Bupe Nshi Ubwacindama pa fya Bupe Fyonse?

“Ica bupe conse icisuma no bupe bonse ubwapwililika fifuma ku muulu, pantu Lesa e mwine wa fya mu muulu ifisanika ulubuuto.” (Yakobo 1:17) Ili ilembo lilanda pali Shifwe wa mu muulu, Yehova Lesa, ukutila ni kapekape. Na lyo line, pa fya bupe fyonse ifyo Lesa apeela abantunse, paliba ubupe bumo ubwacila pali fyonse. Bupe nshi ubu bwine? Yesu alilandile pali ubu ubupe pali Yohane 3:16 ilyo atile, “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.”

Ubupe ubwacindama nga nshi ubo Lesa atupeela, Mwana wakwe uo atemwisha, pantu ubu ubupe bukalenga tukalubuke ku lubembu, ku kukota, e lyo na ku mfwa. (Amalumbo 51:5; Yohane 8:34) Nangu twingesha na maka shani te kuti tuilubule fwe bene kuli ifi fintu. Nomba apo Lesa alitutemwa sana, alitupeela ubupe ubwingatulubula. Apo Yehova Lesa alipeela Umwana wakwe uo atemwa sana Yesu Kristu ukuba icilubula, abantu abacumfwila bakesaikala umuyayaya. Nomba bushe icilubula e cinshi? Cinshi cacindamina? Kabili kuti twanonkelamo shani mu cilubula?

Icilubula cintu balipila pa kupoka icalubile nelyo icifuta mulandu ico mwingalipila pa kuti mulubule umuntu. Baibolo ilondolola ukuti Lesa abumbile abafyashi besu aba kubalilapo, Adamu na Efa abapwililika, kabili bena na bana abo bali no kukwata bali no kulaikala umuyayaya mu paradaise. (Ukutendeka 1:26-28) Ku ca bulanda, balikeene ukumfwila Lesa kabili ici calengele betwalilila ukuba abapwililika. Nomba cinshi cacitike ifi bafililwe ukuba ne cumfwila? Baibolo itila: “Ulubembu lwaingilile mu muntu umo pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.” (Abena Roma 5:12) Apo nomba bali babembu, abana balekwata nabo balefyalwa no lubembu, kabili ici calengele balefwa.

Icilingile ukupeelwa nga icilubula cifwile ukulingana ne cintu icalubile. Ilyo Adamu akeene ukumfwila Lesa ku mufulo, alibembwike kabili ici calengele etwalilila ukuba uwapwililika. Baibolo ilanda ukuti ifyo Adamu acitile fyalengele abana bakwe bonse baba abasha ba lubembu ne mfwa. Kanshi pa kulubula abantu, ubumi bwa kwa Yesu, uwali uwapwililika, e bwalingile ukulipilwa. (Abena Roma 5:19; Abena Efese 1:7) Kanshi icalenga fwe bantunse tube ne subilo lya kwikala umuyayaya mu paradaise pe sonde nga fintu cali no kuba nga ca kuti Adamu na Efa tababembwike, ni co Lesa alilipiile icilubula.—Ukusokolola 21:3-5.

Nga twamona ifyo icilubula ico Lesa atupeela cibomba, tatutwishika ukuti e bupe ubwacindama sana pa fya bupe fyonse. Pa kuti twishibe ifyo icilubula cacindama, lekeni tulande pa fyo citwafwa, ifilenga twaishiba ukuti ca cine caba nga ica bupe ico twalandilepo mu cipande cafumineko ico umuntu engatemwa sana ukupokelela.

Cilalenga twakwata ifyo tufwaya. Tapaba uufwaya ukufwa. (Lukala Milandu 3:11) Nangu ca kuti tapali ifyo twingacita pa kuti twilafwa, icilubula cena kuti calenga twaikala umuyayaya. Baibolo itila: “Pantu icilambu ca lubembu ni mfwa, lelo ubupe bwa kwa Lesa mweo wa muyayaya muli Kristu Yesu Shikulwifwe.”—Abena Roma 6:23.

Cilalenga twakwata ifyo tukabila. Takuli umuntu nangu umo uwingapeela icilubula. Baibolo itila: “Umutengo wa kulubwilako umweo wabo ukalamba icine cine ica kuti washala fye ukwabula ukulipilwa umuyayaya.” (Amalumbo 49:8) Kanshi twalekabila sana ukuti Lesa atwafwe pa kuti tulubuke ku lubembu ne mfwa. Lelo Lesa “mu cilubula ca kwa Kristu Yesu,” alitupeele ifyo twalekabila.—Abena Roma 3:23, 24.

Capeelwe pa nshita iyalinga. Baibolo itweba ukuti: “Ilyo twali tucili ababembu, Kristu alitufwilile.” (Abena Roma 5:8) Lesa alilanga ukuti alitutemwa sana nangu ca kuti tuli babembu pantu atupeele icilubula “ilyo twali tucili ababembu.” Na kabili, nangu ca kuti tucili tulashipikisha amafya tukwata pa mulandu wa lubembu, icilubula cilalenga tulefwaisha ukumona uko amalayo ya kwa Lesa yakafikilishiwa.

Capeelwe pa mulandu wa kutemwa. Baibolo ilatweba icalengele ukuti Lesa apeele Umwana wakwe icilubula. Itila: “Kuli ici e ko ukutemwa kwa kwa Lesa kwamonekele muli ifwe, pantu Lesa atumine Umwana wakwe uwafyalwa eka ukwisa muli ici calo ukuti tukwatile umweo muli ena. Uku e kutemwa, te mu kuti ni fwe twatemenwe Lesa, lelo ni mu kuti ena e watutemenwe.”—1 Yohane 4:9, 10.

Finshi mulingile ukucita pa kulanga ukuti mulatasha pali ubu bupe ubwacila ifya bupe fyonse? Nga muleibukisha, Yesu alandile pali Yohane 3:16 ukuti bantu fye ‘abamutetekela’ e bakapusuka. Baibolo ilanda ukuti icitetekelo “kulolela kwashininkishiwa ukwa kuti ifintu tulesubila fikacitika.” (AbaHebere 11:1) Pa kuti mushininkishe ifintu fimo, mulingile ukukwata ifishinka. Kanshi tulemukoselesha ukuti mulesambilila pali Yehova Lesa, uupeela “ubupe bonse ubwapwililika,” ne fyo mulingile ukucita pa kuti mukabe no mweo wa muyayaya uo tukakwata pa mulandu ne cilubula ca kwa Yesu.

Kuti mwasambilila ifi fyonse ifi nga mulebelenga impapulo shilanda pa fyo Baibolo isambilisha ishaba pa www.jw.org/bem. Inte sha kwa Yehova nabo kuti batemwa ukulamusambilisha. Tatuletwishika ukuti na imwe nga mwasambilila ifyo mwinganonkela mu cilubula, mukalanda ukuti: “Ndetootela Lesa pantu akampususha muli Yesu Kristu Shikulwifwe!”—Abena Roma 7:25.