Fas Samuel

25 Biaen Samuel+ i ded, mo evri man Isrel oli kam wanples blong soem sore from hem, mo blong berem hem long haos blong hem long Rama.+ Nao Deved i girap mo i godaon long draeples long Paran.

2 Nao i gat wan man Maon+ we i stap wok long ples ya Kamel,*+ mo hem i stap katemaot hea blong ol sipsip blong hem. Man ya i rij we i rij, hem i gat 3,000 sipsip mo 1,000 nani. 3 Nem blong man ya Nabal,+ mo waef blong hem, Abigel.+ Abigel i gat hed mo i naes we i naes, be hasban blong hem we i wan laen blong Keleb,+ hem i wan had man mo fasin blong hem i nogud.+ 4 Deved i stap long draeples mo i harem se Nabal i stap katem hea blong ol sipsip blong hem. 5 Ale Deved i sanem ten yang man blong oli go luk Nabal, mo i se: “Yufala i go antap long ples ya Kamel, mo taem yufala i luk Nabal, yufala i askem hem long nem blong mi se hem i oraet o nogat. 6 Biaen yufala i talem se: ‘Pis i stap wetem yu, mo wetem ol famle blong yu, mo long olgeta samting we yu gat. 7 Mi harem se naoia yu stap katem hea blong ol sipsip blong yu. Taem ol man blong lukaot sipsip blong yu oli stap wetem mifala, mifala i no spolem olgeta,+ mo i no gat wan samting blong olgeta i lus taem oli stap long Kamel. 8 Yu askem ol man blong yu, nao bambae oli talem long yu. Prea blong mi se bambae yu glad long ol yang man blong mi, we oli ol man blong wok blong yu, from we mifala i kam long wan taem blong glad.* Plis yu givim eni samting we yu gat, long olgeta mo long boe blong yu Deved.’”+

9 Ale ol yang man blong Deved oli go mo oli talemaot ol tok ya long Nabal long nem blong Deved. Taem oli finis, 10 Nabal i talem long olgeta se: “?Hu ya Deved mo hu ya boe blong Jese? Tede plante wokman oli ronwe long ol masta blong olgeta.+ 11 Mi mi no save se yufala i kam wea. ?Yufala i ting se bambae mi givim bred, mo wota, mo mit we mi rerem blong ol man blong mi we oli stap katemaot hea blong sipsip?”

12 Nao ol yang man blong Deved oli gobak mo oli talemaot ol tok ya long hem. 13 Wantaem nomo, Deved i talem long ol man blong hem se: “!Yufala evriwan i hangem naef blong faet blong yufala!”+ Ale oli hangem naef blong faet blong olgeta, mo Deved tu i hangem naef blong faet blong hem. I gat samwe long 400 man oli go antap wetem Deved, mo i gat 200 man oli stap blong lukaot long olting blong olgeta.

14 Long taem ya, wan man blong wok i talem long Abigel we i waef blong Nabal, i se: “!Yu luk! Deved i sanem sam man we oli kam long draeples, blong talem ol gudfala tok long masta blong yumi, be hem i singaot strong mo i sakem ol rabis tok long olgeta.+ 15 Ol man ya oli mekem i gud long mifala. Oli neva spolem mifala, mo mifala i no lusum wan samting taem mifala i stap wetem olgeta long ol hil.+ 16 Long olgeta taem we mifala i stap wetem olgeta blong lukaot long ol sipsip, olgeta oli protektem mifala long dei mo long naet olsem wan stonwol. 17 Naoia yu mas mekem wan samting, from we bigfala trabol bambae i kam agensem masta blong yumi mo olgeta man long haos blong hem.+ Hem i wan man we i gud blong nating nomo,+ mo hem i no save lesin long wan man.”

18 Ale kwiktaem nomo, Abigel+ i tekem 200 bred, tu bigfala jag blong waen, faef sipsip we i rere blong man i kukum, faef sia* blong sid we oli rusum, 100 kek blong grep we oli draemap, wetem 200 kek blong fig we oli draemap, mo i putum olgeta i go long ol dongki.+ 19 Nao hem i talem long ol man blong wok blong hem se: “Yufala i go fastaem long mi, bambae mi folem yufala.” Be hem i no talemaot wan samting long hasban blong hem Nabal.

20 Taem hem i stap ron long dongki blong hem i kamdaon, hem i no luk Deved olgeta from we bigfala hil i blokem hem, be biaen oli kamdaon stret long hem, nao hem i mitim olgeta. 21 Deved i bin talem se: “I blong nating nomo we mi lukaot long olting blong man ya long draeples. I no gat wan samting blong hem i lus,+ be hem i pembak mi wetem samting we i nogud.+ 22 Prea blong mi se God bambae i panisimgud ol enemi blong Deved,* sipos long moning mi letem wan man* blong Nabal i laef i stap.”

23 Taem Abigel i luk Deved, kwiktaem nomo hem i jamdaon long dongki mo i foldaon long fored blong Deved we fes blong hem i godaon long graon, mo i bodaon long hem. 24 Biaen hem i foldaon long leg blong Deved mo i se: “Masta blong mi, plis yu blemem mi from samting ya. Mi mi gel blong wok blong yu, plis yu letem mi mi toktok long yu, mo yu lesin long ol tok we bambae mi talem. 25 Plis, masta blong mi i no mas tingbaot Nabal+ ya we i gud blong nating nomo, from we hem i sem mak long nem blong hem. Nem blong hem Nabal,* mo hem i no gat hed. Be mi, gel blong wok blong yu, mi no bin luk ol yang man we yu sanem olgeta oli kam. 26 Mo naoia, masta blong mi, mi mi talem long yu long nem blong Jehova we i laef i stap, mo long nem blong yu* we yu laef i stap, se Jehova nao i blokem yu+ blong yu no givimbak mo blong yu no mekem blad blong man i ron.+ Masta blong mi, i gud ol enemi blong yu mo olgeta we oli wantem spolem yu, oli kam olsem Nabal. 27 Masta blong mi, naoia i gud yu tekem presen ya*+ we gel blong wok blong yu i karem i kam, mo yu givim long ol yang man ya we oli folem yu.+ 28 Mi mi gel blong wok blong yu, plis yu fogivim rong blong mi. Jehova bambae i mekem haos blong masta blong mi i stap longtaem,*+ from we masta blong mi i stap faet long ol faet blong Jehova,+ mo yu yu no mekem wan nogud samting long laef blong yu.+ 29 Sipos wan man i ronem yu mo i wantem kilim yu yu* ded, bambae God blong yu Jehova, i protektem yu* olsem wan man we i putum ol sas samting blong hem long wan bag, blong i protektem. Be ol enemi blong yu, hem bambae i slingim olgeta* oli go olsem we man i slingim ston long sling blong hem. 30 Masta blong mi, taem Jehova i givim ol gudfala samting long yu, olsem we hem i promes blong mekem, mo i putumap yu olsem lida blong ol man Isrel,+ 31 bambae yu no rigret* long hat blong yu from we yu no bin givimbak mo mekem blad blong wan stret man i ron.+ Taem Jehova i givim ol gudfala samting long yu, i gud we yu tingbaot gel blong wok blong yu.”

32 Nao Deved i talem long Abigel se: “!Mi mi presem Jehova we i God blong Isrel, we hem nao i sanem yu yu kam tede blong mitim mi! 33 !Prea blong mi se God i blesem yu from gudfala tingting blong yu! I gud God i blesem yu from we tede yu blokem mi blong mi no givimbak mo mekem blad i ron.+ 34 Long nem blong Jehova, God blong ol man Isrel we i laef i stap, mo we i blokem mi blong mi no spolem yu,+ mi mi talem long yu se sipos yu no bin kam kwik blong mitim mi,+ long moning bambae i no gat wan man* blong Nabal i laef i stap.”+ 35 Nao Deved i akseptem ol samting ya we Abigel i tekem i kam, mo i talem long hem se: “Yu gobak long haos blong yu mo yu no wari. Yu luk, mi mi lesin long yu, mo bambae mi mekem samting we yu askem.”

36 Biaen Abigel i gobak long Nabal. Long taem ya, Nabal i mekem wan lafet long haos blong hem, we i olsem lafet blong wan king. Mo Nabal i harem gud mo i drong we i drong. Nao Abigel i no talem eni samting long hem gogo kasem long moning. 37 Long moning, taem Nabal i no moa drong, waef blong hem i tokbaot ol samting ya long hem. Nao hat blong hem i kam olsem hat blong wan dedman, nao hem i ledaon we i no moa muv olsem wan ston. 38 Samwe long ten dei afta, Jehova i kilim Nabal i ded.

39 Taem Deved i harem we Nabal i ded, hem i talem se: “Mi mi presem Jehova. Hem i difendem mi+ afta we Nabal i tok nogud long mi,+ mo hem i blokem mi blong mi no mekem wan samting we i nogud.+ !Mo Jehova i mekem nogud fasin blong Nabal i kakae hem bakegen!” Biaen Deved i sanem tok i go long Abigel blong askem hem blong i kam waef blong hem. 40 Ale ol man blong wok blong Deved oli kam luk Abigel long Kamel, mo oli talem long hem se: “Deved i sanem mifala blong kam tekem yu, blong yu kam waef blong hem.” 41 Wantaem nomo Abigel i girap mo i bodaon we fes blong hem i go long graon mo i talem se: “Slef blong yu hemia, mo hem i rere blong wasem leg+ blong ol man blong wok blong masta blong hem.” 42 Nao kwiktaem nomo Abigel+ i girap mo i klaem long dongki blong hem mo i go, mo faef gel blong wok blong hem oli wokbaot biaen long hem. Hem i folem ol man we Deved i sanem olgeta mo i kam waef blong Deved.

43 Deved i maredem Ahinoam+ finis we i blong Jisrehel,+ mo tufala woman ya i kam waef blong hem.+

44 Be Sol i givim gel blong hem Mikal,+ we i waef blong Deved, long Palti+ we i boe blong Laes, wan man Galim.