Seken leta i go long Tesalonaeka

1 Mi Pol, mi stap wetem Silvanas* mo Timoti,+ mo mi raetem leta ya i go long kongregesen blong Tesalonaeka we i joen long Papa blong yumi God, wetem Masta Jisas Kraes:

2 Mifala i prea se Papa blong yumi God, wetem Masta Jisas Kraes, bambae tufala i kaen long yufala mo tufala i givim pis long yufala.

3 Ol brata, mifala i mas talem tangkiu oltaem long God from yufala. I stret nomo we mifala i mekem olsem from we bilif blong yufala i stap kam strong moa oltaem, mo fasin blong yufala evriwan blong lavlavem yufala, i stap kam bigwan moa.+ 4 From samting ya, mifala i stap presem yufala+ long ol narafala kongregesen blong God, from we yufala i stap stanap strong mo yufala i bilif, nating se ol man oli ronem mo kilim yufala mo yufala i stap kasem* plante trabol.*+ 5 Fasin ya i pruvum se fasin blong God blong jajem man i stret nomo, nao long rod ya, hem i luk se yufala i stret blong kasem Kingdom blong God. Kingdom ya nao we yufala i stap safa from.+

6 Jajmen ya blong God i stret from we hem i givimbak trabol long olgeta we oli stap mekem trabol long yufala.+ 7 Be God bambae i givhan long yufala ya we i stap kasem trabol mo i givhan long mifala tu. Hem bambae i mekem olsem taem Masta Jisas we i stap long heven, i kam long klia ples+ wetem ol strong enjel blong hem+ 8 long bigfala faea blong panisim olgeta we oli no save God, mo olgeta we oli no obei long gud nius we i tokbaot Masta blong yumi Jisas.+ 9 Masta blong yumi bambae i jajem olgeta ya. Panis blong olgeta hemia se bambae oli mas finis blong olwe, blong hem i no moa luk olgeta,+ mo bambae hem i no yusum glori blong hem blong givhan long olgeta. 10 Samting ya bambae i hapen taem Masta i kam, blong hem wetem ol tabu man blong hem, oli kasem ona. Long taem ya, evriwan we oli soemaot bilif, bambae oli sapraes blong luk samting ya, mo yufala tu bambae i sapraes from we yufala i bilif long tok blong mifala.

11 From samting ya nao mifala i stap prea from yufala oltaem, blong God blong yumi i luk se yufala i stret blong kasem laef ya we hem i singaot yufala blong kasem.+ Mifala i prea tu blong hem i yusum paoa blong hem blong mekem evri gudfala samting we hem i glad blong mekem, mo blong i finisim gud ol samting we yufala i stap mekem from bilif blong yufala. 12 Hemia i blong mekem se wok we yufala i mekem i leftemap nem blong Masta blong yumi Jisas, mo blong yufala tu i save kasem haenem wetem hem. Hemia bambae i soemaot se God mo Masta Jisas Kraes tufala i kaen tumas.