Fas Buk Blong Kronikel

11 Sam taem afta, olgeta man Isrel oli kam luk Deved long Hebron,+ mo oli talem se: “!Yu luk! Mifala evriwan ya i stret blad blong yu.*+ 2 Fastaem, taem Sol i king, yu nao yu stap lidim ol man Isrel oli go faet.+ Mo Jehova we i God blong yu i bin talem long yu se: ‘Olsem wan man blong lukaot long sipsip, bambae yu lukaot long ol man Isrel we oli ol man blong mi, mo bambae yu kam lida blong ol man blong mi, ol man Isrel.’”+ 3 Ale olgeta elda long Isrel oli kam luk king long Hebron. Mo long fes blong Jehova, Deved i mekem wan kontrak wetem olgeta long Hebron. Biaen oli makemaot Deved blong i kam king blong Isrel,+ folem tok we Jehova i talemaot tru long Samuel.+

4 Biaen Deved wetem olgeta man Isrel oli wokbaot i go long Jerusalem, hemia Jebus,+ ples we ol man Jebus+ oli stap long hem. 5 Be ol man Jebus oli jikim Deved, se: “!Bambae yu neva kam insaed long ples ya!”+ Be Deved i holemtaet strong ples blong haed long Saeon,+ we naoia nem blong hem Taon Blong Deved.+ 6 Ale Deved i talem se: “Man we i faswan blong kilim i ded ol man Jebus, bambae hem i kam lida* mo prins.” Ale Joab+ we i boe blong Jeruia i go antap fastaem, nao hem i kam lida. 7 Biaen Deved i kam stap long strong ples ya. From samting ya, oli singaot ples ya se Taon Blong Deved. 8 Nao Deved i wokem sam moa haos mo stonwol long taon ya, i stat long Smol Hil* i go kasem ol ples raonabaot long hem, mo Joab i wokem gud bakegen narafala haf blong taon ya. 9 Long fasin ya Deved i stap kam strong moa,+ mo Jehova komanda blong ol ami, i stap wetem hem.

10 Hemia ol man we oli hed blong ol strong man blong faet blong Deved. Olgeta ya wetem ful Isrel oli sapotemgud rul blong Deved, blong mekem hem i kam king folem tok we Jehova i bin talem long saed blong Isrel.+ 11 Hemia lis blong ol strong man blong faet blong Deved: I gat Jasobeam+ we i boe blong wan man long laen blong Hakmoni, mo hem i hed long tu narafala man mo trifala oli ol strong man blong faet.+ Hem i leftemap spia blong hem mo i kilim i ded 300 man wantaem nomo.+ 12 Afta long hem, i gat Eleasara+ we i boe blong Dodo long laen blong Ahoha.+ Hem i wan long ol trifala strong man blong faet. 13 Mo hem i bin stap wetem Deved long Pasdamim,+ ples ya we ol man Filistia oli kam wanples long hem blong faet. I gat wan pis graon we i fulap long bale, mo ol man oli bin ronwe from ol man Filistia. 14 Be hem i stanap i stap long medel blong garen ya, i protektem garen ya, mo i gohed blong kilim i ded ol man Filistia. Nao Jehova i mekem we olgeta oli win bigwan.*+

15 Nao long ol 30 man blong faet we oli hed, tri long olgeta oli godaon long bigfala ston, blong luk Deved long hol blong ston long Adulam.+ Long taem ya, ol ami blong Filistia oli mekem kamp blong olgeta long Vali* Long Refaem.+ 16 Deved i stap long wan strong ples blong haed, mo wan grup blong ol soldia blong Filistia i stap long Betlehem. 17 Nao Deved i talemaot samting we hem i wantem tumas, i se: “!Mi wantem tumas blong dring wota we i stap long hol blong wota, klosap long get blong Betlehem!”+ 18 Nao ol trifala man ya oli faet wetem ol man Filistia go kasem long kamp blong olgeta nao oli kasem wota we i stap klosap long get blong Betlehem, mo oli karem i kam long Deved. Be Deved i no wantem dring wota ya mo i kafsaedem long graon blong givim i go long Jehova. 19 Hem i talem se: “!Long lukluk blong God blong mi, i no stret nating blong mi mekem olsem! Mi mi no save dring blad blong ol man ya we oli putum laef* blong olgeta long denja.+ Olgeta oli putum laef* blong olgeta long denja blong karem i kam.” Ale hem i no wantem dring wota ya. Hemia nao samting we ol trifala strong man blong faet blong hem oli mekem.

20 Mo Abisae+ we i brata blong Joab,+ i kam hed long tu narafala man, mo olgeta oli ol strong man blong faet. Hem i leftemap spia blong hem mo i kilim i ded 300 man, mo ol man oli save hem wetem trifala strong man ya blong faet.+ 21 Long olgeta tri, nem blong hem i hae moa long nem blong tufala narawan mo hem i lidim tufala, be hem i no kasem mak blong trifala faswan man ya.

22 Mo Benaea+ we i boe blong Jehoeada i wan man we i no fraet. Hem i mekem plante samting long Kabjehel.+ Hem i kilim i ded tufala boe blong Ariel we i blong Moab, mo wan dei taem i gat sno, hem i go insaed long wan hol blong wota mo i kilim wan laeon i ded.+ 23 Mo tu, hem i kilim i ded wan man Ijip we i bigwan we i bigwan, longfala blong hem i faef kiubit.*+ Man Ijip ya i gat wan spia long han blong hem, spia ya i bigwan olsem timba we man blong wivim kaliko i stap yusum.+ Be Benaea i holem wan wud mo i go faet agensem man ya mo i kilimaot spia ya long han blong hem, mo i kilim man ya i ded wetem spia ya.+ 24 Hemia nao ol samting we Benaea, boe blong Jehoeada i mekem, mo ol man oli save hem wetem ol trifala strong man ya blong faet. 25 Mo Deved i putumap hem blong i lidim ol bodigad blong hem. Be hem i no kasem mak blong ol trifala man ya,+ nating se nem blong hem i hae moa long nem blong ol teti man ya.

26 Ol strong man blong faet we oli joen long ami, i gat Asahel+ we i brata blong Joab, Elanan we i boe blong Dodo blong Betlehem,+ 27 Samot blong Harot, Helej we i wan man Pelonaet, 28 Ira+ we i boe blong Ikes blong Tekoa, Abiesa+ blong Anatot, 29 Sibekae+ blong Husa, Ilae we i wan laen blong Ahoha, 30 Maharae+ blong Netofa, Heled+ we i boe blong Bahanaha blong Netofa, 31 Itae we i boe blong Ribae blong Gibea long laen blong Benjamin,+ Benaea blong Piraton, 32 Hurae blong ol wadi* long Gahas,+ Abiel blong Betaraba, 33 Asmavet blong Bahurim, Eliabaha blong Sahalbim, 34 ol boe blong Hasem we i wan man Gisonaet, Jonatan we i boe blong Sage blong Harara, 35 Ahiam we i boe blong Sakara blong Harara, Elifal we i boe blong Uru, 36 Hefa blong Mekera, Ahaejah we i wan man Pelonaet, 37 Hesro blong Kamel, Naharae we i boe blong Esbae, 38 Joel we i brata blong Natan, Mibara we i boe blong Hagri, 39 Jelek blong Amon, Naharae blong Berot, we i man blong karem ol tul blong faet blong Joab we i boe blong Jeruia, 40 Ira mo Gareb we tufala i man Itraet, 41 Uria+ we i wan laen blong Het, Sabad we i boe blong Ahilae, 42 Adina we i boe blong Sija long laen blong Ruben, hem i wan lida long laen blong Ruben mo 30 man i stap wetem hem, 43 Hanan we i boe blong Mahaka, Josafat we i wan man Mitnaet, 44 Usia blong Astarot, Sama mo Jeiel we tufala i boe blong Hotam blong Aroere, 45 Jediael we i boe blong Jimri, mo brata blong hem Joha we i wan man Tijaet, 46 Eliel we i wan man Mahavaet, Jeribae mo Josavia we tufala i boe blong Elnaham, Itma blong Moab, 47 Eliel, Obed, mo Jajiel blong Joba.