi e wantemwa; no wantemwa akatemwikwa kuli Tata, na ine nkamutemwa no kuilanga kuli wene.”

Pali ici umutumwa Yuda, umo wine uwitwa na kabili Tandeo, acilima ukuti: “Mwe Shikulu, cinshi calengo kuti muleilanga kuli ifwe, na ku ba pano isonde iyo?”

“Ngo muntu antemwa,” Yesu ayasuka, “kuti abake cebo candi, na Tata akamutemwa . . . Uushantemwa tabaka fyebo fyandi.” Ukukanapala abakonshi bakwe aba cumfwila, icalo calisuula ifisambilisho fya kwa Kristu. E co taisokolola umwine kuli bene.

Mu kati ka butumikishi bwakwe ubwa pe sonde, Yesu nasambilisha abatumwa bakwe ifintu ifingi. Ni shani fintu bakafibukisha fyonse, ukucilisha apo, nangu fye kufika kuli kano kashita, balefilwa ukufumbata ifyafulilako? Mu nsansa, Yesu alaya ukuti: “Ubukota, umupashi wa mushilo uo Tata akamutumina mwi shina lyandi, wene akamusambilisha fyonse, no kumwibulula fyonse ifyo nasosele kuli imwe.”

Na kabili ukubasansamusha, Yesu asoso kuti: “Ndemushilo mutende, umutende wandi ndemupeela. . . . Imitima yenu isakamikwa, nangu kuba no mwenso.” Ca cine, Yesu alebashalikapo, lelo alondolola ukuti: “Amuntemwa, nga mwasekelela ico ndeya kuli Tata: pantu Tata mukalamba pali ine.”

Inshita ya kwa Yesu iyashalako yaipipa. “Nshalande na imwe kabili ifintu ifingi,” e fyo asosa, “pantu aleisa kateka wa pano isonde. Muli ine takwete kantu nangu kamo.” Satana Ciwa, uyo uwali na maka ya kwingila muli Yuda no ku mwikata, aba e kateka wa pano isonde. Lelo tamuliko ubunake bwa lubembu muli Yesu ubo Satana engasaminwako ku kwalula wene ukufuma ku kubombela Lesa. Yohane 14:1-31; 13:27; Luka 22:3, 4; Ukufuma 24:10; 1 Ishamfumu 19:9-13; Esaya 6:1-5.

▪ Ni kwi kuntu Yesu aleya, kabili casuko nshi cintu Toma apokelela ukukuma ku nshila ya kulya?

▪ Ku kwipusha kwakwe, cinshi mu kumonekesha Filipi alefwaya Yesu ukupayanya?

▪ Mulandu nshi uwamona Yesu na kabili amona Wishi?

▪ Ni shani fintu abakonshi ba kwa Yesu bacita imilimo ikalamba ukucila fintu wene acitile?

▪ Ni mu mano nshi Satana ashakwatila kulama pali Yesu?