Jeremaea

36 Nao long namba 4 yia blong Jehoeakim+ boe blong Josaea, king blong Juda, tok ya blong Jehova i kamtru long Jeremaea se: 2 “Yu tekem wan skrol* mo yu raetemdaon olgeta tok we mi bin talem long yu agensem Isrel mo Juda+ mo olgeta nesen,+ stat long fas dei we mi toktok long yu long ol dei blong Josaea kam kasem tede.+ 3 Maet taem olgeta long haos blong Juda oli harem olgeta trabol ya we mi plan blong tekem i kam long olgeta, oli save tanem baksaed long ol rabis fasin blong olgeta, blong mi save fogivim ol mastik mo ol sin blong olgeta.”+

4 Nao Jeremaea i singaotem Baruk+ boe blong Neria i kam, mo Jeremaea i talem olgeta tok ya we Jehova i bin talem long hem, mo Baruk i raetem olgeta long skrol* ya.+ 5 Biaen Jeremaea i talem long Baruk se: “Naoia oli blokem mi finis mo mi no save go insaed long haos blong Jehova. 6 Taswe yu nao yu mas go insaed mo yu ridim long bigfala voes, ol tok ya blong Jehova long skrol, we mi stap talem nao yu raetemdaon. Yu ridimaot long wan dei blong fasting, blong olgeta long haos blong Jehova oli harem. Long rod ya, bambae yu ridim long olgeta man Juda we oli aot long ol taon blong olgeta oli kam. 7 Maet Jehova bambae i harem olgeta taem oli askem blong hem i kaen long olgeta, mo olgeta wanwan bambae oli tanem baksaed long ol rabis fasin blong olgeta, from we kros mo bigfala kros we Jehova i talem blong i kasem ol man ya, i bigwan we i bigwan.”

8 Ale Baruk boe blong Neria i mekem olgeta samting we profet ya Jeremaea i bin talem long hem. Yes, long haos blong Jehova, hem i ridim long bigfala voes, ol tok blong Jehova we i stap long skrol.*+

9 Nao long namba 5 yia blong Jehoeakim+ boe blong Josaea, king blong Juda, long namba 9 manis blong hem, olgeta man long Jerusalem mo olgeta man we oli aot long ol taon blong Juda oli kam long Jerusalem, oli mekem fasting long fes blong Jehova.+ 10 Ale Baruk i ridim long bigfala voes, ol tok blong Jeremaea we i stap long skrol,* long haos blong Jehova, insaed long rum* blong Gemaria+ boe blong Safan+ we i man blong mekem kopi blong ol buk,* long yad antap, long rod we i go insaed long niufala get blong haos blong Jehova,+ mo olgeta man ya oli stap lesin long hem.

11 Taem Mikaea boe blong Gemaria we i boe blong Safan i harem ol tok ya blong Jehova we i stap long skrol,* 12 hem i godaon long haos* blong king, i go long rum blong sekretari. Olgeta prins* oli stap sidaon long ples ya: I gat Elisama+ we i sekretari, Delaea boe blong Semaea, Elnatan+ boe blong Akboro,+ Gemaria boe blong Safan, Jedekia boe blong Hanania, mo olgeta narafala prins. 13 Mikaea i talem long olgeta, evri tok we hem i bin harem taem Baruk i ridimaot long skrol,* long ol man we oli stap lesin.

14 Biaen olgeta prins ya oli sanem Jehudi boe blong Netania we i boe blong Selemia boe blong Kusi, i go talem long Baruk se: “Yu kam wetem skrol ya we yu stap ridim long ol man we oli stap lesin long yu.” Baruk boe blong Neria i tekem skrol ya long han blong hem mo i go luk olgeta. 15 Oli talem long hem se: “Yu sidaon, plis, mo yu ridim tok ya long mifala long bigfala voes.” Ale Baruk i ridim tok ya long olgeta.

16 Nao stret afta we oli harem olgeta tok ya, oli lukluk olgeta, we oli fraet tumas, nao oli talem long Baruk se: “Tru, mifala i mas talemaot olgeta tok ya long king.” 17 Mo oli askem long Baruk se: “Plis yu talem long mifala olsem wanem yu raetem ol tok ya. ?Hem nao i talem, nao yu raetem?” 18 Baruk i ansa long olgeta se: “Hem nao i talem olgeta tok ya long mi, mo mi yusum ink blong raetemdaon olgeta long skrol* ya.” 19 Ol prins ya oli talem long Baruk se: “Yutufala i go mo yutufala i haed, yu mo Jeremaea, mo yutufala i no mas letem eni man i save weples yutufala i stap long hem.”+

20 Nao oli go luk king long yad, mo oli putum skrol ya insaed long rum blong Elisama we i sekretari, mo oli talem evri samting we oli bin harem.

21 Ale king i sanem Jehudi+ blong i go tekem skrol ya, mo hem i go long rum blong Elisama we i sekretari, i karem i kam. Jehudi i stat blong ridim ol tok ya long king mo olgeta prins we oli stap stanap klosap long king, we oli stap lesin. 22 King i stap sidaon insaed long haos ya we i blong koltaem, mo long fored blong hem, wan faea i stap laet insaed long wan aean dis. Hemia long namba 9 manis.* 23 Afta we Jehudi i ridim tri no fo kolom, king i yusum naef blong sekretari i katemaot haf ya, mo i sakem i go long faea we i stap laet insaed long aean dis. Hem i mekem olsem gogo ful skrol ya i go insaed long faea we i stap long aean dis. 24 Mo oli no fraet nating. King mo olgeta man blong wok blong hem we oli harem ol tok ya, oli no terem ol klos blong olgeta from. 25 Nating se Elnatan,+ Delaea,+ Gemaria+ oli plis long king blong i no bonem skrol ya, be hem i no lesin long olgeta. 26 Mo tu, king i givim oda long Jeramehel boe blong king, Seraea boe blong Asriel, mo Selemia boe blong Abdehel blong oli holem Baruk we i sekretari mo profet ya Jeremaea, be Jehova i haedem gud tufala.+

27 Mo afta we king i bonem skrol ya we i gat ol tok we Baruk i raetemdaon taem Jeremaea i stap talem, tok blong Jehova i kamtru long Jeremaea bakegen+ se: 28 “Yu tekem wan narafala skrol mo yu raetemdaon long skrol ya ol semfala tok ya we oli bin stap long faswan skrol, we King Jehoeakim blong Juda i bonem.+ 29 Mo yu mas tok agensem King Jehoeakim blong Juda se: ‘Hemia samting we Jehova i talem, i se: “Yu yu bin bonem skrol ya mo yu se: ‘?From wanem yu raet long hem se: “King blong Babilon bambae i mas kam mo i distroem kantri ya mo i mekem i stap emti nomo we i no gat ol man mo ol animol long hem”?’+ 30 Taswe, hemia samting we Jehova i talem agensem King Jehoeakim blong Juda se: ‘Bambae i no gat wan man blong hem i sidaon long tron* blong Deved,+ mo dedbodi blong hem bambae oli lego i stap nomo long bigsan long dei mo long kolkol long naet.+ 31 Bambae mi singaot hem mo ol laen* blong hem mo ol man blong wok blong hem blong oli talemaot ol mastik blong olgeta, mo bambae mi tekem olgeta trabol we mi bin talem agensem ol man we oli laef long Jerusalem mo ol man Juda, i kam kasem olgeta,+ from oli no lesin long mi.’”’”+

32 Biaen Jeremaea i tekem wan narafala skrol mo i givim long Baruk boe blong Neria we i sekretari.+ Mo taem Jeremaea i stap talem ol tok ya, Baruk i raetemdaon long skrol ya, olgeta tok blong skrol* ya we King Jehoeakim blong Juda i bin bonem long faea.+ Mo i ademap plante moa tok olsem long hem.