Seken Buk Blong Ol King

24 Long taem blong Jehoeakim, King Nebukadnesa+ blong Babilon i kam faet agensem hem, nao Jehoeakim i kam man blong wok blong hem blong tri yia. Be biaen, Jehoeakim i girap i rebel agensem hem. 2 Nao Jehova i stat blong sanem ol grup blong ol raskol blong Koldia,+ blong Siria, blong Moab, mo blong Amon oli kam agensem Jehoeakim. Hem i gohed blong sanem olgeta oli kam long Juda blong oli spolem Juda, stret olsem tok we Jehova i bin talemaot+ tru long ol profet, we oli ol man blong wok blong hem. 3 I tru, oda blong Jehova nao i mekem se ol samting ya oli hapen long Juda, blong aotem olgeta long fored blong hem,+ from olgeta sin ya we Manase i bin mekem,+ 4 mo from blad blong ol stret man we Manase i mekem i ron.+ Hem i bin mekem Jerusalem i fulap long blad blong ol stret man mo Jehova i no wantem fogivim Juda.+

5 Ol narafala stori blong Jehoeakim, mo olgeta samting we hem i mekem, oli raetemdaon long buk blong histri blong ol king blong Juda.+ 6 Biaen Jehoeakim i go spel wetem ol olfala blong hem,+ mo boe blong hem Jehoeakin i kam king long ples blong hem.

7 King blong Ijip+ i neva sanem ol ami blong hem bakegen oli goaot long kantri blong hem, from we king blong Babilon i tekemaot evri kantri we i blong hem, i stat long Wadi* Long Ijip+ i go antap kasem Yufretes Reva.+

8 Jehoeakin+ i gat 18 yia taem hem i kam king, mo hem i rul tri manis long Jerusalem.+ Mama blong hem, nem blong hem Nehustaha, mo hem i gel blong Elnatan we i blong Jerusalem. 9 Jehoeakin i gohed blong mekem samting we i nogud long ae blong Jehova, stret olsem we papa blong hem i bin mekem. 10 Nao long taem ya, ol man blong wok blong King Nebukadnesa blong Babilon oli kam raonem Jerusalem blong faet agensem taon ya.+ 11 Mo taem oli stap hivap raon long taon ya yet, King Nebukadnesa blong Babilon i kamtru long taon ya.

12 Nao King Jehoeakin blong Juda wetem mama blong hem, ol man blong wok blong hem, ol prins blong hem, mo ol haeman blong hem,+ oli go aotsaed blong mitim king blong Babilon,+ nao king ya i holemtaet Jehoeakin. Hemia long namba 8 yia blong rul blong king blong Babilon.+ 13 Biaen hem i tekemaot olgeta sas samting we oli stap long haos blong Jehova, mo long haos* blong king.+ Mo olgeta samting long gol we Solomon, king blong Isrel i bin wokem blong oli yusum long tempol blong Jehova,+ king blong Babilon i katkatem i go long smosmol pis. Samting ya i hapen stret olsem we Jehova i bin talemaot. 14 Hem i tekemaot evri man Jerusalem, evri prins,+ evri strong man blong faet, evri man we oli gat gudhan blong wokem samting, mo evri man blong wokem samting long aean,*+ olgeta evriwan oli 10,000. I no gat wan narafala i stap, olgeta ya nomo we oli pua we oli pua, oli stap.+ 15 Nao long fasin ya, hem i tekemaot Jehoeakin+ i go long Babilon.+ Hem i tekemaot mama blong king tu, wetem ol waef blong king, ol haeman blong king, mo ol impoten man blong taon, i tekemaot olgeta long Jerusalem mo i tekem olgeta i go long Babilon. 16 Mo tu, king blong Babilon i tekemaot evri strong man blong faet, hemia 7,000 man evriwan, wetem 1,000 man we oli gat gudhan blong wokem ol defdefren samting mo blong wokem ol samting long aean,* mo i tekem olgeta oli go long Babilon. Olgeta evriwan ya oli ol strong man blong faet mo oli trengud blong faet long wo. 17 Nao king blong Babilon i putumap Matania blong i kam king long ples blong Jehoeakin, mo i jenisim nem blong hem i kam Jedekia.+ Matania ya i brata blong papa blong Jehoeakin.+

18 Jedekia i gat 21 yia taem hem i kam king, mo hem i rul 11 yia long Jerusalem. Mama blong hem, nem blong hem Hamutal+ mo hem i gel blong Jeremaea blong Libnaha. 19 Jedekia i gohed blong mekem samting we i nogud long ae blong Jehova, stret olsem we Jehoeakim i bin mekem.+ 20 Jehova i kros tumas, taswe hem i mekem ol samting ya oli hapen long Jerusalem mo Juda, go kasem we hem i aotem olgeta long fored blong hem.+ Mo Jedekia i rebel agensem king blong Babilon.+