Seken Buk Blong Ol King

25 Long namba 9 yia blong rul blong Jedekia, long namba 10 dei blong namba 10 manis, King Nebukadnesa+ blong Babilon i kam wetem olgeta ami blong hem blong faet agensem Jerusalem.+ Ale hem i stanemap kamp blong hem long ples ya, mo i wokem wan wol i goraon long taon ya,+ 2 mo oli blokem taon ya go kasem namba 11 yia blong King Jedekia. 3 Be long namba 9 dei blong namba 4 manis, kakae i sot bigwan+ long taon ya, mo i no moa gat kakae blong ol man long kantri ya.+ 4 Mo oli brekem wan hol long stonwol blong taon ya.+ Nao long naet, nating se ol man Koldia oli raonem taon ya yet, be evri soldia oli pastru long get we i stap bitwin long tu bigfala wol klosap long garen blong king, mo oli ronwe. Mo king i pas long rod blong Araba.+ 5 Be ol ami blong Koldia oli ronem king mo oli kasem hem long draeples blong Jeriko, mo olgeta soldia blong hem oli ronwe long hem. 6 Nao oli holemtaet king+ mo oli tekem hem i go antap long king blong Babilon long Riblaha, mo oli jajem hem long ples ya. 7 Nao oli kilim i ded ol boe blong Jedekia stret long fes blong hem, biaen Nebukadnesa i mekem tufala ae blong Jedekia i kam blaen, i fasem hem long ol jen we oli wokem long kopa, mo i tekem hem i go long Babilon.+

8 Nao long namba 19 yia blong rul blong King Nebukadnesa blong Babilon, long namba 7 dei blong namba 5 manis, Nebusaradan+ we i lida blong ol gad mo i man blong wok blong king, i kam long Jerusalem.+ 9 Hem i bonemdaon haos blong Jehova,+ haos blong king,*+ mo evri haos we i stap long Jerusalem,+ mo i bonemdaon evri haos blong ol impoten man.+ 10 Mo olgeta ami blong Koldia we oli stap wetem lida blong ol gad, oli pulumdaon ol stonwol we oli raonem Jerusalem.+ 11 Mo Nebusaradan we i lida blong ol gad, i tekem ol narafala man we oli stap yet long taon ya, olgeta we oli go joenem king blong Babilon, mo ol narafala man we oli stap, nao i tekem olgeta oli go long Babilon.+ 12 Be lida blong ol gad i lego sam man blong kantri ya we oli pua we oli pua, blong oli wok long ol plantesen blong grep mo blong oli kam ol slef.+ 13 Mo ol samting we oli stap long haos blong Jehova, olsem tufala bigfala pos we oli wokem long kopa,+ ol kat,+ mo kopa Si+ we i stap long haos blong Jehova, ol ami blong Koldia oli brekem olgeta i go long ol smosmol pis mo oli karem ol kopa ya i go long Babilon.+ 14 Mo tu, oli karem ol baket, ol savel, ol sisis blong katem wik, ol kap mo olgeta samting we oli wokem long kopa, we oli stap yusum blong mekem ol wok long tempol. 15 Lida blong ol gad i tekem ol faea holda mo ol bol we oli wokem long gol we i klin gud+ mo long silva.+ 16 Long saed blong kopa we i kamaot long tufala bigfala pos ya, wetem Si, mo ol kat we Solomon i bin wokem blong putum long haos blong Jehova, oli no naf blong skelem olgeta evriwan.+ 17 Tufala bigfala pos ya, hae blong wanwan long tufala hem i 18 kiubit,*+ mo hed blong tufala, hae blong hem i tri kiubit mo oli wokem long kopa.+ Net mo ol grenadin we i raonem hed blong tufala bigfala pos ya, oli wokem long kopa. Tufala bigfala pos ya i sem mak nomo.

18 Lida blong ol gad i tekem Seraea+ tu we i jif pris, Sefanaea+ we i namba 2 pris, mo trifala man we oli gad long doa.+ 19 Mo hem i go long taon nao i tekem wan haeman blong king we i bos blong ol soldia, wetem faef man we oli stap joen oltaem wetem king, wetem sekretari blong lida blong ol ami, hemia man ya we i stap singaot ol man oli kam wanples blong faet. Mo hem i tekem 60 narafala man we oli faenem olgeta tu long taon ya. 20 Nebusaradan+ we i lida blong ol gad, i tekem olgeta i go long king blong Babilon we i stap long Riblaha.+ 21 Nao king blong Babilon i kilim olgeta oli ded long Riblaha we i stap long Hamat.+ Long rod ya, oli tekemaot ol man Juda long kantri blong olgeta, mo oli tekem olgeta i go long wan narafala kantri.+

22 Nao King Nebukadnesa blong Babilon i putumap Gedalia+ we i boe blong Ahikam+ mo i smol bubu blong Safan,+ blong i lukaot long ol man we hem i lego olgeta oli stap yet long Juda.+ 23 Taem olgeta lida blong ol ami wetem ol man blong olgeta, oli harem se king blong Babilon i putumap Gedalia, wantaem nomo oli go luk Gedalia long Mispa. I gat Ismael we i boe blong Netania, Johanan we i boe blong Karea, Seraea we i boe blong Tanumet we i man Netofa, mo Jahasania we i boe blong wan man Mahaka. Olgeta ya oli go wetem ol man blong olgeta.+ 24 Nao Gedalia i mekem wan strong promes long olgeta mo long ol man blong olgeta se: “Yufala i no mas fraet blong kam ol man blong wok blong ol man Koldia. Yufala i stap long kantri ya mo yufala i mekem wok blong king blong Babilon, nao bambae yufala i save stap gud.”+

25 Be long namba 7 manis, Ismael+ we i boe blong Netania mo i smol bubu blong Elisama, we i kamaot long laen blong king,* hem i kam wetem ten narafala man mo oli kilim i ded Gedalia, wetem ol man Jiu mo ol man Koldia we oli stap wetem hem long Mispa.+ 26 Biaen long samting ya, olgeta man, i stat long ol man olbaot i go kasem ol haeman, wetem ol lida blong ol ami, olgeta evriwan oli girap mo oli go long Ijip,+ from we oli fraet long ol man Koldia.+

27 Nao long namba 37 yia we King Jehoeakin+ blong Juda i stap long Babilon, long namba 27 dei blong namba 12 manis, King Evil-merodak blong Babilon i tekemaot King Jehoeakin blong Juda long kalabus, long sem yia ya we hem i kam king.+ 28 Hem i toktok kaen long Jehoeakin, mo i mekem se jea blong king blong hem i hae moa long jea blong ol narafala king we oli stap wetem hem long Babilon. 29 Nao Jehoeakin i tekemaot ol klos blong kalabus we hem i stap werem, mo oltaem hem i stap kakae wetem king. Hem i mekem olsem long ful laef blong hem. 30 Mo long ful laef blong hem, king i stap givim kakae long hem oltaem, yes evri dei.