“Ni Kwi Kuntu Indalama Shifuma?”

ABATAMBA vidio wa Watch Tower Society uwa “Jehovah’s Witnesses—The Organization Behind the Name” balapeshiwa amano. Bamona abaume na banakashi aba busaka ukufuma mu mishobo yalekanalekana ne fikulilo, aba mwentula kabili balebomba capamo mu kumfwana. Tabakumbwa fye ukumona amakana ya bakabomba ba nsansa lelo balakumbwa ne fikuulwa fikalamba ifyapikana pa maofesi yakalamba aya Sosaite ku Brooklyn na ku mafarmu yabo ku Walkill, New York. Vidio alangisha ukuti mu kati ka ifi fikuulwa mulasangwa ifya kupangapanga fya muno nshiku—ifisolobelo fya kupulintilako mu kwangufyanya nga nshi ne fya kukupila ifitabo ukuletako amamilioni ayengi aya mpapulo cila mweshi, ukulekanalekana kwa fisolobelo fya makompyuta, na cinkukwe walekanalekana uwa milimo iyafwilisha ukusabankanya kwa mpapulo.

Ici cilangisha ukuti kwalibako ubukumu ubwingi nga nshi. E co bamo balepusha abati, “Ni kwi kuntu indalama shifuma?”

Abatandalila amaofesi yakalamba aya Sosaite aya calo conse na bo bene balasunguka. Balenune mikoshi yabo ku kutamba icikuulwa ca kwikalamo icipya ica ntunti 30, cimo pa fikuulwa ifingi ifibomfiwa ku kwikalamo abatumikishi ba kuitemenwa abacila 3,000 ababombela palya. Ukutandalila Watchtower Educational Center umupya mupepi na bakilomita 110 ku kapinda ka ku kuso aka Brooklyn na ko kulenga abengi ukwikata fye icinwa ca pa nshi. Pekala bakabomba mupepi na 1,200 nangu cingati bacili balekuula. Amakalasi yabili aya bamishonari yakalakanshiwa kuno cila mwaka no kutumwa ku fyalo fimbi ku milimo yabo. Na kabili ni kuno e ko ubutungulushi bupeelelwa ku filonganino fya Nte sha kwa Yehova ifyacila pali 10,000 mu United States. Imisambo iingi mu kusaalala kwa calo na yo ine pali ndakai yalikushako ifibombelo fyabo nelyo bali no kucite fyo. Pa kupwishishisha iyi mibombele yonse cifwaya indalama ishingi. Abantu balepusha ukuti, “Ni kwi kuntu indalama shifuma?”

Icasuko cileti shifuma ku bantu yaweyawe ukupala uuli onse uwa ifwe. Kwalibako abantu, mu kusaalala kwa calo, abafwaisha ukucita apo bengapesha ku kutwala pa ntanshi umulimo wa Bwina Kristu uwacindama uwa kushimikila no kusambilisha. Umupashi wa kuitemenwa uwa musango yo walikwata ica kumwenako ca ku numa.

Ica Kumwenako Caimike Israele wa pa Kale

Imyaka ukucila 3,500 iyapitapo, kwalimineko ukukabila kwa misangulo ya bukapekape. Yehova aebele Mose ukukuula ica kwikalamo, nelyo “ihema lya Kulaishanya,” ilya kubomfya pa Kumupepa. Inshila lyali no kupangilwamo iyapekanishiwe na Lesa yakabile ifipe fyaumo mutengo ifyalekanalekana. Yehova akambishe ukuti: “Mubuule muli imwe ica musangulo ca kwa Yehova: onse uwaitemenwa mu mutima acilete, ca musangulo ca kwa Yehova.” (Ukufuma 35:4-9) Ni shani fintu abantu bayankwileko? Ubulondoloshi bwalembwa butwebo kuti “baishileko umuntu onse uo umutima wakwe wamwimishe kabili onse uo umutima wakwe wamulengele ukuitemenwa, na bo balete ca musangulo ca kwa Yehova, ku mulimo we hema lya Kulaishanya, na ku bubomfi bonse bwa liko, na ku fya kufwala fya mushilo.” Mu kupita kwa nshita ifi “ifya kuitemenwa” fyalifulile ica kuti ‘fyalikumene ukucila pa bubomfi bwa mulimo uo Yehova aebele ukucita.’ (Ukufuma 35:21-29; 36:3-5) Mwandi mupashi wabulwa akaso, uwa bukapekape uo abantu balangishe!

Mupepi ne myaka 500 pa numa, na kabili abena Israele balilombelwe ukusangwilako muli bukapekape. Ukufwaisha kwa mfumu Davidi ukwa kukuulila Yehova iŋanda ibelelela mu Yerusalemu kwali mupepi no kufikilishiwa ukupitila mu mwana wakwe Solomone. Davidi umwine alonganike no kusangwilako iciputulwa cikalamba ica cali no kukabilwa. Bambi baliilundileko lintu Davidi abilishe ubwite bwa kuleta “ica bupe kuli Yehova.” Cinshi cafuminemo? “Abantu balisaminwe pa kupeela kwabo ku kuitemenwa, pantu ne mitima ya cishinka bapeele ku kuitemenwa kuli Yehova; na Davidi imfumu na o asaminwe no kusekelela kukalamba.” (1 Imilandu 22:14; 29:3-9) Silfere na golde fyeka ifyasangwilwe kuti fyafika ku madola amabilioni 50 pa mutengo wa nomba!—2 Imilandu 5:1.

Twamona kuli ifi fya kumwenako ukuti takuli uwapatikishiwe ukupeela. Kwali fye kwa ‘kuitemenwa’ mu kuba ‘no mutima onse.’ Yehova taali na kutemunwa no kupeela kwa mutima citika. Mu kupalako, lintu kwaimineko ishuko lya mu nshita ku kusangwilako indalama ku kwaafwa Abena Kristu bali mu kukabila, umutumwa Paulo alembele ukuti tacali no kuba “ica kufyombotola” (NW). Alundileko kuti: “Onse acite umo apangile mu mutima wakwe; te kupeela no mutimako nangu mu kupatikishiwa, pantu Lesa atemwo mupe wa nsansa.”—2 Abena Korinti 9:5, 7.

Ukukabila Ilelo

Bushe kwalibako ukukabila kwa misangulo ilelo? Mu cine cine e ko kwaba, kabili kukacililako ilyo inshita ilepita. Mulandu nshi?

Abena Kristu balipeelwa amakambisho ya kulungatika muli ino nshita ya ku mpela. Yesu akambishe abasambi bakwe ukuti: “E ico kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya Mupashi wa mushilo: mulebasambilisha ukubaka fyonse ifyo namwebele.”—Mateo 28:19, 20.

Pa kupwilikisha uyu mulimo ukalamba uwa kusambilisha no kushimikila ilyo tulecililako kupalamisha ku kalume ka “kupwa kwa nshita” cifwaya inshita ikalamba no bukumu. Mulandu nshi? Pa mulandu wa fyabimbwamo fyonse mu kutwala ubukombe bwa Bufumu bwa kwa Lesa “ku mpela ya pano nse.” (Imilimo 1:8) Abantu abengi tabaishiba bwino Amalembo nge fyaishibe abaYuda ba mu mwanda wa myaka uwa kubalilapo. Na kuba, impendwa ikalamba iya bekashi ba pe sonde tabaishiba fye no kwishiba Baibolo kabili tabaimona nge Cebo ca kwa Lesa. Bakashimikila bafwile ukukanshiwa no kutumwa mu fyalo fya ku tali. (Abena Roma 10:13-15) Kabili tontonkanya ulwa ndimi ubwingi ishabimbwamo! Abaleshimikilwako balekabila ukukwata amaBaibolo ne mpapulo shashimpwa pali Baibolo ifya kubelenga no kusambililamo mu lulimi lwabo. Pa kufika pali bonse bwino bwino no kubalenga panono panono ukufika pa kukosoka lwa ku mupashi pa kuti bengaafwako na bambi cifwaya ukuteyanya pa cipimo cikalamba.—2 Timote 2:2.

Yesu asosele ukuti “imbila nsuma iyi ya bufumu” ifwile intanshi ‘ukubilwa ku fyalo fyonse ku kubo bunte ku nko shonse; e lyo impela ikesa.’ (Mateo 24:14) E co nomba e nshita ku kupeelesha fyonse ifyo twakwata ku kubombo yo mulimo wakatama. Ubukumu bwesu kuti bwabomfiwa bwino pa ntanshi icuma ca ku mubili tacilaleka ukuba ica mutengo wingabomba ifili fyonse.—Esekiele 7:19; Luka 16:9.

Ni Kwi Kuntu Indalama Shiya?

Watch Tower Society isabankanya impapulo sha Baibolo mu ndimi ukucila pali 230, pamo pene na mu Filembo fya mpofu na bavidio mu fishibilo fya kumfwaninamo na bankomamatwi. Ico cifwaya amabumba ya bakapilibula na baceeceeta mu filembo mu lulimi lumo na lumo. Ukwelenganya fye icifwaikwa pa kuti uyu mulimo onse ucitwe, ukucilisha kuli magazini wa Ulupungu lwa kwa Kalinda, uusabankanishiwa cila mweshi mu ndimi 121 kabili pa nshita imo ine ne ciNgeleshi mu ndimi 101, ca kupapa. Lelo ukupilibula kulakabilwa pa kuti abantu mu kusaalala kwe sonde bengakwata no kubelenga ifyebo fimo fine. Cila mwaka kulabako ukwingilishiwako mu fipooswa fya mapepala ne fisolobelo fimbi ifibomfiwa mu kupulinta ubukombe bwa Bufumu nelyo mu kubukopa pa makaseti nelyo pali vidio. Ifipooswa fya musango yo filalipilwa pa kubomfya imisangulo ukufuma kuli bamunyina.

Umulimo wa kushimikila no kusambilisha ulabombwa mu fifulo fya kubombelamo ifyabamo ifilonganino fya Nte sha kwa Yehova ukucila pali 75,000 mu kusaalala kwa calo. Pa kubekatanya no kubakoselesha, bakangalila benda abakanshiwa balatandalila icilonganino cimo na cimo mupepi ne miku ibili cila mwaka. Ukulongana kukalamba na ko kulabomba ulubali lwakatama mu kusambilisha. Ifikuulwa fikalamba fifwile ukusonkelwa ku mabungano, ayo yakosha icitetekelo apakalamba. Imisangulo yenu ilabomfiwa na kuli iyi mifwaile.

Ilintu ukulongana kukalamba kucitwa fye imiku itatu mu mwaka, ifilonganino fya cikaya filalongana ukulongana kusano ukwa cila mulungu. (Linganyako Ukufuma 34:23, 24.) Ubwingi bwa bapya abaleankula ku mbila nsuma bwafwaya ukulundako amakana ya filonganino ifipya cila mwaka. Mu kuba no kwaafwa kwa mamilioni ya madola mu maloni ayapeelwa ukupitila muli Sosaite, imyanda ya Mayanda ya Bufumu ayapya yalakuulwa cila mwaka, kabili yambi ayengi yalawamishiwa no kutanununwa. Nangu cingati ishi ni ndalama ishashimwa no kubweshiwa imiku iingi, abaleshifwaya batwalilila ukufulilako.

Incende imo umwaba ukukula kushingalinganishiwako ni mu fyalo fya ku Eastern Europe ifyo fyatekelwe ne yali kale Soviet Union. Fintu ubukombe bwa kulunduluka bwali ubwa buseko ubwa kuti umulimo waliswilwe muli ifi fifulo! Nomba bamishonari baletumwa kuli ifi fyalo ifingi. Imisambo ipya yalimikwa mu fyalo fimo, ukwingilishako impendwa ya batumikishi ba kuitemenwa abapanga ulupwa lwa Bethel mu kusaalala kwa calo ukucila pali 15,000. Kwena, ifikuulwa fya musambo umwa kuti baleikala fifwile ukushitwa nelyo ukukuulwa. Imisangulo yenu ilaafwa ukwisushisha ukukabila.

Uyu onse umulimo walimonwa kuli Satana ne fibanda fyakwe. Balacita ukufika apo bengapesha ku kufuupula ukubombesha kwa babomfi ba busumino aba kwa Yehova nelyo ukubaletela impika. (Ukusokolola 12:17) Ici cipinda umulimo walundwako uwa bulwi bwa mwi funde ku kucingilila insambu sha bantu ba kwa Lesa ku kushimikila no kwikala mu kumfwana na ya mafunde yakwe yalungama. Mu kulundapo, ubonaushi bwa nkondo mu micitile ya fintu iya kwa Satana, capamo na masanso ya mu fintu Lesa abumba, fipilibula ukuti ukupayanya kwa kukumbusuka ilingi line filakabilwa kuli bamunyinefwe ne nkashi abapumwa pamo pene na bambi. Imisangulo yenu ilaafwa ukupayanya uku kwaafwa kwakatama.

Yehova Akamulambula

Ukubomfya inshita yesu no bukumu muli bukapekape ku kutwala pa ntanshi umulimo wa kwa Shikulu kulaletako amapaalo yakalamba. Mu nshila nshi? Pa mulandu wa kuti Lesa, umwine wa fintu fyonse, akatulambula. Amapinda 11:25 yalondololo kuti: “Umutima we paalo uupeela ukeniwa, no unwensha akanwenshiwa umwine.” Yehova mu cine cine alatemunwa lintu twabomba ulubali lwesu mu kutwala pa ntanshi ukupepa kwakwe. (AbaHebere 13:15, 16) Alaile abena Israele ba pa kale abaleleta imisangulo yalefwaikwa pe samba lya cipingo ce Funde ukuti: “Shi mundabwile kuli ico, e fyo Yehova wa milalo asosa; mumone nga nshakamwiswile ifipunda fya mu muulu, no kumupongolwele paalo, kukasuke kukabule incende ya kubapo.” (Malaki 3:10) Ulu ulubanda lwa ku mupashi ulo ababomfi ba kwa Yehova baipakisha ilelo bushininkisho bwa kuti Lesa alafikilisha ubulayo bwakwe.

Uyu mulimo ushaikulila uwa kubilisha kuli bonse ubushiku bwe pusukilo no kwaafwa aba mitima ya bufumacumi ukuba pa nshila ya ku bumi tawakatwalilile kuli pe na pe. (Mateo 7:14; 2 Abena Korinti 6:2) Lelo bonse aba mu “mpaanga shimbi” isha kwa Shikulu bafwile ukulonganikwa. (Yohane 10:16) Fintu caba icacindama ukuti tufikilishe uyo mulimo ilelo! Kabili fintu umo na umo uwa ifwe akaba uwa nsansa, lintu twapituluka mu fya ku numa muli cilya calo cipya ica bulungami, no kusoso kuti, ‘Nalyakenemo mu kukumanina muli ulya mulimo wa kulonganika kwa kupelako’!—2 Petro 3:13.

[Akabokoshi pe bula 30, 31]

Ifyo bamo Basangwilako ku Mulimo wa Kushimikila Ubufumu

IMISANGULO KU MULIMO WA MU KUSAALALA KWA CALO: Abengi balabika pa mbali atemwa ukutantika icipimo ico babika mu tubokoshi twa misangulo utwalembwapo ati: “Imisangulo ya Mulimo wa mu Kusaalala kwa Calo uwa Sosaite—Mateo 24:14.” Cila mweshi ifilonganino fituma ishi ndalama napamo ku maofesi yakalamba aya calo conse mu Brooklyn, New York, nelyo kwi ofesi lya musambo ilyabela mupepi.

IFYA BUPE: Imisangulo ya kuitemenwa iya ndalama kuti yatumwa mu kulungatika ku Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, nelyo kwi ofesi lya Sosaite ilibombela icalo cenu. Ifibekobeko nelyo ifikwatwa fimbi na fyo fine kuti fyasangwilwako. Kalata umwipi uwa kulondolola ukuti ica musango yo cili bupe bwa mu kulungatika alingile ukwendela pamo no yu musangulo.

UKUTANTIKA KWA MUSANGULO WA CIPANGANO: Indalama kuti shapeelwa ku Watch Tower Society ukusungwa mu kuseekeshiwa ukufikila imfwa ya ulepeela, mu kuba no kupayanya kwa kuti nga kwabako ukukabila kwa pa lwakwe, shikabweshiwa ku wapeele.

INSHUWALANSI: Watch Tower Society kuti yalumbulwa nga kapokelela wa ndalama sha mibombele yatantikwa iya inshuwalansi iya bumi nelyo mu mapange ya kuleka incito/penshoni. Sosaite ilingile ukwishibishiwa ulwa mitantikile iili yonse iya musango yo.

AMAAKAUNTI YA KU BANKI: Amaakaunti ya ku banki, amasetifiketi ya ndalama shili ku banki, nelyo amaakaunti ya muntu umo umo aya kuleke ncito kuti pambi yabikwa mu kuseekeshiwa kuli umo nelyo ukulipilwa pa mfwa ku Watch Tower Society, mu kumfwana ne fifwaikwa fye banki lya cikaya. Sosaite ilingile ukwishibishiwa ulwa mitantikile iili yonse iya musango yo.

AMA STOCK NA MA BOND: Ama stock na ma bond kuti pambi fyasangulwa ku Watch Tower Society atemwa ngo bupe bwa mu kulungatika nelyo pe samba lya kusuminishanya uko indalama sha malipilo shatwalilila ukulipilwa ku ulepeela.

ICIKWATWA CA MPANGA NE FIKUULWA: Icikwatwa ca mpanga ne fikuulwa ifingashitishiwa kuti pambi fyasangulwa ku Watch Tower Society atemwa ukupitila mu kupeela ubupe bwa mu kulungatika nelyo pa kusungilila impanga ku ulepeela, uyo uwingatwalilila ukwikala mulya mu kati ka nshita ya bumi bwakwe. Umo alingile ukwipusha Sosaite pa ntanshi talalembesha ifipepala fya nsambu sha mwi funde isha kupeelelapo icikwatwa ca mpanga icili conse ku Sosaite.

IFYA CISHALE NO KUSEEKESHA: Ifipe nelyo indalama kuti fyashiilwa Watch Tower Society mu nshila ya cishale iyacitwa mwi funde, nelyo Sosaite kuti yalumbulwa nga kapokelela wa kusuminishanya kwa kuseekesha. Ukuseekesha ukunonsha ukuteyanya kwa mipepele kuti pambi kwapayanya ubusuma bumo ubwa misonko. Kope wa kulemba ifya cishale nelyo ukuseekesha alingile ukutumwa ku Sosaite.

UKUPEELA KWAPEKANISHIWILWA LIBELA: Sosaite naipekanya broshuwa wa mu lulimi lwa ciNgeleshi uukwete umutwe uleti ifyebo fimo pa lwa “Planned Giving.” Abo bekala mu United States abalepekanya ukupeela ica bupe caibela ku Sosaite pali nomba nelyo ukushako fimo lintu bafwa kuti pambi basanga ifi fyebo ukuba ifya kwaafwa. Ukucilisha ici cili fyo nga ca kuti balefwaya ukupwishishishako umulimo umo ngo lupwa nelyo ifya makwebo ilintu balemwenamo mu misonko yacefiwako iya fipooswa fya bupe nelyo icipeelwa.

Ku fyebo fyalundwako ukukuma ku milandu iili yonse iili pa muulu, lembeleni ku Treasurer’s Office, Watch Tower Bible and Tract Society of Pennsylvania, Box 33459, Lusaka 10101, nelyo kwi ofesi lya Sosaite ilibombele calo cenu.