Bushe Ulecita Ukufwaya kwa kwa Lesa?

MU BUTUMIKISHI bwabo ubwa ku ŋanda ne ŋanda, Inte sha kwa Yehova shibili shakumenye shimapepo we Calici lya Episcopal. Amoneke ukuba umwaume musuma, uwa mwefu, mupepi ne myaka ya bukulu 60, nafwala skipa walembwapo ishina lye calici lyakwe. Mu kwishe cefu, atile: “Kanshi nge filundwa fyesu ifye calici baali abapimpa mu kwananya Icebo nga fintu imwe mwaba, lelo nalamulomba ukukanatandala pa ŋanda yandi na kabili.”

Ee, kwalibako abantu abengi abakumbwa umulimo wa Nte sha kwa Yehova no kubatasha pa kupimpa kwabo no kucincimuka. Nalyo line, tababa abasekelela napacepesha mu co Inte shilecita, kabili te kuti balanguluke pa lwa kubomba uyu umulimo abene. Iyi mibele iimoneka ngo kupilika, nangu cibe fyo, taili iipya. Yalilandilwepo kuli Yesu mu kasuba kakwe, kabili alengele cishinka ukumfwika ukupitila mu cilangililo ca kubalamuna itontonkanyo.

“Lelo muletila shani? Umuntu ali na bana baume babili. Aile ku wa ntanshi, ati, We mwana, kabiye, kabombe lelo mwi bala lya myangashi; na o alyaswike, ati, Nshayeko; lelo pa numa alilapiile, no kuya. Aile na ku wa cibili, asosele ifyo fine; na o alyaswike, ati, Ee mukwai; lelo taileko. Bushe ni ani pali abo babili acitile icafwaile wishi?”—Mateo 21:28-31.

Icasuko cintu cayeba. Ukupala ibumba lyakutike Yesu, kuti twayasuka ati, “Uwa ntanshi.” Lelo ukucila pa kuba fye icamonekesha, ukupitila muli cilya cilangililo, Yesu alealwila ukusakamana kwesu ku kuti ukucita ico wishi alefwaya e cali icacindama. Nangu ca kuti umwana mwaume uwa ntanshi asosele ukuti tafwaile ukuya, nangu cibe fyo aliile kabili alitashiwe pali ico. Ukucita umusango walungama uwa mulimo kwalikatama mu kulinganako. Umwana mwaume uwa ntanshi alile no kuyabomba mwi bala lya myangashi ilya kwa wishi; taile no kubomba mwi bala lyakwe line ilya myangashi.

Bupilibulo nshi ici conse citukwatile? Cinshi Lesa afwaya kuli bakapepa ilelo? Cinshi twingasambilila ukufuma ku bumi bwa kwa Yesu icikatwaafwa ukucita ukufwaya kwa kwa Wishi? Aya yali mepusho yakatama, kabili ukusanga kwesu ukwa fyasuko fyalungama kukapilibula ubusuma bwesu ubwa ciyayaya, apantu “uucito kufwaya kwa kwa Lesa ekalilila umuyayaya.”—1 Yohane 2:17; Abena Efese 5:17.

Cinshi Caba “Ukufwaya kwa kwa Lesa”?

Nauni “will” (ukufwaya) yatantikwa imiku ukucila 80 muli Comprehensive Concordance of the New World Translation of the Holy Scriptures. Mupepi ne miku 60 iya uku kumoneka (nelyo mupepi na maperesenti 75 aya iyo miku) ukuloshako kwacitwa ku kufwaya kwa kwa Lesa. Inumbwilo pamo nga “ukufwaya kwa kwa Lesa,” “ukufwaya kwa kwa Tata,” na “ico Lesa afwaya” shimoneka ukucila pa miku 20. Ukufuma kuli ci kuti twamona ukuti ukufwaya kwa bulesa kulingile ukuba ukwa bucindami bukalamba kuli ifwe. Ukucita ukufwaya kwa kwa Lesa kulingile ukuba e kwangwako kukalamba ukwa bumi bwesu.

Mu Cibemba nauni “ukufwaya” lipilibula ‘ukufwaisha, ukukumbwa, umupampamina, icintu cimo icalefwaikwa, ukucilisha ukusalapo nelyo umupampamina wa umo uwakwato bulashi nelyo amaka.’ E co lyene, Yehova, Ubulashi Bwapulamo, alikwato kufwaya, ukufwaisha nelyo umupampamina. Cinshi ico cine? Amalembo yatweba mu lubali ukuti “[Lesa afwaya] abantu bonse ukupusuka no kufika ku kwishibe Cine.” (1 Timote 2:4) Yesu Kristu na Bena Kristu ba mu kubangilila babombele no mweo onse ku kutwala uku kwishiba kwalungikwa kuli bambi.—Mateo 9:35; Imilimo 5:42; Abena Filipi 2:19, 22.

Ni bani balecita ukufwaya kwa kwa Lesa ilelo? Pa kati ka bantu mupepi na mamilioni amakana yabili abaitunga ukuba abakonshi ba kwa Yesu Kristu, ni banga bapala umwana wa ntanshi mu cilangililo ca kwa Yesu, uwaile no kucita ukufwaya kwa kwa wishi? Icasuko tacili icakosa ukusanga. Abakonshi ba cine aba mu nkasa sha kwa Yesu Kristu bafwile ukucita umulimo uyo atile bali no kucita: “Imbila nsuma ili no kubililwa kabela ku nko shonse.” (Marko 13:10) Inte sha kwa Yehova, abali impendwa ukucila pa mamilioni yane na citika mu kusaalala kwa calo, mu kucincila baleshimikila imbila nsuma ya Bufumu bwa kwa Lesa no kusambilisha bambi, ukusonta ku Bufumu nge subilo fye lyeka ilya mutundu wa muntu ilya mutende no mutelelwe. Bushe ulekwato kwakanamo kwakumanina mu kucito kufwaya kwa kwa Lesa? Bushe uleshimikila imbila nsuma iya Bufumu nga fintu Yesu acitile?—Imilimo 10:42; AbaHebere 10:7.

Ukusanga Ubuseko mu Kucito Kufwaya kwa kwa Lesa

Ilintu mwaliba ubuseko mu kusambilila icili ukufwaya kwa kwa Shifwe, mwaliba ubuseko bwakulilako mu kusambilisha bambi ukufwaya kwa kwa Lesa. Yesu asangile ubuseko mu kusambilisha abantu pa lwa kwa Wishi. Cali kwati ca kulya kuli wene. (Yohane 4:34) Na ifwe bene tukaipakisha insansa sha cine cine nga ca kuti twacita nga fintu Yesu acitile, ukucilumbula, ukushimikila no kusambilisha ifintu asambilishe, ifintu ifyo apokelele ukufuma kuli Wishi. (Mateo 28:19, 20) Nga fintu Yesu alaile, “nga mwaishibe fintu ifi, ninshi mwalishuka nga muleficita.”—Yohane 13:17.

Ku kulangilila: Nyina uyo nomba line abwelele mu butumikishi bwa bupainiya bwa nshita yonse atile: “Ukumona icinso ca musambi wa Baibolo ukubengeshima ilyo icine ca Baibolo icalekanalekana cilefika pa mutima ca kucilimusha nga nshi! Bwaba buseko bukalamba kuli ine ukumona umusambi umo ukulemba mu kukumanina amalembo yonse pa ntanshi ye sambililo no kulalemba ifyebo mu kati ke sambililo pa kuti engasuka ifipusho ifili fyonse ifya kupitulukamo pa numa.” Na umbi uwa basambi bakwe aba Baibolo alikumene ne cine mu kubangilila mu myaka ya bupungwe. Apo nomba alyupilwe kabili alisakamikwa pa lwa mpika sha pa lwakwe, alefuluka ukusanga Inte. Fintu ali uwa nsansa lintu nkashi painiya amusangile! Umukashana alicankilwe pa kutendeka isambililo lyakwe ilya Baibolo.

Ukusungilila Ubuseko bwa Kucita Ukufwaya kwa kwa Lesa

Imfumu Davidi iya kwa Israele wa pa kale aali umo uwafwaile ukucita ukufwaya kwa kwa Lesa ubumi bwakwe bonse. Te mulandu no bwingi bwa mafya no kutitikisha ifyaletelwe pali wene, alipuutilwemo ukusoso kuti: “Nabekelwo kucite co mutemenwe, mwe Lesa wandi; kabili amalango yenu yali mu mutima wandi.” (Ilumbo 40:8) Ukucita ukufwaya kwa kwa Yehova kwali mu mweo wine uwa kwa Davidi, mu mwine wine. Iyo yali e nkama ya buseko bwakwe ubushalepwa mu kubombela Yehova. Ukucita ukufwaya kwa kwa Lesa takwali bwafya kuli Davidi. Ukucila, kwali ca kubekelwamo, icintu cimo icafumine mu mutima wakwe. Ukupulinkana ubumi bwakwe bonse, ashombweke ukucita apo engapesha pa kubombela Lesa wakwe, Yehova, nelyo cingati inshita shimo alebembuka no kupelebela.

Pa kashita kamo, ubuseko bwesu kuti bwacepa. Kuti pambi twafunshika nelyo twaba abakungumana. Nakalimo incitilo shesu isha ku numa shiletulolosha, kampingu wesu aletucusha pa ncitilo imo iyalubana iyacitilwe akale ku numa. Ilingi line, kuti twacimfya uku kuyumfwa ukupitila mwi sambililo lyacilapo kuba ilyakumanina ilya Cebo ca kwa Lesa. Kuti twatonta pa kufwatika ifunde lya kwa Lesa mu “mutima” wesu, nga fintu Davidi acitile. Nga ca kuti twaesha ukucito kufwaya kwa kwa Lesa no mweo onse, uko e kuti, apapela amaka yesu, akatulambula mu kulinganako pa mulandu wa kuti aba uwa bucishinka.—Abena Efese 6:6; AbaHebere 6:10-12; 1 Petro 4:19.

Ku ca kusekesha, pa AbaHebere 10:5-7, umutumwa Paulo ayambwile amashiwi ya kwa Davidi pa Ilumbo 40:6-8 no kuyabomfya kuli Yesu Kristu. Mu kucite fyo, Paulo alondolwele fintu Yesu aali uwapalamisha kuli Wishi. Ishiwi lya ciHebere ilya “ukufwaya” lyakwata itontonkanyo lya ‘ukubekelwa, ukufwaisha, ukubisha, nelyo ukucankwa.’ E ico, Ilumbo 40:8 kuti pambi lyabelengwa ukukuma kuli Kristu aliti: “Ku kucita ico mucankilwamo, Mwe Lesa wandi, eko nabekelwamo.”a Yesu alefwaya ukucita icaletemuna Wishi. Yesu acitile ukucila pa co aipushiwe. Acitile icali ku mutima wa kwa Wishi, kabili aliipakishe ukucita cene.

Ubumi bwa kwa Yesu bonse bwashingulwike pa kusambilisha bambi icaba e kufwaya kwa kwa Lesa ne co bafwile ukucita pa kunonka ipaalo lya kwa Lesa. Aali ni kashimikila wa nshita yonse kabili kasambilisha kabili asangile ubuseko bukalamba mu kubomba ulya mulimo. Muli fyo kanshi lintu twacililako ukubomba umulimo wa kwa Yehova, e lyo tukapokelela ubuseko bwafulilako. Bushe na iwe kuti wabomba inshita yonse mu mulimo wa kushimikila pa kuti ubuseko bobe bwingapaka?

Ica kwaafwa calundwapo mu kusungilila ubuseko mu kucito kufwaya kwa kwa Lesa caba kutontomesha pa nshita ya ku ntanshi. Ico e cintu Yesu acitile. “Pa mulandu wa kusekelela ukwabikilwe pa ntanshi yakwe, ashipikishe ku [cimuti ca kucushiwilwapo, NW], ukusuule nsoni.” Kuli wene, ubuseko bwali kushinina ukuba uwa busumino kuli Lesa ukufika ku mpela kabili lyene ukunonka icilambu ca bumfumu ku kuboko kwa kulyo ukwa kwa Wishi.—AbaHebere 12:2.

Elenganya ubuseko bwa nshita ya ku ntanshi ubukesa kuli abo abatwalilila ukucito kufwaya kwa kwa Lesa. Bakamonako bonaushi bwa abo abapampamina pa kucito kufwaya kwabo kwine ukwa kaso nelyo fye uku kulenga ukucula kuli abo abatukuta ukucito kufwaya kwa kwa Lesa. (2 Abena Tesalonika 1:7, 8) Tontonkanya ulwa buseko bwa batemwikwa ababuushiwa mu kunonka ishuko lya mu nshita ku kusambilila no kucita ukufwaya kwa kwa Lesa. Nelyo languluka imifwaile ya kwa Lesa iya kubwesesha isonde kuli Paradise. Kabili mu kupelako, elenganya ubuntungwa ubo bukafuma mu konaula kwa mupwilapo ukwa kwa Satana, kakaanya wa kufwaya kwa kwa Yehova.

Ee, ukucito kufwaya kwa kwa Lesa ilelo kuti kwaletako ubuseko ubwingi nomba ne nsansa shabulo kupwa mu nshita ya ku ntanshi. Te mulandu no kwankulako uko tupokelela mu mulimo wa kushimikila, shi natupashanye ica kumwenako ca kwa Yesu mu kucankilwa mu kucito kufwaya kwa kwa Wishi.

[Futunoti]