Josua

3 Nao long eli moning Josua wetem ol laen blong Isrel* oli girap, oli aot long Sitim,+ oli kam stap klosap long Jodan Reva. Long naet oli slip long ples ya bifo we oli gokros long narasaed.

2 Oli stap tri dei, ale ol ofisa+ blong olgeta oli go pas long olgeta tent long kamp, 3 oli talem long olgeta se: “Taem yufala i luk ol pris long laen blong Livae,+ oli karem bokis blong kontrak blong Jehova God blong yufala, yufala i mas aot long ol ples blong yufala, yufala i folem. 4 Be yufala i mas wokbaot samwe 2,000 kiubit* longwe long bokis ya, yufala i no kam klosap long hem. Olsem ya, bambae yufala i save stret rod blong folem, from we yufala i neva pas long ples ya bifo.”

5 Ale Josua i talem long ol man se: “Yufala i mas mekem yufala i tabu,+ from we tumoro Jehova bambae i soemaot paoa blong hem long medel blong yufala.”+

6 Biaen Josua i talem long ol pris ya se: “Yufala i tekem bokis+ blong kontrak, yufala i go fastaem long ol man.” Ale, oli tekem bokis ya, oli go fastaem long ol man.

7 Nao Jehova i talem long Josua se: “Tede bambae mi stat blong leftemap yu long fes blong ol man Isrel,+ blong mekem olgeta oli save se mi bambae mi stap wetem yu+ olsem we mi stap wetem Moses bifo.+ 8 Yu mas talem long ol pris we oli karem bokis blong kontrak se: ‘Taem yufala i kasem Jodan Reva, yufala i go long saed blong wota ya, yufala i mas stanap i stap long Jodan Reva.’”+

9 Ale Josua i talem long ol laen blong Isrel se: “Yufala i kam, yufala i lesin long tok blong Jehova we i God blong yufala.” 10 Mo hem i gohed i se: “Samting we bambae i hapen naoia, bambae i mekem yufala i save se God we i laef, i stap long medel blong yufala,+ mo long fes blong yufala bambae hem i mas ronemaot laen blong Kenan, laen blong Het, ol man Hivi, ol man Perij, ol man Gigas, ol man Amoro, mo ol man Jebus.+ 11 !Yufala i luk! Bokis blong kontrak blong Masta blong fulwol, i go fastaem finis long yufala, i kasem Jodan Reva. 12 Naoia yufala i jusum 12 man long ol traeb blong Isrel, we wanwan long olgeta i kamaot long wanwan traeb,+ 13 mo taem leg blong ol pris we oli karem Bokis blong Jehova we i Masta blong fulwol, i tajem wota blong Jodan Reva, semtaem nomo bambae reva ya i no moa ron. Wota we i stap ron i kam, bambae i hivap wanples olsem wan stonwol.”+

14 Nao taem ol man ya oli aot long ples we oli stap long hem blong gokros long Jodan Reva, ol pris oli karem bokis+ blong kontrak, oli go fastaem long olgeta. 15 (Hemia long ol dei blong havest, we oltaem Jodan Reva i ron bigwan.+) Nao taem ol pris oli karem Bokis ya oli kasem Jodan Reva mo oli draonem leg blong olgeta long reva ya, 16 reva ya i no moa ron. Nao wota we i ron i kamdaon, i hivap longwe olsem wan stonwol, long taon ya Adam, klosap long Jaretan. Mo wota we i godaon, i ronaot i go long Solwota Blong Araba, hemia Sol Si.* Reva ya i no moa ron, nao olgeta man oli gokros, oli kasem narasaed long Jeriko. 17 Ol pris we oli karem bokis blong kontrak blong Jehova, oli stanap long drae graon nomo,+ long medel blong Jodan Reva gogo kasem we olgeta man Isrel oli wokbaot long drae graon nomo+ blong krosem Jodan Reva.