Abacaice Bepusha Ukuti . . .

Bushe Ipepo Kuti Lyangafwa Shani?

Brada atila: “Lipepo lyangafwile ukubwelela ku mikalile yalungama.”

ABACAICE abengi balapepa—napamo ukucila na pa fyo mwaishiba. Ukufwailisha mu bacaice aba myaka 13-17 abaleimininako abanabo mu United States kwalangile ukuti abacaice amapesenti 56 balapepa ilyo bashilalya ica kulya. Ukufwailisha mu bakalambako kwalangile ukuti amapesenti 62 balapepa cila bushiku.

Nalyo line ku bacaice abengi, ipepo lyaba cibelesho ica fye. Banono fye abacaice abakwata ico Baibolo ita ukuti ‘ukwishiba kwa kwa Lesa.’ (Abena Kolose 1:9, 10) E calenga ukuti Lesa ecindama mu bumi bwabo. Mu kufwailisha kumo baipwishe abacaice nga balilombapo ukwafwa kuli Lesa ilyo balesalapo fimo ifyacindama. Umukashana ayaswike ati: “Lyonse ndalanda na Lesa mwi pepo ukuti antungulule pa kuti nsale nshila yalungama mu bumi.” Nalyo line atile: “Nshileibukisha nangu limo ukulomba kuli Lesa pa kusala ica kucita.” E co, te kuti tusunguke ukuti abacaice abengi tabacetekela ukuti amapepo yabo yalikwata amaka nelyo kuti yabafwa!

Nangu ni fyo, nga Brad, uo tulandilepo pa kubala, imintapendwa ya bacaice balimona amaka ye pepo. Na iwe kuti wayamona! Icipande cafumineko calangilile umulandu wa kucetekela ukutila Lesa akomfwa amapepo yesu.b Lelo icipusho ca kuti, Bushe ipepo kuti lyakwafwa shani? Intanshi natumone ifyo Lesa asuka amapepo yesu.

Ifyo Lesa Asuka Amapepo

Mu nshita sha mu Baibolo amapepo ya baume ba busumino yaleyasukwa mu kulungatika—na mu cipesha amano fye. Ku ca kumwenako, ilyo Imfumu Hisekia yaishibe ukuti yalwele ubwa kufwa, yalombele Lesa ukuipususha. Lesa ayaswike ati: “Ning’umfwe pepo lyobe, nimone filamba fyobe: mona, ndekuundapa.” (2 Ishamfumu 20:1-6) Lesa alecitapo fimo ku kwafwa Abaume na banakashi na bambi abaletiina Lesa.—1 Samwele 1:1-20; Daniele 10:2-12; Imilimo 4:24-31; 10:1-7.

Lelo, mu nshita sha Baibolo, te lyonse Lesa alecitapo fimo mu cipesha amano ku kwafwa abantu. Ilingi Lesa taleasuka amapepo ya babomfi bakwe ukupitila mu fipesha amano, lelo, alebafwa ukuti ‘besulemo ukwishibo kufwaya kwakwe mu mano yonse no mucetekanya ifya bumupashi.’ (Abena Kolose 1:9, 10) Ca cine, Lesa alebafwa, alekosha abantu bakwe lwa ku mupashi na mu mibele—ukubapeela amano no kwishiba pa kuti bapingulepo bwino ifya kucita. Ilyo Abena Kristu bali na mafya, Lesa tafumishepo bulya bwesho. Lelo, abapeele “ukucishamo kwa maka” pa kuti bashipikishe!—2 Abena Korinti 4:7; 2 Timote 4:17.

Na lelo line, icasuko ku mapepo yobe napamo tacakasukwe mu cipesha amano. Lelo, nga fintu alecita kale, Lesa kuti akupeela umupashi no kukukosha ukuti ubombele pali conse icacitika. (Abena Galatia 5:22, 23) Ku ca kumwenako, natulande pa nshila shine umo ipepo lingakwafwa.

Kuti Lyakwafwa Ukupingula pa Fintu

Karen aleishishanya no mulumendo uwalemona kwati akwete amabuyo ya ku mupashi ayakalamba. Karen atila: “Lyonse alenjeba ukutila alefwaya ukuba eluda mu cilonganino. Ici caleumfwika bwino. Lelo, alelanda sana na pa makwebo ayo ali no kutendeka na pa fintu fyonse ifyo ali no kulanshitila. Natendeke ukutwishika nga ali umufumacumi.” Karen apepele pa lwa ici. Atila: “Napaapaatile Yehova ukwisula amenso yandi no kunanga ifyo nalekabila ukwishiba pa lwa wene.”

Limo ukupepa kweka fye kulafwa, pantu kuti kwakulenga ukumona ifilekusakamika nga fintu Yehova alefimona. Lelo, Karen akabile no kupanda amano ukwingamwafwa. Bushe ali no kupokelela icasuko mu cipesha amano? Cisuma, mona icalembwa ca mu Baibolo pa lwa Mfumu Davidi. Ilyo aishibe ukuti Ahitofele, cibusa wakwe uo acetekele aletumikisha umwana wakwe uwa bushikamfutu Abishalomu, Davidi apepele ati: “Shi pumfyanyeni ukupanda amano kwa kwa Ahitofele, mwe Yehova.” (2 Samwele 15:31) Lelo Davidi alicitilepo na fimo ifyaumfwene ne pepo lyakwe. Aebele cibusa wakwe Hushai ukubomba uyu mulimo, amwebele ati: “Kuti wamfulunganisho kupanda amano kwa kwa Ahitofele.” (2 Samwele 15:34) E fyo cali na kuli Karen, acitile fimo ifyaumfwene ne pepo lyakwe. Alanshenye na eluda wa Bwina Kristu uwakosoka uwaishibe umulumendo wakwe. Amwebele filya fine aletunganya: Umulumendo wakwe talundulwike lwa ku mupashi nangu panono.

Karen atila: “Ici calinangile bwino bwino amaka ye pepo.” Ku ca bulanda, ulya wali umulumendo wakwe, akonkelele ifyuma no kuleka ukubombela Lesa. Atila: “Nga naupilwe kuli wene limbi nga njisa neka ku kulongana kwa Bwina Kristu.” Ipepo lyalyafwile Karen ukupingulapo bwino.

Kuti Lyakwafwa Ukulama Inkuntu

Pa Amapinda 29:11 Baibolo itila: “Umuwelewele afumye cipyu conse ca mu mutima; lelo uwa mano atontolole cifukushi cakwe.” Ubwafya bwa kuti abengi pali lelo balalunguluka sana kabili ilingi balafilwa ukulama icipyu—limo mulafuma ifyabipa nga nshi. Brian uwacaice ebukisho ukuti: “Nalepusana na untu twalebomba nankwe. Bushiku bumo afumishe umwele.” Bushe nga wacitile shani? Brian alipepele. Atila: “Yehova alingafwile ukushikatala, nalandile nankwe no kumunashanasha ukuti ebomfya ulya mwele. Aponeshe umwele no kufumapo.” Ukulama inkuntu kwaafwile Brian ukukanakalipa, ukucite fyo kufwile e kwamupuswishe.

Napamo te kuti bakutiinye no mwele. Lelo mu bumi bobe kuti mwaba inshita ishingi ilyo wingakabila ukulama inkuntu shobe. Ipepo kuti lyakwafwa ukushikatala.

Kuti Lyakwafwa Ilyo Wasakamikwa

Barbara ebukisha ukuti imyaka imo ku numa “alyeshiwe.” Atila: “Incito, ulupwa, ifibusa—fyonse tafyalensekesha. Nshaishibe ica kucita.” Barbara apepeele ukwafwa. Lelo pali ubwafya. Atila: “Nshaishibe ifya kulomba kuli Yehova. Kuli pele pele, nalombele umutende wa muntontonkanya. Nalelomba cila bushiku ukuti angafwe ukukanasakamikwa pali fyonse.”

Bushe ilyo ipepo lyamwafwile shani? Atila: “Pa numa ya nshiku ishinono, namwene ukuti nangu line amafya yandi tayapwile, nshaleyatontonkanyapo sana kabili tayalensakamika.” Baibolo yalaya ukuti: “Lekeni ifya kulomba fyenu fiishibikwe kuli Lesa . . . no mutende wa kwa Lesa uwapulamo mu kwiluka konse, wakulalinde mitima yenu na mapange yenu muli Kristu Yesu.”—Abena Filipi 4:6, 7.

Kuti Lyakwafwa Ukupalama Kuli Lesa

Moneni ica kumwenako ca wacaice uwe shina lya Paul. Atila: “E lyo nakuukiile fye kuli balupwa lwandi. Limo, ubushiku nalipopomenwe sana. E lyo napwishishe fye isukulu lya ku sekondari, kabili nalefuluka sana abanandi bonse. Bulya bushiku nalukwishe ifilamba ilyo naleibukisha ifyo twaleyanga.” Cinshi Paul acitile? Apepele ukufuma ku mutima pa muku wa kubalilapo. Atila: “Nalandile ifya ku mutima no kulomba Yehova ukuti ankoshe no kumpeela umutende wa muntontonkanya.”

Cinshi cacitike? Paul ebukisha ukuti: “Ubushiku bwakonkelepo ulucelo, ilyo nashibwike naleyumfwa uwailululwako sana ukucila kale lyonse mu bumi. Nalyalwike, nshabalile ncushiwa ku muntontonkanya wacushiwa lelo nali no ‘umutende wa kwa Lesa uwapulamo mu kwiluka konse.’” Nomba apo umutima wakwe walishikatele, talelungulushiwa kabili talefuluka. Kabili mu kwangufyanya alikutulwike ukuti ‘inshiku sha ku kale’ ishalemoneka ukuti shisuma tashali ishisuma. (Lukala Milandu 7:10) Na kuba “Ifibusa” ifyo alefuluka sana tafyalemwafwa ukucita ifisuma.

Ne cacindamishe, Paul aliimwenene ifyo Yehova afwa. Alimwene ukuti amashiwi yaba pali Yakobo 4:8 ayatila: “Palameni kuli Lesa, na o alapalama kuli imwe” ya cine. Kuli Paul uku kwali kwaluka kwakatama. Alicincishiwe ukucindikisha Yehova mu mikalile yakwe no kupeela ubumi bwakwe kuli wene.

Landa na Lesa!

Ifi fyacitikila bamo ifisuma fyaba bushinino bwa kuti ipepo kuti lyakwafwa. Kwena, kuti lyakwafwa fye nga wapampamina pa kwishiba Lesa, ukulundulula bucibusa na wene. Ku ca bulanda, abacaice abengi balashingashinga ukucite co. Carissa akushiwe mu lupwa lwa Bwina Kristu. Lelo asumina ukuti: “Kwena ni mu myaka fye iinono iyapita e lyo naumfwikishe ifyo bucibusa bwesu na Yehova bwacindama.” Brad uo tulandilepo pa mubalo, akushiwe ngo Mwina Kristu lelo alilekele ukupepa kwa cine pa myaka iingi. Atila: “Cali fye ni pa numa ya kukutuluka ifyo naipuswile, e lintu nayalukile kuli Yehova. Nomba nalishiba ifyo ubumi bwingabipa no kukanaba ubwa fye nga tapali ubu bucibusa.”

Lelo, te kwesha ukulolela ubwafya bwaima e lyo wapalamina kuli Lesa. Tendeka ukulanda nankwe nomba—lyonse fye! (Luka 11:9-13) “Pongolweleni ku cinso cakwe ifya mu mitima yenu.” (Amalumbo 62:8) Mu kwangufyanya ukamona ukuti ipepo kuti lyakwafwa icine cine!

[Amafutunoti]

[Akabokoshi ne Fikope pe bula 15]

Ipepo Kuti Lyakwafwa

● Ukupingulapo bwino pa fintu

● Ukushikatala mu nshita shayafya

● Ukwilululwa ku masakamika

● Ukupalamina kuli Lesa