Seken Samuel

11 Nao long stat blong yia,* long taem we ol king oli stap go mekem faet, Deved i sanem Joab, ol man blong wok blong hem, mo ful ami blong Isrel blong oli go spolemgud ol man Amon, ale olgeta oli go hivap raon long Raba,+ mo long taem ya, Deved i stap nomo long Jerusalem.+

2 Nao long wan sapa,* Deved i kamaot long bed blong hem mo i stap wokbaot antap long ruf blong haos* blong hem. Taem hem i stap long ples ya, hem i luk wan woman i stap swim, mo woman ya i naes tumas. 3 Ale Deved i sanem wan man i go blong faenemaot se woman ya i hu, mo man ya i givim ripot se: “Hemia Batseba+ we i gel blong Eliam,+ mo hem i waef blong Uria+ we i wan laen blong Het.”+ 4 Biaen Deved i sanem sam man blong oli go tekem woman ya i kam long hem.+ Ale woman ya i kam luk hem, mo Deved i slip wetem hem.+ Samting ya i hapen taem woman ya i stap mekem hem i kam klin bakegen long fes blong God.*+ Biaen hem i gobak long haos blong hem.

5 Nao woman ya i gat bel, mo i sanem tok i go long Deved se: “Mi mi gat bel.” 6 Ale Deved i sanem mesej i go long Joab se: “Yu sanem Uria we i laen blong Het, i kam luk mi.” Nao Joab i sanem Uria i go long Deved. 7 Taem Uria i kamtru, Deved i askem long hem se faet i olsem wanem mo sipos Joab mo ol soldia oli oraet. 8 Biaen Deved i talem long Uria se: “Yu godaon long haos blong yu mo yu spel.”* Taem Uria i aot long haos blong king, king i sanem wan presen* long hem. 9 Be Uria i no go slip long haos blong hem, hem i slip wetem ol man blong wok blong Deved long fored blong haos blong king. 10 Ale oli talem long Deved se: “Uria i no godaon long haos blong hem.” Nao Deved i talem long Uria se: “Yu yu aot longtaem mo yu jes kambak, ?from wanem yu no wantem godaon long haos blong yu?” 11 Nao Uria i talem long Deved se: “Bokis+ blong God, ol man Isrel, mo ol man Juda, olgeta evriwan oli stap long tent, mo masta blong mi Joab wetem ol man blong wok blong masta blong mi, oli stap long open ples nomo. Taswe, ?olsem wanem mi save go long haos blong mi blong kakae mo dring, mo slip wetem waef blong mi?+ !Mi mi talem long yu long nem blong yu we yu laef i stap, se bambae mi no mekem samting ya!”

12 Nao Deved i talem long Uria se: “Yu stap long ples ya tede, mo tumoro bambae mi sanem yu yu go.” Ale Uria i stap long Jerusalem long dei ya mo long nekis dei. 13 Biaen Deved i singaot hem blong i kam kakae mo dring wetem hem, mo hem i mekem Uria i drong. Be long naet, hem i go slip bakegen wetem ol man blong wok blong Deved, hem i no godaon long haos blong hem. 14 Long moning, Deved i raetem wan leta i go long Joab mo i putum long han blong Uria blong i karem i go. 15 Hem i raetem long leta ya se: “Yu putum Uria long fored, long ples we faet i strong. Biaen yufala i muvaot long hem, blong ol enemi oli kilim hem i ded.”+

16 Joab i bin wajemgud taon ya, ale hem i putum Uria long ples we hem i save se i gat ol strong man blong faet long hem. 17 Taem ol man long taon ya oli kamaot mo oli faet agensem Joab olgeta, sam man blong wok blong Deved oli ded, mo Uria we i laen blong Het, hem tu i ded.+ 18 Nao Joab i sanem ripot blong faet i go long Deved. 19 Mo hem i talem long mesenja we i karem ripot ya i go, se: “Taem yu talemaot nius blong faet ya long king finis, 20 maet king bambae i kros mo i talem long yu se: ‘?From wanem yufala i go klosap tumas long taon ya blong faet? ?Yufala i no save se olgeta bambae oli stap antap long stonwol mo oli sutum yufala? 21 ?Hu i kilim i ded Abimelek+ we i boe blong Jerubeset?+ Hemia wan woman we i stap antap long stonwol mo i sakem ston blong granem wit long hem, nao hem i ded long Tebej. ?From wanem yufala i go klosap tumas long stonwol?’ Bambae yu talem long hem se: ‘Man blong wok blong yu Uria we i laen blong Het, hem tu i ded.’”

22 Ale mesenja ya i go mo i talemaot evri samting long Deved, olsem we Joab i bin talem long hem. 23 Nao man ya i talem long Deved se: “Ol soldia blong olgeta oli strong bitim mifala, mo oli kam faet agensem mifala long open ples, be mifala i pusum bak olgeta i go kasem get blong taon blong olgeta. 24 Mo ol man we oli sut long bonara oli stap antap long stonwol mo oli sutum ol man blong wok blong yu, mo sam man blong wok blong king oli ded. Man blong wok blong yu Uria we i laen blong Het, hem tu i ded.”+ 25 Nao Deved i talem long mesenja ya se: “Yu go leftemap tingting blong Joab, mo yu talem tok ya long hem, se: ‘Yu no letem samting ya i mekem yu harem nogud, from we naef blong faet i save kilim eni man i ded. Yufala i mas faet strong moa agensem taon ya mo winim hem.’”+

26 Taem waef blong Uria i harem se hasban blong hem Uria i ded, hem i sore from hasban blong hem. 27 Nao taem ol dei blong sore i finis, Deved i sanem sam man oli go tekem hem i kam long haos blong hem, ale hem i kam waef blong Deved+ mo i bonem wan boe blong hem. Be Jehova i no glad nating long samting we Deved i mekem.+