?Olsem wanem Jehova bambae i leftemap nem blong hem long fiuja? Hemia tru long ol jajmen blong hem. I no longtaem bambae hem i spolem Bigfala Babilon we i stap sakem doti long tabu nem blong hem. (Rev. 17:​5, 16; 19:​1, 2) Sam man we oli luk Bigfala Babilon i lus, maet bambae oli joenem yumi long tru wosip. Mo long Amagedon, Jehova bambae i distroem rabis wol ya blong Setan wetem olgeta ya tu we oli stap agensem hem, mo oli tok nogud long nem blong hem. Be bambae hem i sevem olgeta we oli lavem hem, oli obei long hem, mo oli glad blong presem hem. (Mak 8:38; 2 Tes. 1:​6-10) Mo long laswan traem we bambae i hapen afta long Wan Taosen Yia Rul Blong Kraes, Jehova bambae i pruvum se i stret we ol man oli wosipim hem nomo. (Rev. 20:​7-10) Long taem ya, “wol bambae i fulap long save long saed blong glori blong Jehova olsem we wota i kavremap gud solwota.” (Hab. 2:14) !Bambae yumi glad tumas taem yumi evriwan we i laef i givim glori long Jehova from nem blong hem! w25.01 7 ¶15-16

?Wanem i save halpem ol Hibru Kristin blong oli stanap strong long ol trabol we oli fesem? Aposol Pol i save se oli nidim blong gat stret tingting long ol trabol we oli fesem. Hem i eksplenem se taem wan samting i traem bilif blong wan Kristin, hemia i olsem wan trening. Mo ol trabol olsem, oli halpem ol Kristin blong wokem o kam gud moa long sam impoten Kristin fasin. Sipos ol Kristin oli tingbaot se ol trabol ya oli save mekem i gud long olgeta, bambae i moa isi blong oli stanap strong. (Hib. 12:11) Pol i talem long ol Hibru Kristin se oli mas gat strong tingting blong stanap strong. I stret nomo we hem nao i givim advaes ya, from we bifo hem tu i stap agensem ol Kristin, mo hem i save gud olsem wanem ol trabol ya oli spolem ol Kristin. Mo tu, hem i save gud olsem wanem blong stanap strong, from we hem tu i fesem strong fasin agens afta we hem i kam wan Kristin.—2 Kor. 11:​23-25. w24.09 12 ¶16-17

Taem ol dei oli stap pas, wok blong prij i kam moa impoten. ?From wanem? From we i no gat plante taem i stap. Tingbaot tok we Jisas i talem long Mak 13:​10, long saed blong wok blong prij long ol las dei ya. Folem buk blong Matiu, Jisas i talem se ol man bambae oli talemaot gud nius long olgeta ples long wol bifo we “en” i kam. (Mat. 24:14) Tok ya en, i minim en blong rabis wol ya blong Setan. Jehova i makemaot wan stret “dei mo aoa” finis blong samting ya, mo i no longtaem bambae i kamtru. (Mat. 24:36; Wok 1:7) Evri dei yumi stap kam klosap moa long taem ya. (Rom 13:11) Be yumi mas gohed blong prij gogo kasem we en i kam. I gat wan impoten kwestin we yumi evriwan i wantem tingbaot. Hemia se: ?From wanem yumi talemaot gud nius? Ansa i isi nomo. Hemia se lav nao i pulum yumi blong prij. Taem yumi prij, yumi soemaot se yumi laekem gud nius, yumi lavem ol man, mo antap moa yumi lavem Jehova mo nem blong hem. w24.05 14-15 ¶2-3