Abena Filipi 4:6, 7—“Mwilasakamana na Kamo”

“Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela; no mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.”—Abena Filipi 4:6, 7, Amalembo ya Calo Cipya.

“Mwilasakamana na kamo; nomba muleishibisha Lesa ifintu mufwaya, mu kupepa konse, mukupapata konse na mu kutasha. Elyo ne cibote cakwa Lesa, icacisha na pa mano yonse, cakulasunga imitima yenu na mano yenu muli Kristu.”—Filipi 4:6, 7, Baibolo ya Diocese of Mbala.

Bakapepa ba kwa Lesa bapepa nga nabasakamikwa sana, kuti bapepa kuli ena. Lesa alibalaya ukuti akabapeela umutende, uyu mutende ulabafwa ukukanasakamana sana kabili ulalenga tabaletontonkanya ifingalenga balaumfwa ubulanda. Mu cikomo 6 mwaliba imisango iyalekanalekana iya mapepo ayengafwa umuntu ukuba no mutende.

Amapepo ya kupaapaata, kupaapaata Lesa ukuti atwafwe. Umuntu kuti apaapaata Lesa nga nasakamikwa sana nelyo ilyo ali na mafya ayakalamba nga filya Yesu acitile. (AbaHebere 5:7) Ilingi line umuntu nga alepepa amapepo ya kupaapaata, tapepa fye umuku umo lelo alabwekeshabwekeshapo ukupepa.

Amapepo ya kulomba, kweba Lesa ifyo ulefwaya. Ababomfi ba kwa Lesa balapepa amapepo ya kulomba “muli fyonse” nelyo “mu fintu mulefwaya.” Na lyo line, ilyo tulelomba kuli Lesa tulingile ukulomba ukulingana no kufwaya kwa kwa Lesa uko atweba mu Baibolo.—1 Yohane 5:14.

Amapepo ya kutasha, kutasha Lesa pa fyo atucitila ne fyo akatucitila ku ntanshi. Nga twabika amano ku fyo twingatashishapo Lesa, cikalenga tukaleba ne nsansa.—1 Abena Tesalonika 5:16-18.

Lesa pa kwasuka amapepo ya babomfi bakwe alabapeela umutende. Amashiwi ya kuti “umutende wa kwa Lesa” yalosha ku mutende tukwata pa mulandu wa kuba ifibusa sana na Lesa. (Abena Roma 15:13; Abena Filipi 4:7) Uyu umutende ‘walicila amatontonkanyo yonse’ pantu ufuma kuli Lesa kabili kuti watwafwa ukucila na pa fyo tutontonkanya.

Ici cikomo ca mu Baibolo citila umutende wa kwa Lesa kuti walinda imitima yesu. Ishiwi lya ciGriki ilyo bapilibula “ukulinda” lyalipalana kuli filya ibumba lya bashilika balecita pa kulonda umusumba uwakosa sana. Ifi fine e fyo caba, no mutende wa kwa Lesa ulacingilila ifyo umuntu aleumfwa ne fyo aletontonkanya. Ulamwafwa ukukanasakamikwa sana ilyo ali na mafya.

Umutende Lesa atupeela ulatucingilila, “ukupitila muli Yesu” pantu Yesu e ulenga twaba ifibusa na Lesa. Yesu alipeele ubumi bwakwe nge lambo pa mulandu wa membu shesu. Nga twamucetekela, Lesa akulatupaala. (AbaHebere 11:6) Ilyo tulepepa kuli Lesa, tupitila muli Yesu. E mulandu wine Yesu atile: “Takuli uwisa kuli tata kano aishila muli ine.”—Yohane 14:6; 16:23.

Ibuuku lya Abena Filipi ni kalata iyo umutumwa Paulo alembele Abena Kristu abaleikala mu musumba wa Filipi.a Mu cipandwa 4 mwi buuku lya Abena Filipi, Paulo akoseleshe abali muli cilya cilonganino ukulasekelela, kabili alibatashishe na pali bukapekape bwabo ubwalengele aba ne nsansa. (Abena Filipi 4:4, 10, 18) Alilanda pa fyo ipepo lingalenga twaba no mutende wa kwa Lesa, kabili alilandile na pa fyo tufwile ukutontonkanyapo no kucita pa kuti tupokelele “umutende wa kwa Lesa.”—Abena Filipi 4:8, 9.