Ifya Kucita nga Kwaba Amafya mu fya Makwebo

Mu lyashi lyalembwa pali 1 Abena Korinti 6:1-8, Paulo alandile pa fyo Abena Kristu banankwe baletwalana ku cilye. Alyumfwile ububi ukuti Abena Kristu bamo mu Korinti ‘balepama ukuya ku cilye pa ntanshi ya bashalungama.’ (Icikomo 1) Paulo alilandile imilandu ine ine iyo Abena Kristu balingile ukupwishisha imilandu yabo mu cilonganino mu nshita ya kutwalana ku filye. Natulande pa milandu imo iyalengele ukuti Lesa ebe Paulo ukufunda Abena Kristu, lyena tulande na pali fimo ifyo nalimo ashalandilepo muli uku kufunda.

Nga twapusana no Mwina Kristu munensu mu fya makwebo, intanshi tufwile ukucita ifyo Yehova atweba, te kucita fye ifyo tulefwaya fwe bene. (Amapinda 14:12) Nga fintu Yesu asosele, cisuma ukupwisha bwangu ubwafya ilyo tabulakula. (Mateo 5:23-26) Ku ca bulanda, Abena Kristu bamo balakansana sana ica kuti batwalana na ku cilye. Paulo atile: “Mwaliluba nga nshi pantu mulatwalana ku filye.” Mulandu nshi asosele ifi? Umulandu uukalamba wa kutila, ukutwalana ku filye kuti kwaseebanya icilonganino ne shina ilisuma ilya kwa Lesa uo tupepa. Kanshi tufwile ukulaibukisha icipusho Paulo aipwishe ica kuti: “Cinshi ico mushisalilapo ukufyengwa?”—Icikomo 7.

Paulo alandile no kuti Lesa alipekanya inshila iisuma iya kupwishishamo amafya ayengi mu cilonganino. Baeluda Bena Kristu aba mano pantu balishiba icine ca mu Malembo, e co Paulo alandile ukutila, kuti ‘bapingula pa kati ka ba bwananyina’ mu milandu ya “fya buno bwikashi.” (Ifikomo 3-5) Yesu afundile ukuti, abapusene kuti bakonka inshila shitatu pa kupwisha imilandu iikalamba pamo ngo mulandu wa lwambo no wa bucenjeshi: iya kubalilapo, abapusene bafwile ukulanshanya beka fye pa kuti bawikishanye; iya bubili, kuti baitako inte imo nelyo shibili nga ca kuti bafilwa ukuwikishanya; iyi nshila ya bubili nga taibombele ninshi ica butatu ico bafwile ukucita, kutwala umulandu kuli baeluda abemininako icilonganino.—Mateo 18:15-17.

Lelo kwena baeluda te baloya nelyo bashimakwebo kabili te mulimo wabo uwa kupanda abantu amano mu fya musango uyu. Tabapangila aba bwananyina abapusene amafunde aya kukonka pa kupwisha amafya ya fya makwebo. Lelo bafwaya ukubalanga ifya kukonka ifyo Amalembo yalanda pa kuti balanshanye bwino ukwabula ukupusana. Mu milandu iikalamba, kuti baipushako kangalila wa muputule nelyo aba ku maofeshi ya Nte sha kwa Yehova. Lelo kwaliba imilandu imo iyo Paulo ashalandilepo mu kufunda kwakwe. Milandu nshi iyi?

Imilandu imo imo, ifwaikwa fye ukukonka ifyo ifunde lisosa pa kuti ifintu fibe bwino. Ku ca kumwenako, pa kupwisha imilandu imo kano fye mwaya ku cilye, pamo nga ukupwisha icupo, ukupoka insambu sha kusunga umwana icupo nga capwa, ukwishiba uulingile ukulalipila umunankwe icupo nga capwa, ukupoka indalama sha inshuwalansi, ukufwaya ukuba pa bakapokako indalama kampani nga yawa, e lyo na pa kushininkisha ukuti ifili pa cipepala ico uwafwa alembele fya cine. Kulaba ne nshita ilyo munyinefwe engamona ukuti pa kuti acingililwe ku fintu fimo kuti cawama na o atwala umulandu ku cilye.a

Umwina Kristu nga aya ku cilye pa kupwisha umulandu ukulingana ne funde, ninshi tapulile mu fyo Paulo alelandapo.b Na lyo line, ico afwile ukubikako sana amano kufwaya umutende no kumfwana fitwalilile mu cilonganino no kukanalenga ishina lya kwa Yehova lyapontelwa. Ico abasambi ba kwa Kristu beshibikilwako sana, kutemwa, kabili “mu kutemwa . . . tamwaba ukucita ifya kuisekesha.”—1 Abena Korinti 13:4, 5; Yohane 13:34, 35.