Bushe Ulubembu ni Cinshi?

Ulubembu kucita ifili fyonse, ukumfwa, nelyo ukutontonkanya ifyapusana ne fyo amafunde ya kwa Lesa yalanda. Mu kucita ulubembu mwaliba no kucita icabipa nelyo icishalungama mu menso ya kwa Lesa. (1 Yohane 3:4; 5:17) Baibolo ilanda ukuti ukukanacita icalungama ico twishibe nako lubembu.—Yakobo 4:17.

Mu ndimi balembeelemo Baibolo, ishiwi bapilibula ukuti ulubembu lyalola mu kuti “ukupusa.” Ku ca kumwenako, abashilika abena Israele balishibe sana ukusukusa amabwe “no kupusa iyo,” nelyo ukwabula ukupusa. Aya mashiwi nga bayapilibwile ukukonka fye ishiwi limo na limo, nga bapilibwile ukuti “no kubembuka iyo.” (Abapingushi 20:16) Kanshi ukubembuka kupusa nelyo ukukanakonka amafunde ya kwa Lesa ayalungama.

Apo Lesa e Kabumba wa fintu fyonse, alikwata insambu sha kupangila abantunse amafunde. (Ukusokolola 4:11) Bonse tukalubulula kuli ena pa fyo tucita.—Abena Roma 14:12.

Bushe Kwaliba Umuntu Uushakwata Ulubembu?

Awe. Baibolo itila “bonse babembu kabili balifilwa ukufika pa bukata bwa kwa Lesa.” (Abena Roma 3:23; 1 Ishamfumu 8:46; Lukala Milandu 7:20; 1 Yohane 1:8) Mulandu nshi abantu bonse babela ababembu?

Pa kubala abantunse bakubalilapo Adamu na Efa tabakwete ulubembu, pantu babumbilwe abapwililika, kabili babumbilwe mu cipasho ca kwa Lesa. (Ukutendeka 1:27) Na lyo line, ilyo bakeene ukumfwila Lesa, balilekele ukuba abapwililika. (Ukutendeka 3:5, 6, 17-19) Ilyo bakwete abana, balibambukishe ulubembu kabili abana bapyene ukukanapwililika nga filya fine umwana afyalwa no bulwele ubo abafyashi bakwe balwala. (Abena Roma 5:12) Imfumu Davidi iya bena Israele yalandile ukuti, “mu lubembu e mo nafyalilwe.”—Amalumbo 51:5.

Bushe kwaliba imembu ishabipisha ukucila ishibiye?

Ee. Ku ca kumwenako, Baibolo itila abaleikala mu musumba wa Sodomu uwaliko kale ‘bali ababi kabili balebembuka imembu shabipisha.’ (Ukutendeka 13:13; 18:20) Lekeni tulande pa fintu fitatu ifya kwishibilako nga ca kuti ulubembu nalubipa sana.

1. Ubukulu bwa lubembu. Baibolo ilatusoka ukuti tufwile ukutaluka ku membu ishikalamba pamo nga ubulalelale, ukupepa utulubi, ukwiba, bucakolwa, ubucenjeshi, ukwipaya, no kupupa imipashi. (1 Abena Korinti 6:9-11; Ukusokolola 21:8) Baibolo yalilekanya ishi membu ku membu isho umuntu acita ukwabula ukutontonkanya kabili ukwabula ukwishiba, pamo nga ukulanda nelyo ukucita fimo ifingakalifya bambi. (Amapinda 12:18; Abena Efese 4:31, 32) Na lyo line, Baibolo itukoselesha ukukanacita imembu nangu shinono, pantu ukucita imembu ishinono kuti kwalenga twacite icintu icabipisha nga nshi, e kuti ukutoba amafunde ya kwa Lesa.—Mateo 5:27, 28.

2. Icilengele umuntu acite ulubembu. Abantu bamo bacite imembu pa mulandu wa kuti tabaishiba ifyo Lesa afwaya. (Imilimo 17:30; 1 Timote 1:13) Nangu ca kuti abacita imembu mu kukanaishiba te bakaele, Baibolo ilabalekanya na bacita imembu pa mulandu wa kutoba amafunde ya kwa Lesa ku mufulo fye. (Impendwa 15:30, 31) Icilenga umuntu ukucita ulubembu ku mufulo “kutalama kwa mutima wakwe.”—Yeremia 16:12.

3. Imiku umuntu acita ulubembu. Ifyo Baibolo ilanda filanga ukuti paliba ubupusano pa muntu uwacita fye ulubembu pa muku umo no ucita ulubembu pa nshita ntali. (1 Yohane 3:4-8) Bonse abacita “ulubembu ku mufulo fye,” na pa numa ya kusambilila ukucita icalungama, Lesa akabakanda.—AbaHebere 10:26, 27.

Abasumina ukuti balicita ulubembu ulukalamba balomfwa sana ububi pantu baleshiba ukuti balilufyenye. Ku ca kumwenako, Imfumu Davidi yalembele ukuti: “Imembu shandi shapita pa muulu wa mutwe wandi; Shamfinina nge cisendo cafina.” (Amalumbo 38:4) Nomba Baibolo yalilaya ukuti: “Lekeni umubifi aleke inshila shakwe, no mubi aleke ukutontonkanya kwakwe; kabili lekeni abwelele kuli Yehova, uukamubelela uluse, kabili abwelele kuli Lesa wesu, pantu akamwelela nga nshi.”—Esaya 55:7.