Bushe Indalama E Ntulo ya Bubi Bonse?

Icasuko ca mu Baibolo

Awe. Baibolo tailanda ukuti indalama shalibipa, kabili taitila indalama e shalenga fyonse ifyabipa ificitika muli cino calo. Filya abantu abengi balanda ukuti “indalama e ntulo ya bubifi bonse,” balashako ifishinka fimo ifyo Baibolo yalanda pa ndalama, kabili ifi balanda kuti fyalenga abantu balaumfwila mumbi amashiwi Baibolo yalanda pa ndalama. Na kuba Baibolo itila “ukutemwishe ndalama e ntulo ya bubi bonse.”a—1 Timote 6:10, Diocese of Mbala, ni fwe twafitisha ukutemwishe.

Finshi Baibolo ilanda pa ndalama?

Baibolo ilanda ukuti indalama nga twashibomfya bwino kuti shatwafwa no ‘kutucingilila’ fye. (Lukala Milandu 7:12) Na kabili, Baibolo ilatasha sana bonse abapeelako abantu banabo ifintu, ukubikako fye ne ndalama.—Amapinda 11:25.

Na lyo line, Baibolo ilatusoka ukukanabika amano ku kufwaisha indalama. Itila: “Mu mikalile yenu mwilatemwa indalama, lelo muteke imitima ku fintu ifyo mukwete.” (AbaHebere 13:5) Ico Baibolo ilandapo kulabomfya bwino indalama no kukanabika sana amano ku kufwaya ifyuma. Kanshi tufwile ukuteka imitima ku fintu ifyo tukabila pamo nga ifya kulya, ifya kufwala no mwakwikala.—1 Timote 6:8.

**Mulandu nshi Baibolo itusokela pa kutemwisha indalama?**

Abafwaisha ukukwata ifingi tabakakwate umweo wa muyayaya. (Abena Efese 5:5) Umulandu umo wa kuti ukufwaisha ukukwata ifingi kupepa utulubi. (Abena Kolose 3:5) Umulandu umbi wa kutila pa kuti aba bantu bakwate ifyo bafwaisha, ilingi line tabakonka amafunde ayasuma. Baibolo pa Amapinda 28:20 itila: “Uwangufyanya ukunonka icuma takabe uwa kaele.” Abafwaisha ukukwata ifyuma kuti batunkwa no kucita ifyabipa pamo nga ubucenjeshi, ukufinsha abanabo, ukwiba abantu, nelyo fye ukwipaya abantu banabo.

Nangu ca kuti inshita shimo ukutemwisha indalama te kuti kulenge umuntu ukucita ifyabipa, kuti kwamuletelela. Baibolo itila: “Abafwaisha ukuba ne fyuma bawila mu matunko kabili mu citeyo kabili mu lunkumbwa ulwingi ulwa kutumpa kabili ulwa kubaletelela.”—1 Timote 6:9.

Kuti twanonkelamo shani mu fyo Baibolo ilanda pa ndalama?

Nga ca kuti tatuletoba amafunde ayo twaishiba ukuti yalilungama nelyo nga tatulecita ifishisekesha Lesa pa mulandu fye wa kufwaya ukukwata indalama, tukalaumfwa ukuti twalicindama. Na kabili Lesa akulaba na ifwe kabili akulatwafwa. Lesa alilaya bonse abesha apo bengapesha ukucita ifilenga asekelela kabili aba cishinka kuli ena ukuti: “Nshakakushe nakalya nangu ukukulekelesha nakalya.” (AbaHebere 13:5, 6) Na kabili alitulaya ukuti “umuntu uubomba ifya cishinka akapaalwa nga nshi.”—Amapinda 28:20.

Amalembo ayalanda pa ndalama

Lukala Milandu 7:12: ‘Indalama shilacingilila.’

Umwalola ili ilembo: Nga twabomfya bwino indalama kuti shatwafwa, pantu kuti shatucingilila muli fimo.

Luka 12:15: “Umuntu nangu akwate shani ifingi, ubumi bwakwe tabwaba mu fintu akwata.”

Umwalola ili ilembo: Indalama te shacindama sana mu bumi, kabili te kuti shilenge twaisapusuka.

1 Timote 6:10: “Ukutemwa indalama e ntulo ya bubi bwa misango yonse, kabili bamo pa kushitemwisha balilufya icitetekelo no kuilasaula abene amacushi ayengi.”

Umwalola ili ilembo: Indalama ishine tashabipa. Lelo abantu abatemwisha indalama, e kutila ababika sana amano ku kukwata ifyuma, balailetela amafya pamo nga ukuleka ukumfwana bwino mu ndupwa no kukanaba no bumi ubusuma pa mulandu wa kubomba ukucila mu cipimo pa kuti fye bakwate indalama.

AbaHebere 13:5: “Mu mikalile yenu mwilatemwa indalama, lelo muteke imitima ku fintu ifyo mukwete.”

Umwalola ili ilembo: Mu cifulo ca kulacita icili conse pa kuti fye tukwate indalama, kuti caba bwino ukuteka imitima nga natukwata ifyo tulekabila.

Mateo 19:24: “Cayangukapo ku ngamila ukupula mu linso lya nshindano ukucila uwa fyuma ukwingila mu bufumu bwa kwa Lesa.”

Umwalola ili ilembo: Yesu alandile aya mashiwi pa numa fye ya kweba umulumendo umo uwa fyuma ukuti alemukonka. Uyu mulumendo alikeene pantu alitemenwe sana ifyuma ifyo akwete. E ico Yesu aletusoka ukuti, nga twatemwisha ifyuma ukucila Lesa, tatwakabe no bumi bwa muyayaya.

a Ili ilembo lyapilibulwa no kuti: “Ukutemwa indalama e ntulo ya bubi bwa misango yonse.”