Twalilileni Ukuba mu Cilonganino ca kwa Yehova

UMUSAMBI Yakobo alembele ukuti: “Palameni kuli Lesa, na o akapalama kuli imwe.” (Yako. 4:8) Kanshi nangu ca kuti tuli babembu, Yehova taba ukutali kuli ifwe ica kuti te kuti omfwe amapepo yesu. (Imil. 17:27) Kuti twacita shani pa kuti tupalame kuli Lesa? Tulingile ukukosha bucibusa bwesu na ena, kabili cimo icingatwafwa ukucita ifi kulapepa lyonse. (Amalu. 39:12) Na kabili kuti twapalama sana kuli Lesa nga tulesambilila lyonse Icebo cakwe, Baibolo. Ukubelenga Baibolo lyonse kulatwafwa ukwishiba bwino Yehova Lesa, ubufwayo bwakwe, ne fyo afwaya ukutucitila. (2 Tim. 3:16, 17) Ici cilalenga twatemwa sana Yehova no kukanalacita nangu cimo icingamufulwisha.—Amalu. 25:14.

² Yesu, Umwana wa kwa Lesa e wingatwafwa fye ukupalama kuli Yehova. (Yoh. 17:3; Rom. 5:10) Takwaba umuntu nangu umo uwingatwafwa ukwishiba bwino ifyo Yehova aaba ne fyo atontonkanya, kano fye Yesu. Alishiba bwino sana Wishi, e co alandiile ukuti: “Takuli uwaishiba Umwana ifyo aba kano Wishi, kabili takuli uwaishiba Wishi ifyo aba kano Umwana, na untu Umwana afwaya ukusokolwela.” (Luka 10:22) Kanshi nga tulebelenga amabuuku ya Mbila Nsuma, tulasambilila ifyo Yesu aletontonkanya ne fyo alemona ifintu. Nga tulecita ifi tukeshiba ifyo Yehova atontonkanya ne fyo amona ifintu. Ukusambilila pali Yesu kulalenga twapalama sana kuli Lesa.

³ Lesa alisonta Umwana wakwe Yesu ukuba umutwe wa cilonganino. Tulapalama sana kuli Yehova nga twatwalilila ukuba mu cilonganino cakwe icitusambilisha ukucita ukufwaya kwakwe. Nge fyo casobelwe pali Mateo 24:45-47, Shikulwifwe, Yesu Kristu, alisonta “umusha wa cishinka kabili uwashilimuka” pa kuti alepeela aba mu ng’anda “ifya kulya pa nshita yalinga.” Muno nshiku, “umusha wa cishinka” alatupeela ifya kulya fya ku mupashi ifingi. Yehova alatufunda ukupitila mu musha wa cishinka ukuti tufwile ukulabelenga Icebo cakwe cila bushiku, ukulasangwa ku kulongana lyonse, e lyo no kulabombesha mu mulimo wa kubila “imbila nsuma iya Bufumu.” (Mat. 24:14; 28:19, 20; Yosh. 1:8; Amalu. 1:1-3) Kanshi tatufwile ukusuula ifyo umusha wa cishinka atweba. Tulingile no kwesha na maka ukwikalilila mu cilonganino ca kwa Yehova, no kulakonka ifyo citweba ukulacita. Ukucita ifi kukatupalamika sana kuli Lesa wesu Yehova, kabili kukatukosha no kutucingilila na mu nshita ya mesho.

⁴ Nalimo ni kale sana mwabatishiwe. Nga ni kale, mufwile mwalishiba ifyo cipilibula ukushipikisha amesho ayengalenga mwaleka ukuba aba cishinka kuli Lesa. Lelo nangu ni nomba line mwasambilile pali Yehova kabili e lyo mwatendeke fye ukulongana na bantu bakwe, mwalishiba ukuti Satana Kaseebanya alalwisha bonse abanakila imitekele ya kwa Yehova. (2 Tim. 3:12) Kanshi nga mwalishipikisha amesho ayengi nelyo ayanono, tamulingile ukuba no mwenso atemwa ukufuupulwa. Yehova alimulaya ukuti akamukosha kabili akamupeela umweo wa muyayaya.—Heb. 13:5, 6; Ukus. 2:10.

⁵ Apo twikala mu nshiku sha kulekelesha isha kuteka kwa kwa Satana, bonse fye kuti twaeshiwa. Ukutula fye ilyo Ubufumu bwa kwa Lesa bwatendeke ukuteka mu 1914, Satana balimutamfya ku muulu, kabili takwata na maka ya kuyako. Balimupoosa pe sonde kumo ne fibanda fyakwe. Ico amafya yafulile pano calo, ukubikako no kucusha ababomfi ba kwa Yehova, ni co Satana aliba ne cipyu kabili aya mafya bushininkisho bwa kuti tuleikala mu nshiku sha kulekelesha isha kuteka kwakwe ukwabipa.—Ukus. 12:1-12.

⁶ Satana alikalipa nga nshi pa mulandu wa kumupoosa pano calo kabili alishiba no kuti ashele fye ne nshita inono. E mulandu wine Satana ne fibanda fyakwe bakoselapo fye ukulesha umulimo wa kubila imbila nsuma ya Bufumu no kufwaya ukuleta amalekano pa babomfi ba kwa Yehova abaikatana. Kanshi fwe babomfi ba kwa Lesa tulalwa ubulwi bwa ku mupashi nga fintu Baibolo yalondolola ukuti “ukushomboka kwesu, te kwa kushomboka na bantu bakwata umubili wa munofu no mulopa, lelo kwa kushomboka na mabuteko, na bamulopwe, na bakateka ba calo cino icaba mu mfifi, ne mipashi ibifi iyaba mu muulu.” Nga tulefwaya ukucimfya ubu bulwi, tatufwile ukubwelela inuma, lelo tufwile ukutwalilila ukufwala ifya bulwi fya ku mupashi. Tufwile “ukwiminina ndi ku kulwisha imicenjelo” ya kwa Satana Kaseebanya. (Efes. 6:10-17) E ico tufwile ukushipikisha pa kuti tucimfye.

⁷ Ishiwi lya kuti ukushipikisha lipilibula ukuba uwashipa no kukananenuka nga wakwata amafya. Ukulingana ne fyo Baibolo yalanda, ukushipikisha cipilibula ukutwalilila ukuba uwakosa mu kucita icalungama nga baletukaanya, baletucusha, nga tuli na mafya nelyo nga kwacitika ifintu fimbi ifingalenga twafilwa ukuba aba cishinka kuli Lesa. Tufwile ukwishiba ifya kucita pa kuti tuleshipikisha amafya, lelo kwena palapita inshita pa kuti twishibe ifyo tulingile ukulacita. Ilyo bucibusa bwesu na Lesa bulekoselako, e lyo tukwatilako amaka ya kushipikisha. Nga twashipikisha amafya ayanono ayo tukwata ilyo twatendeka fye ukubombela Yehova, tukaba abakosa ica kuti na lintu tukakwata amafya ayakalamba tukaba na maka ya kushipikisha. (Luka 16:10) Kanshi tatulingile ukulolela twakwata amafya ayakalamba e lyo twatendeka ukutontonkanya pa fyo twalacita pa kuti tushipikishe. Tufwile ukutontonkanishisha libela pa fyo tukacita nga twaba na mafya. Ifyo umutumwa Petro alandile fyalangile ukuti tatulingile ukupelela fye pa kushipikisha, lelo tufwile no kuba ne mibele na imbi iyo Abena Kristu balingile ukukwata. Atile: “Na imwe mufwile ukubombesha ukulundako imibele iisuma ku citetekelo cenu, kabili ku mibele yenu iisuma mufwile ukulundako ukwishiba, ku kwishiba na ko mulundeko ukuilama, na ku kuilama kwine mulundeko ukushipikisha, ku kushipikisha na ko mulundeko bukapepa, na kuli bukapepa kwine mulundeko ukutemwa aba bwananyina, e lyo ku kutemwa aba bwananyina mulundeko ukutemwa abantu bonse.”—2 Pet. 1:5-7; 1 Tim. 6:11.

⁸ Pa kulanga ukuti ukushipikisha kwalicindama, Yakobo alembele ukuti: “Mwe bamunyinane, mulemona ukuti nga mwaponenwa ne fya kwesha fyalekanalekana, ninshi mwalipaalwa icine cine, pantu mwalishiba bwino bwino ukuti ukweshiwa kwa citetekelo cenu kuleta ukushipikisha. Kanshi muleleka ukushipikisha kwenu kwapwisha umulimo wa kuko, pa kutila mube abafikapo kabili abatuntulu muli fyonse, abashabulisha nangu cimo.” (Yako. 1:2-4) Yakobo atile Abena Kristu tabalingile ukulatiina amafya ayesha icitetekelo cabo, lelo balingile ukulasekelela pantu nga baeshiwa e lyo bengakwata sana amaka ya kushipikisha. Bushe mwalibala amutontonkanyapo pali ifi twalanda? Yakobo alandile no kuti ukushipikisha kulalenga twawamyako ifyo twaba kabili kulalenga twapokelelwa kuli Lesa. Kanshi nga tuleshipikisha amesho, kuti calenga tulekwatilako amaka ya kushipikisha. Ukushipikisha kulalenga twaba ne mibele na imbi iisuma iyo tulingile ukuba nayo.

⁹ Nga tuleshipikisha amesho, Yehova alatemwa kabili cikalenga akatupeele umweo wa muyayaya. Yakobo alandile no kuti: “Alipaalwa umuntu uushipikisha ubwesho, pantu nga aba uwasuminishiwa akapokelela icilambu ca mweo, ico Yehova alaile abatwalilila ukumutemwa.” (Yako. 1:12) Kanshi tufwile ukulashipikisha amesho pa kuti tukabe no bumi ku ntanshi. Te kuti tutwalilile ukuba mu cine nga tatuleshipikisha amesho. Nga tulefilwa ukushipikisha amafya ayo tukwata muli cino calo citekwa na Satana, kuti twabwelela ku fintu fya mu calo. Na kabili Yehova te kuti atwalilile ukutupeela umupashi wakwe uwa mushilo, ne ci kuti calenga twikwata ifisabo fya mupashi.

¹⁰ Pa kuti tutwalilile ukushipikisha muli shino nshiku isha-afya, tatulingile ukusakamikwa sana nelyo ukufuupulwa nga tulecula pa mulandu wa kuba Umwina Kristu. Muleibukisha amashiwi ayalandile Yakobo aya kuti, nga mwaponenwa ne fya kwesha “ninshi mwalipaalwa icine cine.” Limbi kuti ca-afya ukumona ukuti twalipaalwa nga baletucusha nelyo nga natusakamikwa sana. Lelo tuleibukisha ukuti nga twafilwa ukushipikisha, tatwakabe no mweo wa muyayaya. Ukusambilila ku fyo abatumwa bacitile ilyo bakwete amafya, kuti kwalenga twalasekelela ilyo tuli na mafya. Ifyo bacitile fyalembwa mwi buuku lya Imilimo, umwaba amashiwi ayatila: “Baitile abatumwa, no kubafopaula, no kubalesha ukulandila mwi shina lya kwa Yesu, e lyo babalekele baye. E ico, bafumine pa ntanshi ya cilye ca Sanhedrini, baya balesekelela pantu basangilwe abawamina ukuculila ishina lyakwe.” (Imil. 5:40, 41) Abatumwa balishibe ukuti icalengele balebacusha ni co balecita ifyo Yesu abebele kabili balelenga umutima wa kwa Yehova ukusekelela. Ilyo papitile imyaka iingi, Petro alembele muli kalata yakwe iya kubalilapo ukuti cisuma ukuculila pa mulandu wa bulungami.—1 Pet. 4:12-16.

¹¹ Nomba natulande pa fyacitikiile Paulo na Sila. Ilyo balebomba umulimo wa bumishonari mu Filipi, balibekete no kubapeela umulandu wa kuti balefulunganya abantu mu musumba kabili balebasambilisha intambi isho aba mu musumba bashasuminishiwe ukusambilila. Ici calengele ukuti Paulo na Sila babafopaule no kubapoosa mu cifungo. Baibolo yalilanda pa fyo cali ilyo bali mu cifungo ninshi tabakwete no wa kubawamya ifilonda, itila: “Pa kati ka bushiku Paulo na Sila balepepa no kulumbanya Lesa mu nyimbo; na bafungwa balebomfwa.” (Imil. 16:16-25) Paulo na Sila balemona amacushi balekwata pa mulandu wa kwa Kristu ukuti bwali bushininkisho bwa kutila bali ne cishinka kuli Lesa na ku bantu, kabili balemona ukuti aya macushi yali no kulenga bashimikilako na bambi abalefwaya ukumfwa imbila nsuma. Kanshi ukubila imbila nsuma kwali no kulenga abantu na bambi ukupusuka. Bulya bwine ubushiku, kalinda wa cifungo no lupwa lwakwe, balyumfwile imbila nsuma baba na basambi. (Imil. 16:26-34) Paulo na Sila balicetekele ukuti Yehova ali no kulabafwa no kulabakosha mu mafya balekwata. Na cine Yehova alibafwile.

¹² Na muno nshiku mwine, Yehova alatupeela fyonse ifingatwafwa ukushipikisha nga twaba na macushi, pantu afwaya ukuti tuleshipikisha. Alitupeela Icebo cakwe Baibolo icitwafwa ukwishiba bwino ubufwayo bwakwe. Icebo cakwe cilakosha icitetekelo cesu. Twalikwata ishuko lya kuba pamo na Bena Kristu banensu, e lyo ne lya kubomba umulimo wa mushilo. Twalikwata ne shuko lya kukosha bucibusa bwesu na Yehova ukupitila mwi pepo. Alomfwa amapepo yesu aya kumulumbanya na ya kulomba ukuti aletwafwa ukuba abasanguluka. (Fil. 4:13) E lyo kabili isubilo twakwata lilatukosha kabili lilatwafwa ukushipikisha.—Mat. 24:13; Heb. 6:18; Ukus. 21:1-4.

¹³ Amesho tukwata tayapusana na yo abasambi ba kwa Yesu Kristu aba kubalilapo balekwata. Muno nshiku Inte sha kwa Yehova balabasaalula no kubacusha ku bantu abaishiba ifya bufi pali ba Nte. Nga fintu cali mu nshita ya batumwa, abatunka sana abantu ukuti baletucusha, ni ntungulushi sha mapepo abacita ifyabipa kabili abasambilisha ifisambilisho ifyo Baibolo yasokolola apabuuta tuutu ukuti fya bufi. (Imil. 17:5-9, 13) Inshita shimo Inte sha kwa Yehova nga babekala pa nsambu shabo, balaya ku filye pa kuti ubuteko bubafwe. (Imil. 22:25; 25:11) Na lyo line, limo bakateka balatubinda ukubila imbila nsuma. (Amalu. 2:1-3) Nga batubinda, tatumfwa umwenso, tucita nga filya abatumwa ba cishinka bacitile, abatile: “Tufwile ukunakila Lesa ukucila ukunakila abantu.”—Imil. 5:29.

¹⁴ Apo abantu abengi mwi sonde lyonse balitemwisha ifyalo fyabo, limo cilafya kuli bakabila ba mbila nsuma ukutwalilila ukulabomba umulimo uo Lesa abapeela. Ababomfi ba kwa Lesa bonse balishiba bwino bwino ukusoka ukwaba pa Ukusokolola 14:9-12 ukulanda pa kupepa “iciswango ne cimpashanya ca ciko.” Twalishiba ifyo amashiwi Yohane alandile yacindama, ayatila: “Apa e po aba mushilo, abasunga amafunde ya kwa Lesa kabili abatetekela Yesu, balekabila ukushipikisha.”

¹⁵ Amesho ayabako nga kwaba inkondo, bacipondoka nga baimina ubuteko, ubuteko nga bwabinda umulimo wesu, nelyo nga batendeka ukutucusha, kuti yalenga ca-afya ukulapepa bwino Yehova. Limo te kuti tulelongana pamo nge cilonganino. E lyo limo te kuti kube ne nshila ya kulanshanishishamo ne ofeshi lya musambo. Kabili inshita shimo bakangalila ba muputule kuti balefilwa ukutandalila ifilonganino. E lyo limbi kuti twaleka no kupokelela impapulo. Kuti mwacita shani nga ca kuti cimo pali ifi twalandapo cacitika?

¹⁶ Icasuko ca kuti, mulingile ukwesha na maka yenu yonse ukulacita ifingalenga mwatwalilila ukuba cibusa wa kwa Lesa. Te kwesha ukuleka ukuisambilisha ifya kwa Lesa. Kabili kuti mulelongana mu mabumba ayanono mu mayanda. Kuti mulebomfya impapulo sha kale e lyo na Baibolo pali uku kulongana. Tamulingile ukusakamikwa sana ifintu nga fya-afya. Ilingi line, Ibumba Litungulula lilapekanya bwangu bwangu inshila ya kulanshanishishamo na bamunyinefwe abatungulula.

¹⁷ Nangu tamuli na bamunyinenwe, mufwile ukulaibukisha ukuti Yehova no Mwana wakwe Yesu Kristu bali nenu, kabili kuti mwatwalilila ukuba abakosa. Yehova kuti akutika ku mapepo yenu, kabili kuti amukosha ukubomfya umupashi wa mushilo. Lyonse mufwile ukulomba ukuti alemutungulula. Tamufwile ukulaba ukuti muli babomfi ba kwa Yehova kabili muli basambi ba kwa Yesu Kristu. Kanshi ishuko nga lyamoneka, mufwile ukushimikilako abantu pali Lesa. Yehova kuti amupaala ica kuti abo muleshimikilako pali ena nabo kuti batendeka ukupepa Lesa wa cine.—Imil. 4:13-31; 5:27-42; Fil. 1:27-30; 4:6, 7; 2 Tim. 4:16-18.

¹⁸ Lelo limo ifintu kuti fyaba nga filya fyali ku batumwa na bantu bambi. Nalimo kuti bamweba ukuti balamwipaya. Nga e fyo bamweba, mufwile ukucetekela “Lesa uubusha abafwa.” (2 Kor. 1:8-10) Isubilo mwakwata ilya kuti Lesa akabuusha abafwa kuti lyalenga mwashipikisha na mesho ayakalamba nga nshi. (Luka 21:19) Kristu Yesu alishipikiishe amesho; alishibe ukuti nga atwalilila ukuba ne cishinka, ali no kukoselesha na bambi ukulashipikisha. Na imwe nga muleshipikisha kuti mwakoselesha bamunyinenwe ukulashipikisha amesho.—Yoh. 16:33; Heb. 12:2, 3; 1 Pet. 2:21.

¹⁹ Nomba te kumucusha fye no kumukaanya ukwingesha icitetekelo cenu, kwaliba amesho na yambi. Ku ca kumwenako, bamo balafuupulwa pa mulandu wa kuti abantu mu fifulo babombela balakaana ukukutika ku mbila nsuma. Bambi nabo balacula pa mulandu wa kuti balalwalilila nelyo baliba sana na masakamika, nelyo tabakwata amaka ya kubombesha pa mulandu wa kulwalilila nelyo ubukote. Umutumwa Paulo na o alishipikishe ubwesho akwete ubwalelenga ukuti limo limo elabomba bwino umulimo wakwe. (2 Kor. 12:7) Na Epafroditi, Umwina Kristu wa ku Filipi, alisakamikwe nelyo ‘alikungumene pantu abanankwe balyumfwile ukuti alilwele.’ (Fil. 2:25-27) Ifilubo tucita e lyo ne filubo fya banensu kuti fyalenga catukosela ukushipikisha. Limo kuti twapusana na Bena Kristu banensu nelyo balupwa lwesu. Kuti twashipikisha nelyo ukucimfya aya mafya nga twatwalilila ukukonka ifyo Icebo ca kwa Yehova citufunda.—Esek. 2:3-5; 1 Kor. 9:27; 13:8; Kol. 3:12-14; 1 Pet. 4:8.

²⁰ Tufwile ukulaumfwila Yesu Kristu uo Yehova asonta ukuba umutwe wa cilonganino. (Kol. 2:18, 19) Tufwile no kulabombela pamo no “musha wa cishinka kabili uwashilimuka” e lyo na bakangalila abo basonta ukulatutungulula. (Heb. 13:7, 17) Nga tulekonka ifyo icilonganino ca kwa Lesa citweba, tuleumfwila na bo basonta ukulatutungulula, tukaba abateyanishiwa ku kucita ukufwaya kwa kwa Yehova. Tufwile no kulapepa lyonse. Muleibukisha ukuti nangu bamupoosa mu cifungo, Shifwe wa ku muulu uwatutemwa te kuti afilwe ukukutika ku mapepo yenu, kabili nangu batupoose mu cifungo te kuti cilenge tufilwe ukwikatana na ba bwananyina.

²¹ Natutwalilile ukulashipikisha no kulacita fyonse ifingatwafwa ukulabila imbila nsuma iyo Yesu Kristu aebele abasambi bakwe ukulabila ilyo atile: “E ico kabiyeni, kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo, mulebasambilisha ukulakonka fyonse ifyo namwebele.” (Mat. 28:19, 20) Natuleshipikisha nga filya Yesu ashipikishe. Natutwalilile ukulatontonkanya pa Bufumu bwa kwa Lesa na pa bumi bwa muyayaya ubo tukakwata ku ntanshi. (Heb. 12:2) Apo tuli basambi ba kwa Kristu ababatishiwa, twalikwata ishuko lya kufikilishako amashiwi Yesu asobele pa fikalacitika ‘ku mpela ya calo.’ Yesu atile: “Ne mbila nsuma iyi iya Bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.” (Mateo 24:3, 14) Nga tulebomba uyu mulimo no mweo onse muli shino nshiku sha ku mpela, tukasekelela nga nshi ilyo tukengila mu calo cipya ica kwa Yehova umukaba ubulungami!