Bushe Muli Bena Kristu ‘Abafika ku Bukalamba?’

UMUTUMWA Paulo alembele ati: “Ilyo nali umwaice, nalelanda ngo mwaice, naleumfwa ngo mwaice, naletontonkanya ngo mwaice.” Cine cine, ifwe bonse pa nshita imo twali abaice abapelelwa. Nangu cibe fyo, tatwatwalilile muli iyi mibele. Paulo atile: “Lelo nomba ndi mukalamba, nindeke fya bwaice.”—1 Abena Korinti 13:11.

Mu musango umo wine, Abena Kristu bonse batendeka ngo tunya lwa ku mupashi. Lelo mu kuya kwa nshita, bonse ‘kuti bafika kuli buumo bwa kutetekela na ku kwishibo Mwana wa kwa Lesa, ukufika na ku bukalamba, ku mulingo wa mushinku wa mwisulo wa kwa Kristu.’ (Abena Efese 4:13) Pali 1 Abena Korinti 14:20, twakonkomeshiwa ukuti: “Mwe ba bwananyina, mwiba baice mu mitima . . . Lelo mu mitima mube abakalamba.”

Ukuba pamo na Bena Kristu abakosoka, abafika ku bukalamba caliba lipaalo ku bantu ba kwa Lesa ilelo, ukucilisha apo kuli abapya abengi mu kati kabo. Abena Kristu abafika ku bukalamba balalundako ku kushikatala kwa cilonganino. Balacincisha imibele isuma iya ba mu cilonganino basangwamo.

Ilyo ukukula lwa ku mubili kuiishila fye ukwine kweka, ukukula lwa ku mupashi kwisako ukupitila mu kuba ne nshita no kubombesha. Te ca kupapa ukuti mu nshita sha kwa Paulo, Abena Kristu bamo balifililwe “ukulola ku bukalamba,” nangu ca kuti balibombele Lesa pa myake iingi. (AbaHebere 5:12; 6:1) Ni shani pa lwa imwe? Nampo nga mwalibombela Lesa pa myaka iingi nangu pa nshita iipi, cili calinga ukuibebeta mwe bene mu kufumaluka. (2 Abena Korinti 13:5) Bushe muli pali abo abengetwa icine cine ukuti Bena Kristu bakosoka, nelyo abafika ku bukalamba? Nga te fyo, ni shani fintu mwingafikapo?

“Mu Mitima Mube Abakalamba”

Abacece lwa ku mupashi ‘balasensenunwa kabili balapepelulwa ku mwela onse we sambilisho, ku kufinsha kwa bantu, incenjeshi ku kwelenganye fya kulufya.’ E co Paulo acincishe ukuti: “Mu kutemwa, muli fyonse tukule tufike kuli wene, e Mutwe, Kristu.” (Abena Efese 4:14, 15) Ni shani fintu umo engacite ci? Pa AbaHebere 5:14 patila: “Ifilyo ifyakosa fya bakalamba, abo bakansho kulingulula kwabo pa kweshaesha ukupaatululo busuma ukubulekanya no bubi.”

Moneni ukuti abantu abakosoka balikansho kulingulula kwabo, nelyo balibelesha mu kubomfya ifishinte fya Baibolo. E co kanshi, umo te kuti afike ku kukosoka mu bushiku fye bumo; cilasendako inshita ukukula lwa ku mupashi. Nangu ni fyo, kuti mwacite fingi ku kuluminisha ukukula kwenu ukwa ku mupashi ukupitila mwi sambililo lya pa lwenu—ukucilisha ukusambilila ifyashika ifyaba mu Cebo ca kwa Lesa. Pali ndakai, Ulupungu lwa kwa Kalinda lwalilanda pa fyashika ifingi. Abakosoka lwa ku mupashi tabasengauke fipande fya musango yo pa mulandu wa kuti mwaba “ifintu fimo ifyayafyo kwiluka.” (2 Petro 3:16) Lelo, balafwaya ukuipakisha ifya kulya ifyakosa ifya musango yu!

Bakashimikila Kabili Bakasambilisha Bapimpa

Yesu aebele abasambi bakwe ukuti: “E ico kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya Mupashi wa mushilo: mulebasambilisha ukubaka fyonse ifyo namwebele.” (Mateo 28:19, 20) Ukubomba umulimo wa kushimikila mu kupimpa kuti na ko kwamucincisha ukukula lwa ku mupashi. Mulandu nshi wa kukanatukuta ukubombako sana uyu mulimo nga fintu imibele yenu ilemusuminisha?—Mateo 13:23.

Pa nshita shimo, ukutitikisha kwa mikalile kuti kwacilenga ukube icayafya ukusange nshita ya kushimikila. Lelo, ‘ukupilikita’ kwenu nga kashimikila, kukalangilila ifyo mwacindamika “imbila nsuma.” (Luka 13:24; Abena Roma 1:16) Napamo ‘abatetekela bakalamumona nge ca kumwenapo.’—1 Timote 4:12.

Aba Bumpomfu

Ukukula ukufika ku kukosoka cisanshamo kabili ukubombesha ukuba aba bumpomfu. Nga fintu calembwa pa Amalumbo 26:1, Davidi atile: “Mpinguleni, mwe Yehova, pantu ine naendela muli bumpomfu bwandi.” Bumpomfu cipilibula ukutambalala mu mibele, ukuba uwafikapo. Lelo, tacipilibulo kuba uwapwililila. Davidi wine alicitile imembu shimo shimo ishabipisha. Nangu cibe fyo apo alipokelele ukwebaulwa no kulungike nshila shakwe, alilangilile ukuti umutima wakwe ucili walitemenwe Yehova Lesa icine cine. (Amalumbo 26:2, 3, 6, 8, 11) Bumpomfu busanshamo ukuipeelesha no mutima onse nangula mu kukumanina. Davidi aebele umwana wakwe Solomone ukuti: “Ishiba Lesa wa kwa wiso, no kumubombela no mutima wa cishinka.”—1 Imilandu 28:9.

Ukuba aba bumpomfu cisanshamo ‘ukukanaba ulubali lwa calo,’ ukutalukako ku mapolitiki na ku nkondo sha mu calo. (Yohane 17:16) Mulingile kabili ukusengauka ifibelesho ifyabipa, pamo ngo bulalelale, ubucende, no kubomfya imiti ikola. (Abena Galatia 5:19-21) Ukuba aba bumpomfu kupilibula ifingi, ukucila na pa kusengauka fye ifyo fintu. Solomone asokele ukuti: “Lunshi uwafwa apimpinusha amafuta ya kwa katobenkanya: ukutumpa kunono koona amano no bukata.” (Lukala Milandu 10:1) Ca cine, nangu fye “ukutumpa kunono,” pamo nge milandile ishalinga nelyo imibele ya cintemwa ku muntu uo mushaupana nankwe , kuti kwaonaule shina lisuma ilya wa “mano.” (Yobo 31:1) E co, langilileni ukukosoka kwenu ukupitila mu kufwaya ukuba ica kumwenako mu myendele yenu yonse, ukusengauka nangu fye “imimonekele ya bubifi.”—1 Abena Tesalonika 5:22, King James Version.

Aba Bucishinka

Umwina Kristu uwafika ku bukalamba kabili alaba na bucishinka. Umutumwa Paulo akonkomesha Abena Kristu nga fintu tubelenga pa Abena Efese 4:24 ukuti: “[Fwaleni] buntu bupya, ubwalengelwe mu cipasho ca kwa Lesa mu kulungama no kushila kwa Cine.” Mu Malembo ya ciGriki, ishiwi lyapilibulwa ukuti “ukushila kwa Cine” mu lulimi lwa kutendekelako lilosha kuli bumushilo, ubulungami, no kucindikisha. Umuntu wa bucishinka aliipeelesha, aba uwa bukapepa; kabili mu kusakamanishisha alabomba imilimo yonse iyapeelwa na Lesa.

Ni nshila nshi shimo umo twingalundulwila bucishinka bwa musango yo? Inshila imo kupitila mu kubombela pamo na baeluda ba pa cilonganino ca pa mwenu. (AbaHebere 13:17) Ukwishiba ukuti Kristu alisontwa ukuba Umutwe wa cilonganino ca Bwina Kristu, Abena Kristu bakosoka lyonse balaba aba bucishinka kuli abo abasontwa ku ‘kucema ulukuta lwa kwa Shikulu.’ (Imilimo 20:28) Mwandi fintu cingaba icishalinga ukutwishika nelyo ukusuusha ubutungulushi bwa baeluda basontwa! Mulingile kabili ukuba aba bucishinka ku “musha wa cishinka kabili uwashilimuka” na ku fibombelo fibomfiwa ku kwananya ‘ica kulya ca ku mupashi mu nshita iyene.’ (Mateo 24:45) Muleyangufyanya ukubelenga no kubomfya ifyebo ifisangwa mu Ulupungu lwa kwa Kalinda ne mpapulo shimbi.

Ukutemwa Bambi ku Ncitilo Shenu

Paulo alembeele Abena Kristu mu Tesalonika ukuti: “Ukutemwana kwa imwe bonse umo umo kulefulisha.” (2 Abena Tesalonika 1:3) Ukukula mu kutemwa maka maka kwaba lubali lwacindama ulwa kukula lwa ku mupashi. Nga fintu calembwa pali Yohane 13:35, Yesu atile: “Muli ici e mo bonse bakeshibilo kuti muli basambi bandi, nga mwaba no kutemwana.” Ukutemwa aba bwananyina ukwa musango yo takwishibikilwa fye ku nkuntu no kuyumfwa epela. Vine’s Expository Dictionary of Old and New Testament Words isosa ukuti: “Ukutemwa kuti kwaishibikilwa mu fyo kulenga umuntu ukucita.” Cine cine, kuti mwalola ku kukosoka pa lwa uyu mulandu nga mwalangisha mu ncitilo ukuti mwalitemwa bambi!

Ku ca kumwenako, pa Abena Roma 15:7, tubelengo kuti: “Mulesekelelana.” Inshila imo twingatemenwamo bambi kupitila mu kulaposha abasumina banensu kabili no kusekelela abapya pa kulongana—mu cikabilila na mu kucincimuka! Esheni ukwishiba bene ngo muntu umo umo. ‘Mulelolekesha’ ifya bambi. (Abena Filipi 2:4) Nakalimo kuti mwaba fye ne cileela kabili no kulaalika abapusanapusana ku ng’anda ku mwenu. (Imilimo 16:14, 15) Ukukanapwililika ukwa bantu bambi inshita shimo kuti kwaesha ifyo mwabatemwa, lelo ilyo mulesambilila ‘ukushipikisha mu kutemwa,’ mukalalangilila ukuti mulelola ku bukalamba.—Abena Efese 4:2.

Ukubomfya Ifikwatwa Fyesu mu Kutwala pa Ntanshi Ukupepa Kwasanguluka

Mu nshita sha pa kale, te bantu ba kwa Lesa bonse ababombele imilimo yabo ku kwafwilisha itempele lya kwa Yehova. E co Lesa atumine bakasesema, pamo nga Hagai na Malaki, ku kucincimuna abantu Bakwe muli uyu mulandu. (Hagai 1:2-6; Malaki 3:10) Abena Kristu bakosoka ilelo mu nsansa balabomfya ifikwatwa fyabo ku kwafwilisha ukupepa kwa kwa Yehova. Pashanyeni aba musango yu pa kulakonka icishinte ca pali 1 Abena Korinti 16:1, 2, ica ‘kulapaatulako fimo no kubika,’ ku kusangwilako lyonse ku cilonganino na ku mulimo uwa mwi sonde lyonse uwa Nte sha kwa Yehova. Icebo ca kwa Lesa calayo kuti: “Uutanda alefusha, akaseepe fyafula.”—2 Abena Korinti 9:6.

Mwilalabako na ku fikwatwa fimbi mwakwata, pamo nge nshita e lyo na maka. Muleesha ‘ukulubule nshita’ ku ncito ishishacindamisha. (Abena Efese 5:15, 16; Abena Filipi 1:10) Sambilileni ukubomfya bwino inshita yenu. Nga mwacite ci cikamulengo kubombako mu mulimo wa kuwamye Ng’anda ya Bufumu na mu ncito shimbi ishapalako ishilundulula ukupepa kwa kwa Yehova. Ukubomfya ifikwatwa fyenu muli iyi nshila cikaba bushinino bwalundwako ubwa kuti mulefika ku kuba Umwina Kristu umukalamba.

Loleni ku Bukalamba!

Abaume na banakashi abatemwisha ukusoma no kwishiba ifintu, abapimpa mu kushimikila, aba bumpomfu, aba bucishinka na batemwa abantu, kabili abaitemenwa ukwafwilisha lwa ku mubili mu mulimo wa Bufumu baliba ipaalo icine cine. E mulandu wine kanshi umutumwa Paulo akonkomeseshe ukutila: “Natufume ku masambililo ya kutendeka ya kwa Kristu, no kulola ku bukalamba.”—AbaHebere 6:1.

Bushe muli Bena Kristu abakosoka, abafika ku bukalamba? Nangu bushe mu nshila shimo, mucili nga kacece lwa ku mupashi? (AbaHebere 5:13) Te mulandu muli abakalamba nelyo abaice lwa ku mupashi, pampamineni pa kulasambilila Baibolo pa lwenu, ukulashimikila, kabili ukutemwa bamunyinenwe. Pokeleleni ukufunda konse no kusalapula ukufuma ku Bena Kristu bakosoka. (Amapinda 8:33) Sakamaneni imilimo yonse iya Bwina Kristu. Mu kupita kwa nshita na mu kulabombesha, na imwe bene ‘mukafika kuli buumo bwa kutetekela na ku kwishibo Mwana wa kwa Lesa, ukufika na ku bukalamba, ku mulimo wa mushinku wa mwisulo wa kwa Kristu.’—Abena Efese 4:13.

[Amashiwi pe bula 27]

Abena Kristu abafika ku bukalamba balalundako ku kushikatala kwa cilonganino. Balacincisha imibele isuma iya ba mu cilonganino

[Ifikope pe bula 29]

Abena Kristu bakosoka balasangwilako ku mupashi usuma uwa cilonganino pa kwangwako kuli bambi