Wilaba ne Cikonko ku Mukoshi

KUTI pambi camoneka icacilapo ukusonsomba ukusengauka ukuba ne cikonko lintu umo atulufyanya. Baibolo yalikwata ukufunda ukubomba pa mibele ya musango yo. “Kalipeni, lelo mwibembuka; mwileka kasuba kawe mucili no bukali,” e fyalembele umutumwa Paulo.—Abena Efese 4:26.

Lintu umo atulufyanya, caliba fye ca cifyalilwa ukuba ne cipyu. Apantu Paulo atila “kalipeni” ciletubulula ukuti ubukali pa nshita shimo kuti bwaba ubwalinga—napamo mu kwankula ku mucisha cinani nelyo ku kufyengeleshiwa. (Linganyako 2 Abena Korinti 11:29.) Lelo lintu bwalekeleshiwa ukwabula ukupikululwa, nelyo bukali ubwalinga kuti bwafumamo ifintu fyabipa, ukutwala ku lubembu lukalamba. (Ukutendeka 34:1-31; 49:5-7; Ilumbo 106:32, 33) E co, cinshi wingacita nga ca kuti wakalifiwa?

Mu milandu iingi iya tulubo tunono, napamo kuti wafipwisha fye mu mutima “no kutalala” nelyo kuti watununuka uukukalifye no kulanshanya uyo mulandu. (Ilumbo 4:4; Mateo 5:23, 24) Inshila iili yonse wasalapo, caliwamisha ukupikulula umulandu mu kwangufyanya pa kuti icikonko tacimite no kufyala ifya kufumamo fyabipa.—Abena Efese 4:31.

Yehova alalekelela imembu shesu apa fye, nelyo fye ni membu isho tushaishiba ukuti twalicita. Bushe na ifwe tatulingile ukulekelela utulubo tunono utwa bantunse banensu?—Abena Kolose 3:13; 1 Petro 4:8.

Ku ca kusekesha, ishiwi lya ciGriki ilyapilibulwa “ukulekelela” mu kulikonka fye lipilibula “ukulekelako.” Ukulekelela tacipilibule fyo tucefye icilubo nelyo ukucitekelesha. Inshita shimo kuti casanshamo fye ukulekelako imibele imo, ukwishiba ukuti ukuba ne cikonko ku mukoshi kukalundako fye ku cisendo no kupumfyanya ukwikatana kwa cilonganino ca Bwina Kristu. Mu kulundapo, ukuba ne cikonko ku mukoshi kuti kwaba kwa busanso ku butuntulu bobe ubwa bumi!—Ilumbo 103:9.