Ifyo Baibolo Ilanda pa Kulekana no Kupaatukana mu Cupo

Yehova afwaya abaupana balesunga imilapo ya cupo. Ilyo Yehova aufishe Adamu na Efa, atile: ‘Umwaume . . . akalambatila ku mukashi wakwe, na bo bakaba umubili umo.’ Pa numa ya myaka iingi, Yesu Kristu alibwekeshepo aya mashiwi, atile: “Kanshi, ico Lesa alundenye, umuntu e cilekanya.” (Ukutendeka 2:24; Mateo 19:3-6) E ico, Yehova na Yesu bafwaya ukuti abaupana batwalilile mu cupo mpaka ne mfwa. (1 Abena Korinti 7:39) Apo icupo calicindama sana mu menso ya kwa Lesa, abaupana tabalingile ukulamona ukulekana kwati ka mulandu akanono. Na kuba, Yehova alipata ukulekana apabula umulandu wine wine uwa mu Malembo.—Malaki 2:15, 16.

Mulandu nshi uwa mu Malembo uo Abena Kristu bengalekaninapo? Yehova alikaanya ubucende no bulalelale. (Ukutendeka 39:9; 2 Samwele 11:26, 27; Amalumbo 51:4) Lesa tafwaya nangu panono ubulalelale ica kuti alisuminisha na bantu ukulekaninapo. (Pa kuti mumfwikishe imisango yalekanalekana iya bulalelale, belengeni Icipandwa 9, paragrafu 7, umo balondolola ubulalelale.) Yehova alipeela uo babembukile insambu sha kupwisha icupo nga alefwaya. (Mateo 19:9) E ico, uo babembukile, nga asalapo ukupwisha icupo, ninshi talufyenye kuli Yehova. Na lyo line, icilonganino ca Nte sha kwa Yehova tacikoselesha abantu ukulekana. Na kuba, limo kuti kwaba ifingalenga ukuti uo babembukile apingulepo ukwelela umwina mwakwe, maka maka nga nalapila icine cine. Lelo nga pali umulandu uo Baibolo yasuminisha ukulekaninapo, uo babembukile e ulingile ukupingulapo ifya kucita kabili afwile ukuipekanya kuli fyonse ifikafuma mu fyo apingulapo.—Abena Galatia 6:5.

Mu cupo nga mwaba sana ubwafya, Abena Kristu bamo balapaatukana na bena mwabo, bambi na bo balapwisha ifyupo nangu ca kuti abena mwabo tabacitile ubulalelale. Nga bapaatukana, Baibolo itila uwafuma ku cupo, “eupwa. Lelo nga afilwa ukushipikisha, abwelele ku mulume wakwe.” (1 Abena Korinti 7:11) Umwina Kristu wa musango uyu tafwile ukuupa nelyo ukuupwa. (Mateo 5:32) Lekeni nomba tulande pa milandu iyo bamo bapaatukaninapo.

Ukukanasakamana ulupwa ku mufulo. Nga ca kuti umulume alefilwa ukufwaila ulupwa lwakwe ifya kulya ne fya kufwala ku mufulo fye, ulupwa lwakwe kuti lwalacula. Baibolo itila: “Umuntu nga tasakamana . . . aba mu ng’anda yakwe, ninshi nakaana icitetekelo kabili abipa ukucisha no ushatetekela.” (1 Timote 5:8) Nga ca kuti uyu mulume atwalilila ukukanasakamana ulupwa lwakwe, umukashi kuti amona nga kutila ena na bana bakwe kuti baikala bwino nga ca kuti afuma ku cupo ukulingana na ifunde. Kwena baeluda balingile ukwishiba bwino bwino icilengele ukuti uyu Mwina Kristu alefilwa ukusunga ulupwa lwakwe. Ukukanasakamana ulupwa kuti kwalenga umo atamfiwa mu cilonganino.

Ukupumwa. Uupuma umwina mwakwe kuti alenga ubumi bwa mwina mwakwe bwaba mu busanso kabili kuti asuka amwipaya. Nga ca kuti Mwina Kristu e upuma, baeluda bafwile ukufwailisha bwino bwino umulandu nga cine cine alapuma umwina mwakwe. Uwa cipyu no wa lubuli kuti atamfiwa mu cilonganino.—Abena Galatia 5:19-21.

Ukulesha ukupepa. Limo uushipepa kuti alenga umwina mwakwe alafilwa ukupepa Yehova nelyo kuti alamupatikisha ukupula mu mafunde ya kwa Lesa. Nga caba ifyo, kapepa afwile ukusalapo nampo nga ukupoka icipepala ca kulekaninapo ica mwi funde e nshila fye yeka iya kulanga ukuti ‘alenakila Lesa ukucila ukunakila abantu.’—Imilimo 5:29.

Muli iyi milandu yonse twalandapo, takuli uulingile ukupatikisha uwa kaele ukupaatukana no mwina mwakwe nelyo ukumupatikisha ukuti ekale nankwe. Nangu ca kuti Abena Kristu banabo na baeluda kuti bafunda abaupana ukulakonka ifyo Baibolo ilanda, te kuti beshibe bwino bwino ifishinka fyonse ifilelenga ukuti abaupana balepusana. Ni Yehova fye, e wingeshiba. Kwena umwanakashi Umwina Kristu nga ca kuti alekusha fye ifilubo fya mulume wakwe nelyo nga mwaume Umwina Kristu e ulekusha ifilubo fya mukashi wakwe pa kuti bapaatukane, ninshi tabalecindika Lesa ne cupo. Yehova aleshiba amapange yonse aya bucenjeshi nangu umuntu afise shani ico alecita. Cine cine, “ifintu fyonse fyaba ubwamba kabili fyaba pa mbilibili ku menso ya uyo tukalubululako.” (AbaHebere 4:13) Lelo nga ca kuti ubwafya bwatwalilila, takuli uulingile ukuseka Umwina Kristu nga asalapo ukupaatukana no mwina mwakwe pa numa ya kushipikisha pa nshita ntali. Lelo twilaba ukuti “ifwe bonse umo umo tukalubulula kuli Lesa.”—Abena Roma 14:10-12.