Eksodas

6 Ale Jehova i talem long Moses se: “Naoia bambae yu luk samting we bambae mi mekem long Fero.+ Strong han blong mi bambae i fosem hem blong sanemaot yufala, mo strong han blong mi bambae i fosem hem blong ronemaot yufala long kantri ya.”+

2 Biaen God i talem long Moses se: “Mi mi Jehova. 3 Bifo, taem mi stap kamtru long Ebraham, Aesak, mo Jekob, mi soemaot mi se mi God Ya We i Gat Olgeta Paoa,+ be long saed blong nem blong mi Jehova,+ mi mi no mekem olgeta oli savegud mi.+ 4 Mo tu, mi mekem kontrak wetem olgeta se bambae mi givim kantri ya Kenan long olgeta. Hemia kantri ya we oli stap long hem olsem ol man blong narafala kantri.+ 5 Mi mi harem krae blong ol man Isrel, we ol man Ijip oli fosem olgeta blong wok slef, mo mi tingbaot kontrak blong mi.+

6 “Taswe, yu talem long ol laen blong Isrel se: ‘Mi mi Jehova, mo bambae mi sevem yufala, mi mekem we yufala i no moa wok slef blong ol man Ijip.+ Mo bambae mi stretem han* blong mi blong tekembak yufala mo blong mekem bigfala jajmen i kasem olgeta.+ 7 Mo bambae mi mekem yufala i kam man blong mi, mo mi bambae mi God blong yufala,+ nao bambae yufala i save se mi, God blong yufala Jehova, mi nao mi tekemaot yufala long ol man Ijip we oli stap mekem yufala i slef. 8 Mo bambae mi tekem yufala i go long kantri ya we mi bin mekem wan strong promes blong givim long Ebraham, Aesak, mo Jekob. Mo bambae mi givim kantri ya se i blong yufala.+ Mi mi Jehova.’”+

9 Biaen Moses i talemaot mesej ya long ol laen blong Isrel, be oli no wantem lesin long Moses, from we tingting blong olgeta i foldaon mo from strong wok we oli stap mekem.+

10 Ale Jehova i toktok long Moses, i talem se: 11 “Yu go talem long Fero, king blong Ijip, se hem i mas sanemaot ol laen blong Isrel long kantri ya.” 12 Be Moses i talem long Jehova se: “!Yu luk! Ol laen blong Isrel oli no lesin long mi,+ mo mi mi no save toktok gud,+ ?olsem wanem Fero bambae i lesin long mi?” 13 Be Jehova i talem bakegen ol tok we bambae Moses mo Eron, tufala i talemaot long ol laen blong Isrel mo long Fero, king blong Ijip. Hem i mekem olsem blong i save tekemaot ol laen blong Isrel long Ijip.

14 Hemia nem blong ol man we oli hed long haos blong papa blong olgeta. Long ol boe blong Ruben, i gat Hanok, Palu, Hesron, mo Kami.+ Olgeta ya oli ol famle blong Ruben we i fasbon blong Isrel.+

15 Long ol boe blong Simeon, i gat Jemuel, Jamin, Ohad, Jakin, Johar, mo Saol we mama blong hem i blong Kenan.+ Olgeta ya oli ol famle blong Simeon.

16 Hemia nem blong ol boe blong Livae,+ wetem famle we i kamaot biaen long olgeta: Geson, Kohat, mo Merari.+ Livae i laef kasem 137 yia.

17 Long famle blong Geson, i gat Libni mo Simei we tufala i boe blong hem.+

18 Ol boe blong Kohat, i gat Amram, Isa, Hebron, mo Usiel.+ Kohat i laef kasem 133 yia.

19 Ol boe blong Merari, i gat Mali mo Musi.

Hemia nao famle blong ol Livaet wetem olgeta we oli kamaot biaen long olgeta.+

20 Amram i tekem Jokebed we i sista blong papa blong hem, blong i kam waef blong hem.+ Nao Jokebed i bonem Eron mo Moses.+ Amram i laef kasem 137 yia.

21 Ol boe blong Isa, i gat Kora,+ Nefeg, mo Sikri.

22 Ol boe blong Usiel, i gat Misael, Elijafan,+ mo Sitri.

23 Eron i tekem Eliseba blong i kam waef blong hem, nao Eliseba i bonem Nadab, Abihu, Eleasara, mo Itamara.+ Eliseba ya i gel blong Aminadab mo i sista blong Nason.+

24 Ol boe blong Kora, i gat Asiri, Elkana, mo Abiasaf.+ Hemia nao ol famle long laen blong Kora.+

25 Eleasara+ we i boe blong Eron, i tekem wan gel blong Putiel blong i kam waef blong hem. Mo woman ya i bonem Finehas.+

Hemia nao olgeta we oli hed long haos blong papa blong ol Livaet, folem ol famle blong olgeta.+

26 Eron mo Moses ya nao we Jehova i toktok long tufala, i se: “Yutufala i tekemaot ol man Isrel long Ijip, mo oli mas wokbaot long ol grup.”+ 27 Moses mo Eron ya nao+ we i toktok long Fero, king blong Ijip, blong tekemaot ol man Isrel long Ijip.

28 Nao long dei ya, taem Jehova i toktok long Moses long Ijip, 29 Jehova i talem long hem se: “Mi mi Jehova. Yu talemaot long Fero, king blong Ijip, olgeta samting ya we mi talem long yu.” 30 Nao Moses i talem long Jehova se: “!Yu luk! Mi mi no save toktok gud, ?olsem wanem Fero bambae i lesin long mi?”+