“Mukaba Inte Shandi”

1, 2. (a) Nani inte ya kwa Yehova uwacila pa nte shonse? (b) Bushe ishina lya kuti Yesu lyalola mwi, kabili finshi filanga ukuti alecita umwalola ishina lyakwe?

ILYO Yesu Kristu balemulubulwisha kuli kateka umwina Roma alandile ukuti: “Ici e co naishila pano calo, pa kuti mbe inte ku cine.” (Belengeni Yohane 18:33-37.) Yesu ali-ilondolwele umwine ukuti ni mfumu. Pa numa, umutumwa Paulo alandile pa fyo Yesu ali inte iyashipa pantu “alibilile bwino bwino kuli Ponti Pilato.” (1 Tim. 6:13) Kanshi inshita shimo tukabila ukuba abashipa sana pa kuti tube “inte ya cishinka kabili iya cine” mu calo ca kwa Satana umwaba sana ulupato!—Ukus. 3:14.

² Apo Yesu aali mu Yuda, kanshi mu cifyalilwa fye ali ni nte ya kwa Yehova. (Esa. 43:10) Kuti twatila e wacila pa nte shonse isho Lesa abomfya ukumulandilako. Yesu alishibe ukuti ishina ilyo Lesa amupeele lyali ilyacindama nga nshi. Ilyo malaika aebele Yosefe, wishi wa kwa Yesu ukuti ifumo Maria akwete lyafumine ku mupashi wa mushilo, alandile no kuti: “Akafyala umwana umwaume, kabili ukamwinike ati Yesu, pantu akapususha abantu bakwe ku membu shabo.” (Mat. 1:20, 21) Abasoma sana pali Baibolo balanda ukuti ishina lya kuti Yesu lyafuma kwi shiwi lya ciHebere ilya kuti Yeshua, ilyalola mu kuti “Yehova E Pusukilo Lyandi.” Ifi fine e fyo Yesu acitile ukulingana no mwalola ishina ilyo Lesa amupeele. Alyafwile “impaanga ishaluba isha mu ng’anda ya kwa Israele” ukulapila ku membu shabo pa kuti Yehova abatemwe na kabili. (Mat. 10:6; 15:24; Luka 19:10) Yesu ali uwacincila mu kushimikila pa Bufumu bwa kwa Lesa. Kalemba wa mbila nsuma Marko alandile ukuti: “Yesu aile ku Galili, alebila imbila nsuma iya kwa Lesa, aleti: ‘Inshita naifika, no bufumu bwa kwa Lesa nabupalama. Lapileni, no kutetekela imbila nsuma.’” (Marko 1:14, 15) Yesu na kabili ali uwashipa pa ku kalipila intungulushi sha baYuda, e calengele no kuti bamwipaye.—Marko 11:17, 18; 15:1-15.

 3. Cinshi cacitike inshiku shitatu pa numa ya mfwa ya kwa Yesu?

³ Lelo icintu ca kupapusha calicitike inshiku shitatu pa numa ya mfwa ya kwa Yesu! Yehova alimubuushishe no mubili wa ku muulu. (1 Pet. 3:18) Pa kuti abantu beshibe ukuti alibuushiwe, Yesu alimoneke ku bantu mu mubili wa buntunse. Ubushiku abuushiwe, alimoneke imiku 5 ku basambi bakwe.—Mat. 28:8-10; Luka 24:13-16, 30-36; Yoh. 20:11-18.

 4. Pa numa ya kubuuka, kukumana nshi uko Yesu akwete na basambi bakwe, kabili mulimo nshi abapeele?

⁴ Pa muku walenga 5, Yesu amoneke ku batumwa na bantu bambi abalongene. Pali ilya nshita, Yesu asambilishe abasambi bakwe Icebo ca kwa Lesa. ‘Abalengele ukwishiba bwino umwalola Amalembo.’ E ico balyumfwikishe ukuti filya abalwani bamwipeye e lyo na filya abuushiwe mu cipesha amano, fyonse fyalisobelwe mu Malembo. Ilyo Yesu alesondwelela kulya kukumana aebele abalongene mulimo uo balingile ukubomba. Abebele ukuti “kukaba ukubila mu nko shonse ukuti abantu balapile pa kuti belelwe imembu mwi shina lyakwe, ukutendekela mu Yerusalemu.” Alandile no kuti: “Imwe muli no kuba inte sha ifi fintu.”—Luka 24:44-48.

5, 6. (a) Mulandu nshi Yesu asosele ati: “Mukaba inte shandi”? (b) Cintu nshi icipya ico Yesu aebele abasambi bakwe ukulabila ku bantu icali no kufikilisha ubufwayo bwa kwa Yehova?

⁵ Kanshi ilyo Yesu amonekele ku basambi pa numa ya nshiku 40, bafwile balishibe umo aloseshe ilyo abebele ukuti: “Mukaba inte shandi mu Yerusalemu na mu Yudea monse na mu Samaria, na ku mpela ya pano isonde.” (Imil. 1:8) Mulandu nshi Yesu alandile ukuti: “Mukaba inte shandi,” mu nshita ya kulanda ukuti mukaba inte sha kwa Yehova? Yesu nga alandile ukuti muli inte sha kwa Yehova lelo abena Israele abo alelandako baali ni nte sha kwa Yehova.

⁶ Abasambi ba kwa Yesu baali no kutendeka ukulashimikila pa cintu icipya icacindama ukucila pa fyo Yehova alubwile abena Israele ukufuma mu busha mu Egupti na mu Babiloni, nomba baali no kulashimikila pa fyo Yehova aali no kufikilisha ubufwayo bwakwe ukubomfya Yesu. Imfwa ya kwa Yesu Kristu no kubuuka kwakwe fyalenga abantu ukulubulwa ku busha bwabipisha, e kutila ulubembu ne mfwa. Pa Pentekoste mu 33 C.E., abasambi abapya aba kwa Yesu baleshikila abantu “ifintu ifikalamba ifya kwa Lesa” kabili abantu abengi abaumfwileko balilapiile no kutetekela Yesu. Kanshi ilyo Yesu aileikala ku kuboko kwa kulyo ukwa kwa Wishi mu muulu, atendeke ukumona ukufikilishiwa kwa bupilibulo bwe shina lyakwe, pantu abantu abengi sana balilapiile no kutetekela ukuti e o Yehova alebomfya ku kupusha abantu.—Imil. 2:5, 11, 37-41.

 7. Bushe ifyacitike pa Pentekoste mu 33 C.E., filanga cinshi?

⁷ Ifyacitike pa Pentekoste mu 33 C.E. filanga ukuti Yehova alisuminishe ukuti ilambo lyapwililika ilya kwa Yesu lilefuuta imembu sha bantu. (Heb. 9:11, 12, 24) Nga filya fine Yesu alandile, “taishile ukuti balemubombela, lelo aishile mu kubombela abantu no kupeela umweo wakwe icilubula pa kuti alubule abengi.” (Mat. 20:28) Abantu “abengi” abali no kunonkelamo mwi lambo lya cilubula ilya kwa Yesu tabali baYuda fye epela. Lesa afwaya ukuti “abantu balekanalekana bakapusuke” pantu icilubula ‘calisenda ulubembu lwa ba mu calo!’—1 Tim. 2:4-6; Yoh. 1:29.

 8. Ni kwi uko abasambi ba kwa Yesu bafikile ukushimikila, kabili cinshi cabafwile?

⁸ Bushe abasambi ba kwa Yesu aba kubalilapo balishipile pa kuti batwalilile ukushimikila pali ena? Ee balishipile, lelo kwali icalengele ukuti bashipe. Umupashi wa mushilo uwa kwa Yehova e wabakoseshe no kubafwa ukutwalilila ukushimikila. (Belengeni Imilimo 5:30-32.) Ilyo papitile imyaka 27 pa numa ya Pentekoste mu 33 C.E., “amashiwi ya cine aya mbila nsuma” yalifikile “ku cibumbwa conse ica mwi samba lya muulu,” e kutila ku baYuda na bena Fyalo.—Kol. 1:5, 23.

 9. Cinshi cacitike mu cilonganino ca Bena Kristu ica kubalilapo?

⁹ Ku ca bulanda, mu cilonganino ca kubalilapo mwaishileba ifisambilisho fya bufi. (Imil. 20:29, 30; 2 Pet. 2:2, 3; Yuda 3, 4) Nga filya fine Yesu alandile, “umubifi,” e kutila Satana e walengele ukuti mu cilonganino mube ubusangu kabili ubu busangu bwalitwalilila ukufika na ku “nshita ya ku mpela ya cino calo.” (Mat. 13:37-43) Pa numa, Yehova aali no kulenga Yesu ukuba Imfumu. Ici cacitike mu October 1914, kabili e lyo ne “nshiku sha kulekelesha” isha calo ca kwa Satana shatendeke.—2 Tim. 3:1.

10. (a) Bushiku nshi ubwacindama ubo Abena Kristu basubwa balelandapo? (b) Cinshi cacitike mu October 1914, kabili twaishiba shani?

¹⁰ Abena Kristu basubwa aba muno nshiku balilandile ukuti Kristu aali no kutendeka ukuteka mu October 1914. Icalengele ukuti balande ifi bakonkele ukusesema kwa kwa Daniele ukwalanda pa cimuti icikalamba ico bali no kutema, kabili icali no kumena pa numa ya “nshita cinelubali.” (Dan. 4:16) Ilyo Yesu alelanda pa kubapo kwakwe na pa “mpela ya cino calo,” alandile pa nshita cinelubali ukuti ni “nshita ya bena fyalo.” Ukutula mu 1914, calishibikwa ukuti Kristu ni Mfumu. (Mat. 24:3, 7, 14; Luka 21:24) Kanshi ukutula ilya nshita, pa “fikalamba ifya kwa Lesa” ifyo tushimikilapo paba ne ca kuti Yehova alibika Yesu pa Bufumu.

11, 12. (a) Cinshi Imfumu Yesu Kristu yatendeke ukucita mu 1919? (b) Cinshi cimbi icatendeke ukucitika mu 1935? (Moneni icikope pa ntendekelo ya cino cipande.)

¹¹ Pa numa fye ya kumubika pa Bufumu, Yesu Kristu atendeke ukulubula Abena Kristu basubwa ukubafumya muli “Babiloni Mukalamba.” (Ukus. 18:2, 4) Mu 1919, pa numa ya Nkondo ya Calo iya Kubalilapo, Abena Kristu basubwa balikwete sana ubuntungwa bwa kushimikila pa Mfumu ya Bufumu bwa kwa Lesa. Ne ci calengele ukuti abasubwa abengi abakateka na Kristu balonganikwe.

¹² Mu 1935, calimoneke apabuuta ukuti Kristu alitendeke ukulonganika “impaanga shimbi” abali no kuba mwi “bumba likalamba.” Ili ibumba likalamba pamo na Bena Kristu basubwa balapashanya filya Yesu ali uwashipa ilyo baleshimikila abantu ukuti ipusukilo lyesu lyafuma kuli Lesa fye na Kristu. Nga batwalilila ukushimikila no kuba ne citetekelo mwi lambo lya kwa Kristu, bakapusuka “ubucushi bukalamba,” kabili bakekala mwi sonde lipya.—Yoh. 10:16; Ukus. 7:9, 10, 14.

13. Apo tuli Nte sha kwa Yehova, cinshi ico tufwile ukutwalilila ukulacita, kabili cinshi cingalenga tucetekele ukuti tatwakafilwe?

¹³ Natutwalilile ukulashimikila pa “fikalamba” ifyo Yehova Lesa acita na pa fyo alaya. Kwena tacayanguka ukutwalilila ukushimikila. Bamunyinefwe abengi babombela mu fifulo umo abantu bashifwaya imbila nsuma, e co balabapumya no kubacusha nga nshi. Kanshi tufwile ukupashanya umutumwa Paulo na Bena Kristu banankwe abatile: “Twalishipile pantu Lesa wesu alitukoseshe pa kuti tulande kuli imwe imbila nsuma ya kwa Lesa no kucula nga nshi.” (1 Tes. 2:2) Tatufwile ukuleka ukushimikila. Lelo natutwalilile ukulacita ifyo twalaile ilyo twaipeele ukufikila icalo ca kwa Satana cikonaulwe. (Esa. 6:11) Te kuti tubombe uyu mulimo ku maka yesu, lelo nga filya fine Abena Kristu ba kubalilapo balecita, na ifwe tufwile ukulapepa kuli Yehova ukuti aletupeela “amaka yacila aya bantunse.”—Belengeni 2 Abena Korinti 4:1, 7; Luka 11:13.

14, 15. (a) Bushe Abena Kristu bakubalilapo balebamona shani, kabili cinshi umutumwa Petro alandile pali bena? (b) Bushe tufwile ukumfwa shani nga baletucusha pa mulandu wa kuba ba Nte?

¹⁴ Muno nshiku, abengi baita ukuti Bena Kristu, ‘lelo ku fyo bacita balikaana Lesa, pantu bantu ababipa kabili ni bacintomfwa kabili te kuti babombe umulimo uusuma nangu umo.’ (Tito 1:16) Tufwile ukulaibukisha ukuti Abena Kristu ba cine aba kubalilapo balibapatile ku bantu abengi. E mulandu wine umutumwa Petro alandile ukuti: “Abantu nga balemupontela pa mulandu we shina lya kwa Kristu, ninshi mwalipaalwa, pantu ninshi . . . umupashi wa kwa Lesa, uli na imwe.”—1 Pet. 4:14.

¹⁵ Bushe na ba Nte muno nshiku balabapontela? Ee, pantu bashimikila ukuti Yesu ni Mfumu ya Bufumu bwa kwa Lesa. Kanshi ukutupata pa mulandu wa kulanda pe shina lya kwa Lesa cimo no ‘kutupontela pa mulandu we shina lya kwa Yesu Kristu’ uwaebele abalemukaanya ukuti: “Naishila mwi shina lya kwa Tata, lelo imwe tamumpokelela.” (Yoh. 5:43) Kanshi nga balemucusha ilyo muleshimikila, muleshipa. Pantu ninshi Lesa natemwa ifyo mulecita no “umupashi wa kwa Lesa, uli na imwe.”

16, 17. (a) Cinshi icilecitika mu fyalo ifingi ico abantu ba kwa Yehova balemona? (b) Finshi ifyo mulefwaisha ukucita?

¹⁶ Muleibukisha no kuti mu fyalo ifingi abantu abengi balekutika ku mbila nsuma. Nangu fye ni mu fifulo umo twashimikila sana, tulasangamo abantu abafwaisha ukukutika ku mbila nsuma. Kanshi natulebombesha nga twasanga abalefwaya ukumfwa pa kuti tutendeke ukusambilila nabo Baibolo, ukubafwa ukulunduluka pa kuti baipeele no kubatishiwa. Nalimo na imwe mumfwa filya ba Sarie aba ku South Africa bomfwa, abashimikila imbila nsuma pa myaka 60. Batile: “Ndatasha sana pa cilubula ce lambo lya kwa Yesu pantu calilenga ukuti imbe cibusa musuma uwa kwa Yehova, Mulopwe uwabumbile ifintu fyonse kabili ndomfwa bwino ukwebako bambi pe shina lyakwe ilya bukata.” Ba Sarie na bena mwabo ba Martinus, balyafwa abantu abengi ukusanshako na bana babo ukuba bakapepa ba kwa Yehova. Ba Sarie balandile no kuti, “Takwaba umulimo uuli onse uulenga naba sana nsansa ukucila uyu, kabili Yehova alatupeela umupashi wakwe uwa mushilo uutwafwa ukutwalilila ukushimikila imbila nsuma.”

¹⁷ Nampo nga tuli Bena Kristu ababatishiwa nelyo iyo, tufwile ukulatasha pe shuko lya kuba mu cilonganino ca Nte sha kwa Yehova. E ico twalilileni ukulashimikila sana imbila nsuma no kulaesha na maka yonse ukukanaba aba muli cino calo ca kwa Satana. Nga mulecita ifi, mukalenga ishina lya kwa Shifwe wa ku muulu, ukucindikwa uo twitilwa kwi shina lyakwe ilya mushilo.