Cinshi Ifyabipa Ficitikila, Kabili Cinshi Abantu Baculila?

Ifyabipa nga fyacitika, mu cifyalilwa fye tulayipusha ukuti, “Cinshi fyacitikila?” Nomba icawamako ca kuti Baibo yalyasuka ici cipusho.

1. Finshi Satana acitile pa kuti ifyabipa fitendeke ukucitika pano calo?

Satana Kaseebanya alipondokele Lesa. Satana alefwaya ukuba kateka, e ico alitunkile Adamu na Efa ukuti nabo bapondokele Lesa. Pa kuti acite ifi alibepele Efa. (Ukutendeka 3:1-5) Alilengele Efa alatontonkanya ukuti Yehova alimufishile ifisuma. Mu mashiwi yambi aleti abantunse kuti baba ne nsansa sana nga tabaleumfwila Lesa. Umuku wa kubalilapo Satana abepele ni lilya aebele Efa ukuti taali no kufwa. E mulandu wine Baibo ilandila ukuti Satana “wa bufi kabili e wishi wa bufi.”—Yohane 8:44.

2. Cinshi Adamu na Efa basalilepo ukucita?

Yehova alipeele Adamu na Efa fyonse ifyo balekabila. Abebele ukutila kuti balya ku fimuti fyonse ifyali mwi bala lya Edeni, ukufumyako fye icimuti cimo. (Ukutendeka 2:15-17) Lelo basalilepo ukulya kuli cilya icimuti abakeenye. Efa ‘alisabileko ifisabo no kulya alya.’ Pa numa, Adamu na o ‘aliliile.’ (Ukutendeka 3:6) Bonse babili tabaumfwilile Lesa. Apo Adamu na Efa bali abapwililika, bali no kulacita fye ifyalungama lyonse. Nomba apo basalilepo ukukanaumfwila Lesa ku mufulo fye, balibembwike kabili balikeene ukuti Lesa alebateka. Ifi basalilepo ukucita fyalibaletelele.—Ukutendeka 3:16-19.

3. Bushe ifyo Adamu na Efa basalilepo ukucita fyatukuma shani?

Ilyo Adamu na Efa babembwike, baishileba abashapwililika. Kanshi na bana bali no kukwata nabo bali no kuba abashapwililika. Baibo ilanda pali Adamu ukuti: “Ulubembu lwaingilile mu mwaume umo pano calo ne mfwa yaingilile mu lubembu, e fyo ne mfwa yasalanganine ku bantu bonse.”—Abena Roma 5:12.

Kwaliba ifingi ifilenga tulecula. Inshita shimo icilenga tulecula kukanasala bwino ifya kucita. E lyo inshita shimbi tulacula pa mulandu wa fyabipa ifyo bambi basalapo ukucita. E lyo inshita shimbi nasho, tulacula pa mulandu wa kuti twasangwa apo ifyabipa fyacitikila.—Belengeni Lukala Milandu 9:11.

SAMBILILENI NA FIMBI

4. Uulenga tulecula

Abantu abengi baishiba ukuti Lesa e uteka icalo. Bushe ca cine e uteka? Tambeni VIDIO.

VIDIO: Nani Ateka Cino Calo? (1:24)

Belengeni Yakobo 1:13 na 1 Yohane 5:19, lyena lanshanyeni ici cipusho:

• Bushe Lesa e ulenga tulecula?

5. Finshi fyacitika ukutula apo Satana atendekele ukuteka?

VIDIO: Mulandu Nshi Lesa Asuminishisha Ukucula?—Iyo Baipifya (3:07)

Belengeni Ukutendeka 3:1-6, lyena lanshanyeni aya mepusho:

• Bufi nshi Satana abepele?—Moneni icikomo 4 na 5.

• Finshi Satana alandile ifyalengele camoneka kwati Yehova alefisa ifisuma ku bantunse?

• Ukulingana ne lembo twacibelenga, bushe Satana aloseshe mu kuti abantunse kuti baba ne nsansa Yehova nga alebateka?

Belengeni Lukala Milandu 8:9, lyena lanshanyeni ici cipusho:

• Finshi fyacitika ifi Yehova ashiteka isonde?

1. Adamu na Efa bali abapwililika kabili baleikala mu Paradaise. Lelo baumfwilile Satana no kupondokela Yehova

2. Ilyo Adamu na Efa bapondweke, balilengele abantu bonse baba abashapwililika, balacula, no kufwa

3. Yehova akafumyapo ulubembu, ukucula, e lyo ne mfwa. Kabili ici cikalenga abantunse bakabe abapwililika na kabili no kulaikala mu Paradaise

6. Yehova tomfwa bwino nga tulecula

Bushe Lesa omfwa shani nga tulecula? Moneni ifyo Imfumu Davidi no mutumwa Petro balembele. Belengeni Amalumbo 31:7 na 1 Petro 5:7, lyena lanshanyeni ici cipusho:

• Bushe mwaumfwa shani ifi mwaishiba ukuti Yehova aleshiba nga mulecula kabili alomfwa ububi?

IFYO MUSAMBILILE

Satana Kaseebanya, Adamu, e lyo na Efa e balenga ukuti kube ifyabipa ificitika mu calo. Yehova alomfwa ububi nga tulecula, kabili nomba line fye ali no kufumyapo fyonse ifilenga tulecula.

Ukupitulukamo

• Bufi nshi Satana abepele Efa?

• Bushe filya Adamu na Efa bapondokele Lesa fyatukuma shani?

• Twaishiba shani ukuti Yehova alomfwa ububi nga tulecula?

ISHIBILENIPO NA FIMBI

Moneni ifyo Baibo yalondolola ulubembu.

“Bushe Ulubembu ni Cinshi?” (Icipande ca pa jw.org)

Belengeni na fimbi pa mulandu Satana Kaseebanya aimishe mwi bala lya Edeni.

“Cinshi Lesa Asuminishisha Ukucula?” (Ulupungu lwa kwa Kalinda, January 1, 2014)

Belengeni icasuko ku cipusho ico abengi bafilwa ukusanga amasuko.

“Mulandu Nshi Kwabelele Icimusango ca Kwipaya AbaYuda mu Nkondo ya Calo iya Bubili? Cinshi Lesa Ashaleseshe Cilya Cimusango?” (Icipande ca pa jw.org)

Tambeni vidio no kumona ifyo umwaume umo asambilile pa mafya ayalecitika uko ali.

Pali Ino Nshita Nshaba Neka (5:09)

Tulacita imembu, tulacula, kabili tulafwa pa mulandu wa kuti Adamu na Efa tabaumfwilile Lesa.a Lelo twalikwata isubilo. Yehova alitupeele Umwana wakwe Yesu Kristu ukwisatulubula ku lubembu ne mfwa. Baibo isambilisha ukuti ilyo Yesu afwile alipeele icilubula. Icilubula ni ndalama nelyo ifintu ifyo balipila pa kulubula umuntu. Ico Yesu alipiile bumi bwakwe ubwapwililika. (Belengeni Mateo 20:28.) Ilyo Yesu aitemenwe ukufwa, alilengele twaba ne shuko lya kwisakwata fyonse ifyo Adamu na Efa balufishe. Na kabili Yesu alilengele caishibikwa ukuti ena na Yehova balitutemwa. Ifili muli lino isambililo fyalalenga muletasha sana pali filya Yesu atufwilile.

1. Fisuma nshi fyafuma muli filya Yesu atufwilile?

Apo tuli babembu, tulacita ifintu ifingi ifyo Yehova apata. Na lyo line, nga twalapila ukufuma panshi ya mutima, twapepa kuli Yehova ukupitila muli Yesu Kristu ukuti atwelele, kabili nga twaesha na maka ukukanabwekeshapo ifyo twalufyenye, tulaba sana ifibusa fya kwa Lesa. (1 Yohane 2:1) Baibo itila: “Kristu afwile fye umuku walimo pa mulandu wa membu shesu, uwalungama afwiliile abashalungama pa kuti amutungulule kuli Lesa.”—1 Petro 3:18.

2. Fisuma nshi ifikacitika ku ntanshi pa mulandu wa kuti Yesu alitufwilile?

Yehova atumine Yesu ukwisapeela ubumi bwakwe ubwapwililika pa “pa kuti onse [uutetekela Yesu] ekonaika, lelo akabe no mweo wa muyayaya.” (Yohane 3:16) Apo Yesu alitufwilile, nomba line Yehova akafumyapo ifyabipa fyonse ificitika pa mulandu wa kuti Adamu taumfwilile Lesa. Kanshi nga twatetekela mwi lambo lya kwa Yesu, tukesaba ne nsansa umuyayaya mu paradaise pe sonde!—Esaya 65:21-23.

SAMBILILENI NA FIMBI

3. Imfwa ya kwa Yesu yalilenga twalubuka ku lubembu ne mfwa

VIDIO: Mulandu Nshi Yesu Afwilile?—Ulubali 1 (2:01)

• Lishuko nshi Adamu apanishe ilyo akeene ukumfwila Lesa?

Belengeni Abena Roma 5:12, lyena lanshanyeni ici cipusho:

• Bushe filya Adamu abembwike fyamukuma shani?

Belengeni Yohane 3:16, lyena lanshanyeni ici cipusho:

• Cinshi Yehova atumiine Umwana wakwe ukwisa pe sonde?

1. Adamu ali uwapwililika. Lelo apo taumfwilile Lesa, alilengele abantu bapyana ulubembu ne mfwa

2. Yesu ali uwapwililika kabili aleumfwila Lesa. Ici cikalenga abantu bakabe abapwililika no kwisaikala umuyayaya

4. Abantu bonse kuti banonkelamo mu mfwa ya kwa Yesu

VIDIO: Mulandu Nshi Yesu Afwilile?—Ulubali 2 (2:00)

• Bushe imfwa ya muntu umo kuti yalenga shani abantu bonse banonkelamo?

Belengeni 1 Timote 2:5, 6, lyena lanshanyeni ici cipusho:

• Adamu ali uwapwililika. Nomba pa mulandu wa kuti alibembwike, abantu bonse pe sonde balafyalwa no lubembu kabili balafwa. Yesu na o ali uwapwililika. Fisuma nshi fyafuma muli filya Yesu atufwilile, ifyalenga abe “icilubula icalinga”?

5. Icilubula bupe ubo Yehova amupeela

Ifibusa fya kwa Yehova bamona icilubula ngo bupe ubo Yehova abapeela. Ku ca kumwenako, belengeni Abena Galatia 2:20, lyena lanshanyeni ici cipusho:

• Finshi ifyo umutumwa Paulo alandile ifilanga ukutila alemona ukuti icilubula bupe ubo Yehova amupeele?

Ilyo Adamu abembwike, ena na bana bakwe bonse bapingwilwe ukufwa. Lelo Yehova atumine Umwana wakwe ukwisafwa pa kuti mukabe no mweo wa muyayaya.

Ilyo mulebelenga ifikomo ifikonkelepo, mule-elenganya ifyo Yehova aumfwile ilyo Umwana wakwe balemucusha. Belengeni Yohane 19:1-7, 16-18, lyena lanshanyeni ici cipusho:

• Bushe mwaumfwa shani pa fyo Yehova na Yesu bamucitila?

IFYO MUSAMBILILE

Filya Yesu atufwilile fyalilenga Yehova aletwelela imembu, kabili fikalenga tukabe ne nsansa umuyayaya.

Ukupitulukamo

• Mulandu nshi Yesu afwilile?

• Bushe filya Yesu apeele ubumi bwakwe ubwapwililika fyalenga aba shani icilubula icalinga?

• Bushe kuti mwanonkelamo shani mu mfwa ya kwa Yesu?

ISHIBILENIPO NA FIMBI

Belengeni umulandu ubumi bwa kwa Yesu ubwapwililika bwabela icilubula.

“Bushe Imfwa ya kwa Yesu Yaba Shani ‘Icilubula ca pa Abengi’?” (Icipande ca pa jw.org)

Moneni ifyo tufwile ukucita pa kuti tukalubuke ku lubembu ne mfwa.

“Bushe Yesu Apususha Shani?” (Icipande ca pa jw.org)

Bushe Yehova kuti atwelela nangu twacita ulubembu ulukalamba?

“AMEPUSHO YA MU BAIBOLO YA-ASUKWA” (Ulupungu lwa kwa Kalinda, May 1, 2013)

Moneni ifyo ukusambilila pa cilubula ca kwa Kristu kwa-afwile umwaume umo ukwalula imibele yakwe.

“Pali ino Nshita Nshatekwa Ubusha ku Bunkalwe” (Icipande ca pa jw.org/bem)