Eksodas

28 “Bambae yu singaotem brata blong yu Eron+ wetem ol boe blong hem,+ hemia Nadab, Abihu,+ Eleasara, mo Itamara,+ mo yu tekemaot olgeta long ol laen blong Isrel, blong oli wok olsem ol pris blong mi.+ 2 Bambae yu wokem ol tabu klos blong brata blong yu Eron, blong flasem hem mo blong ol man oli ona long hem.+ 3 Bambae yu toktok wetem olgeta man we oli gat gudhan blong wokem samting, hemia olgeta ya we mi givim waes long olgeta,+ nao bambae oli wokem ol klos blong Eron blong mekem hem i tabu, nao bambae hem i wok olsem pris blong mi.

4 “Hemia ol klos we bambae oli wokem: Wan spesel paos we i blong hangem long jes,+ wan efod,+ wan kot we i no gat han blong hem,+ wan longfala klos we i gat ol smosmol skwea long hem, wan kaliko blong fasem long hed,+ mo wan strap we oli wokem long kaliko.+ Bambae oli wokem ol tabu klos ya blong brata blong yu Eron mo ol boe blong hem, nao bambae hem i wok olsem pris blong mi. 5 Ol man ya we oli gat gudhan blong wokem samting, bambae oli yusum gol, blu tred, pepol wul, tred we i laet red, mo gudfala tred ya linen.

6 “Blong wokem efod, bambae oli mas wivim blu tred, pepol wul, tred we i laet red, mo gudfala tred ya linen we oli wivim tugeta. Mo bambae oli flasem wetem tred we oli wokem long gol.+ 7 Efod ya i gat tu pis, wan i blong hang long fored mo narawan i blong hang long baksaed, be i joen long solda. 8 Strap we oli wokem long kaliko+ mo we i joen long efod ya blong fasemtaet efod ya, oli mas wivim long sem samting olsem efod, hemia tred we oli wokem long gol, blu tred, pepol wul, tred we i laet red, mo gudfala tred ya linen we oli wivim tugeta.

9 “Bambae yu tekem tu ston ya onikis+ mo yu katem nem blong ol boe blong Isrel long hem,+ 10 stat long fasbon go kasem lasbon, sikis nem long wan ston mo sikis nem long narafala ston. 11 Wan man we i gat gudhan blong katem samting long ston, bambae i katem nem blong ol boe blong Isrel long tufala ston ya, olsem we hem i katem nem long wan stamp.+ Mo biaen yu talem long olgeta blong oli putum gol i goraon long ol ston ya blong holemtaet olgeta. 12 Bambae yu putum tufala ston ya long joen blong efod long solda, mo bambae tufala i olsem wan saen blong tingbaot ol boe blong Isrel.+ Mo long fes blong Jehova, Eron i mas karem nem blong olgeta long tufala solda blong hem, olsem wan memori. 13 Yu mas mekem ples blong tufala long gol, 14 mo yu wokem tu jen long gol we i klin gud, yu tantanem tufala olsem wan rop,+ mo yu mas joenem jen ya i go long gol we i goraon long tufala ston ya.+

15 “Bambae yu wokem wan spesel paos blong jajmen,+ we i blong hangem long jes. Bambae yu wokem long tred we oli wokem long gol, blu tred, pepol wul, tred we i laet red, mo gudfala tred ya linen we oli wivim tugeta, olsem we yu wokem efod.+ 16 Spesel paos ya taem yu benem, hem i mas skwea mo longfala blong hem, saes blong hem i wan open han* mo bigfala blong hem, saes blong hem i wan open han. 17 Yu mas putum ol ston antap long hem long fo laen. Long faswan laen i gat ston ya rubi, topas, mo emeral. 18 Long seken laen i gat takwoes, safaea, mo jaspa. 19 Long namba 3 laen i gat ston ya lesem,* agat, mo ametis. 20 Long namba 4 laen i gat krisolaet, onikis, mo jed. Yu mas mekem ples blong ol ston ya long gol, blong holemtaet olgeta. 21 Ol ston ya oli folem nem blong ol 12 boe blong Isrel. Oli mas katem nem long olgeta wanwan olsem we oli katem nem long wan stamp. Ol nem ya wanwan oli representem ol 12 traeb blong Isrel.

22 “Bambae yu yusum gol we i klin gud blong wokem ol jen we oli tantanem olsem rop long spesel paos ya.+ 23 Bambae yu wokem tu ring long gol blong spesel paos ya, mo yu fasem tufala ring ya long tufala en blong spesel paos ya. 24 Bambae yu pusum tufala rop ya we yu wokem long gol, i gotru long tufala ring long ol en blong spesel paos ya. 25 Mo bambae yu pusum en blong tufala rop ya i gotru long tufala ples blong holem ston mo yu mas fasem tufala antap long solda, blong spesel paos ya i save hang long fran blong efod ya. 26 Mo bambae yu wokem tu ring long gol, mo yu putum tufala long en blong spesel paos, long baksaed blong hem we i fesem efod.+ 27 Yu mas wokem tu ring bakegen long gol mo yu putum long fored blong efod. Tufala ring ya i mas stap aninit long ples we efod ya i joen long hem antap, be i no mas bitim strap blong efod we oli wivim long kaliko. Tufala i mas stap klosap long strap ya.+ 28 Bambae yu fasemtaet spesel paos ya long blu rop. Blong mekem olsem, yu pusum blu rop ya i go long ol ring blong spesel paos ya, mo yu fasem long ol ring we i stap long efod. Hemia bambae i mekem se spesel paos ya i stap strong long efod ya, antap long strap blong efod we oli wivim.

29 “Eron i mas karem nem blong ol boe blong Isrel long spesel paos blong jajmen we i hang long jes* blong hem, taem hem i kam insaed long Rum We i Tabu. Spesel paos ya bambae i olsem wan memori long fes blong Jehova. 30 Bambae yu putum Yurim mo Tumim*+ insaed long spesel paos ya blong jajmen, mo bambae oli mas hang long jes blong Eron, taem hem i kam long fes blong Jehova. Mo oltaem Eron i mas hangem tufala samting ya long jes blong hem long fes blong Jehova, taem hem i jajem ol laen blong Isrel.

31 “Bambae yu yusum blu tred blong wokem wan kot we i no gat han blong hem, blong hae pris i werem aninit long efod.+ 32 Mo medel blong nek blong klos ya bambae i open i kamdaon. Oli mas wivim wan samting i goraon long ples ya we i open, blong kaliko ya i no brok. Ples ya we i open i mas olsem hemia blong aean klos. 33 Yu mas wokem ol frut blong grenadin long blu tred, pepol wul, mo tred we i laet red, mo yu hangem i goraon long en blong kot ya. Mo yu mas wokem ol bel long gol mo yu hangem bitwin long ol grenadin ya. 34 Yu mas hangem wan bel mo wan grenadin, wan bel mo wan grenadin, yu mekem olsem raon long kot ya. 35 Mo Eron i mas werem kot ya, blong hem i save mekem minista wok, mo ol bel ya oli mas mekem noes taem Eron i go insaed long tabu ples long fes blong Jehova mo taem i kam aotsaed, olsem nao bambae hem i no ded.+

36 “Bambae yu wokem wan plet we i saen we i saen long gol we i klin gud, mo yu katem ol tok ya long hem olsem we yu katem nem long wan stamp: ‘Jehova i stamba blong olgeta samting we i tabu.’+ 37 Yu mas putum plet ya antap long kaliko we i stap long hed+ blong hae pris mo yu fasem long wan blu rop, mo plet ya i mas stap nomo long fored blong kaliko ya. 38 Plet ya i mas stap long fored blong Eron, mo hem i mas karem blem sipos wan man i mekem sin agensem ol samting we oli tabu,+ we ol man Isrel oli givim olsem ol presen we i tabu. Plet ya i mas stap oltaem long fored blong Eron, blong Jehova i glad long ol man taem oli kam long fes blong hem.

39 “Bambae yu yusum gudfala tred ya linen blong wivim wan longfala klos we i gat ol smosmol skwea long hem, mo yu wokem wan kaliko long linen blong fasem long hed, mo yu wivim wan strap.+

40 “Mo tu, bambae yu wokem ol longfala klos, ol strap we oli wokem long kaliko, mo ol hat blong ol boe blong Eron,+ blong flasem olgeta mo blong ol man oli ona long olgeta.+ 41 Bambae yu mekem brata blong yu Eron mo ol boe blong hem oli werem ol klos ya, mo yu makemaot olgeta long oel,+ mo yu putumap olgeta oli kam pris+ mo yu mekem oli tabu, nao bambae oli wok olsem ol pris blong mi. 42 Bambae yu wokem ol kalsong* blong olgeta long gudfala kaliko ya linen, blong blokem bodi blong olgeta,+ stat long hips blong olgeta i go finis bifo long ni blong olgeta. 43 Eron wetem ol boe blong hem oli mas werem ol klos ya taem oli kam insaed long tent blong miting,* o taem oli kam long olta blong mekem minista wok long holi ples, olsem nao bambae oli no mekem sin mo oli ded. Hemia wan loa we Eron wetem ol pikinini* we bambae oli kamaot biaen long hem oli mas folem oltaem.