Ankuleni ku Malayo ya kwa Lesa pa Kubeleshe Citetekelo

“[Yehova Lesa] atufumpile filayo ifikankaala kabili ifyakulisha.”—2 PETRO 1:4.

 1. Cinshi citulenga ukubelesha icitetekelo ca cine?

YEHOVA afwaya ifwe ukubeleshe citetekelo mu malayo yakwe. Lelo, “icitetekelo te cikwatwa ca bantu bonse.” (2 Abena Tesalonika 3:2, NW) Iyi mibele yaba cisabo ca mupashi wa mushilo uwa kwa Lesa, nelyo amaka yabomba. (Abena Galatia 5:22, 23) Muli fyo, ni abo fye beka abatungululwa no mupashi wa kwa Yehova e bengabeleshe citetekelo.

 2. Ni shani fintu umutumwa Paulo alondolola “icitetekelo”?

² Lelo bushe icitetekelo cinshi? Umutumwa Paulo eta cene “icilangililo camonekesha ica fintu fine fine nangu cingati tafilamonwa.” Ubushininkisho bwa ifi fintu ifishimonwa bwalibo bwakosa ica kuti icitetekelo calinganishiwa na bwene. Icitetekelo casoswa na kabili ukuba ngo “kwenekela kwaebekeshiwa ukwa fintu filesubilwa” pantu abo abakwata iyi mibele balikwata ukwebekesha kwa kuti icili conse icalaiwa na Yehova Lesa calishininkishiwa nga nshi ica kuti caba nge cafikilishiwa.—AbaHebere 11:1, NW.

Icitetekelo na Malayo ya kwa Yehova

 3. Cinshi cintu Abena Kristu basubwa bakakumanya nga babelesha icitetekelo?

³ Pa kusekesha Yehova, tufwile ukubelesha icitetekelo mu malayo yakwe. Umutumwa Petro alangishe ici muli kalata wakwe wa cibili uwapuutwamo, uwalembelwe mupepi na 64 C.E. Alondolwele ukuti nga ca kuti Abena Kristu banankwe abasubwa babeleshe citetekelo, bali no kumona ukufikilishiwa kwa “filayo ifikankaala kabili ifyakulisha” ifya kwa Lesa. Pamo nge ca kufumamo, bali no “kuba abakumako ku mbela ya bulesa” nge mpyani shinankwe na Yesu Kristu mu Bufumu bwa mu muulu. Mu kuba ne citetekelo no kwaafwa kwa kwa Yehova Lesa, bali nabafyuka ukufuma ku kuba mu busha ku myata ne fibelesho fyabola ifya cino calo. (2 Petro 1:2-4) Kabili citontonkanye! Abo balebeleshe citetekelo ca cine balaipakisha ubuntungwa bwaumo mutengo bumo bwine ilelo.

 4. Mibele nshi tulingile ukulunda ku citetekelo cesu?

⁴ Icitetekelo mu malayo ya kwa Yehova no kutasha pa buntungwa bwesu bwapeelwa na Lesa filingile ukutusesha ukucita apapela maka yesu ukuba Abena Kristu ba ca kumwenapo. Petro atile: “Pali ici cine lundeniko ukucincila konse, ku citetekelo cenu lundeniko ubulumba, na ku bulumba lundeniko ukwishiba, na ku kwishiba lundeniko [ukuilama, NW], na ku [kuilama, NW] lundeniko ukushipikisha, na ku kushipikisha lundeniko [ukuipeelesha kwa bukapepa, na ku ukuipeelesha kwa bukapepa, NW] lundeniko ukutemwa aba bwananyina, na ku kutemwa aba bwananyina lundeniko ukutemwa.” (2 Petro 1:5-7) Petro muli fyo atupeela umutande untu tuli no kucita bwino ukusungila ku mutwe. Natuloleshe mu kupalamisha pali iyi mibele.

Imbali Shakatama Isha Citetekelo

5, 6. Ubulumba cinshi, kabili ni shani twingalunda bwene ku citetekelo cesu?

⁵ Petro atile ubulumba, ukwishiba, ukuilama, ukushipikisha, ukuipeelesha kwa bukapepa, ukutemwa aba bwananyina, no kutemwa fili no kulundwa kuli cimo ne cinankwe na ku citetekelo cesu. Tufwile ukubombesha ukulenga iyi mibele ukuba imbali shakatama isha citetekelo cesu. Ku ca kumwenako, ubulumba tayaba mibele iyo tulanga mu kupaatuka ku citetekelo. Kalemba wa dikishonari W. E. Vine alondolola ukuti pali 2 Petro 1:5, “ubulumba busanshiwako nge mibele yacindama mu kubeleshe citetekelo.” Imo na imo iya mibele imbi cinelubali iyo Petro alumbwile ili no kuba lubali lwa citetekelo cesu.

⁶ Intanshi, tufwile ukulundako ubulumba ku citetekelo cesu. Ukuba uwa bulumba cipilibula ukucite cisuma mu cinso ca kwa Lesa. Pantu ishiwi lya ciGreek pano ilyapilibulwa “ubulumba,” amabupilibulo yamo yabomfya “ubusuma.” (New International Version; The Jerusalem Bible; Today’s English Version) Ubulumba bulatukunta ku kusengauka ukucito bubi nelyo kucena ku bantunse banensu. (Ilumbo 97:10) Na kabili bucincisha imibombele ya bukose mu kucito busuma ku kumwenamo kwa bambi ukwa ku mupashi, ku mubili, na mu nkuntu.

 7. Mulandu nshi tulingile ukulundila ukwishiba ku citetekelo cesu no bulumba?

⁷ Mulandu nshi Petro atucincishisha ukulundako ukwishiba ku citetekelo cesu no bulumba? Cisuma, ilintu tulelolenkana no kusonsomba kupya ku citetekelo cesu, tukabila ukwishiba nga tuli no kulekanya icalungama ukufuma ku calubana. (AbaHebere 5:14) Ukupitila mwi sambililo lya Baibolo no kubelesha mu kubomfye Cebo ca kwa Lesa na mu kubelesha amano yabomba mu bumi bwa cila bushiku, tulalundako ukwishiba kwesu. Mu kukonkapo, ici citulenga ukusungilila icitetekelo cesu no kutwalilila ukucita ifya bulumba lintu tuli pe samba lya bwesho.—Amapinda 2:6-8; Yakobo 1:5-8.

 8. Ukuilama cinshi, kabili ni shani kwasuntinkanishiwa ku kushipikisha?

⁸ Pa kutwaafwa ukukumanya amesho mu kuba ne citetekelo, tukabila ukulunda ku kwishiba kwesu ukuilama. Ishiwi lya ciGreek ilya “kuilama” lilangilila amaka ya kuifyambata fwe bene. Ici cisabo ca mupashi wa kwa Lesa citwaafwa ukulanga ukuikaanya mwi tontonkanyo, mu cebo, na mu myendele. Pa kutwalilila ukubelesha ukuilama, tulunda kuli kwene ukushipikisha. Ishiwi lya ciGreek ilya “kushipikisha” lipilibula ukushangila kwabamo bukose, te kutompoka kwa kulangisha icinso cabombomana ku bwafya bushingasengaukwa. Cali pa mulandu wa buseko bwabikilwe pa ntanshi yakwe e co Yesu ashipikishishe icimuti ca kucushiwilwapo. (AbaHebere 12:2) Ubukose bwapeelwa na Lesa ubwaampana no kushipikisha bulakosha icitetekelo cesu kabili butwaafwa ukusekelela mu bucushi, ukucincintile tunko, no kusengauka ukusuusuka lintu twapakaswa.—Abena Filipi 4:13.

 9. (a) Ukuipeelesha kwa bukapepa cinshi? (b) Mulandu nshi uwa kulundila ukutemwa aba bwananyina ku kuipeelesha kwesu ukwa bukapepa? (c) Ni shani twingalunda ukutemwa ku kutemwa aba bwananyina?

⁹ Ku kushipikisha kwesu tufwile ukulundako ukuipeelesha kwa bukapepa—ukucindikisha, ukupepa, no mulimo kuli Yehova. Icitetekelo cesu cilakula ilyo tubelesha ukuipeelesha kwa bukapepa no kumona fintu Yehova abomba na bantu bakwe. Nalyo line, pa kulangisha bukapepa, tukabila ukutemwa aba bwananyina. Na kuba, “uushatemwa munyina uo amona, te kuti atemwe Lesa uo ashamona.” (1 Yohane 4:20) Imitima yesu ilingile ukutusesha ku kulanga icitemwiko ca cine ku babomfi bambi aba kwa Yehova no kufwaya ubusuma bwabo pa nshita shonse. (Yakobo 2:14-17) Lelo mulandu nshi twaebelwa ukulundako ukutemwa ku kutemwa kwesu aba bwananyina? Mu kumonekesha Petro apilibwile ukuti tufwile ukulango kutemwa ku mutundu wa muntu onse, te bamunyinefwe beka. Uku kutemwa kulangililwa maka maka ku kushimikila imbila nsuma no kwaafwa abantu lwa ku mupashi.—Mateo 24:14; 28:19, 20.

Ukusonga Kwapusana

10. (a) Ni shani fintu tukabomba nga ca kuti ubulumba, ukwishiba, ukuilama, ukushipikisha, ukuipeelesha kwa bukapepa, ukutemwa aba bwananyina, no kutemwa fyalundwa ku citetekelo cesu? (b) Cinshi cicitika nga ca kuti Umwina Kristu waitunga abulisha iyi mibele?

¹⁰ Nga ca kuti twalundako ubulumba, ukwishiba, ukuilama, ukushipikisha, ukuipeelesha kwa bukapepa, ukutemwa aba bwananyina, no kutemwa ku citetekelo cesu, tukalatontonkanya, ukulanda, no kubomba mu nshila shasuminishiwa na Lesa. Mu kupusanako, nga ca kuti Umwina Kristu waitunga afilwa ukulangisha iyi mibele, asanguka impofu lwa ku mupashi. ‘Esala amenso yakwe ku lubuuto’ ulufuma kuli Lesa no kulabo kuti alisangululwa ku membu sha ku numa. (2 Petro 1:8-10; 2:20-22) Shi twikatala atufilwa muli yo nshila na muli fyo ukulufya icitetekelo mu malayo ya kwa Lesa.

11. Cinshi cintu mu kulingisha twingenekela ku basubwa aba bucishinka?

¹¹ Abena Kristu ba bucishinka abasubwa balikwata icitetekelo mu malayo ya kwa Yehova kabili balapilikita ukulenga ukwitwa kwabo no kusalwa ifya cine. Te mulandu ne fya kupunwisha ifili fyonse mu nshila yabo, kuti twaenekela bene ukulangisha imibele ya bukapepa. Ku basubwa aba busumino ‘kwapeelwa mu musango uwacindama ukwingila mu bufumu bwa muyayaya bwa kwa Yesu Kristu’ ukupitila mu kubuukila kwabo ku bumi bwa mupashi mu muulu.—2 Petro 1:11.

12. Ni shani tuli no kumfwikisha amashiwi ya pali 2 Petro 1:12-15?

¹² Petro alishibe ukuti aali no kufwa mu kwangufyanya, kabili aenekele ukupokelela ukubuuka kwali no kukonkapo ku bumi bwa ku muulu. Lelo ilintu aali uwa mweo “mwi hema ili”—umubili wakwe uwa buntunse—aeseshe ukukuule citetekelo mu basumina banankwe no kubacincimusha pa kubacinkulako ulwa fikabilwa ku kusenamina kwa bulesa. Pa numa ya kufumapo kwakwe mu mfwa, bamunyina ba ku mupashi aba kwa Petro ne nkashi bali na maka ya kukoshe citetekelo cabo pa kwibukisha amashiwi yakwe.—2 Petro 1:12-15.

Icitetekelo mu Cebo ca Kusesema

13. Ni shani fintu Lesa apayenye ubunte bwa kukoshe citetekelo pa lwa kwisa kwa kwa Kristu?

¹³ Lesa umwine apeele ubunte bwa kukoshe citetekelo pa lwa kushininkishiwa kwa kwisa kwa kwa Yesu “na maka yakalamba no bukata.” (Mateo 24:30; 2 Petro 1:16-18) Pa kubulwo bushininkisho, bashimapepo ba cisenshi balandile imilumbe ya bufi pa lwa tulesa twabo, ilintu Petro, Yakobo, na Yohane baali ni bansangwapo ba bumulopwe bwa kwa Yesu mu kwaluka. (Mateo 17:1-5) Balimumwene ukukatamikwa kabili baumfwile iciunda ce shiwi lya kwa Lesa umwine ukwishibisha Yesu ngo Mwana Wakwe uwatemwikwa. Kulya kwishibisha no kumoneka kwabengeshima ukwapeelwe kuli Kristu ilyo kwali kubikwa kwa mucinshi no bukata pali wene. Pa mulandu wa uku kusokolola kwa bulesa, Petro ainike incende, mu kupalishako pa mukunkuluko wa Hermone, “ulupili lwa mushilo.”—Linganyeniko Ukufuma 3:4, 5.

14. Ni shani fintu icitetekelo cesu cilingile ukwambukilwa ku kwaluka kwa kwa Yesu?

¹⁴ Ni shani fintu ukwaluka kwa kwa Yesu kulingile ukwambukila icitetekelo cesu? Petro atile: “Kabili twakwate cebo ca kusesema caikashiwo kucila. Kuti cawama nga mwayangwako; cileaka nge nyali umwafiita, busuke buce Ubushiku, no lutanda lwa lucelo lutule mu mitima yenu.” (2 Petro 1:19) “Icebo ca kusesema” mu kumonekesha casanshishemo te masesemo fye ya mu Malembo ya ciHebere pa lwa kwa Mesia lelo na kabili ukulondolola kwa kwa Yesu ukwa kuti aali no kwisa “na maka yakalamba no bukata.” Ni shani fintu icebo cabele “caikashiwo kucila” ku kwaluka? Cilya ca kucitika cashininkishe icebo ca kusesema pa lwa kwisa kwa bukata ukwa kwa Kristu mu maka ya Bufumu.

15. Cinshi cabimbwamo mu kupeelo kusakamana ku cebo ca kusesema?

¹⁵ Pa kukosha icitetekelo cesu, tufwile ukupeela ukusakamana ku cebo ca kusesema. Ici cisanshamo ukusambilila cilya cebo, ukulanshanya cene pa kulongana kwa Bwina Kristu, no kubomfya ukufunda kwa ciko. (Yakobo 1:22-27) Tufwile ukulenga cene ukube “nyali umwafiita,” ukubuutushe mitima yesu. (Abena Efese 1:18) Ni lyo fye lyeka e lintu cikatutungulula mpaka na lintu “ulutanda lwa lucelo,” nelyo “ulutanda ulubalika ulwa lucelo,” Yesu Kristu, aisokolola mu bukata. (Ukusokolola 22:16) Kulya kusokoloka kukapilibula ubonaushi ku babule citetekelo kabili amapaalo kuli abo abalebeleshe citetekelo.—2 Abena Tesalonika 1:6-10.

16. Mulandu nshi twingakwatila icitetekelo ukuti amalayo ya mu busesemo yonse aya mu Cebo ca kwa Lesa yakafikilishiwa?

¹⁶ Bakasesema ba kwa Lesa tabali fye bantu bacenjela abacitile ukusobela kwa mano, pantu Petro atile: “Ukusesema konse ukwalembwa takwaba ukwa kuiilwila; pantu ku kufwaya kwa buntu takwaletwa kusesema nangu limo, lelo ni pa kobelwa ku [mupashi] wa mushilo e po abantu ba mushilo balandiile.” (2 Petro 1:20, 21) Ku ca kumwenako, Davidi atile: “Umupashi wa kwa Yehova [e wasosele] muli ine.” (2 Samwele 23:1, 2) Kabili Paulo alembele ati: “Amalembo yonse yantu yapuutwamo kuli Lesa.” (2 Timote 3:16) Apo bakasesema ba kwa Lesa bapuutilwemo no mupashi wakwe, kuti twakwate citetekelo ca kuti amasesemo yonse mu Cebo cakwe yakafikilishiwa.

Balikwete Icitetekelo mu Malayo ya kwa Lesa

17. Bulayo nshi bwali e citendekelo ca citetekelo ca kwa Abele?

¹⁷ Amalayo ya kwa Yehova yali citendekelo ca citetekelo kwi ‘kumbi ilyakula’ ilya nte shakwe isha pa ntanshi ya Bwina Kristu. (AbaHebere 11:1–12:1) Ku ca kumwenako, Abele alikwete icitetekelo mu bulayo bwa kwa Lesa pa lwa “lubuto” ulwali no kulasa “insoka” ku mutwe. Kwaliko ubushininkisho bwa kufikilishiwa kwa bupingushi pa bafyashi ba kwa Abele. Ku nse ya Edene, Adamu no lupwa lwakwe baliile ica kulya mu mabe ya pa finso fyabo pantu umushili watiipwa wameseshe imyunga na ficilasa. Mu kupalishako Abele alimwene ukufuluka kwa kwa Efa ku mulume wakwe no kuti Adamu alimutekele. Mu kushininkisha alilandile pa lwa kukoma kwe fumo lyakwe. Kabili ubwingililo kwi bala lya Edene bwacingililwe na bakerubi ne cilimi ca lupanga icalebilima. (Ukutendeka 3:14-19, 24) Ici conse capangile “icilangililo camonekesha” ukwebekesha Abele ukuti ukulubulwa kwali no kwisa ukupitila mu Lubuto lwalaiwe. Ukubomba mu citetekelo, Abele apeele kuli Lesa ilambo ilyashininkishe ukube lya mutengo wacila pa lya kwa Kaini.—AbaHebere 11:1, 4.

18, 19. Ni mu nshila nshi Abrahamu na Sara babeleshe icitetekelo?

¹⁸ Ifikolwe Abrahamu, Isaki, na Yakobo nabo balikwete icitetekelo mu malayo ya kwa Yehova. Abrahamu abeleshe icitetekelo mu bulayo bwa kwa Lesa ubwa kuti indupwa shonse isha pe sonde shali no kuipaalila ishine ukupitila muli wene no kuti ulubuto lwakwe lwali no kupeelwa icalo. (Ukutendeka 12:1-9; 15:18-21) Umwana wakwe umwaume Isaki no mwishikulu wakwe Yakobo bali “impyani shinankwe kuli ico cine icalailwe.” Ku citetekelo “e ko [Abrahamu] aikalile umulebeshi mu calo icalailwe,” kabili alelolelo “Musumba uuli ne ca kukuulapo,” Ubufumu bwa kwa Lesa ubwa mu muulu pe samba lya ubo ali no kubuukila ku bumi pe sonde. (AbaHebere 11:8-10) Bushe walikwata icitetekelo capalako?

¹⁹ Umukashi wa kwa Abrahamu, Sara, aali mupepi ne myaka ya bukulu 90 kabili uwacila nga nshi pa mushinku wa kufyala abana lintu abeleshe icitetekelo mu malayo ya kwa Lesa kabili apeelwe amaka “ya kwimita” no kufyala Isaki. Muli fyo, kuli Abrahamu wa myaka 100, “uwali ngo wafwa” ukukuma ku maka ya kufyala, mu kupelako “kwafyelwe abana nge ntanda sha mu muulu ku bwingi.”—AbaHebere 11:11, 12; Ukutendeka 17:15-17; 18:11; 21:1-7.

20. Nelyo cingatila ifikolwe tafyamwene ukufikilishiwa kwakumanina ukwa malayo ya kwa Lesa kuli bene, cinshi cintu bacitile?

²⁰ Ifikolwe fya busumino fyafwile ukwabulo kumona ukufikilishiwa kwakumanina ukwa malayo ya kwa Lesa kuli bene. Lelo, “bafimwenene [ifintu fyalaiwe] ukutali no kufisekelela, kabili bailumbwile ukuti beni kabili balebeshi pano nse.” Inkulo shalipitilepo pa ntanshi Icalo Calaiwe tacilasanguka icikwatwa ca bufyashi bwa kwa Abrahamu. Ukupulinkana ubumi bwabo bonse, nangu cibe fyo, ifikolwe fitiina Lesa fyabeleshe icitetekelo mu malayo ya kwa Yehova. Pa mulandu wa kuti tabatalile abalufye citetekelo, mu kwangufyanya bakabukila ku bumi mu kuteka kwa pe sonde ukwa “Musumba” uo Lesa abapekanishishe, Ubufumu bwa buMesia. (AbaHebere 11:13-16) Mu nshila yapalako, icitetekelo kuti catusunga aba bucishinka kuli Yehova nelyo fye tatumwene ukufikilishiwa kwa ilyo line ukwa malayo yakwe yonse aya kupapa. Icitetekelo cesu na kabili cikatusesha ukumfwila Lesa, nga fintu fye Abrahamu acitile. Kabili ifyo apishishe icikwatwa ca ku mupashi ku bufyashi bwakwe, e fyo twingaafwa abana besu ukubelesha icitetekelo mu malayo ya kwa Yehova ayaumo mutengo.—AbaHebere 11:17-21.

Icitetekelo Calicindama ku Bena Kristu

21. Pa kuba abapokelelwa kuli Lesa ilelo, cinshi cilingile ukusanshiwa mu kubelesha kwesu icitetekelo?

²¹ Kwaliba, kwena, ifyacilapo ku citetekelo ukucila pa kukwato kucetekela mu kufikilishiwa kwa malayo ya kwa Yehova. Ukupulinkana ilyashi lya kale ilya buntunse, calibe cakabilwa ukubeleshe citetekelo muli Lesa mu mbali shalekanalekana nga tuli no kuipakisha ukusuminisha kwakwe. Paulo alondolwele ukuti “[ukwabula icitetekelo, NW] te kuti kube ukutemuna [Yehova Lesa], pantu uupalamina kuli Lesa ali no kutetekelo kuti e ko ali, no kuti aba kalambula wa bamufwayafwaya.” (AbaHebere 11:6) Pa kupokelelwa kuli Yehova ilelo, umuntu afwile ukubelesha icitetekelo muli Yesu Kristu na mwi lambo lya cilubula ilyo Lesa apayanya ukupitila muli wene. (Abena Roma 5:8; Abena Galatia 2:15, 16) Cili kwati fintu Yesu umwine asosele ati: “Lesa atemenwe aba pano isonde ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya. Uutetekelo Mwana aba no mweo wa muyayaya; uushumfwa Mwana takamone umweo, lelo icipyu ca kwa Lesa caikala pali wene.”—Yohane 3:16, 36.

22. Ubufumu bwa buMesia bukaletako ukufikilishiwa kwa bulayo nshi?

²² Yesu abombo lubali lukalamba mu kufikilishiwa kwa malayo ya kwa Lesa pa lwa Bufumu buntu Abena Kristu bapepela. (Esaya 9:6, 7; Daniele 7:13, 14; Mateo 6:9, 10) Nga fintu Petro alangilile, ukwaluka kwashininkishe icebo ca kusesema pa lwa kwisa kwa kwa Yesu mu maka ya Bufumu no bukata. Ubufumu bwa buMesia bukaleta ukufikilishiwa kwa bulayo na bumbi ubwa kwa Lesa, pantu Petro alembele ati: “Imyulu ipya ne calo cipya e fyo tulolela, umwaikalo bulungami.” (2 Petro 3:13) Ubusesemo bwapalako bwalifikilishiwe lintu bankole ba ciYuda mu Babiloni babweshiwe ku calo ca ku mwabo mu 537 B.C.E. pe samba lya kamfulumende na Serubabele nga kateka na Yoshua nga shimapepo mukalamba. (Esaya 65:17) Lelo Petro asontele ku nshita ya ku ntanshi lintu “imyulu ipya”—Ubufumu bwa ku muulu ubwa buMesia—yali no kuteka pa “calo cipya,” sosaite walungama uwa bantunse uukekala pali ici cibulungwa.—Ilumbo 96:1.

23. Fipusho nshi pa lwa bulumba tukalangulukapo mu kukonkapo?

²³ Nga babomfi ba bucishinka aba kwa Yehova kabili abakonshi ba Mwana wakwe watemwikwa, Yesu Kristu, tulafuluka icalo cipya calaiwa ica kwa Lesa. Twalishibo kuti cili mupepi, kabili twalikwata icitetekelo ukuti amalayo yonse aya kwa Yehova ayaumo mutengo yakafikilishiwa. Pa kwenda abapokelelwa pa ntanshi ya kwa Lesa wesu, tufwile ukukoshe citetekelo cesu pa kulunda kuli cene ubulumba, ukwishiba, ukuilama, ukushipikisha, ukuipeelesha kwa bukapepa, ukutemwa aba bwananyina, no kutemwa.a Pali ino nshita, kuti pambi caipushiwa ukuti, Ni shani twingalangisha ubulumba? Kabili ni shani ukuba kwesu aba bulumba kukatunonsha na bambi, maka maka aba kubishanya nabo besu aba Bwina Kristu, abayankula ku malayo ya kwa Lesa pa kubelesha icitetekelo?

[Futunoti]

Finshi Fili Ifyasuko Fyobe?

◻ Ni shani fintu “icitetekelo” pambi cingalondololwa?

◻ Ukulingana na 2 Petro 1:5-7, mibele nshi ili no kulundwa ku citetekelo cesu?

◻ Kwambukila nshi kuntu ukwaluka kwa kwa Yesu kulingile ukukwata pa citetekelo cesu?

◻ Fya kumwenapo nshi ifya citetekelo fyapeelwe na Abele, Abrahamu, Sara, na bambi aba mu nshita sha mu kubangilila?

[Icikope pe bula 15]

Bushe walishiba ifyo ukwaluka kwa kwa Yesu kwingambukila icitetekelo ca muntu?